ISOMO 59

Nosobora Kugumira Okuhiiganizibwa

Omulingo Kirukusisana ha Rupapura

Obwire bwona, Abakristaayo boona nibasobora kuhiiganizibwa. Kinu kisemeriire kutweralikiriza?

1. Habwaki nitunihira ngu nitwija kuhiiganizibwa?

Baibuli ekyoleka kurungi ngu: “Bona abarukwenda okukwata engeso ezokutina Ruhanga omu Kristo Yesu balihiganizibwa.” (2 Timoseo 3:12) Yesu akahiiganizibwa habwokuba akaba atali kicweka eky’ensi ya Sitaani. Naitwe tituli kicweka ky’ensi, nahabweki tikirukutuhuniriza obutuhiiganizibwa gavumenti ez’ensi enu hamu n’ebitebe eby’amadiini.—Yohana 15:18, 19.

2. Nitusobora tuta kwetekaniriza okuhiiganizibwa?

Tusemeriire kugumya obwesige bwaitu omuli Yahwe hati. Tunga obwire buli kiro kumusaba hamu n’okusoma Ekigambo kye. Genda omu nsorrokano butoosa. Ebintu binu byona nibiija kukuha amaani agorukwetaaga kuraba omu kuhiiganizibwa n’obumanzi, n’obu kuraaba nikuruga omu banyabuzaale. Omukwenda Paulo ayahiiganizibwaga akahandiika ati: “[Yahwe] nuwe mukonyezi wange; tinditina.”—Abaheburaniya 13:6.

Obututebeza obutoosa, kitukonyera kuba bamanzi. Okutebeza kutwegesa kwesiga Yahwe n’okuleka kutiina abantu. (Enfumo 29:25) Kakuba okurakuraniza obumanzi bw’okutebeza hati, noija kwetekaniriza kurungi kutebeza, gavumenti n’obuziratanga omulimo gwaitu.—1 Abasesalonika 2:2.

3. Obutugumira okuhiiganizibwa kitugasira kita?

Ky’amananu ngu titwegondeza omu kuhiiganizibwa, baitu obutukugumira, okwikiriza kwaitu kweyongera kuguma. Twirra haihi na Yahwe habwokuba turora obukonyezi bwe, obutwehurra ngu titukyaine maani agarukumara. (Soma Yakobo 1:2-4.) Kisaaliza Yahwe obw’arora nitubonabona, baitu kandi kimusemeza obw’arora nitugumisiriza. Baibuli n’egamba ngu: “Baitu obumugumiisiriza okubonabonesebwa habw’okukora ebirungi, eki nikyo ekirukusiimwa omu maiso ga Ruhanga.” (1 Petero 2:20, “NWT”) Ekisembo Yahwe eky’aliha abo boona abagumiisiriza n’obwesigwa nubwo obwomeezi obutahwaho omu nsi ey’etarumu kuhakaniza okuramya okw’amananu.—Matayo 24:13.

YEGA EBIRUKUKIRAHO

Manya ensonga habwaki nikisoboka kwikara tuli besigwa hali Yahwe, abantu n’obubatuhiiganiza, n’omulingo alituhamu empeera.

Omukazi n’agenda kwegesa omwegi we owa Baibuli n’obukiraaba ngu bazaire be nibamuhiiganiza.

4. N’osobora kugumira okuhakanizibwa okuruga omu abanyabuzaale

Yesu akaba akimanyire kurungi ngu abamu h’ab’omu maka gaitu basobora kutagonza tuheereze Yahwe. Musome Matayo 10:34-36, hanyuma mubazeeho ekikaguzo kinu:

Abanyabuzaale nibasobora kugamba ki rundi kukora ki omuntu kakuba acwamu kuheereza Yahwe?

Kurora ekyokurorraho, mutekeho VIDIYO, hanyuma mubazeeho ekikaguzo ekirukuhonderaho.

VIDIYO: Yahwe Akatutangirra (5:13)

N’osobora kukora ki kakuba omunyabuzaale rundi omunywani alengaho kukulemesa kuheereza Yahwe?

Musome Zabuli 27:10 na Marako 10:29, 30. Hanyuma y’okusoma buli kyahandiikirwe, mubazeeho ekikaguzo kinu:

Omurago gunu nigusobora kukukonyera guta kakuba abanyabuzaale rundi banywani baawe bakuhiiganiza?

5. Ikara n’oramya Yahwe n’obw’oraaba n’ohiiganizibwa

Nikyetaagisa obumanzi kuheereza Yahwe abandi n’obubalengaho kutulemesa. Mutekeho VIDIYO, hanyuma mubazeeho ekikaguzo ekirukuhonderaho.

VIDIYO: Kwoleka Obumanzi n’Obworaaba n’Ohiiganizibwa (6:27)

Ebyokurorraho ebyolekerwe omu vidiyo enu byakugarramu bita amaani?

Musome Engeso Ezabakwenda 5:27-29 na Abaheburaniya 10:24, 25. Hanyuma y’okusoma buli kyahandiikirwe, mubazeeho ekikaguzo kinu:

Habwaki kikuru kugumizaamu nituheereza Yahwe n’obukiraaba ngu omulimo gwaitu ogw’okutebeza rundi ensorrokano bitangirwe?

6. Yahwe naija kukukonyera kugumiisiriza

Abakaiso ba Yahwe abato n’abakuru kuruga omu nsi yoona bagumiizeemu kuheereza Yahwe n’obwesigwa n’obubaraaba nibahiiganizibwa. Kurora kiki ekyabakonyire, mutekeho VIDIYO. Hanyuma mubazeho ekikaguzo ekirukuhonderaho.

VIDIYO: Yahwe Ruhanga Naija Kumpa Amaani (3:40)

Kusigikirra ha vidiyo, kiki ekyakonyire Abakaiso ba Yahwe banu kugumiisiriza?

Musome Abarumi 8:35, 37-39 na Abafiripi 4:13. Hanyuma y’okusoma buli kyahandiikirwe, mubazeeho ekikaguzo kinu:

Ekyahandiikirwe kinu nikikugumya kita ngu n’osobora kugumira buli kulengwa kwona?

Musome Matayo 5:10-12, hanyuma mubazeeho ekikaguzo kinu:

Habwaki n’osobora kusemererwa n’obw’oraaba n’ohiiganizibwa?

Abakaiso ba Yahwe ab’omu kasumi kanu abagumiisiriize okuhiiganizibwa hamu n’enkomo habw’okwikiriza kwabo. — Obukaikuru bw’Abakaiso ba Yahwe bagumiizeemu nibaheereza Yahwe n’obwesigwa n’obukiraaba ngu nibahiiganizibwa. Naiwe n’osobora!

ABANTU ABAMU BAGAMBA: “Tindukunihira ngu ninsobora kugumira okuhiiganizibwa.”

Byahandiikirwe ki ebisobora kubakonyera kutunga obumanzi obubarukwetaaga?

OYEGERE KI?

Yahwe asiima habw’amaani tuteekamu kumuheereza n’obuturukuba nituhiiganizibwa. Kandi naija kutukonyera kukugumira!

Kweijukyamu

Habwaki Abakristaayo basemeriire kunihira ngu nibaija kuhiiganizibwa?
Kiki eky’osobora kukora hati kusobora kwetekaniriza okuhiiganizibwa?
Kiki ekisobora kukukonyera kukigumya ngu n’osobora kwikara n’oheereza Yahwe n’obw’oratunga okulengwa okwa buli mulingo?

Ekiro tumaliriize isomo linu:

Lengaho Kinu

Kaguza omu h’Abakristaayo bagenzi baawe: “Haroho omuntu wena ayakalengahoga kukutanga kuheereza Yahwe? Okakora ki kwikara n’oheereza Yahwe?”

Ekindi:

Your other goal

SERULIIRIZA

Rora ow’oruganda n’asoborra omulingo Yahwe yamukonyire kugumiisiriza, obuyatairwe omu nkomo habw’okwanga kugwera orubaju.

Kugumiisiriza n’Obuturaaba Nituhiiganizibwa (2:34)

Manya ekyakonyire ow’oruganda na mukazi we kwikara nibaheereza Yahwe kumara emyaka nyingi n’obukiraaba ngu bakaba nibahiiganizibwa.

Kuheereza Yahwe omu Kasumi k’Empindahinduka (7:11)

Manya omulingo osobora kugumira okuhiiganizibwa n’obumanzi.

“Kanu Nuko Akasumi Osemeriire Kwetekaniriza Okuhiiganizibwa” (Omunaara gw’Omulinzi, ogwa Julaayi 2019)

Tusemeriire kurora tuta okuhakanizibwa kuruga omu maka gaitu, kandi nitusobora kukora ki kulinda obusinge n’okwikara nituheereza Yahwe n’obwesigwa?

Amananu Tigaleeta “Obusinge, Baitu Empirima” (Omunaara gw’Omulinzi, ogwa Okitobba 2017)