Ruhanga Akurora?

EBITURUKWEGERA HA BINTU EBYAHANGIRWE

Edakiika 60 omwana ezamara hanyuma y’okuzaarwa nkuru muno omu bwomeezi bwe. Habwaki? Habwokuba nyina mwana obwaba n’omwana we omu saaha emu ey’okubanza hanyuma y’okuzaarwa kikonyera omwana kukura kurungi.a

Kiki ekiretera omukazi kufaaho omwana we ayakazaarwa? Purofeesa omu arukwetwa Jeannette Crenshaw, akasoborra omu magaziini erukwetwa The Journal of Perinatal Education ngu hormone rundi ensande ey’omubiri erukwetwa oxytocin “eretera enyehurra ya nyina omwana ey’embabazi kweyongera hanyuma y’okuzaara obwamukwataho, obwaba amuroleriire rundi obwaba namwonkya.” Haroho endi hormone “eyekonyera omukazi hanyuma y’okuzaara kumanya omwana we” kandi n’okutunga enkoragana enungi n’omwana we. Habwaki ekintu kinu kikuru?

Enkoragana enu ey’omwana na nyina ekakorwa Omuhangi waitu ow’okugonza, Yahwe Ruhanga.b Omukama Daudi akakugiza Ruhanga ‘habw’okumwiha omunda’ ya nyina n’okumuliinda n’akozesa nyina. Akasaba nagamba ati: “Nkebinga iwe okuruga okuzaarwa kwange; niwe Ruhanga wange okuruga omu nda ya mau.”​—Zabuli 22:9, 10.

TEKEREZAAHO KINU: Ruhanga obwaraaba yakozere entekaniza enu ey’esobozesa omuzaire kwetegereza omwana we kandi akamanya ebyetaago bye, tikyakubaire ky’amagezi kwikiriza ngu Ruhanga natufaaho, itwe ‘abaana be’?​—Engeso Ezabakwenda 17:29.

BAIBULI EKY’EYEGESA HA MULINGO RUHANGA ATUROLERRAMU

Yesu Kristo arukumanya kurungi Omuhangi waitu, akeegesa ati: “Ebisirya bibiri tibabigura omu senti emu? Kandi ekitahi kyabyo ekimu tikirigwa hansi . . . Isinywe [atamanyire]: baitu nisoke erya ha mutwe gwawe libazirwe lyona. Nikyo mutalitinira: inywe nimukira muno ebisirya bingi.”​—Matayo 10:29-31.

Bake muno omulitwe abafaaho obunyonyi obutaito, titukimanya n’okukimanya akanyonyi kamu obukagwa hansi kakafa. Baitu Isitwe ow’omu iguru namanya buli kamu koona! N’obukiraaba nukwo kiri, obunyonyi n’obubwakuba buli bwingi​—tibusobora kukira omuntu omuhendo. Nahabweki, isomo liri ngu: “Tosemeriire kutiina” ngu Ruhanga takumanyire. Baitu okigumize kimu ngu n’akufaaho muno!

Ebyahandiikirwe nibitugumya ngu

• “Amaiso ga Mukama gali hona hona, nigarolerra ababi nabarungi.”​—ENFUMO 15:3.

• “Amaiso ga Mukama garora abokuhikirra, namatuge gahurra okukunga kwabu.”​—ZABULI 34:15.

• “Ndahi’rwa, ndasemererwa obwokuganyirwa kwawe; baitu okarora omuhito gwange; okamanya obwomezi bwange omu bujune.”​—ZABULI 31:7.

“NAYEHURRAGA NGU YAHWE TARUKUNGONZA”

Itwe kukimanya ngu Ruhanga natufaaho kandi ngu aikara naturora habwokuba natugondeza ebirungi nikisobora kuhindura obwomeezi bwaitu? Ego, Hannah,c arukuruga omu ihanga lya Bungereza nasoborra ati:

“Emirundi nyingi, nayehurraga ngu Yahwe tarukungonza kandi tarukugarukamu okusaba kwange. Nkantekereza ngu kinu kikabaho habwokuba nkaba nyine okwikiriza kuke. Nkehurra ngu Ruhanga nanfubira rundi tandora n’okundora habwokuba tinyine mugaso gwona. Kandi nkehurra ngu Ruhanga tarukunfaaho.”

Baitu hati, Hannah n’akigumya ngu Yahwe n’amufaaho kandi n’amugonza. Kiki eky’amuletiire kuhindura entekereza ye? Nagamba ati: “Ekahinduka mpora mpora.” Nayongera nagamba ngu: “Ninyijuka orubazo rumu orukusigikirra ha Baibuli orw’ahairwe emyaka nyingi enyuma, orukukwata ha kicunguro kya Yesu. Rukankwataho muno kandi rwankonyera kukigumiza kimu ngu Yahwe n’angonza. Nkira kurra okusaba kwange obukugarukwamu, habwokuba nkyetegereza ngu Yahwe nangonza. Okusoma Baibuli n’okugenda omu nso’rokano binyegeseze biingi ebirukukwata hali Yahwe, emiringo ye, n’omulingo ayehurra hali itwe. Hati ninkigumiza kimu Yahwe atukonyera, n’atugonza kandi n’agonza kurolerra buli omu wena nk’omuntu.”

Hannah ebyarukugamba nibigarramu amaani. Baitu, nosobora ota kukigumya ngu Ruhanga nayetegereza kandi naijuka enyehurra zaawe? Ekicweka ekirukwongera nikiija kugarukamu ekikaguzo kinu.