Obworaaba oli omu kitebe ekikooto, kandi noyehurra ngu iwe tibakira kukukoma, n’osobora kuhwamu amaani. Baitu otaleka kwikara n’olengaho kugarukamu. Teekaniza eby’okugarukamu bingi ha buli rusorrokano. Nukwo obubaraaba batakukomere hakutandika, n’osobora kugarukamu obwire obundi. Obworaaba n’otekaniza Omunaara gw’Omulinzi, tekerezaaho omulingo buli kacweka karukukwatagana n’omutwe gw’ekicweka eki. Obw’orakikora, noija kusobora kutunga eby’okugarukamu ebirungi. Ekindi, n’osobora kutekaniza kugarukamu obucweka oburukubazaaho enyegesa ezigumire kusoborra. Habwaki? Habwokuba abantu bake nibasobora kuhanika emikono ha bucweka obu. Kiki eky’osemeriire kukora kakuba okyetegereza ngu na hanyuma y’okurabaho ensorrokano nyingi tibakakukomere? Ensorrokano zitakatandikire, n’osobora kugambira ow’arukwebembera ekikaguzo ekiwakugondeze kugarukamu. w23.04 21-22 ¶9-10

Yusufu yateekaga omu nkora obuhabuzi bwa Yahwe, ekyamukonyiire kuba nyineeka omurungi. Emirundi esatu akatunga obuhabuzi oburukukwataho eka ye kuruga hali Ruhanga. Kandi buli murundi yabworoberaga ahonaaho n’obukyayetaagisaga kukora empindahinduka ez’amaani. (Mat. 1:20; 2:​13-15, 19-21) Habw’okuhondera oburagirizi bwa Ruhanga, Yusufu akalinda Malyamu, yamusagika kandi yamuhikyaho ebyetaago bye. Tekerezaaho omulingo ebikorwa bya Yusufu byaletiire Malyamu kweyongera kumugonza n’okumuteekamu ekitiinisa. Banyineeka nimusobora kwegera ha kyokurorraho kya Yusufu, kuraba omu kuserra obuhabuzi bwa Baibuli oburabakonyera omu maka ganyu. Obumuteeka omu nkora obuhabuzi bunu n’obukiba nikyetaagisa kukora empindahinduka ez’amaani kyoleka ngu nimugonza bakazi banyu, kandi mweyongera kugumya obuswere bwanyu. Munyaanya itwe kuruga Vanuatu, ow’amazire emyaka erukuhingura 20 omu buswere n’agamba ati: “Iba nyowe obwaserra obuhabuzi kuruga hali Yahwe kandi akabuteeka omu nkora, nyeyongera kumuteekamu ekitiinisa, mpurra nyine obulinzi kandi nsagika encwamu ze.” w23.05 21 ¶5

Abayudaaya abaakugarukire kuruga Baburoni baakufookere “ihanga erirukwera” omu maiso ga Ruhanga wabo. (Bir. 7:6) Baitu eki kyali kitarukumanyisa baali bataine empindahinduka ez’okukora nukwo basemeze Yahwe. Abayudaaya abarukukira obwingi baali bazaliirwe Baburoni, kandi baali bamanyiriire entekereza n’emigenzo y’Abababuroni. Hanyuma y’emyaka nyingi bagarukire Isaleri, Nehemiya nauwe akahunirra kukimanya ngu abaana abaazaliirwe omu Isaleri bakaba batasobora kubaza Oruheburaniya. (Bir. 6:​6, 7; Neh. 13:​23, 24) Abaana banu baakwegere bata kugonza Yahwe n’okumuramya, batarukwetegereza orulimi Oruheburaniya orwakozesiibwe omu kuhandiika Ekigambo kya Ruhanga? (Ezer. 10:​3, 44) Nahabweki Abayudaaya abo baali baine empindahinduka nyingi ez’okukora, baitu kyakubanguhiire kuzikora bali omu Isaleri nambere okuramya okw’amananu kwali kuliyo nikugarurwaho.—Neh. 8:​8, 9. w23.05 15 ¶6-7