Omulingo Yahwe Agarukamu Esaara Zaitu

1-2. Obwire obumu nitusobora kwekaguza ki obukirukuhika ha saara zaitu?

WAKEKAGUZAAGA Yahwe obwaraaba agarukamu esaara zaawe? Obukiraaba nukwo kiri, toli wenka. Ab’oruganda na banyaanya itwe baingi bekaguza ekikaguzo kinu, kukira muno obubaba nibaraba omu bizibu. Naitwe obuturaaba nitubonabona, nikisobora kutugumira kwetegereza omulingo Yahwe agarukamu esaara zaitu.

² Leka turole omulingo tusobora kukigumya ngu Yahwe agarukamu esaara z’abaheereza be. (1 Yoh. 5:15) Nitwija n’okugarukamu ebikaguzo binu: Habwaki obwire obumu kisobora kuzooka ngu Yahwe tarukugarukamu esaara zaitu? Kasumi kanu Yahwe agarukamu ata esaara zaitu?

YAHWE N’ASOBORA KUTATUGARUKAMU OMU MULINGO TUBAIRE NITUNIHIRA

3. Habwaki Yahwe n’agonza tumusabe?

³ Ebyahandiikirwe bitwoleka ngu Yahwe n’atugonza muno kandi tuli b’omuhendo haluwe. (Hag. 2:7; 1 Yoh. 4:10) Niyo ensonga habwaki n’aturaaliza kumusaba obukonyezi. (1 Pet. 5:6, 7) N’agonza kutukonyera kwikara tuli haihi nauwe n’okugumira ebizibu ebiturukurabamu.

4. Nitukimanya tuta ngu Yahwe agarukamu esaara z’abaheereza be? (Rora ekisisani.)

⁴ Omu Baibuli, tukira kusomaho omulingo Yahwe yagarukiremu esaara z’abaheereza be. Kyokurorraho ki eky’osobora kutekerezaaho? Leka tubazeeho eky’Omukama Daudi. Akatunga abanyanzigwa baingi muno omu bwomeezi bwe, kandi yasabaga Yahwe kumukonyera. Kiro kimu, akasaba ati: “Hurra okusaba kwange, ai [Yahwe]; otegere okutu okwesengereza kwange: omu kwesigwa kwawe ongarukemu, nomu kuhikirra kwawe.” (Zab. 143:1) Yahwe akagarukamu okusaba kwa Daudi. (1 Sam. 19:10, 18-20; 2 Sam. 5:17-25) Niyo ensonga habwaki Daudi akaba n’asobora kugamba ati: “[Yahwe] ali haihi na bona abamukunga.” Naitwe eki nitusobora kukigumya.—Zab. 145:18.

5. Yahwe yagarukamuga esaara zoona ez’abaheereza be abaakara omu mulingo ogubaabaga nibanihira? Bazaaho ekyokurorraho. (Rora ekisisani.)

⁵ Yahwe n’asobora kutagarukamu esaara zaitu omu mulingo ogutubaire nitunihira. Eki nikyo kyahikire ha mukwenda Paulo. Akasaba Ruhanga kumwihaho “ekicumita omu mubiri.” Emirundi esatu, akasabaho ekizibu nikyo kimu. Yahwe akagarukamu esaara ezo? Ego, baitu omu mulingo Paulo ogw’akaba atarukunihira. Omu kiikaro ky’okwihaho ekizibu eki, Yahwe akamuha amaani agaakaba nayetaaga kusobora kugumizaamu namuheereza n’obwesigwa.—2 Kol. 12:7-10.

6. Habwaki obwire obumu nikisobora kuzooka ngu Yahwe tarukugarukamu esaara zaitu?

⁶ Naitwe esaara zaitu nizisobora kugarukwamu omu mulingo tubaire tutarukunihira. Tusemeriire kukigumya ngu Yahwe amanyire omulingo ogurukukirayo oburungi ogw’okutukonyera. N’asobora “okukora okukira byona ebitusobora okusaba nokutekereza.” (Bef. 3:20) Nahabweki n’asobora kutugarukamu omu kasumi rundi omu mulingo tubaire tutarukunihira.

7. Habwaki nikisobora kutwetaagisa kuhinduramu esaara zaitu? Bazaaho ekyokurorraho.

⁷ Nitusobora kuhinduramu esaara zaitu hanyuma y’okwetegereza Yahwe ekyarukugonza. Tekerezaaho ekyokurorraho kya Martin Poetzinger. Hanyuma y’akasumi kake amazire kutaaha obuswere, bakamusibira omu nkambi ya ba Nazi. Hakubanza akasaba Yahwe bamulekere nukwo asobole kugenda kurolerra mukazi we n’okugumizaamu natebeza. Baitu hanyuma ya wiiki ibiri, atarole ekirukwoleka ngu Yahwe akaba nagenda kugarukamu esaara ye. Nahabweki akasaba ati: “Yahwe nkwesegeriize, ningonza onyoleke ekyorukugonza nkole.” Hanyuma akatandika kutekerezaaho ebintu ab’oruganda abandi omu nkambi baali nibarabamu. Baingi baali beralikiriire habw’abakazi n’abaana baabo. Hanyuma Ow’oruganda Poetzinger akasaba ati: “Yahwe webale kumpa obujunanizibwa bunu obuhyaka. Nkonyera nsobole kugumya n’okugarramu ab’oruganda amaani.” Eki nikyo yakozere omu myaka mwenda eiyamazire omu nkambi.

8. Nsonga ki enkuru eitusemeriire kwikara nitwijuka obutuba nitusaba?

⁸ Tusemeriire kwijuka ngu Yahwe aine ekigendererwa, kandi naija kuhikiiriza kusigikirra ha bwire obwataireho. Ekigendererwa kinu nikitwarramu kumaraho ebizibu byona ebiretiire abantu kubonabona nk’ebigwererezi, endwaire, n’okufa. Yahwe naija kuhikiiriza ekigendererwa kinu nakozesa Obukama bwe. (Dan. 2:44; Kus. 21:3, 4) Nk’oku akasumi ako katakahikire, Yahwe aikiriize Sitaani kulema ensi.b (Yoh. 12:31; Kus. 12:9) Kakuba Yahwe amaraho ebizibu byona hati, nikisobora kuzooka ngu Sitaani nalema kurungi abantu. N’obukiraaba ngu tukyalinzire akasumi Yahwe obwarahikiiriza emirago ye, kinu tikirukumanyisa ngu tatukonyera. Leka turole bimu ha bintu Yahwe akora kutukonyera.

OMULINGO YAHWE AGARUKAMU ESAARA ZAITU KASUMI KANU

9. Yahwe n’asobora ata kutukonyera obutuba nitugonza kukora encwamu? Bazaaho ekyokurorraho.

⁹ Atuha amagezi. Yahwe aturaganiize kutuha amagezi agaturukwetaaga kusobora kukora encwamu enungi. Nitwetaaga amagezi kuruga hali Ruhanga kukira muno obutuba nitugenda kukora encwamu ezirakwataho obwomeezi bwaitu, ekyokurorraho kucwamu okutaaha obuswere rundi kutabutaaha. (Yak. 1:5) Tekerezaaho ekyokurorraho ekya munyaanya itwe Maria ow’atali omu buswere.c Akaba nayegondeza omu kuheereza nka payoniya ow’akasumi koona kandi hanyuma yatunga ow’oruganda. Akagamba ati: “Obutwayeyongiire kufooka banywani, tukeyongera kugonzangana. Nkaba nkimanyire ngu nyine kukora encwamu. Nkasaba muno ha nsonga enu. Nkaba ninyetaaga obuhabuzi bwa Yahwe baitu nkaba nkimanyire ngu tarukwija kunkorra encwamu.” Munyaanya itwe nayehurra ngu Yahwe akagarukamu esaara ye. Omu mulingo ki? Akakora okuseruliiriza omu bitabu byaitu, kandi akatunga ebicweka ebyamukonyiire kutunga ebyokugarukamu eby’ebikaguzo eby’akaba aine. Akaikiriza n’obuhabuzi nyina yamuhaire. Obuhabuzi obu bukakonyera Maria kwekebiija enyehurra ze. Kandi hanyuma akasobora kukora encwamu enungi.

10. Kusigikirra ha Abafiripi 4:13, kiki Yahwe ekyarukwija kukora kukonyera abaheereza be? Bazaaho ekyokurorraho. (Rora ekisisani.)

¹⁰ Atuha amaani kusobora kugumiisiriza. Nk’oku yakozere hali omukwenda Paulo, Yahwe atuha amaani agaturukwetaaga kugumira ebizibu byaitu. (Soma Abafiripi 4:13.) Tekerezaaho omulingo Yahwe yakonyiire Ow’oruganda Benjamin kugumira enyikara ey’egumire. Kurugira kimu omu buto bwe, Benjamin n’ab’omu ka ye baikaraga omu nkambi z’abasuhuuki omu Afrika. N’agamba ati: “Nasabaga Yahwe butoosa kumpa amaani kusobora kukora ebyagonza. Yahwe akagarukamu esaara yange kuraba omu kumpa obusinge omu bitekerezo, obumanzi obw’okutebeza, n’ebitabu ebyankonyiire kwikara ngumire omu by’omwoyo. Ekindi, kusomaho ebintu ab’oruganda na banyaanya itwe barabiremu n’omulingo Yahwe yabakonyiire kugumiisiriza kikanyekambisa kucweramu kimu kwikara ndi mwesigwa.”

11-12. Yahwe n’asobora ata kukozesa eka yaitu ey’eby’omwoyo kugarukamu esaara zaitu? (Rora ekisisani.)

¹¹ Akozesa eka yaitu ey’eby’omwoyo. Omu bwire bw’ekiro Yesu atakahaireyo obwomeezi bwe, akasaba muno. Akasaba Yahwe kumwihaho okuswara okw’okurorwa nk’omuntu arukujuma Ruhanga. Omu kiikaro ky’okukora eki, Yahwe akamusindikira omu h’abamalaika kumugumya. (Luk. 22:42, 43) Naitwe Yahwe n’asobora kutukonyera nakozesa ab’oruganda na banyaanya itwe abasobora kututerraho esimu rundi kutubungira. Itwena nitusobora kuserra omugisa ogw’okugambira ab’oruganda na banyaanya itwe “ekigambo ekirungi.” —Nfu. 12:25.

¹² Tekerezaaho ekyokurorraho kya munyaanya itwe Miriam. Wiiki nke hanyuma ya iba kufa, akaba ali wenka omu ka naganya kandi ayetuntwire. Akaba narra muno kandi nayetaaga omuntu ow’okubaza nauwe. N’agamba ati: “Nkaba ntaine maani ag’okuterra omuntu wena esimu, nahabweki nkasaba Yahwe. Obunkaba nincura, omugurusi w’ekitebe ow’akaba ali munywani waitu akanterra esimu.” Miriam akatunga okuhuumuzibwa kuruga hali omugurusi ogu na mukazi we. Nakigumiza kimu ngu Yahwe nuwe yaletiire omugurusi ogu kumuterra esimu.

13. Bazaaho ekyokurorraho omulingo Yahwe asobora kukozesa abatarukumuramya kugarukamu esaara zaitu.

¹³ N’asobora n’okukozesa abantu abatali baheereza be. (Nfu. 21:1) Obwire obumu Yahwe agarukamu esaara z’abaheereza be naleetera abantu abatarukumuramya kubakonyera. Ekyokurorraho, akaleetera Omukama Atakisakisi kwikiriza Nehemiya kugaruka Yerusalemu kukonyera omu kwongera kwombeka orubuga. (Neh. 2:3-6) N’omu kasumi kanu, Yahwe n’asobora kuleetera abo abatarukumuramya kutukonyera obuturukuba tuli omu bwetaago.

14. Kiki ekyoyegere omu kyokurorraho kya munyaanya itwe Soo Hing? (Rora ekisisani.)

¹⁴ Munyaanya itwe Soo Hing akehurra ngu Yahwe akamukonyera nakozesa dakitaali. Mutabani we atalibanizibwa oburwaire bw’omutwe. Obuyatungire butandwa, munyaanya itwe na musaija we bakaleka kukora kusobora kumurolerra. Ekyarugiremu, bakatunga ebizibu omu by’entahya. Munyaanya itwe Soo Hing akagamba ngu akaba atakyasobora kugumiisiriza. Akaseesera Yahwe omutima gwe, namusaba amukonyere. Dakitaali akacwamu kumukonyera n’eka ye. Ekyarugiremu, bakatunga obukonyezi kuruga omu gavumenti, baatunga n’enju enungi ey’okwikaramu. Hanyuma y’ebi, munyaanya itwe akagamba ati: “Nkarora omulingo Yahwe yatukonyiiremu. Mali ‘ahurra okusaba.’”—Zab. 65:2.

KUSERRA N’OKWIKIRIZA OMULINGO YAHWE AGARUKAMU ESAARA ZAITU NIKYETAAGA OKWIKIRIZA

15. Kiki ekyakonyiire munyaanya itwe omu kumanya ngu esaara ze zikaba nizigarukwamu?

¹⁵ Obwire obumu esaara zaitu tizigarukwamu nk’oku twakugondeze. Baitu Yahwe azigarukamu omu omulingo ogurakutukonyera kwikara tuli besigwa haluwe. Nahabweki lengaho kumanya omulingo Yahwe agarukiremu esaara zaawe. Munyaanya itwe Yoko akehurra ngu Yahwe akaba atarukugarukamu esaara ze, baitu akatandika kuhandiika ebintu eby’akaba amusabire. Hanyuma y’obwire akarora omu kitabu kye kandi akakyetegereza ngu Yahwe akaba agarukiremu esaara ze ezirukukira obwingi n’ezimu ez’akaba ayeberwe. Tusemeriire kutekerezaaho omulingo Yahwe arukugarukamu esaara zaitu.—Zab. 66:19, 20.

16. Nitusobora tuta kwoleka okwikiriza obukirukuhika ha saara zaitu? (Abaheburaniya 11:6)

¹⁶ Twoleka okwikiriza obututagarukira ha kusaba Yahwe kyonka, baitu n’obutwikiriza omulingo agarukiremu esaara zaitu. (Soma Abaheburaniya 11:6.) Tekerezaaho ekyokurorraho kya Mike na mukazi we Chrissy. Bakaba baine ekigendererwa eky’okuheereza ha Bbeseeri. Mike n’agamba ati: “Tukamara emyaka nyingi nitwijuza foomu kandi twaikara nitugambira Yahwe ha kigendererwa kinu baitu batatwete.” Mike na Chrissy bakaikara nibakigumya ngu Yahwe amanyire omulingo ogurukukirayo oburungi ogw’arabakozesa. Bakagumizaamu kukora ekibarukusobora nibaheereza nka bapayoniya ab’akasumi koona, baagenda nambere hali obwetaago, n’okukonyera omu purojekiti ez’okwombeka. Kasumi kanu bali omu mulimo ogw’okubungira ebitebe. Mike n’agamba ati: “Obwire obumu Yahwe tagarukamu esaara zaitu omu mulingo ogutubaire nitunihira. Baitu azigarukiremu omu miringo ey’erukukirayo oburungi kukira nk’oku tubaire nitunihira.”

17-18. Kusigikirra ha Zabuli 86:6, 7, kiki ekiturukugumya?

¹⁷ Soma Zabuli 86:6, 7. Omuhandiiki wa Zabuli Daudi akaba nakigumya ngu Yahwe nahurra kandi n’agarukamu esaara ze. Naiwe n’osobora kukigumya. Ebyokurorraho ebitubalizeeho omu kicweka kinu nibitugumya ngu Yahwe n’asobora kutuha amagezi n’amaani ebiturukwetaaga kusobora kugumiisiriza. N’asobora n’okukozesa eka yaitu ey’eby’omwoyo rundi naabo abatarukumuramya kutukonyera.

¹⁸ N’obukiraaba ngu obwire obumu Yahwe tagarukamu esaara zaitu nk’oku tubaire nitunihira, nitukimanya ngu naija kuzigarukamu. Naija kutuha ebiturukwetaaga omu bwire bwonyini. Nahabweki leka twikale nitusaba nitukigumya ngu Yahwe naija kutukonyera hati kandi omu nsi empyaka ‘aliigusa ekintu kyona ekyomiire ekikigonza.’—Zab. 145:16.