Kozesa Kurungi Endolerwamu

Omwegeswa Yakobo akalengesaniza Baibuli n’endolerwamu ey’etusobozesa kurora omuntu waitu ow’omunda. (Yak. 1:​22-25) Nitusobora tuta kukozesa kurungi Baibuli nk’endolerwamu?

Gisome n’obwegendereza. Obu twerorra omu ndolerwamu nitwanguhiriza, nitusobora kutarora kurungi omulingo turukuzookamu. Omu mulingo nugwo gumu, obu turaasoma Baibuli nitwanguhiriza, titurukwija kurora empindahinduka ezi tusemeriire kukora. Kusobora kukora kinu, tusemeriire kusoma Baibuli n’obwegendereza.

Teeka omutima ha mpindahinduka ezi osemeriire kukora hatali ez’abandi. Obwire obumu obu turora omu ndolerwamu nitusobora kurora n’abantu abandi abaine akamogo, kandi nitusobora kuteeka omutima ha mulingo omubi ogu barukuzookamu. Omu mulingo nugwo gumu, nitusobora kukozesa Baibuli kurora ensobi ez’omuntu ondi. Baitu kinu tikirukwija kutukonyera kuterekereza ensobi zaitu.

Ba muntu arukwetegereza. Kakuba turora omu ndolerwamu kandi tukateeka omutima ha bintu ebi tutagonza ha mubiri gwaitu byonka, nitusobora kuhwamu amaani. Tusemeriire kukozesa okwetegereza obu turukuba nitusoma Ekigambo kya Ruhanga tutarukwenihirramu bingi kukira ebya Yahwe arukutunihirramu.—Zab. 103:14.