OBWOMEEZI BWAITU NK’ABAKRISTAAYO

Ekicweka Ekihyaka eky’Okukozesa omu Ruso’rokano orwa Hagati omu Wiiki

Kutandika na Janwali 2018, oruso’rokano orubaho hagati ya wiiki nirwija kubamuga ekicweka ekirukusigikirra ha Baibuli ei tukozesa omu kwesomesa eya New World Translation of the Holy Scriptures (nwtsty-E), enyakuli ha mukura gwaitu. N’obukiraaba ngu Baibuli enu teri omu rulimi rwaitu, ekicweka kinu nikiija kutukonyera muno obuturaaba nitutekaniza enso’rokano. Baitu ekirukukira obukuru, ekicweka kinu nikiija kutukonyera kugumya enkoragana yaitu na Yahwe, Isitwe ow’engonzi!

EBIGAMBO EBIRUKUSOBORRA

Ekicweka kinu nikiija kwongera kutukonyera kumanya biingi ebirukukwata ha kiikaro ekirukubazibwaho, obuhangwa bw’abantu, hamu n’amakuru g’ebigambo ebimu kuruga omu Baibuli.

Matayo 12:20

Ekibugo Ekicucuuka: Abantu bakozesaaga etaara omu maka gaabo ezikozerwe omu ibumba kandi bakozesaaga amagita ag’omuzeituni nk’amafuta. Orutambi rwakonyeraga kusika amafuta nukwo etaara ikale neyaka. Ekigambo ky’Oruyonaani ekirukumanyisa ‘ekibugo ekirukucucuuka’ nikisobora kuba kyamanyisaga orutambi orukucuuka omwika oruli haihi kuraara rundi oruzimire. Obunabbi obuli omu Isaya 42:3 bukaranga ngu embabazi za Yesu zakuletiire okunihira okw’abantu abebundaazi hamu n’abalemeriirwe kutaraara rundi kuzima.

Matayo 26:13

Mananukwo: Omurulimi Oruyonaani ekigambo, a·menʹ, kikaruga omu kigambo ky’Oruheburaniya ʼa·menʹ, ekirukumanyisa ngu “nukwo kibe,” rundi “mananukwo.” Yesu akakozesa muno ekigambo kinu obuyabaga natandika embazo, n’araganiza, rundi naranga obunabbi, kugumya ngu eby’abalize by’amananu kandi by’okwesiga. Omulingo ogw’embaganiza Yesu yakozesezemu ekigambo “mananukwo” rundi amiina nigusangwa omu bitabu eby’enjiri byonka hatali omu bitabu ebindi ebya Baibuli rundi eby’ediini. Ekigambo kinu obu kikozesebwa emirundi ebiri (a·menʹ a·menʹ) nk’oku kiri omu Njiri ya Yohana kihindurwa ngu “mali mali.”—Yoh 1:51.

EBISISANI NA VIDIYO

Ebisisani, hamu na vidiyo ezitaine maraka nibiija kutukonyera kumanya biingi ebiri omu Baibuli.

Besifage, ha Rusozi orwa Zeituni hamu na Yerusalemu

Vidiyo enu n’etwoleka omuhanda ogurukutaaha omu Yerusalemu kuruga omu buruga izooba, omu kyaro ekirumanywa nka et-Tur kasumi kanu—ekyaro kinu nikiteberezebwa kuba Besifage erukabazibwaho omu Baibuli—enyakuli ha rubaju rw’Orusozi orwa Zeituni. Besaniya eri omu kicweka kya buruga izooba bwa Besifage ha Rusozi orwa Zeituni. Yesu n’abegeswa be, obu babaga Yerusalemu bararaga Besaniya omu rubuga orukumanywa nka el-ʽAzariyeh (El ʽEizariya ) kasumi kanu. Ibara ly’orubuga runu omu Ruharabu nirimanyisa ngu “Ekiikaro kya Lazaro.” Hataroho okugurukyagurukya kwona, Yesu yararaga omu ka yaba Maliza, Malyamu hamu na Lazaro. (Mat 21:17; Mar 11:11; Luk 21:37; Yoh 11:1) Yesu obuyabaga naruga omu ka yabo kugenda Yerusalemu, nasobora kuba yarabaga omu muhanda ogu tuboine omu vidiyo. Yesu obwakaba n’agenda Yerusalemu atembere ha nkaina omu kwezi kwa Nisani 9, 33 C.E. kuraba ha Rusozi orwa Zeituni, n’asobora kuba yakozeseze omuhanda nugwo gumu kuruga Besifage kugenda Yerusalemu.

Omuhanda kuruga Besaniya kugenda Besifage
Besifage
Orusozi orwa Zeituni
Ekihanga kya Kidironi
Orusozi orwa Yekaru

Omusumaali omu igufa ly’ekikongoijo

Ekisisani ekyolekerwe hanu kiri ky’ekibumbe ekyakozerwe kwesaniriza igufa ly’ekikongoijo erirumu omusumali ogwa inci 4 n’ekicweka ery’azoirwe omu Yerusalemu omu 1968, kandi lyali ly’omu busumi bw’Abarumi. Ekibumbe kinu kikakonyera abantu kwetegereza ngu emisumaali yakozesebwaga omu kuhanika abantu ha miti nukwo barahuke kufa. Omusumaali gunu nigusobora kuba nigusisana n’emisumaali eyakozesiibwe abasirikale ba Roma kuhanika Yesu ha muti. Igufa ery’azoirwe likasangwa omu kasanduuko akakozerwe omw’ibale nambere bayahuraga amagufa g’omuntu hanyuma y’omubiri kujunda. Kinu nikyoleka ngu n’abantu abahanikwaga ha miti babaziikaga.—Mat 27:35.