Ikara Olindiriire Yahwe Oine Okusemererwa
OINE ekihika eky’okurora Yahwe namaraho ebintu ebibi byona kandi akafoora byona ebihyaka? (Kus. 21:1-5) Hataroho kugurukyagurukya okiine! Baitu tikyanguhire kwikara tulindiriire Yahwe, kukira muno obutuba nituraba omu bizibu. Obutuba nitunihira ekintu ekirungi, kikakerererwa kubaho, nitusobora kuhwamu amaani.—Nfu. 13:12.
Baitu nabwo, Yahwe n’agonza tumulindirre n’okugumiisiriza kuhikya obwaragira ekiyakoraho. Kiki ekyarukugonza tukole? Kiki ekiratukonyera kulindirra Yahwe twine okusemererwa?
KIKI YAHWE EKYARUKUGONZA TUKOLE?
Baibuli egamba ngu: “[Yahwe] alirindira, abagirre embabazi, kandi nikyo alinyumizibwa abaganyire: baitu [Yahwe] nuwe Ruhanga wobulyo; banyina omugisa bona abamutegereza.” (Is. 30:18) Ebigambo binu bikaba nibikwataho Abayudaaya abakaba bali bajeemu. (Is. 30:1) Baitu Abayudaaya abamu bakaba bali besigwa hali Yahwe, kandi ebigambo binu bikabaha okunihira. N’omu kasumi kanu, ebigambo binu nibiha abaheereza ba Yahwe abesigwa okunihira.
Nahabweki, twine kulindirra n’okugumiisiriza habwokuba Yahwe nauwe alindiriire. Ataireho akasumi obwalimaraho obusinge bunu, kandi alindiriire ekiro n’esaaha kuhika. (Mat. 24:36) Akasumi ako obukalihika, nikiija kuba kyeyolekiire kimu ngu byona Sitaani ebyarukujunaana Yahwe n’abaheereza be bisuba. Alihwerekereza Sitaani n’abarukumusagika, baitu itwe ‘alitugirra embabazi.’
Kasumi kanu, Yahwe n’asobora kutamaraho ebizibu byaitu, baitu naturaganiza ngu nitusobora kwikara twine okusemererwa obu tumulindiriire. Nk’oku Isaya yahandiikire, nitusobora kwikara tusemeriirwe obuturukuba nitunihira kutunga ekintu ekirungi. (Is. 30:18)a Nitusobora tuta kutunga okusemererwa oku? Leka tubazeeho ebintu bbina ebisobora kutukonyera.
OMULINGO TUSOBORA KULINDIRRA TWINE OKUSEMERERWA
Teeka omutima ha birungi. Omukama Daudi akaba arozere ebintu ebibi bingi nibibaho. (Zab. 37:35) Baitu akagamba ati: “Culerra [Yahwe], omutegereze noguma: otabihirwabihirwa habwogu anyakubona omubiri omu muhandagwe, habwomuntu anyakuhikiriza ebyamagezi agabihire.” (Zab. 37:7) Daudi akateeka omu nkora obuhabuzi bunu kuraba omu kuteeka omutima ha murago gwa Yahwe ogw’okumujuna. Ekindi, akateeka omutima ha migisa Yahwe akaba namuha. (Zab. 40:5) Obuturaikara tutaire omutima ha birungi hatali ebintu ebibi ebirukubaho, nikiija kutukonyera kwikara tusemeriirwe obu tulindiriire.
Ikara nokugiza Yahwe. Omuhandiiki wa Zabuli 71, ow’asobora kuba ni Daudi, akagambira Yahwe ati: “Ndanihiraga obutosa, ndagarukiraga okukukugiza.” (Zab. 71:14) Yakukugiize ata Yahwe? Akagambira abandi ebirukukwata hali Yahwe kandi yamuziniraga n’ebizina eby’okumukugiza. (Zab. 71:16, 23) Nka Daudi, naitwe nitusobora kwikara tusemeriirwe obu tulindiriire Yahwe kugira ekiyakoraho. Tumukugiza kuraba omu kutebeza, kumubazaaho obutuba tuli n’ab’oruganda na banyaanya itwe, n’obutuzina ebizina byaitu. Nahabweki, obworaabaga nozina ebizina byaitu, tekerezaaho amakuru g’ebigambo n’omulingo birukukuleetera kusemererwa.
Ikiriza ab’oruganda na banyaanya itwe bakugarremu amaani. Daudi obwakaba naraba omu mitalibaine nyingi akagambira Yahwe ati: “Ndategerezaga ibara lyawe, baitu lirungi, omu maiso gabarukwera bawe.” (Zab. 52:9) Oihireho kutebeza hamu n’ab’oruganda na banyaanya itwe hamu n’okuba omu nsorrokano, nitusobora kugarurwamu amaani kakuba tuba nabo obubaba besoroliize omu biikaro ebindi kusemererwa.—Bar. 1:11, 12.
Gumya okunihira kwawe. Omu Zabuli 62:5 nihagamba ngu: “Iwe obwomezi bwange, oculerre Ruhanga wenka; baitu nuwe ndukutegereza.” Kikuru muno kuba nokunihira okugumire kukira muno obutwehurra ngu empero ikaireho kwija nk’oku twali nitunihira. Tusemeriire kukigumiza kimu ngu emirago ya Yahwe niija kuhikirra, n’obuturamara kasumi ki tulindiriire. Tugumya okunihira kwaitu obutwesomesa Ekigambo kya Ruhanga. Ekyokurorraho, wecumiitirizeeho obunabbi bwa Baibuli obumazire kuhikirra, omulingo ebitabu bya Baibuli bitarukuhakanizangana n’obukiraaba ngu bikahandiikwa abantu abarukwahukana, n’omulingo Yahwe atugambira ebirukumukwataho. (Zab. 1:2, 3) Ekindi, tusemeriire kugumizaamu nitusaba Yahwe kutuha “omwoyo ogurukwera” gutukonyere kwikara twine enkoragana enungi nauwe, obu tumulindiriire kuhikiiriza omurago gwe ogw’okutuha obwomeezi obutahwaho.—Yud. 20, 21.
Kusisanaho n’Omukama Daudi, kigumye ngu eriiso lya Yahwe liikara hali abo abarukumulindirra kandi abooleka okugonza okutalekera. (Zab. 33:18, 22) Ikara olindiriire Yahwe kuraba omu kuteeka omutima ha birungi ebyorukutunga omu bwomeezi, kuraba omu kumukugiza, kwikiriza ab’oruganda na banyaanya itwe bakugarremu amaani, n’okwikaza okunihira kwawe kugumire.
a Ekigambo ekihindurwa nka “okutegereza” nikisobora kumanyisa “kulindirra ekintu n’ekihika rundi kunihira ngu ekintu ekirungi nikiija kubaho.” Nahabweki, tikiri kibi kugonza muno kurora Yahwe namaraho okubonabona.