Habwaki Abakaiso ba Yahwe Batagwera Rubaju omu by’Obulemi?
Abakaiso ba Yahwe baine ensonga habwaki baikara batagweriire rubaju omu by’obulemi kandi ensonga ezi nizisigikirra ha Baibuli. Tituserurra ab’eby’obulemi rundi ebitebe by’obulemi akaruuru, titukoma, titwesimbaho rundi kulengaho kuhindura gavumenti. Baibuli ebazaaho ensonga habwaki tutasemeriire kugwera rubaju.
Tuhondera ekyokurorraho kya Yesu ow’atarayejumbiire omu by’obulemi. (Yohana 6:15) Akegesa abegeswa be kutaba ‘kicweka ky’ensi’ kandi akyoleka kurungi ngu tibasemeriire kugwera rubaju omu by’obulemi.—Yohana 17:14, 16; 18:36; Marako 12:13-17.
Tusagika Obukama bwa Ruhanga, Yesu obuyabalizeeho ati: “Nenjiri enu eyobukama eritebezebwa omu nsi zona.” (Matayo 24:14) Habwokuba nitusagika Obukama bwa Ruhanga, kandi tuhairwe obujunanizibwa obw’okubugambiraho abandi, twikara tutagweriire rubaju omu by’obulemi omu nsi yoona n’omu ihanga nambere twikara.—2 Abakolinso 5:20; Abefeso 6:20.
Obutwikara tutagweriire rubaju, kitusobozesa kugambira abantu ab’ebitebe byona eby’obulemi amakuru amarungi ag’Obukama bwa Ruhanga tutarukutiina. Omu bigambo n’omu bikorwa byaitu tulengaho kwoleka ngu nitwesiga Obukama bwa Ruhanga kumaraho ebizibu byaitu byona n’ebizibu ebiri omu nsi.—Zabuli 56:11.
Habwokuba twetantara eby’obulemi kitukonyera kwikara omu bumu nk’oruganda orw’ensi yoona. (Abakolosai 3:14; 1 Petero 2:17) Kwahukanaho naitwe, amadiini agejumbira omu by’obulemi, abantu baago tibali omu bumu.—1 Abakolinso 1:10.
Tuteekamu gavumenti ekitiinisa. N’obukiraaba ngu titwejumbira omu by’obulemi, tuteekamu ekitiinisa ab’obusobozi omu biikaro nambere twikara. Kinu nikihikaana n’ekiragiro kya Baibuli ekirukugamba ngu: “Omuntu wena ahurrege abalemi abakuru.” (Abarumi 13:1) Tworobera ebiragiro, tusasura emisoro, kandi tusagika entekaniza za gavumenti ezitairweho kukonyera abantu boona. Omu kiikaro ky’okulengaho kurwanisa gavumenti, tuhondera obuhabuzi bwa Baibuli oburukututererra kusabira ‘abakama nabakuru boona,’ kukira muno obubarukuba nibakora encwamu ezirakwataho obugabe bwaitu obw’okuramya.—1 Timoseo 2:1, 2.
Ekindi, tukimanyire ngu buli omu aine obugabe obw’okwecweramu ha nsonga ez’eby’obulemi kandi tuteekamu ekitiinisa encwamu ya buli muntu. Ekyokurorraho, titutalibaniza abantu obubaba nibateera akaruuru rundi kutanga abo abacwamu kuteera akaruuru.
Encwamu ey’okutagwera orubaju niitwe tugyeteriireho? Nangwa. Abakwenda hamu n’Abakristaayo ab’omu kyasa eky’okubanza nabo bakakora encwamu niyo emu. Ekitabu Beyond Good Intentions nikigamba ngu: “N’obukiraaba ngu baali bakimanyire ngu bakaba basemeriire kuteekamu ab’obusobozi ekitiinisa, Abakristaayo ab’omu kyasa eky’okubanza baali batakaikirizaaga kwejumbira omu nsonga ez’eby’obulemi.” Ekitabu On the Road to Civilization nikigamba ngu Abakristaayo ab’omu kyasa eky’okubanza “bakaba abatasobora kwesimbaho.”
Kutagwera orubaju kitabangura obusinge omu ihanga? Nangwa. Tuli baikazi abagonza obusinge kandi ab’obusobozi tibasemeriire n’okututiina. Tekerezaaho okuseruliiriza okwakozerwe National Academy of Sciences of Ukraine omu 2001. Okuseruliiriza kunu okwali nikukwata h’Abakaiso ba Yahwe kutagwera orubaju, kwali nikugamba ngu: “Kasumi kanu abantu baingi nibasobora kuba batarukugonza encwamu enu ey’Abakaiso ba Yahwe; enu niyo ensonga enkuru habwaki obulemi bwa ba Nazi n’aba Communist baabahiiganiize omu busumi obwakara.” Baitu kandi na hansi y’obulemi obwa Soviet, Abakaiso ba Yahwe “bakaikara niborobera ebiragiro. Baakoraga n’amaani omu misiri n’omu makorro kandi batarwanise obulemi obwa ba Communist.” N’omu kasumi kanu, enyikiriza z’Abakaiso ba Yahwe, rundi ebibakora, “tibitabangura obusinge bw’ihanga lyona.”