Kuteera Ejaara Kibi Hali Ruhanga?

Eky’okugarukamu kuruga omu Baibuli

N’obukiraaba ngu Baibuli tebazaaho okuteera ejaara omu bwijwire, nitusobora kukirorra omu misingi ya Baibuli ngu Ruhanga arora okuteera ejaara nk’ekibi.—Abefeso 5:17.a

• Omururu nugwo guleetera omuntu kuteera ejaara, kandi Ruhanga anoba omururu. (1 Abakolinso 6:9, 10; Abefeso 5:3, 5) Abateezi b’ejaara baba nibanihira kutunga sente abandi ezibaba baferiirwe, baitu Baibuli ejumirra ebikorwa eby’okwegomba ebintu by’abandi.—Okuruga 20:17; Abarumi 7:7; 13:9, 10.

• Kuteera ejaara na ha bintu ebya sente nke nikisobora kuleetera omuntu kugonza muno sente ekihinguraine.—1 Timoseo 6:9, 10.

• Abateezi b’ejaara bateeka obwesige bwabo omu buraguzi rundi emigisa. Baitu ebintu nk’ebi Ruhanga abirora nk’okuramya ebisisani, ekintu ekitarukuhikaana n’omulingo agonza tumuramyemu.—Isaya 65:11.

• Omu kiikaro ky’okukurakuraniza okwegomba okw’ekintu eky’otakoleriire, Baibuli etwekambisa kukora n’amaani. (Omugambizi 2:24; Abafeso 4:28) Abo abahondera obuhabuzi bwa Baibuli balya ebyokulya byabo ebirugire omu maani gaabo.—2 Abasesalonika 3:10, 12.

• Okuteera ejaara nikisobora kutuleetamu omutima ogw’okugonza kwoleka ngu nitukira abandi kandi ekintu Baibuli ekyetaikiranganiza nakyo.—Abagaratiya 5:26.