Habwaki Abakaiso ba Yahwe bahindwire Zimu ha Nyikiriza Zaabo?

Enyikiriza zaitu zisigikirra ha Baibuli, nahabweki tuhindura enyikiriza zaitu, obutweyongera kwetegereza kurungi Ebyahandiikirwe.a

Empindahinduka zinu nizikwatagana n’omusingi gwa Baibuli oguli omu Enfumo 4:18: “Orugendo orwabahikiriire ruli nkemamba obwesara, erukweyongera okusara okuhikya omusana okujwa.” Nk’oku ekyererezi ky’izooba erirukwimuka kiikara nikyeyongera mporampora, naitwe Ruhanga atusobozesa kwetegereza amananu agali omu Kigambo kye mporampora omu kasumi akaaba agondeze. (1 Petero 1:10-12) Nk’oku Baibuli yarangire, Ruhanga ayeyongiire kutukonyera kwetegereza Ebyahandiikirwe omu ‘kasumi aka ha mpero.’—Danieri 12:4.

Empindahinduka zinu omu nyetegereza yaitu tizisemeriire kutuhuniriza rundi kututalibaniza. Abaheereza ba Ruhanga abaakara nabo bakaba baine enyetegereza etahikire kandi kyabetagisaaga kuhindura omulingo baaroramuga ebintu.

• Musa akehayo kujuna ihanga lya Isaleri emyaka 40 akasumi Ruhanga akaba atekaniize katakahikire.—Engeso Ezabakwenda 7:23-25, 30, 35.

• Abakwenda bakalema kwetegereza obunabbi oburukukwata ha kufa kwa Masiya n’okuhumbuuka kwe.—Isaya 53:8-12; Matayo 16:21-23.

• Abamu h’Abakristaayo abaakara bakaba baine entekereza etahikire ha kwija kw’ekiro kya Yahwe.—2 Abasesalonika 2:1, 2.

Ruhanga akaterekereza entekereza yabo, kandi nitusaba ngu naija kwikara natuterekereza.—Yakobo 1:5.