Haroho “Ebibi Musanju eby’Okufa”?

Eky’okugarukamu kuruga omu Baibuli

Baibuli tebazaaho ebibi musanju eby’okufa. Baitu eyegesa ngu omuntu ow’akora ebibi eby’amaani tarukwija kujunwa. Ekyokurorraho, Baibuli ebazaaho obusiihani, kuramya ebisisani, oburogo, ekiniga, hamu n’obutamiizi nk’ebibi eby’amaani, kandi ‘nk’engeso ez’omubiri.’ Kandi eyongera egamba eti: “Abo abakora ebirukusisa biti tibaligwetwa obukama bwa Ruhanga.”—Abagaratiya 5:19-21.a

Baibuli eyoleka orukarra orw’ebintu ebinugwa musanju Ruhanga eby’anoba?

Ego. Kusigikirra ha Enfumo 6:16 nihagamba hati: “Haroho ebigambo mukaga Mukama ebyarukunoba; ego, musanju ebiri muziro namberali.” Baitu orukarra rw’ebibi ebirukuhonderaho omu Enfumo 6:17-19, tibiri nibyo byonka. Oihireho, nizibazaaho ebibi ebimu ebirukukiikirra ebikorwa ebibi byona otwaliiremu n’ebituteekereza, ebitubaza, hamu n’ebikorwa.b

Ebigambo “ekibi ekyokufa” nibimanyisa ki?

Empindura za Baibuli ezimu zikozesa ebigambo binu omu 1 Yohana 5:16. Ekyokurorraho, Baibuli ey’Orunyoro/Rutooro eya 1993 n’egamba eti: “Haroho ekibi ekyokufa.” Ebigambo “ekibi ekyokufa” nibisobora n’okuhindurwa nka “ekibi ekireeta okufa.” Mbaganiza ki enyakuli hagati ‘y’ekibi ekireeta okufa’ hamu ‘n’ekibi ekitali ky’okufa’?—1 Yohana 5:16.

Baibuli n’ekyolekera kimu kurungi ngu ebibi byona bireeta okufa. Baitu nitusobora kujunwa hali ekibi n’okufa habw’ekicunguro kya Yesu Kristo. (Abarumi 5:12; 6:23) Nahabweki, “ekibi ekireeta okufa” tikisobora kujunwa ekicunguro kya Kristo. Omuntu ow’akora ekibi ekya mulingo gunu aba acweriiremu kimu kuhondera omuhanda ogw’ekibi kandi talihindura entekereza rundi ebikorwa bye. Ekindi, Baibuli egamba ngu ekibi ekya mulingo ogu ‘tikiriganyirwa.’—Matayo 12:31; Luka 12:10.