Yahwe Naturaganiza Kufoora Ensi Orugonjo Orurungi

1. Nabbi Isaya akagambira ki Abaisaleri?

NABBI Isaya akagamba ngu Yahwe ali “Ruhanga wamazima.” Ekigambo ekirukuhindurwa nka “mazima” nikimanyisa “amiina.” (Is. 65:16) Kandi ekigambo “amiina” nikimanyisa “nukwo kibe,” rundi “kihikirre.” Ekigambo “amiina” obukikozesebwa kubazaaho Yahwe rundi Yesu omu Baibuli, kiba nikimanyisa ngu ekintu eki kihikire. Nahabweki, Abaisaleri baketegereza kurungi Isaya ekyakaba nabazaaho. Akaba namanyisa ngu Yahwe ebyaraganiza byona bihikirra. Eki Yahwe akyolekere kuraba omu kuhikiiriza buli kimu kyona ekyaraganiize.

2. Habwaki nitusobora kukigumya ngu Yahwe naija kuhikiiriza ebyaturaganiize, kandi bikaguzo ki ebiturukwija kubazaaho?

² Habwaki naitwe nitukigumya ngu Yahwe naija kuhikiiriza emirago yoona eyaraganiize? Hanyuma y’okurabaho emyaka nka 800 Isaya amazire kuhandiika ebigambo ebi, omukwenda Paulo akasoborra ensonga habwaki emirago ya Ruhanga ehikirra. Akagamba ati: ‘Ruhanga tasobora kubiiha ebisuba.’ (Baheb. 6:18) Nk’oku ensoro y’amaizi etasobora kurugamu amaizi amarungi n’ag’ekisura ha murundi nugwo gumu, Yahwe anyakuli Ensoro y’amananu tasobora kubaza ebisuba. Egi niyo ensonga habwaki nitusobora kwesigira kimu byona Yahwe ebyagamba, otwaliremu n’emirago ey’omu kasumi ak’omumaiso. Omu kicweka kinu nitwija kubazaaho ebikaguzo binu: Bintu ki Yahwe ebyaturaganiize? Kandi kiki Yahwe ekyakozere kutukonyera kukigumya ngu emirago ye yoona niija kuhikirra?

BINTU KI YAHWE EBYATURAGANIIZE?

3. (a) Murago ki abaheereza ba Ruhanga ogubarukugonza muno? (Okusuku’rwa 21:​3, 4) (b) Abantu abamu betwaza bata obutubagambiraho omurago gunu?

³ Abaheereza ba Ruhanga omunsi yoona bagonza muno omurago ogutwagenda kubazaaho. (Soma Okusuku’rwa 21:​3, 4.) Yahwe naraganiza akasumi nambere “okufa; nobukwakuba okutera empamo, nobukwakuba okurra, nobukwakuba okusasa,” biriba bitakyaroho. Baingi omuliitwe obutuba nitutebeza tukozesa enkarra zinu kwoleka abantu omulingo obwomeezi buliba omu nsi empyaka. Baitu baingi betwaza bata obutubasomera omurago gunu? Nibasobora kugamba ngu “eki tikirukusoboka.”

4. (a) Bintu ki bibiri Yahwe ebyakaba amanyire ha murago ogurukukwata ha nsi empyaka? (b) Kiki ekindi Yahwe ekiyakozere oihireho kutuha omurago gunu?

⁴ Yahwe obuyaterekeriize Yohana kuhandiika omurago gunu ogurukukwata ha nsi empyaka akaba akimanyire ngu nitwija kugugambiraho abandi. Ekindi, Yahwe akaba akimanyire ngu kyakugumiire abantu kwikiriza ngu ebintu binu nibiija kubaho omu kasumi ak’omumaiso. (Is. 42:9; 60:2; 2 Kol. 4:​3, 4) Hati nitusobora tuta kukonyera abandi kukigumya ngu omurago ogurukusangwa omu Okusuku’rwa 21:​3, 4 nigwija kuhikirra? Kandi nitusobora tuta kweyongera kwesiga Yahwe ngu naija kuhikiiriza omurago gunu? Yahwe atagarukire ha kutuha omurago gunu ogurukusemeza, baitu akatuha n’ensonga habwaki tusemeriire kukigumya ngu nigwija kuhikirra. Nsonga ki eziyatuhaire?

YAHWE NATUGUMYA NGU OMURAGO GWE NIGWIJA KUHIKIRRA

5. Nkarra ki ezitukonyera kukigumya ngu omurago gwa Ruhanga ogw’okufoora ensi orugonjo orurungi nigwija kuhikirra?

⁵ Enkarra ezirukwongeraho nizitukonyera kukigumya ngu Yahwe naija kuhikiiriza omurago gwe ogw’okufoora ensi orugonjo orurungi. Nitusoma ngu: “Nogu akaba aikaliire ha kitebe kyobukama yagamba ati Dora, ninfora byona ebihyaka. Yagamba ati handika: baitu ebigambo binu byokwesiga, byamazima. Yangambira ati [bihikiriziibwe]. Ninyowe Alufa na Omega, okubanza nempero.”​—Kus. 21:​5, 6a.

6. Habwaki ekyahandiikirwe ekiri omu Okusuku’rwa 21:​5, 6 kitugumya ngu omurago gwa Ruhanga nigwija kuhikirra?

⁶ Habwaki ebigambo binu bitukonyera kweyongera kwesiga omurago gwa Ruhanga? Omu nkarra zinu Yahwe nasisana nk’arukuteeka omukono ha ndagaano hagati ye n’abantu abesigwa kubagumya ngu naija kuhikiiriza omurago gwe. Omurago gunu nigusangwa omu Okusuku’rwa 21:​3, 4. Kandi omu rukarra orwa 5 na 6, abaza ebigambo ebirukutukonyera kukigumya ngu ebyaraganiize nibiija kuhikirra. Leka tubazeeho ebigambo binu omu bwijwire.

7. Nooha arukubaza ha kutandika kw’orukarra rwa 5 kandi habwaki ebigambo ebi by’embaganiza?

⁷ Orukarra rwa 5 rutandika n’ebigambo binu: “Nogu akaba aikaliire ha kitebe kyobukama yagamba ati.” (Kus. 21:5a) Ebigambo binu byembaganiza habwokuba gunu guli gumu ha mirundi esatu omu kitabu ky’Okusuku’rwa nambere Yahwe wenyini abaliza omu kwolekwa. Yahwe wenyini nuwe yabalize ebigambo binu, hatali malaika rundi Yesu. Eki nikitukonyera kukigumya ngu byona Yahwe ebyaraganiize nibiija kuhikirra. Habwaki nitugamba tuti? Habwokuba Yahwe ali Ruhanga “atarukusobora okubiha.” (Tit. 1:2) Nahabweki nitukigumiza kimu ngu ebigambo ebiturukusoma omu Okusuku’rwa 21:​5, 6 nibiija kuhikirra.

“DORA, NINFORA BYONA EBIHYAKA”

8. Kiki Yahwe ekyarukugamba kwoleka ngu nakigumya omurago gwe nigwija kuhikirra? (Isaya 46:10)

⁸ Hanyuma, Yahwe agamba ati: “Dora.” (Kus. 21:5) Ekigambo eky’Oruyonaani ekirukuhindurwa nka “Dora” nikikozesebwa emirundi nyingi omu kitabu eky’Okusuku’rwa. Okuseruliiriza okumu nikwoleka ngu ekigambo kinu kikozesebwa kukonyera omuntu kuteeka omutima ha bigambo ebirukuhonderaho. Kiki Ruhanga akyagamba hanyuma y’ekigambo kinu? Agamba ati: “Ninfora byona ebihyaka.” Ky’amananu ngu Yahwe abazaaho ebintu ebyalikora omu kasumi ak’omumaiso, baitu hali uwe omurago gunu nigwija kuhikirra. Enu niyo ensonga habwaki abazaaho empindahinduka zinu nk’ezimazire kubaho.​—Soma Isaya 46:10.

9. (a) Ebigambo “ninfora byona ebihyaka” byoleka bintu ki bibiri Yahwe ebyalikora? (b) Kiki ekirihika ha ‘nsi n’iguru’ ebiroho kasumi kanu?

⁹ Leka tubazeeho ebigambo ebindi ebirukusangwa omu Okusuku’rwa 21:5. Yahwe akagamba ati: “Ninfora byona ebihyaka.” Omu suura enu, Baibuli eyoleka ebintu bibiri Yahwe ebyalikora. Eky’okubanza, Yahwe alihwerekereza ensi enu embi. Ekyakabiri, naija kuleetaho ensi empyaka. Kiki Yahwe ekyaliihaho? Okusuku’rwa 21:1 nihagamba ngu: “Iguru eryokubanza nensi eyokubanza bihoireho.” “Iguru eryokubanza” nirimanyisa gavumenti ez’ensi ezirukulemwa Sitaani na badaimoni be. (Mat. 4:​8, 9; 1 Yoh. 5:19) Ekigambo “ensi” obukikozesebwa omu Baibuli, nikisobora kumanyisa abantu abarukwikaramu. (Kub. 11:1; Zab. 96:1) Nahabweki, ‘ensi ey’okubanza’ nemanyisa abantu ababi ab’omu kasumi kanu. Yahwe tarukwija kusemeza ‘ensi n’iguru’ ebiroho kasumi kanu, oihireho naija kubihwerekereza kandi omu kiikaro kyabyo ateekeho “iguru erihyaka nensi empyaka”​—ekirukumanyisa gavumenti empyaka hamu n’abantu abahikiriire.

10. Bintu ki Yahwe ebyalifoora ebihyaka?

¹⁰ Omu Okusuku’rwa 21:​5, tusomaho ebintu Yahwe ebyarukwija kufoora bihyaka. Wetegereze ngu Yahwe atagambe ngu: “Ninkora ebintu ebihyaka.” Baitu akagamba ngu: ‘Ninfora ebintu byona ebihyaka.’ Yahwe alifoora ensi orugonjo orurungi kandi n’abantu abafoole abahikiriire. Nk’oku Isaya yarangire, ensi yoona erifooka nk’orugonjo rwa Adeni. Kandi alitufoora bahyaka kuraba omu kukiriza kimu endwaire zaitu zoona. Abalema, abafu b’amaiso, n’abafu b’amatu alibakiriza kimu kandi n’abafu balihumbuurwa.​—Is. 25:8; 35:​1-7.

“EBIGAMBO BINU BYOKWESIGA, BYAMAZIMA. . . . BIHIKIRIZIIBWE”

11. Yahwe akagambira Yohana kukora ki kandi habwaki?

¹¹ Kintu ki ekindi Yahwe ekiyabalize kutukonyera kukigumya ngu omurago gwe nigwija kuhikirra? Akagambira Yohana ati: “Handika: baitu ebigambo binu byokwesiga, byamazima.” (Kus. 21:5) Yahwe atagarukire ha kugambira Yohana kuhandiika, akamugambira n’ensonga habwaki akaba asemeriire ‘kuhandiika.’ Akamugambira ati: “Baitu ebigambo binu byokwesiga, byamazima”​—ekirukumanyisa ngu nitusobora kwesiga ebigambo bya Ruhanga. Nitusiima muno ngu Yohana akorobera ekiragiro eki kandi ‘yahandiika’ ebigambo binu. Kandi hati nitusobora kusomaho omurago gwa Ruhanga ogw’okuleetaho ensi empyaka n’okwecumiitirizaaho emigisa etulindiriire omu kasumi ak’omumaiso.

12. Habwaki Yahwe yagambire ngu: “Bihikiriziibwe”?

¹² Ruhanga ayongeraho ki? Agamba ati: “Bihikiriziibwe.” (Kus. 21:​6, NWT) Habwaki Yahwe yabalizeeho emirago enu nk’ey’emazire kuhikirra? Habwokuba busaho ekisobora kumulemesa kuhikiiriza ekigendererwa kye. Yahwe abazaaho ekintu ekindi ekitukonyera kukigumya ngu ebiyaraganiize nibiija kuhikirra. Kiki ekiyagambire?

“NINYOWE ALUFA NA OMEGA”

13. Habwaki Yahwe yagambire ngu: “Ninyowe Alufa na Omega”?

¹³ Nk’oku tusangirwe turozere, Yahwe akabaza na Yohana emirundi esatu kuraba omu kwolekwa. (Kus. 1:8; 21:​5, 6; 22:13) Buli murundi, Yahwe akakozesa ebigambo nibyo bimu. Akagamba ngu: “Ninyowe Alufa na Omega.” Enyuguta erukumanywa nka alufa niyo y’okubanza omu nyuguta ez’Oruyonaani kandi enyuguta erukumanywa nka Omega niyo y’okumalirra. Yahwe obuyagambire ngu nuwe “Alufa na Omega,” akaba namanyisa ngu obwatandika ekintu, akimalirra.

14. (a) Bazaaho ekyokurorraho ekirukwoleka nidi Yahwe obuyagambire ngu “Alufa” kandi nidi obwaligamba ngu “Omega.” (b) Ebigambo ebiri omu Okubanza 2:​1-3 nibitukonyera kugumya ki?

¹⁴ Hanyuma ya Yahwe kuhanga Adamu na Hawa akabagambira ekigendererwa ekyakaba ainiire ensi n’abantu. Baibuli n’egamba eti: “Ruhanga yabaha omugisa; Ruhanga yabagambira ati muzalege, mukanye, muijuze ensi, mugirye.” (Kub. 1:28) Obuyagambiire Adamu na Hawa ebigambo binu akaba nasisana nk’ow’arukugamba ngu “Alufa.” Akasumi kaakuhikire abaijukuru ba Adamu abahikiriire kandi abarukworobera Ruhanga baijuze ensi kandi bagifoole orugonjo orurungi. Nitusobora kugamba ngu akasumi ekigendererwa kya Yahwe kinu obukirihikirra, nubwo alisisana nk’ow’arukugamba ngu “Omega.” Yahwe obuyamazire kuhanga “iguru nensi . . . nihe lyabyo lyona,” akabaza ebigambo ebirukwoleka ngu ekigendererwa kye kyakuhikiriire. Nibisangwa omu Okubanza 2:​1-3. (Soma.) Akagamba ngu ekiro kyamusanju nikyera omu maiso ge. Eki nikimanyisa ki? Yahwe akaba nakigumiza kimu ngu akaba naija kuhikiiriza ekigendererwa kye hali abantu n’ensi. Kandi eki kyakuhikiriire ha kumalirra kw’ekiro eki ekyamusanju.

15. Habwaki Sitaani yatekeriize ngu akaba n’asobora kulemesa Yahwe kuhikiiriza ekigendererwa kye?

¹⁵ Hanyuma ya Adamu na Hawa kujeemera Yahwe, bakafooka basiisi baaleetera abaana baabo ekibi n’okufa. (Bar. 5:12) Nahabweki kyali nikizooka nk’ekitarukusoboka abantu abahikiriire kandi abarukworobera Yahwe kwijuza ensi. Sitaani akasobora kulemesa Yahwe kuhikiriiza ekigendererwa kye? Obundi eki nikyo Sitaani akaba natekereza. Yahwe akaba n’asobora kuhwerekereza Adamu na Hawa nukwo ahange abantu abandi abahikiriire nubo baijuze ensi. Kakuba Yahwe yakozere eki, Sitaani yakumwesere omubiihi w’ebisuba. Habwaki? Habwokuba Yahwe akaba araganiize Adamu na Hawa ngu oruzaaro rwabo nurwo rwakwijwize ensi nk’oku kyolekerwe omu Okubanza 1:28.

16. Habwaki Sitaani yatekeriize ngu akaba n’asobora kujunana Yahwe habw’okutahikiiriza ebyakaba araganiize?

¹⁶ Ncwamu ki endi Sitaani ey’akaba natekereza ngu Ruhanga yaakukozere? Obundi Sitaani akatekereza ngu Yahwe akaba naija kwikiriza Adamu na Hawa kuzaara abaana baitu abatahikiriire. (Mug. 7:20; Bar. 3:23) Omu mulingo ogu, Sitaani yakugambire ngu Yahwe alemerwe kuhikiiriza ebiyaraganiize. Habwaki? Habwokuba eki tikyakuhikiiriize ekigendererwa kya Ruhanga eky’okufoora ensi orugonjo orurungi orurumu abantu abahikiriire, kandi abaijukuru ba Adamu na Hawa.

17. Yahwe akasobora ata kugonjoora obujeemu bwa Sitaani n’abantu ab’okubanza kandi kiki ekirirugamu? (Rora ekisisani.)

¹⁷ Hanyuma ya Sitaani n’abantu ab’okubanza kujeema, Yahwe akora ekintu Sitaani akaba atasobora kunihira. (Zab. 92:5) Yahwe akooleka ngu abaza amananu yaleka Adamu na Hawa baazaara abaana. Kandi akooleka ngu kakuba agamba ngu naija kukora ekintu, busaho ekisobora kumulemesa kukikora. Kusobora kuhikiiriza ekigendererwa kye, akaraganiza kusindika ‘oruzaaro’ orwakujunire abaijukuru ba Adamu na Hawa abaakucwiremu kumworobera. (Kub. 3:15; 22:18) Sitaani aine kuba akaba atarukunihira ngu Yahwe n’asobora kuteekaho entekaniza ey’ekicunguro! Habwaki? Habwokuba n’esigikirra ha kugonza okutarumu okwegondeza. (Mat. 20:28; Yoh. 3:16) Sitaani taine okugonza kunu habwokuba ayegondeza wenka. Hati, kiki ekirukwija kubaho habw’entekaniza ey’ekicunguro? Hakumalirra kw’Emyaka Rukumi ey’Obulemi bwa Kristo, abaijukuru ba Adamu na Hawa abahikiriire nibaija kwikara omu nsi ey’efookere orugonjo orurungi, nk’oku ekigendererwa kya Yahwe kikaba kiri ha kubanza. Kasumi ako Yahwe naija kugamba ngu, “Omega.”

OMULINGO TUSOBORA KWEYONGERA KWESIGA OMURAGO GWA YAHWE OGW’ORUGONJO ORURUNGI

18. Nsonga ki isatu Ruhanga ez’atuha kutukonyera kukigumya ngu omurago gwe gulihikirra? (Rora akasanduuko “Ensonga Isatu Eziratukonyera Kwesiga Omurago gwa Yahwe.”)

¹⁸ Omu kicweka kinu turozere ensonga ezitukonyera kukigumya ngu ensi niija kufooka orugonjo orurungi. Nitusobora tuta kukonyera abandi abarukugurukyagurukya ngu omurago gwa Yahwe ogw’ensi empyaka gulihikirra? Ensonga ey’okubanza, Yahwe wenyini nuwe aturaganiize. Omu kitabu eky’Okusuku’rwa nihagamba hati: “Nogu akaba aikaliire ha kitebe kyobukama yagamba ati Dora, ninfora byona ebihyaka.” Yahwe aine amagezi n’amaani kandi nagonza kuhikiiriza omurago gunu. Eyakabiri, Yahwe akigumiza kimu ngu omurago gunu nigwija kuhikirra kandi niyo ensonga habwaki agubazaaho nk’ogumazire kuhikirra. N’agamba ati: “Ebigambo binu byokwesiga, byamazima. . . . [bihikiriziibwe].” Eyakasatu, ebigambo: “Ninyowe Alufa na Omega,” byoleka ngu Yahwe obwatandikaho ekintu akimaliiriza. Yahwe alyoleka ngu Sitaani mubiihi w’ebisuba kandi ngu tasobora kumulemasa kuhikiiriza ekigendererwa kye.

19. N’osobora ota kukonyera abantu abagamba ngu omurago gwa Ruhanga ogw’okufoora ensi orugonjo orurungi tigulihikirra?

¹⁹ Ijuka ngu buli murundi ogambiraho abandi ha mirago ya Yahwe, oyeyongera kukigumya ngu niija kuhikirra. Nahabweki, omurundi ogundi obwoliba nogambiraho omuntu ha murago gunu omurungi ogurukusangwa omu Okusuku’rwa 21:4 kandi akagamba ngu “tigusobora kuhikirra,” kiki ekyosobora kukora? N’osobora kumusomera orukarra orwa 5 na 6 kandi ozisoborre. N’osobora kumwoleka omulingo Yahwe akigumize ngu omurago gunu nigwija kuhikirra nasisana nk’owataire ekinkumu ha ndagaano.​—Is. 65:16.