Omupiira ogw’Ekikopo ky’Ensi Yoona Mali Nigusobora Kuleetaho Obumu omu Bantu?—Baibuli Ekibazaaho Ki?

Abantu nk’obuhumbi butaano nibanihirwa kurora omupiira ogw’ensi yoona (FIFA World Cup) ogwatandikire Novemba 20 kugarukira Desemba 18, 2022. Baingi bahurra ngu emizaano nk’enu tegarukira ha kuleetera abantu kwehurra ngu bali omu bumu obubarukuba nibagirora.

• “Emizaano eine amaani agasobora kuhindura ensi. Eine amaani ag’okwekambisa abantu. Eine amaani ag’okuleetera abantu kuba omu bumu omu mulingo ogw’embaganiza.”—Nelson Mandela, ow’akaba ali mwebembezi w’ihanga lya South Africa.

• “Omupiira gw’ebigere . . . guleetaho obumu omu kunihira, omu kusemererwa, omu nyehurra, omu kugonza kandi guleetera abantu kwehurra ngu baine ekibarukusisaniza.”—Gianni Infantino, Omwebembezi wa FIFA.a

Omupiira ogw’ekikopo ky’ensi yoona rundi emizaano endi n’esobora kuhikiriza ekintu kinu eky’amaani? Haroho okunira kwona okw’obusinge n’obumu?

Mali Guleetaho Obumu?

Omupiira ogw’ekikopo ky’ensi yoona ogw’omwaka gunu gubaire gutali mupiira kwonka baitu gubaire nigutwarramu n’ebintu ebindi. Emizaano eretiire abantu kubazaaho muno ensonga ezirukukwata h’abantu, eby’obulemi, kusoroorangana hamu n’obutali bwinganiza omu by’entahya.

Baitu nabwo baingi bakisangire ngu kibasemeza kurora emizaano ey’ensi yoona nk’omupiira ogw’ekikopo ky’ensi yoona. Baitu, n’obukiraaba ngu abantu nibagonza emizaano eteranize hamu abantu, tesobora kuleeteho obumu obw’orutekerro. Oihireho eyoleka entekereza n’ebikorwa eby’okwebaganizaamu Baibuli eby’egamba ngu byakwolekere nk’oku tuli “omu biro bya hanyuma.”—2 Timoseo 3:1-5.

Okunihira Kwonyini okw’Obumu omu Nsi Yoona

Baibuli n’eraganiza ngu ensi yoona eribamu obumu bwonyini. N’eraganiza ngu abantu boona omu nsi baliba omu bumu hansi ya gavumenti ey’omu iguru erukwetwa “Obukama bwa Ruhanga.”—Luka 4:43; Matayo 6:10.

Yesu Kristo, Omukama w’Obukama obu naija kukigumya ngu omu nsi yoona habamu obusinge. Baibuli egamba ngu:

• “Abahikiriire balibona omugisa; nobusinge bwingi.”—Zabuli 72:7.

• “Alijuna omunaku obwakunga . . . Alicungura obwomezi bwabu omu kwenderezebwa nitima.”—Zabuli 72:12, 14.

N’omu kasumi kanu, enyegesa za Yesu ziteraniize obukaikuru n’obukaikuru bw’abantu omu mahanga 239. Beegere kuleka enobi. Kumanya ebirukukiraho soma ebicweka ebiri hansi y’omutwe “Omulingo Tusobora Kusingura Enobi.”