Habwaki Ruhanga Yaikiriize Obukaikuru bw’Abayudaaya Kwitwa? Habwaki Ruhanga Atarakitangire?
Abantu baingi abakaguza ebikaguzo binu baba baferiirwe abantu baabo kandi baba batarukuserra eby’okugarukamu byonka baitu baba nibagonza n’okuhuumuzibwa. Abandi, ekiita bantu bakitwara kuba ekintu ekirukukirayo obubi omuntu eky’asobora kukora, kandi kibagumira kwikiriza ngu Ruhanga aliyo.
Entekereza ezitahikire hali Ruhanga n’ekiita bantu eky’Abayudaaya
Ekitahikire: Tikihikire kukaguza habwaki Ruhanga y’aikiriize ekiita bantu kubaho.
Ekihikire: Abantu abakaba baine okwikiriza kw’amaani nabo bakakaguza habwaki Ruhanga aikiriza ebintu ebibi kubaho. Ekyokurorraho, nabbi Habakuki akakaguza Ruhanga ati: “Kiki onyoleka okutahikirra, norora ha butigi? Baitu okunyaga nitima biri omu maiso gange, kandi haroho empaka nenkungani.” (Habakuki 1:3) Omu kiikaro ky’okuhana Habakuki, Ruhanga akaikiriza ebikaguzo bye bihandiikwe omu Baibuli nukwo itwena tubisome.
Ekitahikire: Ruhanga tafaayo ha kubonabona kw’abantu.
Ekihikire: Ruhanga anoba ebikorwa ebibi n’okubonabona okurugamu. (Enfumo 6:16-19) Omu kasumi ka Nuha, Ruhanga ‘akasaalirwa omu mutima gwe’ habw’okurora ebikorwa ebibi bijwire omu nsi. (Okubanza 6:5, 6) Busaho kugurukyagurukya Ruhanga akasaalirwa muno habw’ekiita bantu ekyabaire ha Bayudaaya. Maraki 3:6.
Ekitahikire: Ekiita bantu kikabaho habwokuba Ruhanga akaba naafubira Abayudaaya.
Ekihikire: Ruhanga akaikiriza Abarooma kuhwerekereza Yerusalemu omu kyasa eky’okubanza. (Matayo 23:37–24:2) Baitu kuruga omu kasumi ako, Ruhanga taine ihanga ery’afubira rundi ery’asagika omu bulemu. Omu maiso ga Ruhanga, “busaho kusorora omu Muyudaya Nomuyonani.”—Abarumi 10:12.
Ekitahikire: Kakuba haali haroho Ruhanga ow’okugonza kandi ow’amaani, yakutangire ekiita bantu kubaho.
Ekihikire: N’obukiraaba ngu Ruhanga taleta okubonabona, obwire obumu akwikiriza kubaho.—Yakobo 1:13; 5:11.
Habwaki Ruhanga y’aikiriize ekiita bantu kubaho?
Ensonga habwaki Ruhanga yaikiriize ekiita bantu kubaho niyo emu habwaki aikiirize abantu kubonabona. Ekyo akakikora kugonjoora ensonga ey’atandikire kara muno. Baibuli n’ekyolekera kimu ngu omu kasumi kanu Sitaani nuwe arukulema ensi hatali Ruhanga. (Luka 4:1, 2, 6; Yohana 12:31) Haroho ensonga ibiri enkuru kuruga omu Baibuli ezisobora kutukonyera kwetegereza habwaki Ruhanga y’aikiriize ekiita bantu kubaho.
Ruhanga akahanga abantu baine obugabe bw’okwecweramu. Ruhanga akagambira abantu ab’okubanza, Adamu na Haawa ekyakaba nagonza bakole, baitu atabahambirize kumworobera. Bakakomamu kwecweramu bonka ekirungi n’ekibi, kandi encwamu yabo embi hamu n’encwamu embi abantu abandi ezibaizire nibakora omu myaka ey’ehingwire zirugireemu abantu boona omu nsi ebizibu bingi. (Okubanza 2:17; 3:6; Abarumi 5:12) Kinu nikikiranganiza n’ekitabu ekya Statement of Principles of Conservative Judaism ekirukugamba kiti: “Okubonabona okurukukira obwingi okuroho kasumi kanu, nikuruga omu kukozesa kubi obugabe obw’okwecweramu obutwahairwe.” Omu kiikaro ky’okutwihaho obugabe obw’okwecweramu, Ruhanga ahaire abantu akasumi balengeho kwerema bonka.
Ruhanga n’asobora kandi naija kumaraho ebizibu byona ebyaleserwe ekiita bantu. Ruhanga naraganiza kuhumbuura obukaikuru n’obukaikuru bw’abantu abaafiire, otwaliiremu n’abaaferiire omu kiita bantu. Kandi naija n’okwihaho n’obusaasi abo abakizireho ha kiita bantu obubaine habw’okurora abantu baabo nibaitwa. (Isaya 65:17; Engeso Ezabakwenda 24:15) Habwokuba Ruhanga n’agonza muno abantu, naija kuhikiiriza ebintu ebi ebiyaraganiize.—Yohana 3:16.
Baingi abaakwasirweho n’abaakizire ha kiita bantu basoboire kulinda okwikiriza kwabo kugumire, kandi n’okutunga ekigendererwa omu bwomeezi habwokuba baketegereza ensonga habwaki Ruhanga alekere ebintu ebibi kubaho n’omulingo arukwija kubihaho.