Okubatizibwa Nikyo Kiki?
Eky’okugarukamu kuruga omu Baibuli
Okubatizibwa nikimanyisa omuntu kwibikwa omu maizi hanyuma akaihwamu.a Eki nikisoborra ensonga habwaki Yesu yabatiziibwe omu kyambu ekikooto. (Matayo 3:13, 16) Omu mulingo nugwo gumu, omusaija Omunyesiyopya akasaba kubatizibwa obubahikire “nambere hali amaizi” maingi.—Engeso Ezabakwenda 8:36-40.
Amakuru g’okubatizibwa
Baibuli erengesaniza okubatizibwa n’okuziika. (Abarumi 6:4; Abakolosai 2:12) Kubatizibwa okw’omu maizi nikimanyisa omuntu kufa habw’enyetwaza ey’obwomeezi bwe obwakara kandi atandika obwomeezi obuhyaka nk’Omukristaayo ow’ayehaireyo hali Ruhanga. Okubatizibwa hamu n’ebintu ebirukwetaagisa kurora omuntu yakuhikaho eri ntekaniza ya Ruhanga ey’ekonyera omuntu kutunga omuntu ow’omunda omurungi kusigikirra ha kwikiriza kwe okw’aine omu kihongwa kya Yesu Kristo. (1 Petero 3:21) Egi niyo ensonga habwaki, Yesu yayegeseze ngu abegeswa be basemeriire kubatizibwa.—Matayo 28:19, 20.
Okubatizibwa okw’omu maizi kwogyaho ebibi?
Nangwa. Baibuli eyegesa ngu esagama ya Yesu eyasesekere niyo yonka ey’esobora kutwogyaho ebibi. (Abarumi 5:8, 9; 1 Yohana 1:7) Baitu omuntu kusobora kugasirwa omu kihongwa kya Yesu, asemeriire kwikiririza omuli Yesu, kandi ahindule omulingo arukutwazaamu obwomeezi nasigikirra ha nyegeza za Yesu kandi hanyuma abatizibwe.—Engeso Ezabakwenda 2:38; 3:19.
Baibuli eyegesa ngu abaana abato basemeriire kubatizibwa?
Nangwa. Baibuli teyegesa ngu abaana bato basemeriire kubatizibwa. Amakanisa agamu gakora emikoro nambere babatiriza abaana abato (kuraba omu kubamiisira amaizi rundi kubaseesera amaizi ha mutwe) kandi hanyuma babaruka amabara. Okubatizibwa okw’Ekikristaayo, kw’abantu abakuzire abasobora kwetegereza kandi bakaikiririza omu makuru amarungi ag’Obukama bwa Ruhanga. (Engeso Ezabakwenda 8:12) Nikitwarramu kuhurra Ekigambo kya Ruhanga, kukiikiriza, hamu n’okwegarukamu, kandi ebintu omwana omuto ebyatasobora kugarukamu.—Engeso Ezabakwenda 2:22, 38, 41.
Ekindi, Baibuli eyoleka ngu Ruhanga arora abaana b’Abakristaayo nk’abarukwera omu maiso ge habw’obwesigwa bw’abazaire baabo. (1 Abakolinso 7:14) Kakuba okubatizibwa okw’abaana abato kwali nikwikirizibwa hali Ruhanga abaana abato tibakwetaagire kuba abarukwera habw’omuntu ondi.b
Ebisuba ebirukukwata ha kubatizibwa okw’Ekikristaayo
Ekisuba: Oireho okwibikwa omu maizi amaingi, kumiisira rundi kuseesera omuntu amaizi ha buso nagwo guli mulingo ogw’okubatiza ogurukwikirizibwa.
Amananu: Okubatizibwa kwona okurukubazibwaho omu Baibuli kwali kw’okwibika abantu omu maizi. Ekyokurorraho, Firipo obw’akaba nagenda kubatiza omusaija Omunyesiyopya, ‘bombi bakasirimuka omu maizi’ nukwo asobole kumubatiza.—Engeso Ezabakwenda 8:36-39.c
Ekisuba: Baibuli n’egamba ngu n’abaana nabo babatizibwaga eka yoona obuyabaga negenda kubatizibwa. Ekyokurorraho, Baibuli ebazaaho eti omunyankomo ow’omu Firipi: “Yabatizibwa, uwe nenjuye yona.”—Engeso Ezabakwenda 16:31-34.
Amananu: Enkarra ezirukubazaaho ebigambo omunyankomo yabalize nizooleka ngu abo abaabatiziibwe baketegereza “ekigambo kya Mukama” kandi boona ‘bakasemererwa’ muno. (Engeso Ezabakwenda 16:32, 34) Ensonga ezo nizituletera kumalirra nitugamba ngu abaana boona abakaba bali omu ka y’omunyankomo batabatizibwe, habwokuba bakaba batasobora kwetegereza ekigambo kya Yahwe.
Ekisuba: Yesu akegesaaho okubatizibwa kw’abaana obuyagambire ngu Obukama bwa Ruhanga buli bw’abaana abato.—Matayo 19:13-15; Marako 10:13-16.
Amananu: Yesu akaba atarukubazaaho okubatizibwa obuyagambire ebigambo ebi. Oihireho akaba nayoleka ngu abo abaakutaahire omu Obukama bwa Ruhanga basemeriire kwetwaza nk’abaana abato, abali baculeezi kandi abarahuka kwegesebwa.—Matayo 18:4; Luka 18:16, 17.
a Ekigambo ky’Oruyonaani ekihindurwa “okubatizibwa” nikiruga omu kigambo ekirukumanyisa “kwibika.” Rora Theological Dictionary of the New Testament, Omuzingo I, orupapura 529.
b Kusigikirra ha kitabo ekirukwetwa The International Standard Bible Encyclopedia, “busaho nambere okubatizibwa okw’abaana abato kurukusangwa omu Ndagaano Empyaka.” Kubatiza abaana kikaruga ha nteekereza ey’etahikire erukukwata h’amakuru g’okubatizibwa, eyerukugamba ngu okubatizibwa kwogyaho omuntu ebibi.—Omuzingo 1, orupapura 416-417.
c Hansi y’omutwe “Okubatizibwa omu kitabu ekirukwetwa the New Catholic Encyclopedia nikigamba ngu: “Nikyeyolekera kimu kurungi ngu okubatizibwa omu kyasa eky’okubanza kwali kw’okwibiika.”—Omuzingo 2, orupapura 59.