ISOMO 22
N’osobora ota Kutebeza Abandi Amakuru Amarungi?
Obworukuba n’oyega amananu kuruga omu Baibuli, n’osobora kutekereza, ‘Buli omu asemeriire kumanya ebintu binu!’ Ky’amananu, buli omu asemeriire kugamanya! Baitu n’osobora kuhurra otiinire kugambiraho abandi eby’oyegere. Leka tubazeeho omulingo osobora kusingura obutiini kandi okatandika kugambiraho abandi amakuru amarungi kuruga omu Baibuli osemeriirwe.
1. N’osobora ota kugambiraho abantu ab’omanyire ebintu eby’oyegere?
Abahondezi ba Yesu bakagamba: “Itwe titurukusobora okuleka okugamba ebitwaboine nebitwahuliire.” (Engeso Ezabakwenda 4:20) Bakagonza muno ebibayegere kuruga hali Yesu kandi kyabaleetera kugonza kubigambiraho buli muntu wena. Naiwe nukwo orukwehurra? Obukiraaba nukwo kiri, serra omugisa ogw’osobora kukozesa kugambiraho abanyabuzaale n’abanywani baawe eby’oyegere omu mulingo gw’ekitiinisa.—Soma Abakolosai 4:6.
Emu ha miringo osobora kukikoramu
Obworukuba n’obaza n’abanyabuzaale, yanjura isomo kuruga omu Baibuli n’ogamba oti: “Wiiki enu haroho ekintu ekirungi ekinyegere.”
Somera munywani wawe anyakurwaire rundi anyakwetuntwire ekyahandikirwe ekirukugarramu amaani.
Abakozi bagenzi baawe obubarakukaguza nk’oku wikendi ebaire, bagambire eby’oyegere omu kwega kwawe rundi omu nsorrokano.
Yoleka abanywani baawe omukura gwa jw.org.
Raaliza abandi kukweteranizaaho obworukuba n’oyega Baibuli, rundi obooleke omulingo basobora kusaba kwegesebwa Baibuli ha jw.org.
2. Habwaki kutebeza n’ekitebe kiri kigendererwa ekirungi eky’osemeriire kweteraho?
Abegeswa ba Yesu batagambire amakuru amarungi abantu ababaali bamanyire bonka. Yesu akabatuma “babiri babiri omu maisoge, okugenda omu rubuga rwona” kutebeza. (Luka 10:1) Okutebeza oku okwali kutekaniziibwe kurungi kukaheereza abantu abandi baingi omugisa gw’okuhurra amakuru amarungi. Ekindi, kutebeza hamu kukaleetera abegeswa okusemererwa kwingi. (Luka 10:17) Naiwe n’osobora kweteraho ekigendererwa ky’okutebeza n’ekitebe.
YEGA EBIRUKUKIRAHO
Manya eky’osobora kukora kusingura okutiina kandi okatunga okusemererwa okuruga omu kutebeza amakuru amarungi.
3. Yahwe naija kukukonyera
Abamu abarukugonza kutebeza basobora kuhurra batiinire habw’omulingo abandi barabaroramu rundi omulingo barabatwazaamu.
N’otiina kugambiraho abandi ebintu ebyoyegere? Habwaki?
Mutekeho VIDIYO, hanyuma mubazeeho ekikaguzo ekirukuhonderaho.
Abakaiso ba Yahwe abato bakasingura bata okutiina?
Musome Isaya 41:10, hanyuma mugarukemu ekikaguzo kinu:
Kakuba ohurra n’otiina kutebeza, habwaki osemeriire kusaba?
Obaire okimanyire?
Abakaiso ba Yahwe baingi baali nibatekereza ngu tibalisobora kutunga obumanzi obw’okutebeza abantu amakuru amarungi. Ekyokurorraho, Sergey, yahurraga atarukweyikiririzaamu kandi kikamugumira kubaza n’abantu abandi. Baitu akamara yayega Baibuli. Nagamba ati: “N’obukiraaba ngu nkaba nintiina, nkatandika kugambiraho abandi ebinkaba ninyega. Ekyampuniriize, obunagambireeho abandi ha Baibuli kikankonyera kweyongera kweyikiririzaamu. Kikandetera kweyongera kwikiririza omu bintu ebihyaka ebinkaba nyegere.”
4. Tekamu abandi ekitiinisa
Obworukuba n’otebeza amakuru amarungi, otagarukira ha kutekerezaaho eby’orabaza byonka, baitu otekerezeeho n’omulingo orabibazaamu. Musome 2 Timoseo 2:24 na 1 Petero 3:15, hanyuma mubazeeho ebikaguzo binu:
N’osobora ota kuteeka omu nkora enkarra zinu obworukuba n’ogambiraho abandi ha Baibuli?
Abanyabuzaale abamu rundi abanywani nibasobora kutaikiriza ebyorukubagambira. Kiki eky’osobora kukora? Kiki ekyotasemeriire kukora?
Habwaki kirungi kukaguza ebikaguzo omu mulingo gw’amagezi omu kiikaro ky’okubagambira ekibasemeriire kwikiririzaamu?
5. Kutebeza amakuru amarungi kireeta okusemererwa
Yahwe akaha Yesu omulimo gw’okutebeza amakuru amarungi. Yesu akatwara ata omulimo ogu? Musome Yohana 4:34, hanyuma mubazeeho ebikaguzo binu:
Kulya ebyokulya ebirungi kitukonyera kuba n’obwomeezi oburungi kandi kituleetera okusemererwa. Habwaki Yesu akalengesaniza kukora Ruhanga ebyagonza, otwaliremu kutebeza amakuru amarungi, n’okulya eby’okulya?
Notekereza kusemererwa kwa mulingo ki okusobora kuruga omu kutebeza amakuru amarungi?
Amagezi Agasobora Kukukonyera
Omu rusorrokano rwa hagati omu wiiki, yega nk’oku osobora kutandikamu kubaza n’abantu.
Kaguza omwegesa wawe omulingo osobora kutaaha omu isomero eribaho ha rusorrokano orwa hagati omu wiiki. Ebicweka by’abeegi nibisobora kukukonyera kwehurra oyetegekere kugambiraho abandi ebyorukwega.
Kozesa ekicweka “Abantu Abamu Bagamba” rundi “Omuntu n’Asobora Kukaguza” omu kitabu kinu kwerengesamu omulingo osobora kugarukamu ebikaguzo ebikira kukaguzibwa rundi eby’abantu bakozesa kutuhakaniza.
OMUNTU N’ASOBORA KUKAGUZA: “Bihyaka ki?”
Nosobora ota kukozesa omugisa gunu kumugambiraho eby’oyegere omu kwega Baibuli?
OYEGERE KI?
Kutebeza abantu amakuru amarungi kireeta okusemererwa, kandi kutandika kutebeza nikisobora kwanguha kukira nk’oku orukutekereza.
Kweijukyamu
Habwaki osemeriire kutebeza abandi amakuru amarungi?
N’osobora ota kukikora omu mulingo ogw’ekitiinisa?
N’osobora kusingura okutiina kwona okw’osobora kuba oine obukirukuhika ha kutebeza?
SERULIIRIZA
Tekerezaaho emiringo ena ey’eyanguhire ey’osobora kukozesa kutebeza amakuru amarungi n’okozesa kaadi erukuragirra ha jw.org.
Yegaho emiringo ena ey’esobora kukukonyera kutebeza abandi amakuru amarungi.
“Oyetegekere Kufooka Musohi ow’Abantu?” (Omunaara gw’Omulinzi, ogwa Sebutemba 2020)
Rora omulingo ekyokurorraho kuruga omu Baibuli kisobora kutukonyera kutunga obumanzi bw’okutebeza amakuru amarungi n’obuturukuba tukyali bato.
Manya omulingo osobora kubazaaho Baibuli n’abanyabuzaale abatakamanyire Yahwe.
“Kuhika ha Mitima ey’Abanyabuzaale Abatali omu Mananu” (Watchtower, eya Maaci 15, 2014)