Nkaba Ningonza Omuzaano gwa Baseball Kukira Ekintu Ekindi Kyona!

OBWOMEEZI BWANGE OBWA KARA

Nkakurra omu Puerto Limón n’ebicweka ebiri haihi n’orubuga runu oruli ha mwaro gwa burugaizooba bwa Costa Rica. Bazaire bange bali baine abaana munaana, kandi nkaba ndi izaara lya musanju. Isenyowe akafa nyine myaka munaana. Nyina itwe akatukuza ali muzaire omu.

Omuzaano gwa baseball gwali guli kicweka ky’obwomeezi bwange. Nayegondezaaga omu muzaano gunu obunkaba nkyali muto. Obunahikire omu myaka y’obusigazi, nketeranizaaho tiimu eyali eri omu liigi yabo abaakatandika kuzaana omuzaano gunu. Obunkaba ndi omu myaka yange eya 20 ninzaana omu liigi enu, omu h’abarukuserra abazaani akansaba kuzanira tiimu ey’amaani omu Nicaragua. Baitu habw’okuba kasumi ako nyina nyowe akaba ali muceke, kandi ninyowe nkaba nimurolerra ntagonze kugenda kwikara Nicaragua. Nahabweki, nkanga kugenda. Hanyuma, ondi h’abarukuserra abanzaani akanyeta kuzaanira tiimu y’ihanga lya Costa Rica, ey’ekaba erumu abo abaali bakomerwe kuruga omu liigi einkaba ninzaaniramu. Ha murundi gunu, nkaikiriza. Nkaba ndi ha tiimu y’ihanga kuruga 1949 kuhikya 1952, kandi tukazaana emizaano omu Cuba, Mexico, na Nicaragua. Nazaanaga kurungi ha base eyakabiri n’eyakasatu, kuhika ha rulengo ngu twazaanaga emizano nka 17 ntasobezeemu nakati. Nagonzaaga kuhurra abantu nibabaza ibara lyange obu nibatokera haiguru!

Eky’enaku, nasiihanaga. N’obukiraaba ngu nkaba nyine omwisiki wange omu, nasiihanaga n’abakazi abandi. Nanywaga n’amaarwa maingi. Kiro kimu nkatamiira muno kandi obunaimukire nyenkyakara nkaba ntamanyire n’omulingo nahikire omu ka! Nateeraga ejaara hamu n’emizaano endi eya sente.

Obunkaba ndi omu bwomeezi bwa mulingo gunu, nyina nyowe akafooka omu h’Akabakiso ba Yahwe. Akalengaho kungambira eby’akaba naikiririzaamu, baitu ha kubanza ntaikirize habwokuba omutima gwange gwona nkaba ngutaire ha muzaano gunu. N’obu nabaga ndi mukizaaniro ninyerengesamu omu bwire bwa nyamusana, tinarumwaga njara habw’okuba omutima gwona nkaba ngutaire ha muzaano. Nkaba ningonza omuzaano gwa baseball kukira ekintu ekindi kyona!

Baitu, obunkaba nyine emyaka 29, nkahutaara obunkaba nindegaho kukwata akapiira obutwali nituzaana. Obunakizire, nkaleka kuzaana ogwa sente. Baitu nabwo, nkaikara mukitongole ekyatekanizaaga omuzaano gwa baseball obu nikitendeka abazaani abali omu tiimu ey’ekaba eri haihi n’omu ka kandi eri n’omu liigi einkaba ndumu ha kubanza.

OMULINGO BAIBULI YAHINDWIRE OBWOMEEZI BWANGE

Omu 1957, nkaraalizibwa kugenda omu rusorrokano orukooto Orw’Abakaiso ba Yahwe orwali omu kizaaniro ekinazaaniiremu baseball. Obunkaba nyikaliire omu bantu abaingi, nkarora ngu Abakaiso ba Yahwe nibetwaza omu mulingo ogw’ekitiinisa hatali nk’abasungi ba baseball abayetwazaaga nk’abagwire iraro. Ekinarozere ha rusorrokano orukooto kikanyekambisa kutandika kwega Baibuli n’Abakaiso ba Yahwe n’okugenda omu nsorrokano zaabo.

Nkahunirra habw’ebintu bingi ebinayegere kuruga omu Baibuli. Ekyokurorraho, Yesu akaranga ngu omu biro ebya ha mpero, abegeswa be baakutebiize amakuru amarungi ag’Obukama omu nsi yoona. (Matayo 24:14) Ekindi, nkeega ngu Abakristaayo ab’amananu tibatebeza habw’okugonza kutunga sente. Yesu akagamba ngu: “Mukahebwa kwonka muhege kwonka.”​—Matayo 10:8.

Obunabaga ninyega Baibuli, nalengesanizaaga ebindukwega n’ebinaroraga omu Bakaiso ba Yahwe. Nayegombaga muno obwekambi bwabo omu kutebeza amakuru amarungi ag’Obukama omu nsi yoona. Nkabaroramu omutima ogw’okugaba Yesu oguyaragiire abegeswa be kwoleka. Nahabweki obunasomere Marako 10:21 nkarora okuraaliza kwe okurukugamba ngu: “Oije, onkuratire.” Nkagonza kufooka omu h’Abakaiso ba Yahwe.

Baitu kikantwarra obwire kurora nakora encwamu ya mulingo ogu. Ekyokurorraho, kumara emyaka nyingi naabaga nyine enamba yange ey’omugisa eyinazaanaga buli wiiki omu kazaano k’ihanga lyona. Baitu, nkeega kuruga omu Baibuli ngu Ruhanga tarukugonza abantu abaheereza “ruhanga ow’orugisagisa,” n’abantu ab’omukoijo. (Isaya 65:11; Abakolosai 3:5) Nahabweki nkacwamu kuleka kuteera ejaara. Hanyuma y’okuleka kuteera ejaara, Sande ey’abandize enamba yange ey’omugisa ekasinga! Abantu bakansekereza habwokuba wiiki egi nkaba ntazaine akazaano, kandi bakansidikiriza muno ngu nyongere nzaane, baitu eki ntakikole. Ntongere kuteera enjaara.

Ha kiro kyonyini ekinabatiriziibwemu ha rusorrokano orukooto orw’Abakaiso ba Yahwe, ‘omuntu wange omuhyaka’ akongera yalengwa. (Abefeso 4:24) Rwebagyo oru, obunagarukire ha Hoteeri nambere nkaba ninyikara, nkasanga ayali mwisiki wange andinzire aheeru y’ekisiika kyange. Akangambira ati: “Boojo naiwe Sammy, leka twegonzeemu!” Baitu aho naaho nkamugambira nti: “Nangwa!” Kandi namwijukya ngu hati nkaba ningendera ha misingi ya Baibuli. (1 Abakolinso 6:18) Akatokera haiguru nagamba ati: “Ogambire ki?” Kandi yajerega omulingo Baibuli ebazaaho obusiihani hanyuma yalemeraho ngu tugaruzeemu enkoragana eitukaba twine. Baitu, nkataaha omu kisiika kyange nakingaho orwigi. Kasumi kanu, nikinsemeza kugamba ngu kuruga nfooka omu h’Abakaiso ba Yahwe omu 1958, n’obwesigwa, nyikaire ninkorra ha binayegere omu bwomeezi bwange.

OMULINGO NGASIIRWE

Ninyehurra nk’arukusobora kuhandiika ekitabu ekirukukwata ha mulingo ngasiirwe habw’okuhondera obuhabuzi bwa Baibuli! Emu ha migisa eintungire niyo ngu, ntungire abanywani abarungi kandi ab’amananu, obwomeezi obwine ekigendererwa n’okusemererwa kwonyini.

Ninkyagonza muno omuzaano gwa baseball, baitu hati nyine ebirukugukira omugaso. Omu muzaano gwa baseball, nkatungamu sente n’okuranganwa, baitu ebintu binu bitahangaale. Baitu hati, enkoragana yange na Ruhanga n’oruganda orw’ensi yoona orunyine nibiija kwikaraho ebiro n’ebiro. Baibuli egamba ngu: “Ensi ehwaho nokwegomba kwayo: baitu anyakukora Ruhanga ebyangonza aikara ebiro nebiro.” (1 Yohana 2:17) Hati ningonza muno Yahwe n’abantu be kukira ekintu kyona!