EKICWEKA KY’OKWEGA 30
EKIZINA 36 Tulinda Emitima Yaitu
Amasomo Amakuru Agaturukwegera Hali Abakama ba Isaleri
“Nubwo muligaruka mulibaganizamu abahikiriire nababi, ogu arukukorra Ruhanga, nogu atarukumukorra.”—MARA. 3:18.
EBI TURAYEGA
Kumanya omulingo Yahwe yaroramuga abakama ba Isaleri nikiija kutukonyera kumanya ekitusemeriire kukora kusobora kusemeza Yahwe kasumi kanu.
1-2. Bintu ki ebimu Baibuli eby’etwoleka hali abakama abamu aba Isaleri?
BAIBULI ebazaaho abasaija abarukuhingura omu 40 abaalemere nk’abakama ba Isaleri.a Tesereka ebintu bamu hali bo ebi baakozere. Ekyokurorraho n’abakama abarungi bakakora ebintu ebimu ebibi. Tekerezaaho Omukama omurungi Daudi. Yahwe akamubazaaho ati: “Omuiru wange Daudi . . . yankuratira nomutimagwe gwona, okukora eki kyonka ekikaba kiri ekirungi omu maiso gange.” (1 Bakam. 14:8) Baitu, omusaija ogu akasiihana n’omukazi w’abandi kandi hanyuma yakora entekaniza ey’okwita iba omu bulemu.—2 Sam. 11:4, 14, 15.
2 Harubaju orundi, baingi abakaba bali bakama abatali besigwa bakakora ebintu ebimu ebirungi. Tekerezaaho Rehoboamu, omu maiso ga Yahwe “akakora ekibi.” (2 Byom. 12:14) Baitu, haroho ebintu ebimu ebirungi Rehoboamu ebi yakozere. Ekyokurorraho, akorobera ekiragiro kya Yahwe eky’okuleka enganda ikumi kwecwaho Obukama bwe. Ekindi akakonyera embuga nyingi omu Bukama bwe kuguma, ekintu ekyakonyiire kulinda abantu ba Ruhanga hali abanyanzigwa baabo .—1 Bakam. 12:21-24; 2 Byom. 11:5-12.
3. Kikaguzo ki ekikuru ekiturukwekaguza, kandi biki ebi turukwija kubazaaho omu kicweka kinu?
3 Kirungi kumanya eky’okugarukamu eky’ekikaguzo kinu. Abakama ba Isaleri obu baraaba baakozere ebintu ebirungi hamu n’ebibi, kiki Yahwe ekiyasigikirrahoga kumanya omukama obwaraaba ali mwesigwa omu maiso ge rundi nangwa? Eky’okugarukamu eky’ekikaguzo kinu nikiija kutukonyera kumanya eki tusemeriire kukora kusobora kusemeza Yahwe. Nitwija kubazaaho ensonga isatu, Yahwe ezi yasigikirrahoga kumanya omukama obwaraaba ali murungi rundi mubi: okugonza okubainiire Yahwe, okwegarukamu kwabo, hamu n’omulingo baramyamuga Yahwe.
BAAGONZAGA YAHWE N’OMUTIMA GWABO GWONA
4. Mbaganiza ki eyekaba eri hagati y’Abakama abesigwa n’abakama abakaba batali besigwa?
4 Abakama abaasemiize Yahwe baamuramyaga n’omutima gwabo gwona.b Omukama omurungi Yehosafati “[akaserra Yahwe] nomutimagwe gwona.” (2 Byom. 22:9) Baibuli ebazaaho Yosiya eti: “Busaho mukama okumusisana ayamubandize ayahindukiire [Yahwe] nomutimagwe gwona.” (2 Bakam. 23:25) Kandi Sulemani ayakozere ebibi omu myaka ye ey’obukuru? ‘Omutima gwe gukaba gutahikiriire.’ (1 Bakam. 11:4) Kandi obu kirukuhika hali Abiyamu, omukama ondi ow’akaba atali mwesigwa, Baibuli emubazaaho eti: “Omutimagwe gutahikiire ahali Yahwe.”—1 Bakam. 15:3.
5. Nikimanyisa ki kuheereza Yahwe n’omutima gwawe gwona?
5 Hati nikimanyisa ki kuheereza Yahwe n’omutima gwawe gwona? Omuntu ow’agonza Yahwe n’omutima gwe gwona, tagarukira ha kuramya Ruhanga ngu habw’okuba nikyo asemeriire kukora. Oihireho aheereza Yahwe habw’okuba amugonza muno kandi amutamu ekitiinisa. Ekindi, aikara namugonza muno kandi namuteekamu ekitiinisa obwomeezi bwe bwona.
6. Nitusobora tuta kwikara nitugonza Yahwe n’omutima gwaitu gwona? (Enfumo 4:23; Matayo 5:29, 30)
6 Nitusobora tuta kwegera hali abakama abesigwa kandi tukaikara nituheereza Yahwe n’omutima gwaitu gwona? Kuraba omu kwetantara ebintu ebibi. Ekyokurorraho, ebyokwesemeza ebibi nibisobora kubaganizaamu omutima gwaitu. Abanywani ababi hamu n’okutekerezaaho muno itungo nabyo nibisobora kubaganizaamu omutima gwaitu. Kakuba tukizoora ngu haroho ekintu ekitandikire kucekya okugonza kwaitu hali Yahwe, twine kugira ekitwakoraho omu bwangu.—Soma Enfumo 4:23; Matayo 5:29, 30.
7. Habwaki kikuru kwetantara ebintu ebibi?
7 Titusemeriire kuleka omutima gwaitu gukabaganizibwamu. Kakuba tutegendereza, nitusobora kwebiihabiiha ngu kakuba twejumbira muno omu bintu eby’omwoyo, nituba tutasobora kutwalirizibwa ebintu ebibi. Ekyokurorraho, teramu akasisani oli aheeru omu bufuki obw’amaani. Hanyuma obw’ohika omu ka ohemba omurro. Baitu kiki ekisobora kubaho kakuba oleka orwigi rukingwirwe? Embeho kuruga eheeru nesobora kwijura omu nju yaawe. Isomo ki eri turukwega? Titusemeriire kugarukira ha kweriisa omu by’omwoyo ebitagasa enkoragana yaitu na Yahwe. Tusemeriire n’okukinga orwigi hali ebintu ebibi, nukwo orwoya orw’ensi enu orurukufuka, rundi engeso ezitali z’obwa Ruhanga zitatataaha omu mutima gwaitu kandi zikagubaganizaamu.—Bef. 2:2.
BAKEGARUKAMU EBIBI BYABO
8-9. Omukama Daudi n’Omukama Hezekiya baketwaza bata obu bahanirwe? (Roraekya ha kyesweko.)
8 Nk’oku tusangirwe turozere, Omukama Daudi akakora ensobi ey’amaani. Baitu nabbi Nasaneri obuyamugambiire ha kibi eky’akaba akozere, n’obwebundaazi Daudi akegarukamu. (2 Sam. 12:13) Kuraba omu bigambo bye ebirukusangwa omu Zabuli 51, nitukirorra kumu ngu Daudi akaba ayegarukiremu kwo. Daudi atefoole ngu akaba asaliirirwe habw’ensobi ey’akaba akozere nukwo abihabiihe Nasaneeri rundi atahikwaho ekifubiro.— Obugambo oburukwanjura Zab. 51:3, 4, 17,.
9 Omukama Hezekiya nauwe akasiisira Yahwe. Baibuli emubazaaho eti: “Omutimagwe gukenyumiza: nikyo ekiniga kyamuhikiraho, na ha Yuda na Yerusalemu.” (2 Byom. 32:25) Habwaki Hezekiya yafookere w’emyehembo? Obundi habw’okuba Yahwe akaba amuhaire itungo lingi, amukonyiire kusingura Abasura, rundi habw’okuba akaba akiziibwe kuruga omu burwaire obukaba buli haihi kumwita. Emyehembo niyo esobora kuba yamuletiire kwoleka itungo lye hali ab’Ababuroni ekyarugiriiremu nabbi Isaya kumuhana. (2 Bakam. 20:12-18) Baitu kusisanaho na Daudi, Hezekiya n’obwebundaazi akegarukamu. (2 Byom. 32:26) Hakumalirra Yahwe akamurora nk’omukama omwesigwa ayaikaire ‘nakakora ebirungi.’—2 Bakam. 18:3.
Omukama Daudi hamu n’Omukama Hezekiya nobwebundaazi bakegarukamu obubabagambiire hali ebibi byabo (Rora akacweka 8-9)
10. Omukama Amaziya aketwaza ata hanyuma y’okuhanwa?
10 Kwahukanaho, Omukama Amaziya owa Yuda akakora ekihikire “baitu hatali omutima oguhikiriire mali.” (2 Byom. 25:2) Kibi ki eki yakozere? Hanyuma ya Yahwe kumukonyera kusingura aba Edomu, Amaziya akatandika kuramya ba ruhanga babo.c Hanyuma ya nabbi wa Yahwe kubaza na uwe, omukama akanga kubaza na nabbi kandi yamubinga.—2 Byom. 25:14-16.
11. Kusigikirra ha 2 Abakolinso 7:9, 11, kiki eki tusemeriire kukora kusobora kuganyirwa? (Rora n’ebisisani.)
11 Kiki eki turukwegera ha by’okurorraho binu? Tusemeriire kwegarukamu ebibi byaitu kandi tukole kyona ekirukusoboka kwetantara kwongera kubikora. Baitu kakuba tutunga okuhanwa kuruga hali abagurusi b’ekitebe, ha nsonga ezirukuzooka nk’entaito muno? Titusemeriire kwehurra ngu Yahwe tarukutugonza rundi ngu abagurusi tibarukutugonza. N’abakama abarungi aba Isaleri bakahaburwa kandi bahanwa. (Baheb. 12:6) Obutuhanwa, tusemeriire (1) kwebundaaza, (2) tukole empindahinduka ezirukwetaagisa, kandi (3) tugumizeemu nituheereza Yahwe n’omutima gwaitu gwona. Kakuba twegarukamu ebibi byaitu, Yahwe naija kutuganyira.—Soma 2 Abakolinso 7:9, 11.
Obu tutunga obuhabuzi, tusemeriire (1) kwebundaaza, (2) kukora empindahinduka ezirukwetaagisa (3) n’okugumizaamu nituheereza n’omutima gwaitu gwona (Rora akacweka 11)f
BAKARAMYA YAHWE OMU MULINGO OGUHIKIRE
12. Mbaganiza ki ey’ekaba eri hagati y’abakama abakaba bali besigwa n’abakaba batali besigwa?
12 Abakama Yahwe abayarozere nk’abarungi bamuramyaga omu mulingo oguhikire. Kandi bayekambisaga abantu abali hansi yabo kukora ekintu nikyo kimu. Amananu gali, nabo bakakora ensobi nk’oku turozere. Baitu baaramyaga Yahwe wenka kandi baakoraga n’amaani kuhwerekereza ebisisani omu nsi ya Isaleri.d
13. Habwaki Yahwe yarozere omukama Ahabu nk’ow’atali mwesigwa?
13 Habwaki Yahwe yarozere abakama abamu nk’abataali besigwa? Amananu gali, tikiri ngu bakakora ebibi byonka. N’omukama omubi Ahabu haroho obu yayolekere obwebundaazi kandi yayeyijukya habw’okwita Nabosi. (1 Bakam. 21:27-29) Akombeka embuga kandi emirundi nyingi akakonyera Abaisaleri kusingura abanyanzigwa baabo. (1 Bakam. 20:21, 29; 22:39) Baitu Ahabu akaba acweriiremu kimu kukurakuraniza okuramya okw’ebisuba obu nasindikirizibwa mukazi we. Kandi ategarukemu habw’okukora kinu.—1 Bakam. 21:25, 26.
14. (a) Habwaki Yahwe yarozere omukama Rehoboamu nk’awatali mwesigwa? (b) Kintu ki abakama abarukukira obwingi abakaba batali besigwa eki bakaba nibasisaniza?
14 Tekerezaaho omukama ondi ow’akaba atali mwesigwa—Rehoboamu. Nk’oku tusangirwe turozere akakora ebintu bingi ebirungi omu bulemi bwe. Baitu obukama bwe obu bwagumire, akaleka kuhondera ebiragiro bya Yahwe kandi yatandika kuramya baruhanga ab’ebisuba. (2 Byom. 12:1) Hanyuma, obwire obumu yaramyaga Yahwe kandi obwire obumu aramya baruhanga ab’ebisuba. (1 Bakam. 14:21-24) Rehoboamu na Ahabu, tibali nubo bonka abaalekereho okuramya okw’amananu. Amananu gali, abakama abarukukira obwingi abakaba batali besigwa, baramyaga baruhanga ab’ebisuba kandi bayekambisaaga n’abantu abandi kukora ekintu nikyo kimu. Nikyeyoleka kurungi ngu hali Yahwe, kumuramya omu mulingo oguhikire nikyo yasigikirrahoga kumanya omukama obu araaba ali murungi rundi mubi.
15. Habwaki kuramya Yahwe omu mulingo oguhikire kikuru hali uwe?
15 Habwaki ensonga y’okuramya ekaba nkuru muno hali Yahwe? Emu ha nsonga niyo ngu, omukama akaba aine obujunanizibwa bw’okukonyera abantu kuramya Yahwe omu mulingo oguhikire. Ekindi, abantu obu baramya baruhanga ab’ebisuba, kibaleetera kukora ebibi ebindi n’okutwaza abantu abandi omu mulingo ogutali gw’obwinganiza. (Hos. 4:1, 2) Kwongerraho, abakama ba Isaleri hamu n’abantu abakaba bali hansi yabo, bakaba behaireyo hali Yahwe. Egi niyo ensonga habwaki, Baibuli erengesaniza okwejumbira kwabo omu kuramya kw’ebisuba n’obusiihani. (Yer. 3:8, 9) Omuntu obu asiihana, aba agobiize omuntu ow’ali nauwe omu buswere kandi amuleetera obusaasi obw’amaani muno. Omu mulingo nugwo gumu, omuheereza wa Yahwe ow’ayehaireyo hali uwe, obu ayejumbira omu kuramya okw’ebisuba, amusaaliza muno.e—Bir. 4:23, 24.
16. Hali Yahwe, kiki ekibaganiza omuntu omurungi hali omuntu omubi?
16 Isomo ki eri turukwega? Tusemeriire kucweramu kimu kwetantara okuramya okw’ebisuba. Baitu tusemeriire kwikara nitumuramya omu mulingo oguhikire kandi twine bingi eby’okukora omu buheereza bwaitu hali uwe. Nabbi Maraki, akoolekera kimu ekintu eki baganizaamu omuntu omurungi omu maiso ga Yahwe hali omuntu omubi. Akahandiika ati: ‘Nubwo muligaruka mulibaganizaamu abahikiriire n’ababi, ogu arukukorra Ruhanga, n’ogu atarukumukorra.’ (Mara. 3:18) Nahabweki titusemeriire kwikiriza ekintu kyona—ka bube obutahikirra bwaitu hamu n’ensobi zaitu, kutumaramu amaani kuhika ha rulengo rw’okuleka kuheereza Ruhanga. Kuleka kuheereza Yahwe nakyo kiri kibi eky’amaani.
17. Habwaki tusemeriire kuba abegendereza obu turukuba nitukomamu omuntu ou turataaha na uwe obuswere?
17 Obu oraaba otakataahire obuswere kandi n’otekerezaaho kubutaaha, ebigambo ebiri omu Maraki nibisobora kukukonyera kukomamu omuntu ow’ahikire ou osobora kutaaha na uwe obuswere. Tekerezaaho kinu, omuntu nasobora kuba aine emiringo emirungi, baitu kakuba omuntu ogu aba atarukuheereza Ruhanga ow’amananu, naaba ahikiriire omu maiso ga Yahwe? (2 Kol. 6:14) Kakuba otaaha obuswere n’omuntu ogu, nasobora kukukonyera kwikara oli mwesigwa hali Yahwe? Tekerezaaho kinu: Abakazi b’Omukama Sulemani abakafiire, nibasobora kuba bakaba baine emiringo emu enungi. Baitu bakaba batarukuramya Yahwe. Hanyuma, mporampora bakatandika kuhindura omutima gwa Sulemani kandi yatandika kuramya baruhanga ab’ebisuba.—1 Bakam. 11:1, 4.
18. Abazaire basemeriire kwegesa ki abaana baabo?
18 Abazaire nimusobora kukozesa eby’okurorraho eby’abakama abarukubazibwaho omu Baibuli, kukonyera abaana banyu kuba n’ekihika eky’okugonza kuheereza Yahwe. Bakonyere kukyetegereza ngu abakama Yahwe abayasiimaga nubo abo abaamuramyaga kandi abayekambisaaga n’abantu abandi kumuramya. Kuraba omu kyokurorraho kyawe hamu n’ebigambo byawe begese ngu ebintu eby’omwoyo—nk’okwesomesa Baibuli, kugenda omu nsorrokano, n’okwejumbira omu buheereza nibyo bikuru omu bwomeezi bwaitu. (Mat. 6:33) Kitali eki, abaana baawe nibasobora kuteekereza ngu bali Bakaiso ba Yahwe habw’okuba eri “diini eyi bazaalirwemu.” Ekirugamu nibasobora kuleka kwebembeza okuramya okw’amananu rundi nibakurugiraho kimu.
19. Abo boona abaalekere kuheereza Yahwe basemeriire kunihira ki? (Rora n’akasanduuko “Nosobora Kugaruka Hali Yahwe!”)
19 Kakuba omuntu aleka kuheereza Yahwe, eki nikimanyisa ngu tasobora kwongera kuba munywani we? Nangwa, habwokuba nasobora kwegarukamu kandi nayongera kuramya Yahwe. Kusobora kukora eki, asemeriire kuleka emyehembo ye kandi akaikiriza obukonyezi kuruga hali abagurusi b’ekitebe. (Yak. 5:14) Baitu amaani goona agarateekamu kugarraho enkoragana ye na Yahwe nigaija kuba gatafiire busa.
20. Kakuba tuhondera ekyokurorraho ky’abakama abesigwa, Yahwe naija kuturora ata?
20 Masomi ki agatwegiire hali abakama ba Isaleri? Nitusobora kuba nk’abakama ba Isaleri abesigwa kakuba tugonza Yahwe n’omutima gwaitu gwona. Leka twegere ha nsobi zaitu, twegarukemu, kandi tuteeke omu nkora obuhabuzi obutuhairwe. Kandi katwikale nitwijuka obukuru obw’okuramya Ruhanga ow’amananu omu mulingo oguhikire. Obu oraikara noheereza Yahwe n’obwesigwa, naija kukurora nk’omuntu arukukora ekihikire omu maiso ge.
EKIZINA 45 Okwecumitiriza okw’Omutima Gwange
a Omu kicweka kinu, ebigambo “abakama ba Isaleri” nibimanyisa abakama boona abaalemere abantu ba Yahwe, kababe baalemere enganda ibiri ez’obukama bwa Yuda, enganda ikumu ez’obukama bwa Isaleri, rundi enganda ikumu na ibiri zoona.
b AMAKURU G’EBIGAMBO EBIMU: Baibuli ekira kukozesa ekigambo “omutima” kumanyisa omuntu waitu ow’omunda, otwaliiremu okwegomba kwaitu, ebitekerezo byaitu, omulingo turoramu ebintu, ebigendererwa byaitu, obusobozi bwaitu, hamu n’ebintu ebitwekambisa kukora ekintu.
c Ekaba eri ngeso abakama abakafiiri kuramya baruhanga ab’amahanga agabaabaga basingwire.
d Omukama Asa akakora ebibi eby’amaani. (2 Byom. 16:7, 10) Baitu Baibuli egamba ngu Asa akakora ebihikire omu maiso ga Yahwe. N’obukiraaba ngu ha kubanza akanga okuhanwa, nikizooka ngu hanyuma akegarukamu. Kutwarra hamu, emiringo ye enungi ekakira ensobi ze. Mali, Asa akaramya Yahwe wenka kandi yakora kyona ekirukusoboka kuhwerekereza ebisisani omu bukama bwe.—1 Bakam. 15:11-13; 2 Byom. 14:2-5.
e Niturora ngu okuramya kintu kikuru muno hali Yahwe habwokuba ebiragiro bibiri eby’okubanza omu Biragiro bya Musa bikaba nibitanga okuramya ekintu kindi kyona oihireho Yahwe wenka.—Kurug. 20:1-6.
f KUSOBORRA EBISISANI: Omugurusi w’ekitebe ow’akyali muto ayoleka ngu akwasirweho obu nabaza nauwe ha mulingo arukunywamu amaarwa. N’obwendaazi, ow’oruganda aikiriza obuhabuzi, akora empindahinduka ezirukwetaagisa, kandi agumizaamu naheereza Yahwe n’obwesigwa.