Hereza Yahwe n’Omutima Gwawe Gwona!

1-3. Kimanyisa ki kuhereza Yahwe “nomutima oguhikiriire”? Ha ekyokurorraho.

ITWENA tituhikiriire kandi tukora ensobi. Baitu ekirungi, Yahwe atuteriireho ekicunguro kandi ayetegekere kutuganyira. Nitusobora kumusaba ekiganyiro kakuba tuba tuli baculeezi kandi abarukwegarukamu. Tukigumye ngu Yahwe tarukwija kututwaza “nkebibi byaitu okubiri.” (Zabuli 103:10) Baitu nabwo, tusemeriire kumuhereza “nomutima oguhikiriire.” (1 Ekyebyomubusinge 28:9) Nitusobora kuhereza tuta Yahwe n’omutima oguhikiriire kandi kunu tutahikiriire?

² Kutukonyera kwetegereza, leka tulengesanize obwomeezi obw’Omukama Asa n’obw’Omumaka Amaziya. Abakama banu boona bakakora ebintu birungi, baitu kandi bakakora n’ensobi habwokuba bakaba batahikiriire. Baitu Baibuli egamba ngu “omutima gwa Asa gukaba guhikiriire ebirobye byona.” (2 Ekyebyomubusinge 15:16, 17; 25:1, 2; Enfumo 17:3) Obwire bwona yalengahoga kukora ebirukusemeza Yahwe kandi akahereza Yahwe “nomutima oguhikiriire” rundi akemarra hali Yahwe. (1 Ekyebyomubusinge 28:9) Baitu omukama Amaziya uwe atahereze Yahwe “nomutima oguhikiriire.” Obu yasingwire abanyanzigwa ba Ruhanga, akaleta ebisisani byabo yatandika kubiramya.​—2 Ekyebyomubusinge 25:11-16.

³ Omuntu arukuhereza Ruhanga “nomutima oguhikiriire” aba n’agondeza kimu Yahwe kandi n’agonza kumuramya ebiro n’ebiro. Baibuli ekira kukozesa ekigambo ‘omutima’ kumanyisa eki ekituli omu nda. Nikitwarramu ebitekerezo byaitu, ebi tugonza, eki twakugondeze kukora omu bwomeezi bwaitu, n’ensonga habwaki tukora ebintu ebimu. Nobuturaaba tutahikiriire, nitusobora kuhereza Yahwe n’omutima gwaitu gwona. Tumuhereza habwokuba nitugonza baitu hatali ngu habwokuba tumazire emyaka nyingi nitumuhereza.​—2 Ekyebyomubusinge 19:9.

4. Kiki eki turukugenda kwegaho?

⁴ Nitusobora kwetegereza kurungi eki kirukumanyisa kuhereza Yahwe n’omutima gwona kakuba tubazaaho obwomeezi bwa Asa hamu n’obw’abakama abandi basatu aba Yuda abalinzire obwesigwa. Banu nubo Yehosafati, Hezekiya, na Yosiya. Abakama banu n’obu baraaba bakozere ensobi, bakeyongera kukora ebintu ebirukusemeza Yahwe. Akarora ngu bakamuhereza n’emitima ehikiriire. Habwaki Yahwe yabarozere ati, kandi nitusobora tuta kuhondera ekyokurorraho kye?

“OMUTIMA GWA ASA GUKABA GUHIKIRIIRE”

5. Asa akakora ki obu yafokere mukama?

⁵ Asa akaba mukama wakasatu owa Yuda hanyuma y’ihanga lya Isareri kubaganizibwamu kufooka obukama bwa Yuda n’obukama bwa Isareri. Asa obu yafokere mukama wa Yuda, akamalirra omu mutima gwe okumaraho okuramya okw’ebisuba n’ebikorwa byona ebibi eby’obusihani kuruga omu bukama bwe. Akahwerekereza ebisisani abantu baramyaga kandi yabinga abamalaaya abaikaraga ha yekaro. Asa akaihaho nyinenkuru ebitiinisa bye habwokuba “akakora ekisisani ekirukunugwa.” (1 Ekyabakama 15:11-13) Kandi Asa akekambisa abantu “okuserra Mukama nokukora ebiragiro nebyatairweho.” Asa akakora kyona ekirukusoboka kukonyera abandi kuhereza Yahwe.​—2 Ekyebyomubusinge 14:4.

6. Abanya Esyopiya obu baramagiire Yuda, Asa akakora ki?

⁶ Emyaka ikumi eyabandize ey’obulemi bwa Asa, Yuda ekaikara etarumu obulemu. Obu harabireho akaire, abanya Esyopiya bakaija kurwanisa Yuda baine abasirikale akakaikuru kamu n’egaali bikumi bisatu. (2 Ekyebyomubusinge 14:1, 6, 9, 10) Asa akakora ki? Atagurukyagurukye ngu Yahwe akaba n’agenda kukonyera abantu be. Nahabweki akasaba Yahwe kubakonyera kusingura obulemu. (Soma 2 Ekyebyomubusinge 14:11.) Obwire obumu Yahwe yakonyeraga abantu be kusingura obulemu, n’obu babaga batali besigwa haluwe. Yakikoraga kwoleka ngu ali Ruhanga ow’amananu. (1 Ekyabakama 20:13, 26-30) Baitu omurundi gunu Yahwe akakonyera abantu be habwokuba Asa akesiga Ruhanga. Yahwe akagarukamu esaara ya Asa kandi Asa yasingura obulemu. (2 Ekyebyomubusinge 14:12, 13) Hanyuma y’obwire Asa akakora ensobi y’amaani obu yasabire obukonyezi kuruga hali omukama wa Aramu omu kiikaro ky’okubusaba Yahwe. (1 Ekyabakama 15:16-22) Baitu n’omu bwire bunu, Yahwe akarora ngu Asa akaba n’amugonza. Omutima gwe “gwahikirraga ahali Mukama ebirobye byona.” Ekyokurorraho kya Asa ekirungi nitusobora kukyegeraho ki?​—1 Ekyabakama 15:14.

7, 8. Nosobora kuhondera ota ekyokurorraho kya Asa?

⁷ Nitusobora kumanya tuta obu turaaba twemaliire hali Yahwe? Nitusobora kwekaguza: ‘Ndayorobera Yahwe n’omu bwire obu kiraaba kitanguhire? Ncweriremu kimu ngu ninyija kwikaza ekitebe kye kyecumi?’ Teramu akasisani orole obumanzi Asa akaba nayetaagisa kurora yaihaho nyinenkuru ekitiinisa ekye! Naiwe obwire obumu n’osobora kwetagisa kwoleka obumanzi nk’obwa Asa. Ekyokurorraho, kakuba omunyabuzaale rundi omunywani wawe nfa nanfe akora ekibi, akanga kwegarukamu, akabingwa omu kitebe? N’osobora kukora kyona ekirukusoboka kwetantara kukoragana n’omuntu ogu? Omutima gwawe gurakusindikiriza kukora ki?

⁸ Nk’omukama Asa, naitwe nitusobora kurora ngu buli muntu n’atuharana. N’asobora kuba ali mwegi mugenzi waawe rundi omwegesa arukukusekereza habwokuba oli omu ha Bakaiso ba Yahwe. Rundi abakozi bagenzi baawe nibakweta mudoma habwokuba oyosa ebiro ebimu nukwo ogende ha ruso’rokano orukooto, rundi habwokuba tokora kuhinguza obwire. Kakuba kikuhikaho, wesige Yahwe nk’oku Asa yakozere. Saba Yahwe akukonyere, tunga obumanzi, kandi oikale n’okora ekihikire. Oijuke ngu Yahwe akagarramu Asa amaani, kandi naiwe n’aija kukuha amaani.

9. Nitusobora tuta kusemeza Yahwe obu turukuba nitutebeza?

⁹ Asa atefeho wenka baitu akekambisa n’abandi kuserra Yahwe. Naitwe tukonyera abantu kuramya Yahwe. Akyetegereza obu tugambira abandi ebirukumukwataho. Kakimusemeza obwarora ngu nitutebeza habwokuba nitumugonza kandi nitugondeza abantu obwomeezi oburungi obw’omu maiso!

YEHOSAFATI AKASERRA YAHWE

10, 11. Nitusobora kuhondera tuta ekyokurorraho kya Yehosafati?

¹⁰ Omutabani wa Asa ayayetwaga Yehosafati “akagendera omu muhanda gwa Asa ise.” (2 Ekyebyomubusinge 20:31, 32) Omu mulingo ki? Nka ise, Yehosafati akekambisa abantu kwikara nibaramya Yahwe. Akatuma abasaija omu mbuga za Yuda okwegesa abantu nibakozesa “ekitabu ekyebiragiro bya Mukamu.” (2 Ekyebyomubusinge 17:7-10) Akahikira kimu omu nsi y’obukama obw’amatemba obwa Isareri, n’ayegesa abantu omu nsozi za Eferaimu, “yabaga’ra hali Mukama.” (2 Ekyebyomubusinge 19:4) Yehosafati akaba mwebembezi “ayase’raga Mukama nomutimagwe gwona.”​—2 Ekyebyomubusinge 22:9.

¹¹ Omu kasumi kanu, Yahwe n’agonza abantu omu nsi yoona okwegesebwa ebirukumukwataho, kandi itwena nitusobora kukonyera omu omulimo gunu. Naiwe oine ekigendererwa ky’okukora omulimo gunu buli kwezi? Naiwe wakugondeze kwegesa abandi Baibuli nukwo nabo batandike kuramya Yahwe? Ekintu kinu okigambiraho Yahwe omu saara zaawe? Kakuba otamu amaani, Yahwe n’asobora kukukonyera kutunga omuntu w’okwegesa Baibuli. Oyetegekere kwerekesa obwire bwawe bw’okuhumura nukwo oyegese omuntu Baibuli? Nk’oku Yehosafati yakonyire abandi kugarukamu kuramya Yahwe, naitwe nitusobora kukonyera abo abafukire omu by’omwoyo. Ekintu ekindi, abagurusi bakora entekaniza z’okubungira n’okukonyera ababingirwe omu kitebe abasobora kuba balekereho kukora ekibi ekyababingisize.

12, 13. (a) Yehosafati obu yatiinire, kiki eki yakozere? (b) Habwaki tusemeriire kuhondera ekyokurorraho kya Yehosafati?

¹² Ihe ly’amaani obulyaizire kurwanisa Yuda, Yehosafati akahondera ekyokurorraho kya Asa ise. (Soma 2 Ekyebyomubusinge 20:2-4.) Akatiina kandi yasaba Yahwe kumukonyera. Omu kusaba kwe, akoleka ngu bakaba batasobora kusingura ihe ly’omunyanzingwa omu maani gabo bonka. Kandi akagamba ngu uwe n’abantu be bakaba batamanyire eky’okukora. Yehosafati akaba atarukugurukyagurukya ngu Yahwe akaba n’agenda kubakonyera. Akagamba: “Amaiso gaitu gali haliwe.”​—2 Ekyebyomubusinge 20:12.

¹³ Nka Yehosafati, obwire obumu naitwe nitusobora kuba tutamanyire eky’okukora kandi nitusobora kuhurra tutinire obuturukuba twine ekizibu. (2 Abakolinso 4:8, 9) Baitu oijuke eki Yehosafati yakozere. Omu maiso g’abantu boona, Yehosafati akasaba Yahwe kandi yamusobororra nk’oku baali nibahurra batarukusobora. (2 Ekyebyomubusinge 20:5) Abanyineka nimusobora kwegera ha kyokurorraho kya Yehosafati. Obu murukuba mwine ebizibu omu maka, mwine kusaba Yahwe kubakonyera n’okuboleka ekyokukora. Mutaswara ab’omu ka kuhurra nimugambira Yahwe ebizibu. Nikiija kwoleka ab’omu ka omulingo murukwesiga Yahwe. Akakonyera Yehosafati, kandi naiwe n’aija kukukonyera.

HEZEKIYA AKAKORA EBIRUNGI OMU MAISO GA MUKAMA

14, 15. Hezekiya akoleka ata ngu akaba n’ayesigira kimu Yahwe?

¹⁴ Omukama Hezekiya nauwe “akagumira hali Mukama” n’obukiraaba ngu ise akataho ekyokurorraho kibi eky’okuramya ebisisani. Hezekiya “akaihaho ebiikaro ebiraihire, yacwa amabale agaraihire, yatema Asera: yacwacwana enjoka eyomulinga Musa eyiyakozire,” habwokuba Abaisareri bakaba nibagiramya. Hezekiya akaba ayeheriireyo kimu hali Yahwe. ‘Yakwataga ebiragirobye, Mukama ebiyaragiire Musa.’​—2 Ekyabakama 18:1-6.

¹⁵ Hezekiya obwakaba nalema, ihe ly’amaani ery’Asura likaramagira Yuda nirigonza kuhwerekereza Yerusalemu. Omukama wa Asura arukwetwa Senakeribu akagaya Yahwe kandi yalengaho kutiinisa Hezekiya nukwo ayeheyo. Omu kasumi ako, Hezekiya akesigira kimu Yahwe kandi yamusaba amukonyere. Akakimanya ngu Yahwe akaba aine amaani agarukukira ihe lya Asura kandi ngu akaba n’asobora kujuna abantu be. (Soma Isaya 37:15-20.) Ruhanga akagarukamu esaara ye obu yatumire maraika omu ayaisire abasirikale aba Asura abarukuhika omu 185,000.​—Isaya 37:36, 37.

16, 17. Nosobora ota kuhondera ekyokurorraho kya Hezekiya?

¹⁶ Hanyuma y’akasumi, Hezekiya akarwara kandi akaba ali haihi kufa. Omu bwire bunu obw’obujune, akesengereza Yahwe okwijuka obwesigwa bwe n’okumukonyera. (Soma 2 Ekyabakama 20:1-3.) Yahwe akahurra esaara ya Hezekiya kandi yamukiza. Kusigikirra ha Baibuli, nitukimanya ngu biro binu titurukunihira Yahwe kukora eky’amahano okutukiza oburwaire rundi okutwongeraho obuhangaazi. Baitu nabwo nitusobora kuba nka Hezekiya tukesiga Yahwe kutukonyera. Nitusobora kumugambira: “Ijuka nu ai Mukma nkwesengeriize, okunagenderaga omu maiso gawe omu mananu nomutima oguhikiriire.” Nokigumya ngu Yahwe n’aija kukurolerra n’omu bwire obw’oburwaire?​—Zabuli 41:3.

¹⁷ Mulingo ki ogundi ogu tusobora kuhondera ekyokurorraho kya Hezekiya? Nihasobora kuba haroho ekintu ekirukukulemesa kuba n’enkoragana enungi na Yahwe, rundi nikikumarra obwire obu wakubaire n’okozesa kuhereza Yahwe. Ekyokurorraho, biro binu abantu baingi nibatwara abantu bagenzi babo kuba nk’ebisisani by’okuramya. Begomba abantu ruranganwa n’abantu bandi aba batarukumanya. Abamu bamara obwire bwingi nibasoma ebirukukwata ha bantu banu rundi nibarora ebisisani byabo. Rundi bamara obwire bwingi nibakozesa emikura rundi emiringo endi okubaza n’abantu. Tikiri kibi kubaza n’abanyabuzale rundi abanywani nitukozesa emiringo enu. Baitu nitusobora kusiisa obwire bwingi nitukozesa emikura. Nitusobora n’okutunga emyehembo kakuba abantu boleka ngu nibagonza ebisisani rundi ebigambo ebitukozeseze ha mukura. Rundi kakuba tukyetegereza ngu abamu tibakyafaho ebiturukutekaho, nitusobora kubihirwa. Baitu, tusemeriire kuhondera ekyokurorraho ky’omukwenda Paulo, Akura, na Pirisikira. Notekereza basiisaga muno obwire nibalengaho kumanya buli kintu abantu bakoraga otwaliremu n’abatali bahereza ba Yahwe? Baibuli n’egamba ngu Paulo ‘akeherayo kimu omu mulimo gw’okutebeza.’ Kandi Pirisikira na Akura bakakozesa obwire bwabo okutebeza n’okusoborra abandi “omuhanda gwa Ruhanga.” (Engeso Ezabakwenda 18:4, 5, 26) Nitusobora kwekaguza: ‘Ninyegendereza muno kurora ngu abantu timbafoire nk’ebisisani ebiramibwa? Ninyegendereza muno kurora ngu tinasiisa obwire bwingi ha bintu ebitali bikuru?’​—Soma Abefeso 5:15, 16.

YOSIYA AKOROBERA EBIRAGIRO BYA YAHWE

18, 19. Nitusobora tuta kuba nka Yosiya?

¹⁸ Omukama Yosiya nauwe akahondera ebiragiro bya Yahwe “nomutimagwe gwona.” (2 Ekyebyomubusinge 34:31) Yosiya akaba ali mwijukuru w’enyakabiri owa Hezekiya Obwakaba akyali muto, “akatandika okuse’ra Ruhanga wa Daudi isenkuru.” Kandi obu yahikize emyaka 20, akatandika kwihamu okuramya kw’ebisisani kwona omu Yuda. (Soma 2 Ekyebyomubusinge 34:1-3.) Yosiya akalengaho muno kusemeza Yahwe n’okukira abakama bandi aba Yuda. Kiro kimu, nyakatagara omukuru akazoora ekitabu eky’Ebiragiro bya Yahwe omu yekaro. Kinu nikisobora kuba kitabu eki Musa wonyini yahandiikire! Omuhandiiki obu yakisomiire Yosiya, akakyetegereza ngu kuhereza Yahwe kwonka kikaba kitarukumara. Kandi akekambisa n’abandi kukora nikyo kimu. Ekyarugiremu? Abantu “bataleke okukuratira Mukama” ebiro byona Yosiya obwakaba n’alema.​—2 Ekyebyomubusinge 34:27, 33.

¹⁹ Obworaaba okyali muto, nosobora kuhondera ekyokurorraho kya Yosiya nukwo okeyongera kumanya Yahwe. Ekyokurorraho kya isenkuru Yosiya Manase hanyuma y’okwegarukamu nikisobora kuba kyayegeseze omukama onu ngu Yahwe ayetegekere kuganyira. Naiwe n’osobora kwegera ha by’okurorraho by’abantu abakuru abali omu ka n’omu kitebe kyanyu. Nibasobora kukugambira ebintu bingi muno ebi Yahwe abakoliire. Ekindi, ijuka omulingo Yosiya yayehuliiremu hanyuma y’okwetegereza Ebyahandiikirwe eki bikaba nibigamba. Akaba ayetegekere kusemeza Yahwe kandi aho n’aho akakora empinduka. Naiwe kakuba osoma Ebyahandiikirwe, nibiija kukukonyera kworobera Yahwe kuruga ha mutima. Eki nikiija kugumya enkoragana yaawe na Yahwe kandi nikiija kukuletera okusemererwa. Kandi nikiija kukwekambisa kugambira abandi ebirukukwata hali Yahwe. (Soma 2 Ekyebyomubusinge 34:18, 19.) Kakuba osoma Baibuli, nosobora kwetegereza ngu haroho emiringo nyingi nambere osobora kusemezamu obuhereza bwawe hali Ruhanga. Kandi kakuba orora nambere orukwetagisa kusemeza, tamu amaani gaawe goona kukora empinduka zinu nka Yosiya.

HEREZA YAHWE N’OMUTIMA GWAWE GWONA!

20, 21. (a) Abakama bbana abatubalizeeho bakaba na bintu ki ebirukusisana? (b) Kiki ekiturukugenda kubazaaho omu kicweka ekirukuhonderaho?

²⁰ Ebyokurorraho binu eby’abakama bbana aba Yuda abaheriize Yahwe n’emitima yabo yoona bitwegeseze ki? Abasaija banu bakaba bacweriiremu kimu okusemeza Yahwe n’okumuramya omu bwomeezi bwabo bwona. Bakesiga Yahwe obu batahiriirwe abanyanzigwa ab’amaani. Ekirukukira obukuru, bakahereza Yahwe habwokuba bakaba nibamugonza.

²¹ Abakama banu abbana n’obu baraaba baali batahikiriire kandi bakoraga ensobi, Yahwe akabagonza muno. Akarora ekikaba kiri omu mitima yabo kandi akaba akimanyire ngu mali nibamugonza. Naitwe tituhikiriire kandi tukora ensobi. Baitu Yahwe n’aija kusemererwa obwararora ngu nitumuhereza n’omutima gwaitu gwona. Omu kicweka ekirukuhonderaho, nitwija kurora ensobi abakama banu ezi bakozere n’omulingo zirukutuhabura.