Abakuzire omu Myaka—Muli b’Omuhendo Hali Ekitebe

Obundi na iwe tokyasobora kukora ebintu ebi wakoraga kara habw’okukura omu myaka. Noobu kiraaba ngu omazire emyaka nyingi nooheereza Yahwe n’obwesigwa, noosobora kutunga enteekereza ey’etahikire habw’ebintu ebi otakyasobora kukora kasumi kanu. Ekyokurorraho, noosobora kutandika kulengesaniza ebi orukukora hati n’ebi wakoraga kara. Obu kiraaba nukwo kiri, kiki eki osobora kukora kusingura enteekereza egi?

YAHWE EKI ARUKUKUNIHIRRAMU

Weekaguze, ‘Kiki Yahwe eki arukunihirramu?’ Noosobora kutunga okuhuumuzibwa kuruga omu bigambo ebirukusangwa omu Ekyebiragiro 6:5, aharukugamba ngu: ‘Ogonzege Yahwe Ruhanga waawe n’omutima gwawe gwona, n’obwomeezi bwawe bwona, n’amaani gaawe goona.’

Kusigikirra ha rukarra oru, Yahwe naakunihirramu kumuheereza n’omutima gwawe gwona, n’obwomeezi bwawe bwona, n’amaani gaawe goona. Orukarra oru nirusobora kukukoonyera kwetantara kwerengesaniza n’abandi, rundi kulengesaniza ebi orukukora kasumi kanu n’ebi wakoraga kara.

Teekerezaho kinu: Obu okaba okyali muto, Yahwe wamuheerezaaga ekirukwingana nkaha? Abaheereza ba Yahwe abarukukira obwingi nibasobora kugamba ngu bakaba nibamuha ekirukukirayo oburungi. Hali iwe, eki nikyo ekikaba nikikirayo oburungi kusigikirra ha nyikara yaawe omu kasumi ako. Kasumi kanu noosobora kuha Yahwe ekirukwingana nkaha? Nikisobora kuba ngu kasumi kanu kyona eki orukuhayo nikyo ekirukukirayo oburungi eki osobora kuha Yahwe. Obu oraaba noorora enyikara yaawe omu mulingo ogu, noosobora kukyetegereza ngu nookyaha Yahwe ekirukukirayo oburungi nkooku wakoraga kara. Okaba noomuha ekirukukirayo oburungi omu kasumi ako, kandi na hati nikyo orukukora.

EKYOKURORRAHO KYAWE NIKISOBORA KUGASIRA ABANDI

Omu kiikaro ky’okuteekerezaaho ebintu ebi otakyasobora kukora, teekerezaaho emigisa nyingi ei oine ey’okukoonyera abandi omu myaka yaawe ey’obukuru. Nk’Omukristaayo ow’akuzire omu myaka noosobora kukora ebintu ebimu kasumi kanu ebi okaba otasobora kukora okyali muto. Ekyokurorraho, noosobora kukora ebintu nka binu:

Gambiraho abandi ebintu ebi orabiremu. Teekerezaaho ebigambo binu ebihandiikirwe omu Baibuli:

Omukama Daudi: “Nkaba ndi muto, hati ngurusire; baitu tinkabonaga ahikiriire asigirwe, nobubakuba abaijukurube nibaleega ebyokulya byabu.”—Zab. 37:25.

Yosuha: “Kandi dora, ekiro kinu ningenda orugendo abahansi bona nambere bagenda: kandi inywe mumanyire omu mitima yanyu inywena, nomu bwomezi bwanyu ngu busaho kigambo nekimu ekyalemere ha bigambo ebirungi byona [Yahwe] Ruhanga wanyu ebiyabagambiireho; byona bihikire nambere muli, busaho nekimu ekyalemere hali ebi.”—Yos. 23:14.

Obundi naiwe okabaza ebigambo nibyo bimu obu okaba okyali muto kugarramu abandi amaani. Daudi na Yosuha, bakabaza nibasigikirra ha bintu ebi baarabiremu. Habwokuba abaheereza ba Yahwe banu abeesigwa bakaba nibabaza ebi baarozere n’ebi baahuliire kumara emyaka nyingi, ebigambo byabo bikaba nibisobora kwesigwa.

Obu oraaba oikaire nooheereza Yahwe kumara emyaka nyingi, na iwe noosobora kubazaaho ebintu Yahwe aikaire naakukorra hamu n’abandi. Noijuka akasumi nambere warozere Yahwe naakoonyera abaheereza be omu mulingo ogw’embaganiza? Obu kiraaba nukwo kiri, kigambireho abandi! Nikisobora kubagarramu amaani, nkooku na iwe wagarwirwemu amaani hanyuma y’okugambiraho abandi ekintu ekirukugarramu amaani. Noosobora kugarramu ab’oruganda na banyaanya itwe amaani kakuba obagambiraho ebi orabiremu.—Bar. 1:11, 12.

Omulingo ogundi ogu osobora kugarramu abandi amaani nukwo kugenda omu nsorrokano maiso h’amaiso, nkooku kirukusoboka. Obu oraakikora noija kugarramu ab’oruganda na banyaanya itwe amaani, kandi na iwe ogarukwemu amaani. Connie, ou tusangirwe tubalizeeho, naagamba ati: “Kugenda omu nsorrokano maiso h’amaiso kinkoonyiire kutahwamu amaani habwokuba ab’oruganda na banyaanya itwe banyoleka okugonza ha Kyombeko ky’Obukama. Ndengaho kwoleka abandi okusiima kuraba omu kubaha ebisembo bike. Ngumizaamu ninkora kyona ekirukusoboka kwejumbira omu bintu eby’omwoyo ndi hamu n’ab’oruganda na banyaanya itwe.”

YAHWE ASIIMA AMAANI OTAMU KUMUHEEREZA

Omu Baibuli harumu ebyokurorraho bingi eby’abantu Yahwe aba yagonzaaga noobu kiraaba ngu enyikara zaabo tizabasobozesaaga kukora eki baakugondeze. Teekerezaaho Simeoni, Omunyaisaleeri ow’akaba akuzire omu myaka ayabaireho omu kasumi Yesu yazaaliirwemu. Simeoni obu yabungaga ha yekaru, naasobora kuba yaroraga abasigazi nibakora emirimo y’amaani. Baitu kandi uwe? Kusigikirra ha ndora y’abantu, akaba naasobora kuteekereza ngu habwokuba akuzire omu myaka takyali w’omugaso muno hali Yahwe. Baitu Yahwe yamuroraga omu mulingo ogurukwahukana. Yahwe akarora Simeoni nk’ow’ahikiriire, kandi ow’arukwekamba muno kumuheereza kandi yamuha omugisa ogw’okurora Yesu akyali nkerembe. Yahwe akakozesa Simeoni kuranga obunabbi obukaba nibwoleka ngu Yesu akaba naija kufooka Masiya! (Luk. 2:25-35) Mali, Yahwe atateeke omutima h’amaani ga Simeoni ag’omubiri oihireho akaguta ha kwikiriza kwe okugumire, kandi “n’omwoyo ogurukwera gukaba gumuroho.”

Na iwe noosobora kukigumya ngu Yahwe naasiima obuheereza bwawe noobu kiraaba ngu enyikara yaawe terukukusobozesa kumuheereza nkooku wakoraga kara. Hali Yahwe omuntu eki ahayo “nikiikirizibwa kusigikirra ha eki aine hatali eki ataine.”—2 Kol. 8:12.

Nahabweki teeka omutima hali eki osobora kukora. Ekyokurorraho teekerezaaho emiringo ey’erukwahukana ey’okutebeza ei osobora kwejumbiramu, noobu kwakuba habw’akacu kake. Noosobora kugarramu ab’oruganda na banyaanya itwe amaani kuraba omu kubaterra esimu rundi kubasindikira kaadi. Ebikorwa ebyanguhire eby’okugonza nibisobora kukwataho muno Abakristaayo bagenzi baawe, kukira muno obu biruga hali omuntu nka iwe ow’amazire akasumi naaheereza Yahwe .

Noobu kiraaba ngu bamu hali inywe abakuzire omu myaka mwine obuceke omu mubiri, nimukyasobora kuha Yahwe ekirukukirayo oburungi. Weetegereze ekyokurorraho kuruga omu East Africa ekiri omu kasanduuko akaine omutwe “Kikajuna Obwomeezi Bwe.”

Mwijuke ngu ekyokurorraho kyanyu eky’okwikiriza n’obwesigwa nikisobora kugarramu abandi amaani. Muteeriireho abandi eky’okurorraho ekirungi eky’okugumiisiriza kandi mukigumye ngu “Ruhanga tali atahikiriire okwebwa emirimo yanyu n’okugonza oku mwayolekere ibara lye, obu mwaheeriize abarukwera kandi nimukyagumizaamu kubaheereza.”—Baheb. 6:10.

IKARA OINE BINGI EBY’OKUKORA

Okuseruliiriza nikwoleka ngu abasaija n’abakazi baingi abakuzire omu myaka abeejumbira omu mirimo y’okukoonyera abandi baba n’obwomeezi oburungi, bateekereza kurungi, kandi boomeera kumara akasumi akaraihire.

Ky’amananu ngu kukorra abandi ebirungi tikirukwija kumarraho kimu ebizibu byona ebireetwaho okukura omu myaka. Obukama bwa Ruhanga bwonka nubwo burukwija kumarraho kimu ebizibu ebireetwaho kukura omu myaka hamu n’okufa, ebintu ebireetwaho obutahikirra obu twaijukwire kuruga hali Adamu.—Bar. 5:12.

Baitu nabwo, kwikara nookora Ruhanga ebi arukugonza okole kasumi kanu ebirukutwarramu kukoonyera abandi kumumanya, nikiija kukukoonyera kwikaza okunihira kwawe kugumire kandi kikukoonyere kuba n’obwomeezi oburungi. Abakuzire omu myaka mukimanye ngu Yahwe naasiima byona ebi murukukora kumuheereza, kandi ngu n’ekitebe nikibarora nk’ab’omuhendo habw’okwikiriza kwanyu .