EKICWEKA KY’OKWEGA 40
Ikara n’Oyekamba nk’Oku Tuli omu Biro by’Okumalirra ‘eby’Ebiro bya Hanyuma’
“Mugume okutatabana, mwekambege obutosa omu mirimo ya Mukama.”—1 KOL. 15:58.
EKIZINA 58 Kuserra Abarukugonza Obusinge
EBITURAYEGAa
1. Nitukigumya tuta ngu tuli “omu biro bya hanyuma”?
OBWORAABA wazairwe hanyuma y’omwaka 1914, obwomeezi bwawe bwona obumazire “omu biro bya hanyuma” eby’obusinge bunu. (2 Tim. 3:1) Itwena tuhulireho okuhikirra okw’ebintu Yesu ebi y’agambire ngu biribaho omu kasumi kanu. Binu nibitwarramu obulemu, enjara, emisisa, endwaire ez’amaani, kweyongera okw’obucwi bw’ebiragiro, hamu n’okuhiganizibwa kw’abaheereza ba Yahwe. (Mat. 24:3, 7-9, 12; Luk. 21:10-12) Kandi niturora abantu nibetwaza nk’oku omukwenda Paulo yarangire. (Rora akasanduuko “Omulingo Abantu Barukwetwazaamu omu Kasumi Kanu.”) Nk’Abakaiso ba Yahwe nitukigumiza kimu ngu tuli “omu biro bya hanyuma.”—Mik. 4:1.
2. Bikaguzo ki ebiturukwija kugarukamu?
2 Nk’oku harabireho emyaka nyingi kuruga omwaka gwa 1914 guhika, hati tuli omu biro eby’okumalirra eby’ebiro “bya hanyuma.” Nk’oku empero eri haihi muno, tusemeriire kumanya eby’okugarukamu by’ebikaguzo binu: Bintu ki ebirukwija kubaho ha kumalirra ‘kw’ebiro bya hanyuma’? Kandi Yahwe n’agonza tukole ki obuturaaba tukyalindiriire ebintu ebi kubaho?
KIKI EKIRUKWIJA KUBAHO HA KUMALIRRA ‘KW’EBIRO EBYA HANYUMA’?
3. Kusigikirra ha bunabbi obuli omu 1 Abasesalonika 5:1-3, amahanga galikora kurangirra kwa mulingo ki?
3 Soma 1 Abasesalonika 5:1-3. Paulo kabazaaho ekiro kya Yahwe. Ekiro ekirukubazibwaho omu kyahandiikirwe kinu, kiritandika n’okuhwerekerezebwa kwa Baburoni Orukooto, rundi ediini zoona ez’ebisuba kandi kimalirre na Haramagedoni. (Kus. 16:14, 16; 17:5) Baitu obuhaliba hasigaireyo akaire kake ekiro eki kitandike, amahanga galirangirra ngu “Mirembe, busaho kabi!” (Empindura ezimu zigamba ngu: “Haroho obusinge n’okutekaana.”) Obwire obumu abebembezi b’amahanga bakozesa ebigambo binu obubaba nibalengaho kugarraho enkoragana enungi hagati y’amahanga.b Baitu, kurangirra Baibuli okw’ebazaaho okwa “Mirembe, busaho kabi” nikwija kuba kwembaganiza. Habwaki? Kinu obukiribaho, abantu baingi balitekereza ngu abebembezi b’ensi basoboire kuleetaho obusinge n’okutekaana omu nsi. Baitu amananu gali ngu, “omuhito omwingi” gulitandika kandi gurugemu “okuhwerekereza okwa bwango.”—Mat. 24:21.
Otaikiriza kubihwabihwa amahanga obugarakora okurangirra okw’ebisuba ngu “Mirembe, busaho kabi” (Rora akacweka 3-6)h
4. (a) Bintu ki ebitutamanyire ebirukukwata ha kurangirra ngu “Mirembe, busaho kabi”? (b) Kiki ekitumanyire ha kurangirra kunu?
4 Haroho ebitumanyire ha kurangirra okurugamba ngu “Mirembe, busaho kabi.” Baitu, haroho ebintu ebindi ebitutarukumanya. Titumanyire ekiriretera abalemi kukora okurangirra kunu rundi omulingo balikukoramu. Titumanyire obubaliranga emirundi nyingi rundi omurundi gumu. Omulingo gwona ogubali kikoramu, tukimanyire ngu titusemeriire kubiihwabiihwa tukatekereza ngu abalemi b’ensi nibasobora kuleetaho obusinge omu nsi yoona. Baitu tukimanye ngu kunu nukwo kurangirra Baibuli erukutugambira kulindirra. Kaliba kokurorraho ngu “Ekiro kya [Yahwe]” kiri haihi kutandika!
5. 1 Abasesalonika 5:4-6 n’etukonyera eta kwetekaniriza “Ekiro kya [Yahwe]”?
5 Soma 1 Abasesalonika 5:4-6. Kutererra kwa Paulo nikutukonyera kumanya omulingo tusobora kwetekaniriza “ekiro kya [Yahwe].” Titusemeriire “okugwijagira nkabandi.” Baitu tusemeriire kwikara ‘niturora’ kandi tuli bulindara. Ekyokurorraho, tusemeriire kwerinda kugwera orubaju rundi kwetahya omu nsonga z’eby’obulemi. Habwokuba obuturayetahya omu by’obulemi, nituba twafooka kicweka ky’ensi. (Yoh. 15:19) Tukimanyire ngu Obukama bwa Ruhanga nubwo bwonka obulireta obusinge omu nsi.
6. Nitugonza kukonyera abantu kukora ki kandi habwaki?
6 Oihireho itwe kwikara niturora, tusemeriire kusisimura abo abagwijagiire nukwo nabo bamanye obunabbi bwa Baibuli oburukukwata ha bintu ebirukubaho omu nsi. Twikale tukimanyire ngu omuhito omwingi obugulitandika, abantu baliba batakyaine omugisa ogw’okutandika kuheereza Yahwe. Enu niyo ensonga habwaki kikuru muno kutebeza n’obwekambi hati!c
IKARA N’OYEKAMBA KUTEBEZA
Obutuba nitutebeza, twoleka abantu ngu Obukama bwa Ruhanga nubwo bwonka oburukwija kuleeta obusinge n’eteeka omu nsi yoona (Rora akacweka 7-9)
7. Yahwe n’agonza tukoleki omu kasumi kanu?
7 Yahwe nagonza twikale nitwekamba omu kukora omulimo gw’okutebeza, omu bwire bunu obuke obusigaireyo “ekiro” kye kihike. Tusemeriire kwikara twine bingi eby’okukora “omu mirimo ya Mukama.” (1 Kol. 15:58) Yesu akabazaaho ekitwakukozere omu kasumi kanu. Obwakaba n’abazaaho ebintu eby’amaani ebyakubaireho omu biro bya ha mpero, akagamba ati: “Kandi kihikiriire enjiri okumara kugambibwa amahanga gona.” (Mar. 13:4, 8, 10; Mat. 24:14) Kitekerezeeho: Buli murundi ogw’ogenda omu buheereza oba n’okonyera kuhikiriza obunabbi bunu obuli omu Baibuli!
8. Kiki ekirukwoleka ngu omulimo gw’okutebezaaho Obukama nigugenda omu maiso?
8 Kiki ekirukwoleka ngu mali omulimo gw’okutebeza gweyongire kugenda omu maiso? Buli mwaka, abantu baingi nibeyongera kuhurra amakuru amarungi ag’Obukama. Ekyokurorraho, tekerezaaho omulingo omuhendo gw’abatebezi b’Obukama gweyongiire omu biro bya ha mpero. Omu 1914, omu nsi yoona hali harumu abatebezi 5,155 omu mahanga 43. Baitu kasumi kanu, omu nsi yoona harumu abatebezi abarukuhika omu bukaikuru munaana n’ekicweka omu mahanga 240! Nobukiraaba nukwo kiri, omulimo gwaitu tigukahoire. Tusemeriire kwikara niturangirra ngu Obukama bwa Ruhanga nubwo bwonka busobora kumaraho ebizibu by’abantu byona.—Zab. 145:11-13.
9. Habwaki tusemeriire kwikara nitutebeza amakuru amarungi ag’Obukama?
9 Titulireka kukora omulimo ogw’okutebeza kuhikya Yahwe obwaligamba ngu guhoire. Hasigaireyo obwire oburukwingana nkaha abantu basobole kumanya Yahwe Ruhanga hamu na Yesu Kristo? (Yoh. 17:3) Titumanyire. Baitu tukimanyire ngu omuhito omwingi gutakahikire, abantu boona abaine ‘entekereza enungi ey’esobora kubaleetera kutunga obwomeezi obutahwaho’ nibasobora kwikiriza amakuru amarungi kandi bakacwamu kuheereza Yahwe. (Eng. 13:48, NW) Nitusobora tuta kukonyera abantu banu obwire butakahoireyo?
10. Bintu ki Yahwe eby’atuhaire kutukonyera kwegesa abantu amananu?
10 Yahwe n’akozesa ekitebe kye kutuha byona ebiturukwetaaga kusobora kwegesa abantu amananu. Ekyokurorraho, tutunga kutendekwa buli wiiki kuraba omu rusorrokano orubaho hagati omu wiiki. Orusorrokano runu rutukonyera kumanya ebitusemeriire kubaza obutuba nitutebeza ha murundi ogw’okubanza rundi obutuba tugarukireyo. Kandi rutwegesa omulingo gw’okwegesaamu abantu Baibuli. Ekintu ekindi ekitebe kya Yahwe kituhaire Bikwato Ebitukozesa Kwegesa. Ebikwato binu bitukonyera . . .
kutandika kubaza n’abantu,
kuleetera abantu ekihika ky’okutuhuliiriza,
kuleetera abantu kugonza kumanya ebirukukiraho,
kwegesa abeegi ba Baibuli, hamu
n’okuragirra abantu ha mukura gwaitu kandi n’okubaraliza kwija ha Kyombeko ky’Obukama.
Kuba n’ebikwato binu tikirukumara. Tusemeriire kwega kubikozesa.d Ekyokurorraho, hanyuma y’okubaza n’omuntu anyakukuhuliriize kurungi, obw’omusigira turakiti rundi magaziini, nasobora kugisoma kuhikya obw’oligaruka kubaza nawe. Kandi bujunanizibwa bwaitu kwekamba kutebeza amakuru g’Obukama buli kwezi.
11. Habwaki amasomo kuruga omu Baibuli gatairwe ha mukura gwaitu?
11 Omulingo ogundi Yahwe ogw’arukukozesa kukonyera abantu kwega amananu, nikyo ekicweka ekirukweta Amasomo Kuruga omu Baibuli ekiri ha mukuru gwaitu ogwa jw.org. Habwaki amasomo ganu gatairwe ha mukura gwaitu? Habwokuba buli kwezi abantu baingi omu nsi yoona bakozesa intaneti kuseruliriza ha bintu ebirukukwata ha Baibuli. Amasomo ganu nigasobora kukonyera abantu kutandika kwega Baibuli. Ekindi abantu abamu abatutebeza tikibanguhira kwikiriza kutandika kwega Baibuli. Obukiraaba nukwo kiri, booleke ekicweka kinu ha mukura gwaitu rundi basindikire endagirro erukubatwara nambere kiri.e
12. Omuntu ayega ki obwasoma Amasoma Kuruga omu Baibuli agali ha mukura gwaitu?
12 Amasomo Kuruga omu Baibuli agali ha mukura nigabazaaho ebintu binu: “Baibuli hamu n’Ayagihandikisize,” “Abantu Abakira Kubazibwaho omu Baibuli,” hamu “n’Obutumwa Obuli omu Baibuli Oburukutuha Okunihira.” Omuntu obwasoma amasomo ganu ayega:
Omulingo Baibuli esobora kukonyera omuntu
Amanya Yahwe, Yesu hamu na Bamalaika
Habwaki Ruhanga yahangire abantu
Habwaki haroho kubonabona
Amasomo ganu gabazaaho n’omulingo Yahwe . . .
arukwija kwihaho kubonabona hamu n’okufa,
arukwija kuhumbura abafu, kandi
nk’oku alihaho gavumenti z’abantu, omu kiikaro kyazo atemu Obukama bwe.
13. Habwaki omuntu asemeriire kwega Baibuli n’omu h’Abakaiso ba Yahwe hanyuma y’okwega amasomo agali ha mukura? Soborra.
13 Omuntu obw’asoma amasomo agali ha mukura tikirukumanyisa ngu tarukwetaaga kwega Baibuli. Yesu atuhaire omugisa ogw’okufoora abantu abegeswa. Amasomo agali ha mukura gatekaniziibwe kukonyera ab’arukugonza amananu kuba n’ekihika ky’okwega ebirukukiraho. Nukwo kibanguhire kwikiriza kwega Baibuli. Ha kumalirra kwa buli isomo, omusomi n’aralizibwa kuhayo okusaba kwe nukwo omuntu aije kumwegesa Baibuli. Buli kiro, abantu abarukuhingura omu 230 omu nsi yoona nubo barukukozesa omukura gwaitu kusaba kwegesebwa Baibuli. Mali kikuru abantu kwega naitwe Baibuli maiso ha maiso.
IKARA NOLENGAHO KUFOORA ABANTU ABEGESWA
14. Kusigikirra ha kiragiro kya Yesu ekiri omu Matayo 28:19, 20, kiki ekitusemeriire kulengaho kukora, kandi habwaki?
14 Soma Matayo 28:19, 20. Obuturaba nitwegesa abantu Baibuli, tusemeriire kulengaho kufoora abantu ‘abegeswa . . . , nitubegesa okukwata byona [Yesu] ebiyaragiire.’ Tusemeriire kukonyera abantu kukimanya nk’oku kikuru kuheereza Yahwe hamu n’okusagika Obukama bwe. Kinu nikimanyisa ngu tusemeriire kubekambisa kugonza amananu, kuta omu nkora ebibarukwega, kwehayo hali Yahwe, hamu n’okubatizibwa. Kinu nikyo kyonka ekirabakonyera kukira ekiro kya Yahwe obukiraija.—1 Pet. 3:21.
15. Kiki ekitutasemeriire kwikara nitukora kandi habwaki?
15 Nk’oku tusangirwe turozere, tusigaizeyo obwire buke muno empero y’obusinge bunu ehike. Enu niyo ensonga habwaki tutasemeriire kwikara nitwega n’abantu abatarukukora empindahinduka omu bwomeezi bwabo nukwo basobole kufooka baheereza ba Yahwe. (1 Kol. 9:26) Omulimo gwaitu tusemeriire kugukora omu bwangu. Abantu baingi nibetaaga kuhurra amakuru g’Obukama empero etakahikire.
WETANTARRE KIMU EDIINI EZ’EBISUBA
16. Kusigikirra ha Okusuku’rwa 18:2, 4, 5, 8, kiki itwena ekitusemeriire kukora? (Rora obugambo obuli hansi.)
16 Soma Okusuku’rwa 18:2, 4, 5, 8. Ekarra zinu nizooleka ekintu ekindi Yahwe eky’arukugonza abaheereza be bakole. Abakristaayo ab’amananu boona tibasemeriire kuba n’akakwate koona na Baburoni Orukooto. Omwegi wa Baibuli n’asobora kuba akaba ali omu ediini ey’ebisuba obwakaba atakegere amananu. Nasobora kuba nuho yasabiraga kandi y’ayejumbiraga n’omu mikoro yayo endi. Obundi yahayoga sente kusagika ediini egyo. Nahabweki omwegi wa Baibuli atakaikiriziibwe kufooka omutebezi ow’atakabatiziibwe, asemeriire kubanza kwecweraho kimu ediini ez’ebisuba. Asemeriire kuhandiika ebbaruha n’amanyisa ediini nambere akaba ali rundi ekitongole kyona ekiine akakwate n’ediini ez’ebisuba nk’oku atakyali omu halibo.f
17. Abakristaayo basemeriire kwetantara emirimo ya mulingo ki, kandi habwaki?
17 Omukristaayo ow’amananu asemeriire kukigumya ngu omulimo gwe tigwine kakwate koona na Baburoni Orukooto. (2 Kol. 6:14-17) Ekyokurorraho, tasemeriire kuba mukoze we kanisa. Kandi ekindi Omukristaayo ow’arukukorra ekitongole kindi ekitali ky’ediini tasemeriire kwikiriza kukora ekihinguraine ha kyombeko eky’ediini ey’ebisuba. Kandi obwaraaba n’ayekozesa, tasemeriire kwikiriza rundi kuserra omulimo gwona ogwine akakwate n’ediini ez’ebisuba. Habwaki ensonga enu nkuru muno halitwe? Habwokuba titurukugonza kuba kicweka ky’engeso n’enyegesa ez’ediini ez’ebisuba ezitasemiire omu maiso ga Ruhanga.—Is. 52:11.g
18. Ow’oruganda omu akagumira ata ha misingi ya Baibuli obwakaba ali ha mulimo gwe?
18 Omu myaka ey’enyuma, omugurusi w’ekitebe arukwekozesa bakamwetera omulimo ogw’okugenda kukora obubaizi, habw’akasumi kake ha kanisa y’omu rubuga nambere akaba naikara. Omusaija ay’amwetiire omulimo gunu akaba akimanyire nk’oku ow’oruganda onu yaikaraga nagamba ngu tasobora kukora omulimo gwona ogwa ha kanisa. Baitu hati omusaija onu akaba nayetaaga muno omuntu arakora omulimo gunu. Nobukiraaba ngu omusaija onu akamwesengereza muno, ow’oruganda akagumira ha misingi ya Baibuli yayanga kukora omulimo ogu. Wiiki eyahondireho, orupapura rw’amakuru orw’omu kiikaro eki rukaiziramu ekisisani ky’omubaizi ondi n’ahanika omusalaba ha kanisa egi. Kakuba ow’oruganda onu yaikiriize kukora omulimo gunu, ekisisani kye nikyo kyakubaire omu rupapura runu orw’amakuru. Tekerezaaho omulingo kinu kyali nikigenda kusiisa ibara lye omu maiso g’Abakristaayo bagenzi be! Tekerezaaho n’omulingo Yahwe yakwehuliiremu.
BIKI EBITWEGERE?
19-20. (a) Bintu ki ebitwegere? (b) Bintu ki ebitutukwija kwegaho?
19 Kusigikirra ha bunabbi bwa Baibuli, ekintu eky’amaani ekirukugenda kwongeraho nukwo okurangirra ngu “Mirembe, busaho kabi.” Baitu habwokuba Yahwe atwegeseze, tukimanyire ngu amahanga tigasobora kuleetaho obusinge bwonyini kandi obutalihwaho omu nsi. Kiki ekitusemeriire kukora ekintu eki kitakabaireho n’okuhwerekerra kwa bwango kutakahondiireho? Yahwe nagonza twikale nitwekamba omu kutebeza amakuru amarungi ag’obukama n’okufoora abantu abegeswa. Kandi tusemeriire kwecweraho kimu amadiini g’ebisuba. Kinu nikitwarramu kuruga omu diine ez’ebisuba hamu n’okwetantara kukora omulimo gwona ogwine akakwate nazo.
20 Haroho ebintu bindi ebirukwija kubaho omu biro binu eby’okumalirra ‘eby’ebiro bya hanyuma.’ Haroho n’ebintu ebindi Yahwe eby’arukugonza tukole. Ebintu binu nibyo biha kandi nitusobora tuta kwetekaniriza byona ebirukwija kubaho omu kasumi ak’omu maiso? Nitwija kubazaaho ensonga zinu omu kicweka ekirahonderaho.
EKIZINA 71 Tuli Ihe lya Yahwe!
a Omu kasumi akatali kahara abebembezi b’ensi nibaija kurangirra ngu “Mirembe, busaho kabi” habwokuba nibaija kuba nibatekereza ngu balesereho obusinge.” Kanu kaliba kokurorraho akalyoleka ngu omuhito omwingi gw’agenda kutandika. Yahwe nagonza tukole ki okurangirra oku kutakahikire? Ekicweka kinu nikiija kutukonyera kutunga eky’okugarukamu.
b Ekyokurorraho, ha mukura gw’ekitebe eky’Amahanga Ageteraine, ekitebe kinu nikigamba ngu “kirinda obusinge n’eteeka omu nsi yoona.”
c Rora ekicweka “Mali Ruhanga Atakacweriire Abantu Omusango—Abanza Kubahabura Ekirukumara?” omu magaziini enu.
d Kusobora kumanya omulingo ogw’okukozesaamu Ebikwato Ebitukozesa Kwegesa, rora ekicweka “Kwegesa Amananu” ekiri Omunaara gw’Omulinzi ogwa Okitobba 2018.
e Omu kasumi kanu amasomo ganu gali omu ndimi ebiri zonka Orungereza hamu na Portuguese, baitu n’endimi ezindi niziija kwongerwaho.
f Tusemeriire n’okwetantara ebitongole rundi ebitebe ebiine akakwate n’ediine ez’ebisuba ebitekaniza emizaano n’eby’okwesemeza habw’ensinganto. Ekyokurorraho, kumanya ebirukukwata ha kutaaha ekitongole ekya YMCA (Young Men’s Christian Association) rundi ekya YWCA (Young Women’s Christian Association) rora, Watchtower eya Janwali 1, 1979 hansi y’ekicweka “Ebikaguzo Kuruga omu Basomi Baitu.” N’obukiraaba ngu ebitongole binu bigamba ngu tibiine kakwate n’ediini, amananu gali ngu bikurakuraniza entekereza hamu n’ebigendererwa by’ediini.
g Kweyongera kumanya kurungi nk’oku Ebyahandiikirwe bibazaaho emirimo enyakwine akakwate n’ebitongole ebiine akakwate n’ediini, rora ekicweka “Ebikaguzo Kuruga omu Basomi Baitu” omu Watchtower eya Apuli 15, 1999.
h KUSOBORRA EBISISANI: Abantu omu hoteeri bakwasirweho muno amakuru agali ha tivi “Agakagwaho” agarukukwata ha kurangirra okurukugamba ngu “Mirembe, busaho kabi.” Ow’oruganda na mukazi we abali omu buheereza baitu abahumwireho kake tibabihwabihwa okurangirra kunu.