Omuhito Omwingi Nikyo Kiki?
Eky’okugarukamu kuruga omu Baibuli
Omuhito omwingi nigwija kuleetaho akasumi akagumangaine muno ekintu ekitakabahoga omu bwomeezi bw’abantu. Kusigikirra ha bunabbi bwa Baibuli, omuhito omwingi nigwija kubaho omu “biro bya hanyuma” rundi omu ‘kasumi akaha mpero.’ (2 Timoseo 3:1; Danieri 12:4) Ebiro ebi biraaba “byobujune, ebitakabahoga biti Ruhanga akaba okuhanga ebyahangirwe, na hati hona, kandi tibiribaho.”—Marako 13:19; Danieri 12:1; Matayo 24:21, 22.
Ebintu ebiribaho omu kasumi ak’omuhito omwingi
● Okuhwerekerra okw’amadiini ag’ebisuba. Amadiini ag’ebisuba nigaija kuhwerekerezebwa omu bwangu muno. (Okusuku’rwa 17:1, 5; 18:9, 10, 21) Eby’obulemi ebirukukikirirwa Ekitongole eky’Amahanga Ageteraine nibiija kuhikiiriza ekigendererwa kya Ruhanga obu nibihwerekereza amadiini g’ebisuba.—Okusuku’rwa 17:3, 15-18.a
a Kusigikirra ha kitabu kya Okusuku’rwa, amadiini ag’ebisuba nigeetwa Baburoni Orukuru, “nyina abasihani.” (Okusuku’rwa 17:1, 5) Ekisoro ekirukutukura, ekirahwerekereza Baburoni Orukuru, kiri kokurorraho ak’ekitebe ekiine ekigendererwa eky’okuleeta hamu amahanga omu bumu n’okukikirra amahanga ag’omu nsi. Ha kubanza kikaba nikyetwa League of Nations kandi kasumi kanu nikyetwa Ekitongole ky’Amahanga Ageteraine.
● Kutaahirra ediini ey’amananu. Amahanga agateraniziibwe hamu agabazibwaho omu kwolekwa kwa Ezekyeri nka “Gogi, owomu nsi ya Magogi”, nigaija kulengaho kuhwerekereza abo boona abali omu diini ey’amananu. Baitu Ruhanga naija kulinda abaheereza be kutahikwaho akabi koona.—Ezekyeri 38:1, 2, 9-12, 18-23.
● Kucwera omusango abo abaliba nibaikara omu nsi. Yesu naija kucwera abantu boona omusango kandi naija “[kubabaganizaamu], nkomulisa [okwabaganizaamu] entama nemburabuzi.” (Matayo 25:31-33) Alibacwera omusango nasigikirra ha busagiki buli muntu yahaire “begenzi” be abalirema nauwe omu iguru.—Matayo 25:34-46.
● Kusorooza abalemi b’Obukama. Abantu abesigwa abakomerwe kulema hamu na Kristo nibaija kumalirra emirimo yabo ey’omu nsi kandi bahumbuurwe batwarwe omu bwomeezi obw’omu iguru.—Matayo 24:31; 1 Abakolinso 15:50-53; 1 Abasesalonika 4:15-17.
● Haramagedoni. Obulemu bunu obw’ekiro ekikuru ekya Ruhanga Ow’obusobozi bwona’ obwire obumu bwetwa “ekiro kya Ruhanga.” (Okusuku’rwa 16:14, 16; Isaya 13:9; 2 Petero 3:12) Abo abarasingwa omusango, Kristo naija kubahwerekereza. (Zefaniya 1:18; 2 Abasesalonika 1:6-10) Kinu kiritwarramu okuhwerekerra kw’ebitebe eby’obulemi eby’ensi yoona, ebirukubazibwaho nk’ekisoro eky’emitwe musanju.—Okusuku’rwa 19:19-21.
Ebintu ebiribaho hanyuma y’omuhito omwingi
● Kubohwa kwa Sitaani n’abadaimoni be. Malaika ow’amaani naija kunaga Sitaani hamu n’abadaimoni be omu “kiina ekitanyina ahokugarukira,” ekirukumanyisa enyikara nambere hataroho kukora ekintu kyona. (Okusuku’rwa 20:1-3) Enyikara ya Sitaani omu kiina ekitanyina ah’okugarukira n’esobora kulengesanizibwa n’okuba omu nkomo, nahabweki Sitaani naija kuba atakyasobora kukora ekintu kyona.—Okusuku’rwa 20:7.
● Emyaka rukumi etandika. Obukama bwa Ruhanga nibwija kutandika okulema kwabo okw’emyaka 1000 kandi bulireetera abantu emigisa nyingi. (Okusuku’rwa 5:9, 10; 20:4, 6) “Ekitebe kingi” eky’abantu abatasobora kubarwa baliba “barugire omu muhito omwingi,” bakizireho kusobora kurora okutandika kw’obulemi obw’Emyaka 1000 hanu omu nsi.—Okusuku’rwa 7:9, 14; Zabuli 37:9-11.