Okugonza kwa Ruhanga Kwikaraho Ebiro n’Ebiro

1-2. Kizibu ki ekihika hali Abakristaayo abarukukira obwingi?

TEEKEREZAAHO eryato eriri hagati y’enyanja ey’erumu ihunga ly’amaani. Ebigonzi eby’amaani nibireetera eryato kutwarwatwarwa. Eryato niriija kwikara niritwatwarwa nambere ebigonzi birukuteera, kuhikya omuntu obu araakozesa enanga. Enanga niija kuleetera eryato kuteekaana kandi erikoonyere kutatwarwatwarwa omu ihunga eri ery’amaani.

² Omu mulingo nugwo gumu, obu oba oine ekizibu eky’amaani eki orukurabamu, noosobora kusisana nk’eryato eri. Enyehurra zaawe nizisobora kwikara nizihindahinduka. Kiro kimu ohurra nooyesiga okugonza kwa Yahwe hamu n’obusagiki bwe, kandi ekiro ekindi noosobora kwekaguza Yahwe obu araaba naarora eki orukurabamu. (Zab. 10:1; 13:1) Obundi omuywani naasobora kukugambira ebigambo ebirukuhuumuza kandi bikakuleetera kwehurra kurungi habw’akacu kake. (Nfu. 17:17; 25:11) Baitu, hanyuma y’akaire oyongera otandika kugurukyagurukya. Noosobora n’okutandika kwekaguza Yahwe obu araaba akulekereho. Noosobora ota kukozesa enanga omu mulingo gw’akokurorraho omu nyikara egi ey’egumire ey’orukurabamu? Ekirukumanyisa, noosobora ota kukigumya kandi okaikara nookigumya ngu Yahwe naakugonza kandi naakusagika?

3. Kiki eki orukwegera ha Zabbuli 31:7 na 136:​1, obukirukuhika ha kugonza kwa Yahwe n’obwesigwa bwe, kandi habwaki nitugamba ngu Yahwe nuwe arukukirrayo kimu kuba n’emiringo enu? (Rora n’ebisisani.)

³ Ekintu ekimu ekisobora kukukoonyera kwikara oteekaine obu orukuba nooraba omu nyikara ezigumangaine, nukwo okwijuka ngu Yahwe aine okugonza kandi mwesigwa. (Soma Zabbuli 31:7; 136:1.) Ekigambo eky’Oruhebburaniya ekyakozesiibwe omu byahandiikirwe binu ‘nk’okuganyira’ nikimanyisa okugonza okw’amaani muno kandi okurukwikaraho omuntu oku aba ainiire mugenzi we. Yahwe nuwe arukukirrayo kimu kuba n’okugonza kunu. Egi niyo ensonga habwaki Baibuli emubazaaho nka Ruhanga ‘anyakwijwire okuganyira.’ (Kurug. 34:​6, 7) Ekindi, Baibuli ebazaaho Yahwe eti: “Oijura okugonza okutalekera hali abo boona abanyakukukunga.” (Zab. 86:​5, NWT) Teekerezaaho ekikirukumanyisa: Yahwe tasobora kulekaho abaheereza be abeesigwa! Kwijuka ngu Yahwe aikara ali mwesigwa, nikisobora kukukoonyera kuteekaana obu orukuba oli omu nyikara ezigumire.—Zab. 23:4.

OKUGONZA KWA YAHWE OKUTALEKERA KUROLE NK’ENYEGESA YA BAIBULI EY’ERUKUBANDIZIBWAHO

4. Bazaaho ebyokurorraho eby’enyegesa za Baibuli ezirukubandizibwaho, kandi osoborre ensonga habwaki kitanguhire omuntu kutubiiha ngu tizihikire.

⁴ Ekintu ekindi ekisobora kukukoonyera kwikara oteekaine obu orukuba nooraba omu nyikara ey’egumangaine, nukwo kwijuka ngu okugonza kwa Yahwe okutalekera eri nyegesa ya Baibuli ey’erukubandizibwaho. Kiki eki oteekerezaaho obu ohurra ebigambo “enyegesa za Baibuli ezirukubandizibwaho?” Obundi nikikuleetera kwijuka enyegesa za Baibuli ezi wabandize kwega. Ekyokurorraho, okeega ngu ibara lya Ruhanga niryo Yahwe, Yesu nuwe Mwana wa Ruhanga ayazairwe omu wenka, abafu tibaine eki bamanyire, kandi ngu ensi erifooka orugonjo orurungi nambere abantu baliikara ebiro n’ebiro. (Zab. 83:18; Mug. 9:5; Yoh. 3:16; Kus. 21:​3, 4) Obu wamazire kwikiriza ngu enyegesa ezi gali mananu, kikaba kitarukwanguha omuntu kukubiihabiiha. Habwaki? Habwokuba okakyetegereza ngu enyegesa ezi nizisigikirra ha bwakaiso oburukwesigwa. Leka turole ensonga habwaki kurora okugonza kwa Yahwe nk’enyegesa ya Baibuli ey’erukubandizibwaho, kisobora kukukoonyera kwangirra enteekereza ey’erukugamba ngu Yahwe takurora rundi takufaaho obu oba nooraba omu nyikara ey’egumangaine.

5. Soborra omulingo omuntu ayanga enyegesa z’ebisuba.

⁵ Obu watandiikire kwega Baibuli, kiki ekyakukoonyiire kwanga enyegesa z’ebisuba? Nikisobora kuba ngu okalengesaniza ebintu ebi wayegesiibwe ediini yaawe, n’ebintu ebi okaba nooyega kuruga omu Baibuli. Teekerezaaho ekyokurorraho kinu: Tugambe ngu waikirizaaga ngu Yesu ali Ruhanga. Baitu obu watandikire kwega Baibuli, okeekaguza, ‘Mali enyegesa egi ehikire?’ Hanyuma y’okwekebiija obwakaiso kuruga omu Baibuli, okakyetegereza ngu tehikire. Kandi hanyuma okaleka kwikiririza omu nyegesa y’ebisuba kandi watandika kwikiririza omu nyegesa enu ey’erukusigikirra h’amananu ag’omu Baibuli ey’erukugamba ngu: Yesu nuwe “omuzigaijo omu byahangirwe byona,” “[omwana] wa Ruhanga, ayazairwe omu wenka.” (Bak. 1:15; Yoh. 3:18) Ky’amananu ngu enyegesa z’ebisuba nizisobora kuba zigumire muno kuleka kandi ezihamire muno nk’emihama. (2 Kol. 10:​4, 5) Baitu hanyuma y’okwega amananu, otongere kwikiririza omu nyegesa ez’ebisuba.—Baf. 3:13.

6. Habwaki nookigumiza kimu ngu okugonza kwa Yahwe okutalekera kwikaraho ebiro n’ebiro?

⁶ Noosobora kukora ekintu nikyo kimu obukirukuhika ha nyegesa ya Baibuli ey’erukukwata ha kugonza kwa Yahwe. Obu orahikwaho ekirengo, kandi okatandika kugurukyagurukya Yahwe obu araaba naakugonza, wekaguze, ‘Ebi ndukuteekereza bihikire?’ Lengesaniza okugurukyagurukya oku oine obukirukuhika ha kugonza kwa Yahwe n’ebigambo ebirukusangwa omu Zabbuli 136:1—ekyahandiikirwe ekyebembiire ekicweka kinu. Omu Ruhebburaniya orwa kara, ekigambo “okuganyira” ekikozesiibwe omu Zabbuli 136 nikisobora n’okumanyisa okugonza okutalekera. Hati habwaki Yahwe yateerekeriize omuhandiiki wa Zabbuli kubazaaho okugonza kwe omu mulingo gunu? Habwaki ekigambo kinu kigarukirwemu emirundi 26 omu Zabbuli enu? Kinu nikyoleka ngu, okugonza okutalekera Yahwe oku ainiire abantu be eri emu ha nyegesa za Baibuli ezirukubandizibwaho ezaakwanguhiire kuziikiriza. Enteekereza ey’erukugamba ngu Yahwe akurora nk’omuntu ow’ataine mugaso rundi ow’atarukugonzebwa, tehikire. Osemeriire kugyangirra nkooku oyanga enyegesa ezindi zoona ez’ebisuba!

7. Bazaaho bimu ha byahandiikirwe ebirukutugumya ngu Yahwe naatugonza.

⁷ Baibuli erumu enkarra ezindi nyingi ezirukutugumya ngu Yahwe naatugonza. Ekyokurorraho, Yesu akagambira abahondezi be ati: “Muli b’omuhendo muno kukira ebisirya bingi.” (Mat. 10:31) Na Yahwe akagambira abantu be ati: “Nyowe ndikuha amani; ego, ndikukonyera; ego, ndikusagika nomukono gwange ogwobulyo ogwokuhikirra.” (Is. 41:10) Weetegereze ngu boona ebigambo byabo nibabigumya. Yesu atagambe ngu ‘Nimusobora kuba b’omuhendo,’ kandi na Yahwe atagambe ngu ‘Ninsobora kukukoonyera.’ Oihireho Yesu akagamba ngu: “Muli b’omuhendo muno” kandi Yahwe yagamba ngu ‘Ndikukoonyera.’ Kakuba ohikwaho ekirengo kandi okatandika kugurukyagurukya Yahwe obu araaba naakugonza, ebyahandiikirwe nk’ebi tibirukwija kugarukira ha kukuleetera kwehurra ngu Yahwe naakugonza, baitu nibiija n’okukugumiza kimu ngu mali naakugonza. Ebyahandiikirwe ebi birumu obwakaiso oburukwesigwa. Obu oraasaba Yahwe kukukoonyera kuleka kugurukyagurukya kandi okeecumiitirizaaho ebyahandiikirwe ebi, noija kubaza ebigambo ebirukusangwa omu 1 Yohaana 4:​16, ebirukugamba biti: “Tumanyire kandi twaikiriza okugonza Ruhanga oku atwiniire.”a

8. Kiki eki osemeriire kukora kakuba obwire obumu otandika kugurukyagurukya Yahwe obu araaba naakugonza?

⁸ Baitu kiki eki osemeriire kukora kakuba oba nookyagurukyagurukya Yahwe obu araaba naakugonza? Lengesaniza omulingo orukwehurra n’ebintu ebi orukumanya hali Yahwe. Enyehurra tosobora kuzeesiga, baitu okugonza Yahwe oku atwiniire buli bwakaiso oburukwesigwa oburukubazibwaho omu Baibuli. Kakuba twanga kwikiriza ngu Yahwe naatugonza, nituba nitusisana nk’abarukugamba ngu ebigambo “Ruhanga kugonza” ebirukusangwa omu Baibuli, tibihikire.—1 Yoh. 4:8.

TEEKEREZAAHO OKUGONZA YAHWE OKU AKWINIIRE

9-10. Kusigikirra hali Yohaana 16:​26, 27, kiki Yesu eki akaba naabazaaho obu yagambire ngu “Isenyowe naabagonza.”? (Rora n’ekisisani.)

⁹ Nitusobora kumanya ebirukukiraho ebirukukwata ha kugonza kwa Yahwe, kuraba omu kuteekerezaaho ebigambo Yesu yagambiire abahondezi be ati: “Isenyowe naabagonza.” (Soma Yohaana 16:​26, 27.) Yesu akaba atabaze ebigambo binu kuleetera abeegeswa be kwehurra kurungi kyonka. Enkarra ezetoroire ebigambo binu nizooleka ngu akaba atataire omutima ha nyehurra zaabo omu kasumi ako. Oihireho, akaba naabazaaho okusaba.

¹⁰ Yesu nubwo akaba yakaruga kugambira abeegeswa be ngu basemeriire kusaba nibaraba omuli uwe hatali kusaba uwe. (Yoh. 16:​23, 24) Bakaba basemeriire kumanya ensonga egi. Hanyuma ya Yesu kuhumbuuka, abeegeswa be nibasobora kuba baasikiiriziibwe kusaba uwe. Yesu akaba afookere munywani wa bo. Bakaba nibasobora kuteekereza ngu okugonza oku abainiire kukaba nikwija kumuleetera kuhurra okusaba kwabo kandi hanyuma akakugambira Ise. Baitu Yesu akabagambira ngu tibasemeriire kuteekereza bati. Habwaki? Habwokuba akabagambira ati: “Isenyowe naabagonza.” Ego Yahwe atugonza muno kuhika ha rulengo ngu nuwe wenka ahurra okusaba kwaitu. Ebigambo ebi eri nyegesa ya Baibuli ey’erukubandizibwaho ey’erukukwata ha kusaba. Wetegereze ekikirukumanyisa hali iwe: Kuraba omu kwega Baibuli, osoboire kumanya Yesu n’okumugonza. (Yoh. 14:21) Baitu kusisanaho n’abeegeswa ba Yesu ab’omu kyasa eky’okubanza, na iwe noosobora kusaba Ruhanga okimanyire ngu na uwe ‘naakugonza.’ Oyoleka ngu noikiririza omu bigambo ebi buli murundi osaba Yahwe.—1 Yoh. 5:14.

MANYA EBINTU EBIKULEETERA KUGURUKYAGURUKYA

11. Habwaki Sitaani asemererwa obu tutandika kugurukyagurukya Yahwe obu araaba naatugonza?

¹¹ Kiki ekisobora kukuleetera kugurukyagurukya Yahwe obu araaba naakugonza? Noosobora kugamba ngu Sitaani nuwe ndugirro y’okugurukyagurukya kwawe, kandi ago nigasobora kuba gali mananu. Sitaani ‘naaserra kutulya,’ kandi kimusemeza obu arora nitugurukyagurukya okugonza Yahwe oku atwiniire. (1 Pet. 5:8) Ijuka ngu okugonza Yahwe oku atwiniire kukamuleetera kuhayo ekicunguro—ekintu Sitaani eki arukugonza twehurre ngu tikitusemeriire. (Baheb. 2:9) Kiteekerezeeho, nooha ow’asemererwa obu tugurukyagurukya okugonza Yahwe oku atwiniire? Ni Sitaani. Kandi nooha ow’asemererwa kakuba tuhwamu amaani tukaleka kuheereza Yahwe? Ni Sitaani. Sitaani naagonza tuteekereze ngu Yahwe tatugonza. Baitu amananu gali Sitaani nuwe Yahwe ow’atagonza. Kandi gumu ha ‘mitego,’ Sitaani ei akira kukozesa nukwo kulengaho kutuleetera kwehurra ngu niitwe Yahwe abaatarukugonza kandi ngu aikara naatucwera omusango. (Bef. 6:11) Obu turaayetegereza ekintu Sitaani arukulengaho kukora, nitwija kucweramu kimu kumuhakaniza.—Yak. 4:7.

12-13. Obutahikirra bwaitu nibusobora buta kutuleetera kugurukyagurukya Yahwe obu araaba naatugonza?

¹² Haroho ekintu ekindi ekituleetera kugurukyagurukya Yahwe obu araaba naatugonza. Kandi eki nikyo obutahikirra obu twaijukwire. (Zab. 51:5; Bar. 5:12) Ekibi kikatwahukaniza hali Omuhangi waitu. Kandi kikasiisa omulingo tuteekerezaamu, enyehurra zaitu hamu n’obwomeezi bwaitu.

¹³ Ekibi kikasiisa enyehurra zaitu omu mulingo ngu kituleetera kwikara nitwecwera omusango, kwetuntura, kwehurra tutaine obulinzi hamu n’ensoni. Enyehurra nk’ezi zituhikaho obu tuba tukozere ekibi. Baitu obundi enyehurra nk’ezi zituhikaho obu twijuka ngu tuli bantu abatahikiriire—ekintu ekirukwahukanira kimu ha mulingo Yahwe yatuhangiremu. (Bar. 8:​20, 21) Nkooku motoka enyakwine emipiira edubukire, etasobora kugenda kurungi kwingana obu eba eri omu nyikara enungi, na itwe nk’abantu abatahikiriire titusobora kwetwaza omu mulingo omurungi kwingana nkooku Yahwe akaba atuhangire. Nahabweki tikirukuhuniriza obwire obumu obu tutandika kugurukyagurukya Yahwe obu araaba naatugonza. Kakuba eki kibaho, tusemeriire kwijuka ngu Yahwe ali ‘Ruhanga omukuru kandi ow’okutiinwa, . . . ayoleka okugonza okutalekera abo abamugonza, niboorobera ebiragiro bye.’—Neh. 1:5.

14. Kuteekerezaaho ekicunguro nikisobora kutukoonyera kita kuleka kugurukyagurukya Yahwe obu araaba naatugonza? (Abarooma 5:8) (Rora n’akasanduuko “Werinde Ebisuba by’Amaani g’Ekibi.”)

¹⁴ Ky’amananu ngu obwire obumu twehurra ngu okugonza kwa Yahwe tikutusemeriire. Amananu gali tikutusemeriire—kandi egi niyo ensonga habwaki okugonza kwe kuli kwembaganiza muno hali twe. Titusobora kugamba ngu okugonza kwa Yahwe kutusemeriire kusigikirra ha bintu ebi tukora. Baitu nabwo Yahwe akahayo ekicunguro nukwo tusobole kuganyirwa ebibi byaitu habwokuba naatugonza. (1 Yoh. 4:10) Ekindi, ijuka ngu Yesu akaija kujuna abasiisi hatali abahikiriire. (Soma Abarooma 5:8.) Busaho omuntu weena hali itwe asobora kukora ebintu omu mulingo oguhikire kikumi ha kikumi, kandi na Yahwe tarukukitunihirramu. Obu turaakyetegereza ngu obutahikirra bwaitu nibusobora kutuleetera kugurukyagurukya okugonza kwa Yahwe, tusemeriire kucweramu kimu kurwanisa enyehurra egi.—Bar. 7:​24, 25.

CWAMU KWIKARA OLI MWESIGWA

15-16. Kiki eki tusobora kugumya kakuba twikara tuli beesigwa hali Yahwe, kandi habwaki? (2 Samwiri 22:26)

¹⁵ Yahwe naagonza tukole encwamu enungi ey’okumugumiraho. (Bir. 30:​19, 20) Obu turaakikora, nitwija kukigumya ngu na uwe naija kwikara ali mwesigwa hali itwe. (Soma 2 Samwiri 22:26.) Obu turaikara tuli beesigwa hali Yahwe, nitwija kukigumya ngu naija kwikara naatukoonyera omu buli nyikara yoona ey’eratuhikaho omu bwomeezi bwaitu.

¹⁶ Nkooku twarora, twine ensonga nyingi ezituleetera kwikara tuteekaine obu tuba nituraba omu birengo. Tukimanyire ngu Yahwe naatugonza kandi naija kwikara naatusagika. Kandi eki nikyo Baibuli eyegesa. Kakuba tutandika kugurukyagurukya okugonza kwe, tusemeriire kwijuka ebintu ebi tumanyire ha kugonza kwa Yahwe, omu kiikaro ky’okuteeka omutima ha mulingo turukwehurramu omu kasumi ako. Leka twikale nitugumiza kimu amananu ag’omu Baibuli agarukugamba ngu okugonza kwa Yahwe okutalekera kwikaraho ebiro n’ebiro.