Nk’Oku Osobora Kwesomesa Baibuli omu Mulingo Ogurakugasira Kandi Okagyegondezamu

Yosuha nasoma Ebiragiro; ebisiika bya Yeriko nibigwa baitu enju ya Rahabu esigara etagwire; Yosuha nasaba aimukize emikono ye haiguru

YOSUHA nuwe akaba nagenda kwebembera ihanga lya Isareri kulihikya omu Nsi ey’Ekaba Eraganiziibwe. Ekintu kinu kyali kitarukugenda kumwanguhira. Baitu, Yahwe akamugumya kandi yamugarramu amaani. Akamugambira ngu: “Ofoke wamani, noguma muno omutima.” Yahwe akagambira Yosuha ngu kakuba asoma Ebiragiro kandi akabyorobera, akaba nagenda kukora encwamu ez’amagezi kandi abe musinguzi.—Yosuha 1:7, 8.

Kasumi kanu tuli omu biro “ebyakabi kaingi,” nahabweki obwomeezi nibusobora kutugumanganira. (2 Timoseo 3:1) Baitu naitwe obuturaaba nitugonza kuba abasinguzi nka Yosuha, twine kuhondera obuhabuzi Yahwe obuyamuhaire. Tusemeriire kusoma Baibuli buli kiro kandi tukozese ebitusomere kukora encwamu enungi.

Baitu abamu omuliitwe nitusobora kuba tutamanyire omulingo gw’okwesomesamu rundi tuhurra tutaine ekihika eky’okwesomesa. Leka twijuke ngu, okwesomesa Baibuli kikuru muno. Obw’oraaba n’osoma ebiri omu kasanduko akaine omutwe “Lengaho Kukozesa Amagezi Ganu,” noija kusangamu amagezi agasobora kukukonyera kugasirwa n’okwegondeza omu kwesomesa kwawe.

Omuhandiki wa Zabuli akagamba ati: ‘Ongendese omu muhanda gwebiragiro byawe; Baitu nibyo nkyanganukira.’ (Zabuli 119:35) Nikisoboka naiwe kuhurra n’ogonza kwesomesa Ekigambo kya Ruhanga. Noija kuzoora ebintu ebindi bingi kakuba oyeyongera kwesomesa Baibuli.

N’obukiraaba ngu torukwija kwetagisibwa kwebembera ihanga nk’onku Yosuha yakozire, naiwe nk’omuntu oine obulemeezi. Nahabweki, nka Yosuha, oyesomese Ekigambo kya Ruhanga kandi oteke omu nkora eby’orukuba osomere. Obu nubwo orakora encwamu ez’amagezi kandi okaba musinguzi.

LENGAHO KUKOZESA AMAGEZI GANU

Otakatandikire okwesomesa, banza osabe. Baibuli erumu ebiteekerezo bya Yahwe kandi bikahandikwa nukwo bikugasire. Nahabweki obworaaba n’osoma Baibuli, saba Yahwe akukonyere osobole kwetegereza, n’okwijuka eby’osomere kandi bikukonyere kukora encwamu enungi omu bwomeezi bwawe.—Ezera 7:10.
Wekaguze ebikaguzo obworaaba n’osoma Baibuli rundi ebitabu eby’Omwiru omwesigwa. Ekyokurorraho, wekaguze: ‘Ekicweka kinu ekinsomere nikinyegesa ki hali Yahwe? Ekicweka kinu kiine akakwate n’obutumwa obukuru obuli omu Baibuli? Ninsobora kukozesa nta ebinsomere kukonyera abantu abandi?’
Wecumitirize muno ha by’orukuba osomere. Obworaaba osomere ekintu, otakeyongiireyo banza oyekaguze: ‘Ekintu kinu nikindetera kwehurra nta? Habwaki nikindetera kwehurra omulingo gunu? Kine akakwate n’ebimu ha bintu ebi narabiremu kara, ebi ndiyo nindabamu hati, rundi ebisobora kumbaho omu kasumi ak’omu maiso? Ninsobora nta kuta omu nkora emisingi enu rundi obuhabuzi bunu?’ (Yobu 23:5; Zabuli 49:3) Obworaaba n’oyecumitiriza, lengaho kurora obukiraaba nikikwanguhira kusoborra ensonga habwaki Yahwe atanga abaheereza be kukora ebintu ebimu. Rundi n’osobora kwekaguza, bintu ki ebyakurugiremu kakuba omuntu ow’osomereho yakozere ebintu omu mulingo ogurukwahukanaho n’ogu ogu yabikozeremu.—Ekyebiragiro 32:28, 29.
Obworaaba n’osoma lengaho kuteramu akasisani. Ekyokurorraho, n’osobora kuteramu akasisani okarora bagenzi ba Yusufu nibamutunda hali Abaisameri? (Okubanza 37:18-28) Kiki eky’orukurora, kiki eky’orukuhurra, kandi kiki ekirukukuboyera? Weteke omu bigere by’abo ab’orukusomaho. Baali nibatekeezaaho ki kandi baali nibehurra bata? Kakuba okozesa obusobozi bwawe obw’okuteramu akasisani, okusoma kwawe nikwija kukugasira.
Kozesa ebikwato byaitu eby’okwesomesa ebitairweho ekitebe. Ebikwato binu nibisobora kutukonyera kwegondeza omu kuseruliiriza. Yega kukozesa ebikwato ebiri omu rulimi rwawe, bibe biri ha mukura rundi biri omu bitabu ebitiirwe. Otatiina kukaguza abandi kukukonyera kwega kubikozesa kurungi. Ekyokurorraho, Watch Tower Publications Index rundi Research Guide for Jehovah’s Witnesses nibiija kukukonyera kuzoora ebihandikirwe ha masomo agarukwahukana kandi nibiija kusoborraho enkarra nyingi eziri omu Baibuli. Kozesa ebyongirweho ebiri omu Baibuli yaitu eya New World Translation of the Holy Scriptures obumuraaba mubiine omu rulimi rwanyu. Ebyongirweho binu nibibazaaho ebintu eby’omugaso ebirukukwata ha biikaro, omulingo ebintu birukuhonderana, endengo n’ebipimo, n’ebintu ebindi.
Komamu ensonga enkuru. Eki nikiija kukukonyera kwijuka ebintu ebi wakamara kusoma. Kirungi kubalizaaho abandi ebyosomere. Omu by’osomere, osangiremu ebintu ebyosobora kukozesa omu buheereza? Obworakora ebintu binu, noija kwikara noijuka ensonga enkuru, kandi n’abandi nibaija kugasirwa omu kwesomesa kwawe.