Nitusobora Tuta Kwikara Nitugonzangana Muno?

1-2. (a) Habwaki omukwenda Paulo yagambire ngu okugonza nugwo mulingo gurukukira emiringo endi? (b) Bikaguzo ki ebiturukwija kubazaaho?

OMUKWENDA Paulo obwakaba nabazaaho okwikiriza, okunihira, n’okugonza, akamalirra nagamba ngu “ekirukukira hali ebi, [nukwo] kugonza.” (1 Kol. 13:13) Habwaki yagambire ati? Tikirukwija kutwetaagisa kuba n’okwikiriza omu mirago ya Ruhanga ey’omu nsi empyaka habwokuba ebintu ebiturukunihira nibiija kuba bimazire kuhikirra. Baitu kiritwetaagisa kwikara nitwoleka Yahwe n’abantu abandi okugonza. Kandi okugonza kunu kulikara nikweyongera.

² Nk’oku twarora ngu nikiija kutwetaagisa kwikara twine okugonza, leka tubazeeho ebikaguzo binu bisatu. Eky’okubanza, habwaki tusemeriire kugonzangana? Ekyakabiri, twoleka tuta ngu nitugonzangana? Ekyakasatu, nitusobora tuta kwikara nitugonzangana muno?

HABWAKI TUSEMERIIRE KUGONZANGANA?

3. Nsonga ki ezisemeriire kutwekambisa kwoleka okugonza?

³ Habwaki kikuru kwikara nitugonza ab’oruganda na banyaanya itwe? Eki, kyoleka ngu tuli Bakristaayo ab’amananu. Yesu akagambira abakwenda be ati: “Nukwo bona balimanya muli begeswa bange, obumurabaga nokugonzangana inywenka.” (Yoh. 13:35) Ekindi, kitwikaza tuli omu bumu. Paulo akagamba ngu okugonza “nukwo kurukugumya [obumu].” (Bak. 3:14) Haroho n’ensonga endi enkuru habwaki tusemeriire kugonzangana. Omukwenda Yohana akahandiikira Abakristaayo bagenzi be ati: “Anyakugonza Ruhanga, agonzege na mugenziwe.” (1 Yoh. 4:21) Obutwoleka abandi okugonza twoleka ngu nitugonza Ruhanga.

4-5. Bazaaho ekyokurorraho ekirukwoleka akakwate akali hagati y’okugonza okutwiniire Ruhanga n’okugonza okutwiniire abandi.

⁴ Okugonza okutwiniire Ruhanga, kwine kakwate ki n’okugonza okutwiniire ab’oruganda na banyaanya itwe? Ekyokurorraho, tekerezaaho akakwate akali hagati y’omutima n’ebicweka ebindi eby’omubiri. Dakitaali obwakwata ha binywa by’omukono kuhurra nk’oku esagama erukugenda, nikisobora kumukonyera kumanya omutima gwaitu obuguraaba guli omu nyikara enungi rundi nangwa. Kinu nikitwegesa ki?

⁵ Nk’oku dakitaali asobora kumanya enyikara y’omutima kuraba omu kukwata ha binywa, okugonza okutwiniire abantu abandi nikusobora kutukonyera kumanya obuturaaba nitugonza Ruhanga rundi nangwa. Kakuba tukyetegereza ngu okugonza okutwiniire ab’oruganda na banyaanya itwe kutandikire kukeeha, kanu kasobora kuba kokurorraho akarukwoleka ngu n’okugonza okutwiniire Ruhanga kuliyo nikukeeha. Baitu obutwikara nitubagonza muno, ako kaba kokurorraho akarukwoleka ngu okugonza okutwiniire Ruhanga kw’amaani.

6. Habwaki tusemeriire kugira ekitwakoraho kakuba tukyetegereza ngu okugonza okutwiniire ab’oruganda na banyaanya itwe kuliyo nikukeeha? (1 Yohana 4:​7-9, 11)

⁶ Habwaki tusemeriire kugira ekitwakoraho kakuba tukyetegereza ngu okugonza okutwiniire ab’oruganda n’abanyaanya itwe kutandikire kukeeha? Habwokuba kanu kasobora kuba kokurorraho akarukwoleka ngu tutandikire kuceka omu by’omwoyo. Omukwenda Yohana atukonyera kwetegereza ensonga enu obuyagambire ati: “Ogu atarukugonza mugenziwe ouyaboine, tasobora okugonza Ruhanga owataraboine.” (1 Yoh. 4:20) Isomo ki eriturukwega? Kusobora kugonza Yahwe, tusemeriire “okugonzangana.”​—Soma 1 Yohana 4:​7-9, 11.

TWOLEKA TUTA NGU NITUGONZA ABANDI?

7-8. Miringo ki emu eitusobora kwolekangana okugonza?

⁷ Emirundi nyingi, Ekigambo kya Ruhanga kituragira ‘kugonzangana.’ (Yoh. 15:​12, 17; Bar. 13:8; 1 Bas. 4:9; 1 Pet. 1:22; 1 Yoh. 4:11) Baitu okugonza eri nyehurra ey’eruga omu mutima kandi tesobora kurorwa n’amaiso. Hati, nitusobora tuta kwoleka abandi okugonza okutubainiire? Kuraba omu bigambo n’omu bikorwa byaitu.

⁸ Haroho emiringo nyingi eitusobora kwolekamu ab’oruganda na banyaanya itwe ngu nitubagonza. Enu eri emu haliyo. Baibuli n’etutererra eti: “Mubazege omuntu wena amazima nomutahiwe.” (Zak. 8:16) “Muterane omu businge.” (Mar. 9:50) “Omu kutekamungana ekitiinisa, ninywe mubanze.” (Bar. 12:​10, NWT) “Muirizanganege inywenka nainywenka.” (Bar. 15:7) ‘Muganyiranganege.’ (Bak. 3:13) “Mujunangane enketo zanyu.” (Bag. 6:2) “Muhumuzanganege inyenka.” (1 Bas. 4:18) “Mwombekege inywena, omuntu wena omutahiwe.” (1 Bas. 5:11) “Musabiranganege.”​—Yak. 5:16.

9. Habwaki kuhuumuza abandi guli mulingo mukuru ogw’okwoleka abandi okugonza okutubainiire? (Rora ekisisani.)

⁹ Leka tubazeeho gumu ha mulingo ogutusobora kwolekamu okugonza ogubaziibweho omu kacweka akahoire. Paulo akagamba ati: “Muhumuzanganege.” Habwaki kuhuumuza ab’oruganda na banyaanya itwe guli mulingo mukuru ogw’okubooleka okugonza? Kusigikirra ha kitabu kimu ekirukusoborra Baibuli, ekigambo Paulo ekiyakozeseze kumanyisa ‘kuhuumuza,’ nikimanyisa “kwemerra ha rubaju rw’omuntu arukuraba omu nyikara ey’egumire okamugarramu amaani.” Nahabweki, obutuhuumuza ow’oruganda rundi munyaanya itwe ow’arukuraba omu nyikara ey’egumire, tumukonyera kugumizaamu narubatira omu muhanda gw’obwomeezi. Ekindi, tumwoleka ngu nitumugonza.​—2 Kol. 7:​6, 7, 13.

10. Kakwate ki akali hagati y’okusaliirirwa abandi n’okubahuumuza?

¹⁰ Haroho akakwate k’amaani hagati y’okusaliirirwa abandi n’okubahuumuza. Obutusaliirirwa omuntu, kitwekambisa kumuhuumuza n’okugira ekitwakoraho kumaraho ekizibu ekirukumuleetera obusaasi. Nahabweki, kinu nikimanyisa ngu tubanza kusaliirirwa abandi nukwo hanyuma nitubahuumuza. Paulo akooleka omulingo kusaliirirwa abantu kiretera Yahwe kugonza kubahuumuza. Akeeta Yahwe “Isitwe owokuganyira, kandi Ruhanga owokuhumuza kwona.” (2 Kol. 1:3) Ekigambo ‘okuganyira,’ Paulo ekiyakozeseze hanu, nikimanyisa kusaliirirwa abandi. Nahabweki Yahwe nayetwa “Isitwe owokuganyira, rundi Endugirro ey’okuganyira habwokuba nuwe arukukirrayo kimu kusaliirirwa abandi.” Kandi eki, kimuleetera kutuhuumuza “omu muhito gwaitu gwona.” (2 Kol. 1:4) Nk’oku omuntu anyakwine iroho ayehurra kurungi hanyuma y’okunywa amaizi amarungi agarukuruga omu iziba, Yahwe aleetera abetuntwire kwehurra kurungi kandi bahuumwire. Nitusobora tuta kwegera ha kyokurorraho kya Yahwe eky’okusaliirirwa abandi n’okubahuumuza? Nitusobora kwekamba kuba bantu abarukuhuumuza abandi. Eki nitusobora kukikora tuta?

11. Kusigikirra ha Abakolosai 3:12 na 1 Petero 3:​8, kiki ekiratukonyera kwikara nitwoleka abandi okugonza kandi nitubahuumuza?

¹¹ Kiki ekiratukonyera kwikara nitwoleka abandi okugonza kandi nitubahuumuza? Tusemeriire kubafaaho, tubagonze nk’ab’omu ka yaitu, kandi tubooleke embabazi. (Soma Abakolosai 3:12; 1 Petero 3:8.) Habwaki eki kikuru? Obutusaliirirwa ab’oruganda, kandi tukabafaaho, nikiija kutwekambisa kubakonyera n’okubahuumuza obubarukuba nibaraba omu bizibu. Yesu akagamba ati: “Ebiijura omu mutima akanwa nibyo kagamba. Omuntu asemiire, aiha ebisemiire omu lyahurrolye erisemiire.” (Mat. 12:​34, 35) Kuhuumuza ab’oruganda n’abanyaanya itwe guli mulingo omukuru ogutuboolekamu ngu nitubagonza.

KIKI EKIRATUKONYERA KWIKARA NITUGONZANGANA MUNO?

12. (a) Kiki ekitusemeriire kwikara nitwijuka? (b) Kikaguzo ki ekitwagenda kubazaaho?

¹² Itwena nitugonza kwikara ‘nitugonzangana.’ (1 Yoh. 4:7) Baitu twijuke ngu Yesu akagamba ngu “okugonza okwabaingi . . . kulifuka.” (Mat. 24:12) Yesu akaba atarukumanyisa ngu abegeswa be abarukukira obwingi baakulekere kugonzangana. Baitu tusemeriire kwegendereza nukwo tutatandika kwetwaza nk’abantu ab’omu nsi abataine okugonza kwonyini. Hati leka tubazeeho ekikaguzo kinu ekikuru: Nitusobora tuta kumanya okugonza okutwiniire ab’oruganda obukuraaba kuli kw’amaani?

13. Nitusobora tuta kumanya okugonza okutwiniire ab’oruganda obukuraaba kuli kw’amaani?

¹³ Nitusobora kumanya okugonza kwaitu obukuraaba kuli kw’amaani kuraba omu kwekebiija omulingo twetwazaamu obutuhikwaho enyikara ezigumire. (2 Kol. 8:8) Omukwenda Petero akabazaaho emu ha nyikara zinu ati: “Okukira byona muyina okugonzangana kwingi muno inywenka nainywenka: baitu okugonza nukuswekerra ebibi bingi.” (1 Pet. 4:8) Omulingo twetwazaamu abantu abandi obubakora ensobi rundi obubatusaaliza nigusobora kwoleka obuturaaba twine okugonza kwingi.

14. Kusigikirra ha 1 Petero 4:​8, tusemeriire kuba n’okugonza kwa mulingo ki? Bazaaho ekyokurorraho.

¹⁴ Leka tubazeeho ebigambo bya Petero omu bwijwire. Akacweka ak’okubanza ak’orukarra rwa 8 nikooleka ngu tusemeriire kuba ‘n’okugonza kwingi muno.’ Ekigambo “kwingi muno,” Petero ekiyakozeseze nikisobora kumanyisa “kwanjurra.” Akacweka kakabiri ak’orukarra katwoleka okugonza okwingi ekikusobora kukora. Kuswekerra ebibi by’ab’oruganda. Tekerezaaho ekyokurorraho kinu: Kakuba oba oine emeeza eroho ebitonyezi bingi, n’osobora kukwata orugoye orurungi n’orwanjurra haiguru y’emeeza n’osweka ebitonyezi ebi byona. Omulingo nugwo gumu, okugonza kutukonyera kuswekerra hatali ekibi kimu kyonka baitu ebibi bingi. Ekigambo ‘okuswekerra’ nikimanyisa okuganyira. Nk’oku orugoye rusobora kuswekerra ekitonyezi, okugonza nikusobora kuswekerra obuceke n’obutahikirra bw’abandi.

15. Obuturaaba nitugonza muno ab’oruganda na banyaanya itwe, nitwija kusobora kukora ki? (Abefeso 4:32)

¹⁵ Okugonza okutwiniire abandi kusemeriire kuba kw’amaani nukwo kutwekambise kuganyira ab’oruganda na banyaanya itwe n’obukirukuba kigumire kukikora. (Soma Abefeso 4:32.) Obutuganyira abandi twoleka ngu twine okugonza kwingi muno kandi ngu nitugonza kusemeza Isiitwe ow’omu iguru, Yahwe. Kiki ekindi ekiratukonyera kutateeka omutima ha nsobi z’ab’oruganda na banyaanya itwe?

16-17. Kintu ki ekindi ekiratukonyera kutateeka omutima ha nsobi z’abandi? Bazaaho ekyokurorraho. (Rora ekisisani.)

¹⁶ Teeka omutima ha miringo enungi ey’ab’oruganda na banyaanya itwe hatali embi. Leka tugambe ngu oli hamu n’ab’oruganda na banyaanya itwe abandi. Muliyo nimubaza kandi musemeriirwe. Obumuba mutakataahire mweteeza hamu ekisisani. Mweteeza ebisisani bisatu nukwo musobole kukomamu ekirukukirayo kuba kirungi. Baitu omu kimu ha bisisani okyetegereza ngu ow’oruganda omu tasemeriirwe. Ekisisani eki nokikorra ki? Nokisiimuura habwokuba oine ebisisani ebindi bibiri nambere ow’oruganda onu asemeriirwe.

¹⁷ Nitusobora kulengesaniza ebisisani ebirungi ebitwahura, n’ebintu ebirukusemeza ebitwikara nitwijuka. Obutuba tuli hamu n’ab’oruganda na banyaanya itwe, bakora rundi babaza ebintu bingi ebirukusemeza. Baitu ow’oruganda rundi munyaanya itwe n’asobora kukora rundi kubaza ekintu kikatubiihiza. Kiki ekitusemeriire kukora? Tusemeriire kukisiimuura omu bitekerezo byaitu nk’okutusiimuura ekisisani ekitasemiire. (Nfu. 19:11) Eki nikyo tusemeriire kukora habwokuba twine ebintu bingi ebirungi ow’oruganda rundi munyaanya itwe onu ebyakozere. Leka nibyo twikale nitwijuka.

HABWAKI TUSEMERIIRE KWOLEKANGANA OKUGONZA KUKIRA MUNO KASUMI KANU

18. Masomo ki amakuru agarukukwata ha kugonza agabaziibweho omu kicweka kinu?

¹⁸ Habwaki tusemeriire kwikara nitugonzangana muno? Turozere ngu obutugonza ab’oruganda na banyaanya itwe, twoleka ngu nitugonza Yahwe. Twoleka tuta ngu nitugonza ab’oruganda na banyaanya itwe? Gumu ha mulingo tukikoramu nukwo kubahuumuza. Kusaliirirwa abandi nikwija kutwekambisa kwikara nituhuumuzangana. Nitusobora tuta kwikara nitugonzangana muno? Tukora kyona ekirukusoboka kuganyira abandi obubatusobeza.

19. Habwaki kikuru muno kwolekangana okugonza kukira muno kasumi kanu?

¹⁹ Habwaki kikuru muno kwolekangana okugonza kasumi kanu? Petero agarukamu ekikaguzo kinu ati: “Empero ya byona eri haihi: nukwo, . . . [mwolekengana] okugonzangana kwingi muno.” (1 Pet. 4:​7, 8) Nk’oku empero y’ensi enu embi ey’eyongiire kwirra haihi, kiki ekitusemeriire kunihira? Yesu akabazaaho abahondezi be ati: “Mulinobwa amahanga gona okubajunana ibara lyange.” (Mat. 24:9) Kusobora kugumira enobi enu, tusemeriire kwikara tuli omu bumu. Obuturaikara nitugonzangana muno, Sitaani tarukwija kusobora kutubaganizaamu, habwokuba okugonza nukwo “kurukugumya [obumu].”​—Bak. 3:14; Baf. 2:​1, 2.