Obulemu omu Ukraine Bulesereho Ibura ly’Ebyokulya Kweyongera

Omu Maayi 19, 2022, Akatebe ak’Ebyokwerinda omu Kitongole eky’Amahanga ag’Eteraine kakatunga ripooti kuruga omu bantu ab’obujunanizibwa abarukuhingura 75 erukugamba ngu “ibura ly’ebyokulya omu nsi yoona, erisangirwe rireserweho oburwaire bwa Korona rundi COVID-19 hamu n’empindahinduka omu nyikara y’obwire, hati ririyo nirihika ha rulengo orw’okufooka enjara omu nsi yoona.” Hanyuma ya ripooti egi, Abakugu omu byentahya bakarangirra ngu “habw’obulemu, ensi ey’esangirwe eine ebizibu bingi, niija kubamu abantu baingi abataine ebyokulya.” Baibuli ekaranga ngu hakaba nihaija kubaho enjara omu busumi bwaitu, baitu n’etuha n’obukonyezi kusobora kugumisiriza.

Baibuli ekaranga ngu hakaba nihaija kubaho ibura ly’ebyokulya

•  Yesu akaranga ngu: “Ihanga liriramagira ihanga, obukama buliramagira obukama: halibaho enjara.”—Matayo 24:7, NWT.

•  Ekitabu kya Baibuli ekirukwetwa Okusuku’rwa nikibazaaho abavugi b’embaraasi bbana. Omu halibo nakikirra obulemu. Naahonderwa ondi arukukikirra enjara, akasumi nambere kirigumira abantu kutunga ebyokulya kandi abantu baliba nibabitunda ha mihendo eya haiguru. “Nkarora embarasi erukwiragura; n’ogu akaba agiikalireho anyina eminzaani omu mukono gwe. Nkahurra nk’iraka . . . Likagamba, ‘Endengo y’engano niija kugurwa omusaara ogw’ekiro kimu, n’endengo isatu eza sayiri nazo niziija kugurwa omusaara ogw’ekiro kimu.”—Okusuku’rwa 6:5, 6, Contemporary English Version.

Obunabbi bunu oburukukwata ha ibura ly’ebyokulya buliyo nibuhikirizibwa omu kasumi kanu, Baibuli akeyeta ‘ebiro ebya hanyuma’ rundi ebiro ebya ha mpero (2 Timoseo 3:1) Kumanya ebirukukiraho ha birukukwata ha ‘biro ebya hanyuma’ hamu n’okuvuga okw’embaraasi ina ez’omu Okusuku’rwa, rora vidiyo Ensi ikaire n’ehinduka kuruga omu 1914 kandi osome ekicweka “Abavugi b’Embaraasi Bbana—Nubo Baha?”

Omulingo Baibuli esobora kutukonyera

•  Baibuli erumu amagezi agasobora kutukonyera kugumira enyikara ezigumangaine, otwaliremu n’emihendo y’ebyokulya kutemba rundi n’ebyokulya kuba bike. Rora ebyokurorraho ebimu ebiru omu kicweka “Omulingo Osobora Kukozesa Ebintu Bike.”

•  Baibuli eha okunihira ngu ebintu nibiija kusemera. N’eraganiza akasumi obu “halibaho omweru gw’ebyokulya eby’enjuma omu nsi” kandi buli omu aliba aine ebyokulya bingi. (Zabuli 72:16, NWT) Kumanya ebirukukiraho ebirukukwata ha kunihira Baibuli okweha ha kasumi ak’omu maiso, soma ekicweka “Okunihira Kwonyini okw’Ebiro eby’Omu Maiso Ebirungi.”