ISOMO 58
Ikara Oli Mwesigwa Hali Yahwe
Abakristaayo ab’amananu tibaikiriza kintu kyona rundi omuntu weena kubalemesa kuramya Yahwe. Hatoroho kugurukyagurukya naiwe nukwo orukwehurra oti. Yahwe atwara obwesigwa bwawe kuba kintu kikuru. (Soma 1 Ekyebyomubusinge 28:9.) Nyikara ki ezisobora kulenga obwesigwa bwawe, kandi kiki ekisobora kukukonyera kuzigumira?
1. Abantu abandi nibasobora bata kulenga obwesigwa bwawe hali Yahwe?
Abantu abamu nibaija kulengaho kutulemesa kuheeraza Yahwe. Nooha asobora kukora ekintu ekibi ekya mulingo ogu? Abantu abamu abarugire omu mananu babazaaho kubi ekitebe kya Yahwe habwokuba nibagonza kucekya okwikiriza kwaitu. Nibeetwa abantu abaayecwireho ekitebe. Ekindi, abebembezi b’amadiini abamu batubazaaho ebisuba habwokuba nibagonza abo abataine okwikiriza okugumire baleke kuheereza Yahwe. Ky’akabi hali itwe kubaza n’abarukuhakaniza ekitebe, kusoma ebitabu byabo rundi obutumwa, kugenda ha mikura yabo rundi kurora vidiyo zaabo. Obukirukuhika hali abo abalengaho kumaramu abandi amaani nukwo baleke kuheereza Yahwe n’obwesigwa, Yesu akagamba ati: “Mubaleke; bali bebembezi abafire amaiso. Baitu omufu wamaiso obwananata omufu wamaiso, bombi baligwa omu kina.”—Matayo 15:14.
Baitu kakuba omuntu outumanyire acwamu ngu takyagonza kuba omu h’Abakaiso ba Yahwe? Nikisaaliza muno kakuba aba ali muntu outumanyire kurungi. Omuntu ogu n’asobora kutuhambiriza kukomamu uwe rundi Yahwe. Tusemeriire kucweramu kimu kwikara tuli besigwa hali Ruhanga kukira ekintu ekindi kyona. (Matayo 10:37) Nahabweki tworobera ekiragiro kya Yahwe eky’okutakoragana n’abantu nk’abo.—Soma 1 Abakolinso 5:11.
2. Encwamu zaitu nizisobora kwoleka zita ngu tuli besigwa hali Yahwe?
Okugonza okutwiniire Yahwe nikwija kutuleetera kwetantara kuba n’akakwate koona n’ediini ez’ebisuba. Emirimo eitukora, ebitongole ebitukorra, rundi ekintu kyona ekitukora, tibisemeriire kuba biine akakwate koona n’amadiini ag’ebisuba. Yahwe atutererra ati: “Mumuturukemu [Baburoni orukuru], abantu bange.”—Okusuku’rwa 18:2, 4.
YEGA EBIRUKUKIRAHO
Manya omulingo osobora kwetantara kwikiriza omuntu weena kucekya obwesigwa bwawe hali Yahwe. Ekindi, rora omulingo osobora kwoleka obwesigwa obu n’oruga omu Baburoni Orukuru.
3. Wegendereze abeegesa ab’ebisuba
Tusemeriire kwetwaza tuta kakuba tuhurra ebintu ebirukusiisa ibara ly’ekitebe kya Yahwe? Musome Enfumo 14:15, hanyuma mubazeeho ekikaguzo kinu:
Habwaki tutasemeriire kwikiriza buli kintu kyona ekituhurra?
Musome 2 Yohana 10, hanyuma mubazeeho ebikaguzo binu:
Tusemeriire kutwaza tuta abantu abaayecwireho ekitebe?
N’obukiraaba ngu tusobora kutabaza n’abaayecwireho ekitebe maiso ha maiso, miringo ki eitusobora kwesanga nitubaza nabo?
N’otekereza Yahwe n’asobora kwehurra ata kakuba tuhuliiriza ebintu ebibi ebibamubazaaho rundi ebibabazaaho ekitebe kye?
4. Ikara oli mwesigwa hali Yahwe kakuba ow’oruganda asiisa
Kakuba tumanya ngu omuntu omu kitebe akozere ekibi eky’amaani, bujunanizibwa ki obutwine? Tekerezaaho omusingi oguli omu biragiro bya Ruhanga hali Abaisaleri. Musome Ebyabalevi 5:1.
Nk’oku turukutererwa omu rukarra oru, kakuba tumanya ngu omuntu akozere ekibi eky’amaani, tusemeriire kugambira abagurusi byona ebiturukumanya. Baitu tutakakikozere, kiri kikorwa ky’embabazi kubanza kugambira anyakukikozere uwe wenka kugenda omu bagurusi akakyatura. Kakuba ayanga kukikora, obwesigwa bwaitu hali Yahwe busemeriire kutwekambisa kugambira abagurusi ebitumanyire. Obutuhondera entekaniza egi tuba nitwoleka tuta okugonza okutalekera hali . . .
Yahwe Ruhanga?
omuntu ow’akozere ekibi?
abandi omu kitebe?
Kakuba Omukristaayo mugenzi waawe aba ali mu kabi, mukonyere!
5. Ikara aheeru ya Baburoni Orukuru
Musome Luka 4:8 na Okusuku’rwa 18:4, 5, hanyuma mugarukemu ebikaguzo binu:
Ibara lyange likyali omu bitabu by’ediini ey’ebisuba?
Ndi omu kitongole ekiine akakwate n’ediini endi?
Omulimo gwange gusagika amadiini ag’ebisuba omu mulingo gwona?
Haroho enyikara ezindi zoona omu bwomeezi bwange nambere nsemeriire kwecwaho ediini ez’ebisuba?
Obundaaba ngarukiremu ego hali bimu ha bikaguzo binu, mpindahinduka ki ezinsemeriire kukora?
Omu nyikara zoona kora encwamu ey’erakuleka oine omuntu ow’omunda omurungi kandi oli mwesigwa hali Yahwe.
N’osobora kukora ki kakuba bakusaba kuhayo kusagika entekaniza z’ediini?
ABANTU ABAMU BAGAMBA: “Nsemeriire kumanya abaayecwireho ekitebe ekibarukubaza hali Abakaiso ba Yahwe nukwo ntonganirre amananu.”
Eki nikiba kiri ky’amagezi? Habwaki?
OYEGERE KI?
Kusobora kwikara tuli besigwa hali Yahwe, tusemeriire kwetantara kukoragana naabo abatali besigwa hali uwe. Ekindi tusemeriire kwecweraho kimu ediini ez’ebisuba.
Kweijukyamu
Habwaki tutasemeriire kurora, kusoma, rundi kuhuliiriza ebintu eby’abantu abaayecwireho ekitebe?
Tusemeriire kutwaza tuta abo abatakyagonza kuba bamu h’Abakaiso ba Yahwe?
Nitusobora tuta kworobera okutererrwa okw’okwiruka omu madiini ag’ebisuba?
SERULIIRIZA
Manya eky’osemeriire kukora abantu abandi obubabazaaho Abakaiso ba Yahwe ebitahikire.
“Omanyire Amananu Gonyini?” (Omunaara gw’Omulinzi, ogwa Agusto 2018)
N’osobora ota kumanya ebitongole rundi emirimo ey’erukusagika Baburoni Orukuru?
Abahakanizi abamu bakozere ki kulengaho kucekya okwikiriza kwaitu?
Omu kicweka “Nyikaire Ninserra Ruhanga Kuruga omu Buto Bwange,” somaho omwebembezi w’ediini eya Shinto ayayecwireho ediini ey’ebisuba
“Baibuli Ehindura Obwomeezi” (Watchtower, eya Julaayi 1, 2011)