Yahwe Naagonza Abantu Boona Kwegarukamu

1. Omuntu obu ayegarukamu kiki eki akora?

OBU tukora ekintu ekibi, kikuru muno kwegarukamu. Baibuli egamba ngu omuntu ayegarukamu obu atandika kunoba ekibi eki akozere, aleka kukikora, kandi acweramu kimu kutakigarukamu.—Mat. 3:8; Eng. 3:19; 2Pet 3:9.

2. Habwaki itwena tusemeriire kwega ebirukukwata ha kwegarukamu? (Nehemiya 8:​9-11)

² Buli muntu weena asemeriire kwega ebirukukwata ha kwegarukamu. Habwaki? Habwokuba itwena tusiisa buli kiro. Nk’abaijukuru ba Adam na Hawa, itwena tukagweterwa ekibi n’okufa. (Bar. 3:23; 5:12) Itwena tuli basiisi kandi tusemeriire kwegarukamu. N’abantu ab’okwikiriza okw’amaani nk’omukwenda Paulo, tikyabanguhiraga kurwanisa okwegomba okubi. (Bar. 7:​21-24) Kinu nikimanyisa ngu nitwija kwikara nitwehurra kubi habw’ebibi byaitu? Nangwa, Yahwe w’embabazi, kandi naagonza tusemererwe. Tekerezaaho eky’okurorraho ky’Abayudaaya omu kasumi ka Nehemiya. (Soma Nehemiya 8:​9-11.) Yahwe akaba atarukugonza behurre kubi habw’ebibi ebi bakaba bakozere enyuma, baitu akaba naagonza bamuheereze n’okusemererwa. Yahwe akimanyire ngu okwegarukamu kurugamu okusemererwa. Egi niyo ensonga habwaki naatwegesa ha kwegarukamu. Kakuba twegarukamu ebibi byaitu, nitukigumya ngu Isiitwe ow’embabazi naija kutuganyira.

3. Biki ebi turabazaaho omu kicweka kinu?

³ Hati leka twege ebirukukiraho ebirukukwata ha kwegarukamu. Omu kicweka kinu, nitwija kubazaaho ebintu bisatu. Eky’okubanza, nitwija kwega ekintu Yahwe yayegeseze Abaisaleri ekirukukwata ha kwegarukamu. Hanyuma, nitwija kuteeka omutima ha mulingo Yahwe akonyiire abasiisi kusobora kwegarukamu. Ha kumalirra, nitwija kubazaaho ekintu Yesu yayegeseze abegeswa be ekirukukwata ha kwegarukamu.

YAHWE EKI YAYEGESEZE ABAISALERI OBU KIRUKUHIKA HA KWEGARUKAMU

4. Kiki Yahwe eki yayegeseze ihanga lya Isaleri obukirukuhika ha kwegarukamu?

⁴ Yahwe obu yahaire Abaisaleri ebiragiro bye, bakamuraganiza kubyorobera. Kandi na Yahwe akabaraganiza ngu obu baakworobiire ebiragiro ebi, yaakubalinzire kandi abahe n’emigisa. Akabazaaho ebiragiro bye ati: “Baitu ebiragiro binu ebinkuragiire hati tibirukulemeera okukujwahya, kunu tibiri hara muno.” (Bir. 30:​11, 16) Ekyokurorraho, obu baakumujemiire nibacwamu kuramya baruhanga abandi, yaakubaihireho emigisa ye kandi babonebone. Baitu nabwo, eki kitamanyise ngu akaba abalekiireho kimu. Baakusoboire ‘kugarukira Yahwe Ruhanga wabo kandi bahurre iraka lye.’ (Bir. 30:​1-3, 17-20) Ekirukumanyisa ngu baakwegarukiremu. Kandi obu baakukozere eki, Yahwe yakubairiize haihi na uwe, kandi ayongere abahe emigisa.

5. Yahwe akooleka ata ngu akaba atalekereho abantu be? (2 Ekyabakama 17:​13, 14)

⁵ Abantu Yahwe ab’akaba akomeremu, baikaraga nibamujeemera. Oihireho kuramya ebisisani, baakoraga n’ebintu ebindi ebibi. Ekyarugiremu, bakabonabona. Baitu Yahwe akaikara naalengaho kukonyera abantu be kwongera kumuheereza. Emirundi nyingi akasindika ba nabbi kutererra abantu be kwegarukamu n’okwongera kumuheereza.—Soma 2 Ekyabakama 17:​13, 14.

6. Yahwe akakozesa ata banabbi be kwegesa abantu be isomo erikuru erirukukwata ha kwegarukamu? (Rora n’ekisisani.)

⁶ Yahwe yakiraga kukozesa banabbi be kutererra n’okuhabura abantu be. Ekyokurorraho, kuraba omu nabbi Yeremiya Ruhanga akagamba ati: “Garuka, iwe Isareri arukuterra okugaruka enyuma, . . . tindibarora nekiniga: baitu ndi wokuganyira, . . . tindigumya ekiniga ebiro byona. Kyonka oikirize okutahikirra kwawe, oti okasisira [Yahwe] Ruhanga wawe.” (Yer. 3:​12, 13) Kuraba omu Yoweri, Yahwe akagamba ati: “Mumpindukire nemitima yanyu yona.” (Yo. 2:​12, 13) Akakozesa Isaya kuhandiika ati: “Mwoge, munabe; muiheho obubi obwengeso zanyu omu maiso gange; muleke okukora kubi.” (Is. 1:​16-19) Kandi kuraba omuli nabbi Ezekyeri, Yahwe akakaguza ati: “Nyowe nyina okusemererwa omu kufa kwomubi? . . . tindukugonza agarukire omu mihandaye abe omwomezi? Baitu tinyina kusemererwa omu kufa kwogu anyakufa, . . . nukwo, muhinduke, mube abomezi.” (Ez. 18:​23, 32) Yahwe asemererwa obu arora abantu nibegarukamu habwokuba naagonza bomeere ebiro n’ebiro! Nahabweki Yahwe talindirra kwonka abantu abasiisi kubanza kuhinduka nubwo abakonyere. Leka turole ebyokurorraho ebindi ebirukubazaaho ensonga enu.

7. Obu naakozesa ekyokurorraho kya nabbi Hoseya na mukazi we, kiki Yahwe eki yayegeseze abantu be?

⁷ Wetegereze Yahwe eki yayegeseze abantu kuraba omu kyokurorraho kya Gomere mukazi wa nabbi Hoseya. Hanyuma y’okusiihana, akalekaho Hoseya yagendera abasaija abandi. Tugambe ngu kikaba kitakyasoboka kwegarukamu? Yahwe ow’amanya ekiri ha mutima akagambira Hoseya ati: ‘Genda kandi, ogonze omukazi arukugonzebwa omusaija ondi baitu musiihani nka Yahwe okwagonza abana ba Isareri, nobubahindukira abacwezi.’ (Hos. 3:1; Nfu. 16:2) Wetegereze ngu omukazi wa Hoseya akaba naakyayejumbira omu kukora ekibi eky’amaani. Baitu Yahwe akagambira Hoseya kumuganyira n’okwongera kumutwaza nka mukazi we.a Omu mulingo nugwo gumu, Yahwe akaba atalekereho abantu be abajeemu. N’obu kiraaba ngu bakaba nibakyakora ebintu ebibi muno, akaba naakyabagonza, kandi akagumizaamu naabakonyera kwegarukamu n’okukora empindahinduka omu bwomeezi bwabo. Kinu nikimanyisa ngu Yahwe ow’arora emitima naija kuhikirra omuntu ow’akyakora ekibi ky’amaani kandi alengeho kumukonyera kwegarukamu? (Nfu. 17:3) Leka turole.

OMULINGO YAHWE AKONYERA ABASIISI KWEGARUKAMU

8. Kiki Yahwe eki yakozere kukonyera Kaini kwegarukamu? (Okubanza 4:​3-7) (Rora n’ekisisani.)

⁸ Kaini akaba ali mutabani wa Adamu na Hawa ow’okubanza. Nk’abaana ba Adamu na Hawa abandi boona, Kaini na uwe akaijukura ekibi kuruga hali bazaire be. Kwongerraho, Baibuli emubazaaho eti: “Emirimoye ekaba eri mibi.” (1 Yoh. 3:12) Eki nikyoleka habwaki Yahwe “atamuikirize nekihongwakye.” Omu kiikaro ky’okuhinduramu engeso ze, “Kaini [akabiihirwa] muno namaisoge gasisikara.” Kiki Yahwe eki yakozere? Akabaza na Kaini. (Soma Okubanza 4:​3-7.) Wetegereze ngu Yahwe akabaza na Kaini omu mulingo gw’embabazi, kandi yamugambira ngu akaba naija kumuha omugisa obu yaakukozere ebirungi. Akongera yamugambira ngu ekiniga kye kikaba nikiija kumuleetera kukora ekintu ekibi. Eky’obusaasi, Kaini akanga kuhuliiriza. Ataikirize Yahwe kumukonyera kwegarukamu. Hanyuma ya Kaini kwanga kuhuliiriza, Yahwe akaleka kukonyera abasiisi kwegarukamu? Nangwa!

9. Yahwe akakonyera ata Daudi kwegarukamu?

⁹ Yahwe yagonzaaga muno Omukama Daudi. Akamweta “omuntu ali nka nyowe okundukwenda.” (Eng. 13:22) Baitu Daudi akejumbira omu kukora ebibi eby’amaani otwaliiremu obusiihani n’obwisi. Kusigikirra ha biragiro bya Musa, Daudi akaba asemeriire kwitwa. (Lev. 20:10; Kubar. 35:31) Baitu, Yahwe akaba naagonza kukonyera Daudi kwegarukamu.b Akasindika nabbi Nasani kubungira Daudi, n’obu kiraaba ngu Daudi akaba atoolekere ngu naagonza kwegarukamu. Nasani akakozesa ekyokurorraho ekyakonyiire Daudi kwetegereza ngu akaba akozere ebibi by’amaani. Daudi akakwatwaho muno kandi yayegarukamu. (2 Sam. 12:​1-14) Akahandiika zabuli eyayolekere ngu akaba ayegarukiremu kuruga ha mutima. (obugambo oburukwanjura Zab. 51) Zabuli egi ehumwize abasiisi baingi kandi yabekambisa kwegarukamu. Mali tikirukusemeza ngu Yahwe akakonyera omuheereza we omugonzebwa Daudi kwegarukamu?

10. Kikuleetera kwehurra ota kukimanya ngu Yahwe atugumiisiriza kandi atuganyira?

¹⁰ Yahwe anoba ebibi ebya buli mulingo. (Zab. 5:​4, 5) Baitu nabwo akimanyire ngu tuli basiisi, baitu habw’okutugonza acwamu kutukonyera kurwanisa ekibi. Aikara naalengaho kukonyera n’abantu abasiisi muno kwegarukamu n’okumwirra haihi. Mali eki ka nikigarramu amaani! Obu tutekerezaaho okugumiisiriza kwa Yahwe hamu n’okuganyira kwe, kitwekambisa kwikara tuli besigwa hali uwe, kandi n’okwanguha kwegarukamu ebibi byaitu. Hati leka turole omulingo ekitebe kyayegesiibwe ebirukukiraho ha kwegarukamu.

YESU EKI YAYEGESEZE ABEGESWA BE OBUKIRUKUHIKA HA KWEGARUKAMU

11-12. Kyokurorraho ki Yesu eki yakozeseze kutwoleka nk’oku Yahwe aikara ayetekaniize kutuganyira? (Rora ekisisani ekya ha kyesweko.)

¹¹ Omu kyasa eky’okubanza Y.A.K., akasumi kaali kahikire aka Masiya kwija. Nk’oku kyolekerwe omu kicweka ekihoire, Yahwe akakozesa Yohana omubatizi na Yesu Kristo kwegesa abantu obukuru bw’okwegarukamu.—Mat. 3:​1, 2; 4:17.

¹² Omu buheereza bwa Yesu bwona, akeegesa abarukumuhuliiriza ebirukukwata ha kuganyira kwa Ise. Gumu ha miringo yakikozeremu nukwo kubagambira oruganikyo orurukukwata ha mwana ayazaahire. Omusigazi ogu akacwamu kuruga omuka kandi yakora ebintu ebibi muno. Baitu hanyuma y’akasumi, akegarukamu kandi yagaruka omuka. Ise akehurra ata? Yesu akagamba ngu omusigazi onu “Obwakaba akiri hara muno, ise yamuleba, yakwatwa embabazi, yairuka, yamugwa omunda, namunywegera muno.” Omwana onu akasaba obu araba naasobora kukorra ise nk’omwiru, baitu ise akamweta kandi yamugarra omu ka. Ise akagamba ati: “akaba azahire, azahukire.” (Luk. 15:​11-32) Yesu obu akaba ali omu iguru atakaizire omu nsi, emirundi nyingi akaba arozere omulingo Ise ayoleka embabazi hali abasiisi abegarukamu. Oruganikyo oru, Yesu oruyagambiire abegeswa be nirutugarramu amaani, kandi nirwoleka omulingo Yahwe ali Ruhanga ow’embabazi.

13-14. Kiki omukwenda Petero eki yayegere obu kirukuhika ha kwegarukamu, kandi kiki eki yayegeseze abandi ha kwegarukamu? (Rora n’ekisisani.)

¹³ Omukwenda Petero akeega bingi kuruga hali Yesu ebirukukwata ha kwegarukamu n’okuganyira. Petero akakora ensobi nyingi kandi Yesu yaikaraga ayetekaniize kumuganyira. Ekyokurorraho, hanyuma ya Petero kwehakana Yesu emirundi esatu, akehurra kubi habw’ekintu akaba akozere. (Mat. 26:​34, 35, 69-75) Baitu hanyuma ya Yesu kuhumbuuka, akeyoleka Petero obu akaba ali wenka kandi yabaza na uwe. (Luk. 24:​33, 34; 1 Kol. 15:​3-5) Yesu akaba akimanyire ngu Petero akaba ayegarukiremu, kandi yamugumya ngu akaba amuganyiire.—Rora Marako 16:7 na study note “and Peter.”

¹⁴ Petero aketegereza obukuru bw’okwegarukamu n’okuganyira nahabweki akeegesa abandi ebi akaba ayegere ha kwegarukamu n’okuganyira. Kandi hayuma ya Pentekote, Petero akasoborra Abayudaaya abakaba batarukwikiririza omuli Yesu ngu bakaba baisire Masiya. Baitu omu mulingo ogw’okugonza, akabatererra naagamba ati: “Nukwo mwegarukemu, muhinduke, ebibi byanyu biragazibwe, ebiro byokuhumuzibwa biije, okuruga omu maiso ga Mukama” (Eng. 3:​14, 15, 17, 19) Nahabweki, Petero akakyoleka ngu kwegarukamu kiretera omusiisi kuhinduka, kuhindura entekereza ye embi n’ebikorwa bye ebibi, kandi atandike kukora ebintu ebirungi ebirukusemeza Ruhanga. Ekindi, omukwenda Petero akooleka ngu Yahwe yakuragaize ebibi byabo, rundi kubibuzaaho. Kandi hanyuma y’emyaka nyingi kurabaho, Petero akagumya Abakristaayo ati: “[Yahwe] . . . nagumisiriza habwanyu, atarukugonza omuntu wena okubura, baitu bona bahike omu kwegarukamu.” (2 Pet. 3:9) Mali eki ka nikihumuuza kukimanya ngu obu twegarukamu ebibi byaitu otwaliiremu n’ebibi eby’amaani Yahwe atuganyirra kimu!

15-16. (a) Omukwenda Paulo akeega ata ebirukukwata ha kuganyira? (1 Timoseo 1:​12-15) (b) Kiki eki turukwija kubazaaho omu kicweka ekirukuhonderaho?

¹⁵ Omuntu ow’akaba naakirayo kwetaaga kwegarukamu n’okuganyirwa nuwe Paulo. Akahiiganiza abahondezi ba Kristo omu mulingo omubi muno. Abakristaayo abarukukira obwingi nibasobora kuba baatekeriize ngu tasobora kuhinduka. Baitu Yesu akaba naamanya ngu Paulo naasobora kuhinduka kandi ayegarukemu. Uwe na Ise bakarora emiringo enungi omuli Paulo. Yesu akagamba ati: ‘Omusaija onu ali kibindi eki nkomeremu kumanyisa ibara lyange.’ (Eng. 9:15) Ekindi, Yesu akakozesa ekyamahano kukonyera Paulo kwegarukamu. (Eng. 7:58–8:3; 9:​1-9, 17-20) Hanyuma ya Paulo kufooka Mukristaayo, akaikara naasiima habw’omulingo Yahwe na Yesu baamwolekeremu embabazi. (Soma 1 Timoseo 1:​12-15.) Omukwenda onu ow’akaba naayoleka okusiima kwe akeegesa ati: ‘Embabazi za Ruhanga nizikuleeta omu kwegarukamu.’—Bar. 2:4.

¹⁶ Paulo obuyahuliire obusiihani obukaba buli omu kitebe Ekikristaayo eky’omu Kolinso, kiki eki yakozere? Kusigikirra ha bigambo bye nitusobora kwega omulingo Yahwe ayolekamu okugonza obu ahana abaheereza be, nomulingo abooleka embabazi obu begarukamu, kandi nitwija kwega n’omulingo tusobora kwoleka embabazi nka uwe. Omu kicweka ekirukuhonderaho nitwija kwega ekyabaireho omu kitebe kya Kolinso.