ISOMO 37
Baibuli eky’Eyegesa ha Mirimo na Sente
Emirimo na Sente byakakweralikirizaaga? Nikisobora kutugumira kwehikyaho ebyetaago byaitu kandi akasumi nuko kamu tukaikara nituramya Yahwe nk’oku arukugonza. Baibuli etuha amagezi agasobora kutukonyera.
1. Baibuli eyegesa ki ha mirimo?
Ruhanga n’agonza twegondeze omu mirimo yaitu. Baibuli n’egamba ngu “tiharoho ekirukukira oburungi, omuntu okusemererwa emirimoye.” (Omugambizi 3:22) Yahwe akora n’amaani. Obutuhondera ekyokurorraho kye eky’okukora n’amaani, tumusemeza kandi tutunga okumarwa.
Kukora kikuru muno. Baitu titusemeriire kwikiriza omulimo gwaitu kuba mukuru muno kukira kuramya Yahwe. (Yohana 6:27) N’aturaganiza ngu kakuba twebembeza kumuheereza omu bwomeezi bwaitu, naija kutuha ebiturukwetaaga.
2. Tusemeriire kutwara tuta sente?
N’obukiraaba ngu Baibuli n’egamba ‘sente rukomera,’ etuhabura ngu sente zonka tizisobora kutuleetera okusemererwa. (Omugambizi 7:12) Nahabweki, nitwekambisibwa kutagonza sente baitu ‘ebitwine nibyo bitumale.’ (Soma Abaheburaniya 13:5.) Obutumarwa ebitwine, twetantara okweralikirra okuleetwa kutekereza ngu ebitwine tibirukutumara. Twetantara amabanja agatarukwetaagisa. (Enfumo 22:7) Twetantara akabi akaruga omu kuteera ejaara, n’okugonza kutunga obuguuda obwa bwangubwangu.
3. Nitusobora tuta kukozesa sente kugabira abandi?
Yahwe ali Ruhanga omugabi, kandi tuhondera ekyokurorraho kye obutwikara twetekaniize “kugaba.” (1 Timoseo 6:18) Nitusobora kukozesa kurungi sente kurabira omu kusagika ekitebe hamu n’okukonyera abali omu bwetaago kukira muno ab’oruganda na banyaanya itwe. Yahwe tarora obwingi bwa sente tuhaireyo, baitu arora ekigendererwa kyaitu. Obuturagaba twihire ha mutima, nitwija kutunga okusemererwa kandi tusemeze Yahwe.—Soma Engeso Ezabakwenda 20:35.
YEGA EBIRUKUKIRAHO
Manya ebirungi ebiruga omu kwikaza emirimo omu kiikaro kyayo n’okuba n’okumarwa.
4. Haisa Yahwe ekitiinisa kurabira omu mulingo okoramu emirimo yaawe
Obunywani bwaitu hali Yahwe busemeriire kukwataho omulingo turoramu emirimo. Mutekeho VIDIYO, Hanyuma mubazeeho ebikaguzo binu.
Omu vidiyo, kiki ekikusemiize ha ntekereza hamu n’enyetwaza ya Jason ha mulimo?
Kiki ekiyakozere kusobora kwikaza omulimo omu kiikaro kyagwo?
Musome Abakolosai 3:23, 24, hanyuma mubazeeho ekikaguzo kinu:
Habwaki entekereza eitwine ha mirimo nkuru muno?
Kikuru muno kukora. Baitu titusemeriire kwikiriza omulimo gwaitu kuba mukuru muno kukira kuramya Yahwe
5. Kitugasira obutuba n’okumarwa
Abantu baingi balengaho nk’oku barukusobora kutunga sente nyingi. Baitu Baibuli etuha amagezi agarukwahukanaho. Musome 1 Timoseo 6:6-8, hanyuma mubazeeho ekikaguzo kinu:
Baibuli etwekambisa kukora ki?
N’obuturukuba twine ebintu bike, nitusobora kusemererwa. Mutekeho VIDIYO, hanyuma mubazeeho ekikaguzo ekirukuhonderaho.
Kiki ekiretera amaka ganu kuba n’okusemererwa n’obukiraaba ngu baine sente ntaito?
Baitu kakuba tuba twine bingi kandi nitukyaserra ebindi? Yesu akooleka omulingo kinu kisobora kuba kyakabi. Musome Luka 12:15-21, hanyuma mubazeeho ekikaguzo kinu:
Kiki eky’oyegere omu kyokurorraho Yesu yahaire?—Rora orukarra 15.
Musome kandi mulengesanize Enfumo 10:22 na 1 Timoseo 6:10. Hanyuma mubazeeho ebikaguzo binu:
Notekereza nikiha ekirukukira obukuru? Kuba munywani wa Yahwe rundi kuba na sente nyingi muno? Habwaki?
Bizibu ki ebiruga omu kugonza sente ekihinguraine?
6. Yahwe naija kutuha ebiturukwetaaga
Omulimo na sente nibisobora kulenga okwikiriza kwaitu omuli Yahwe. Mutekeho VIDIYO kurora ekitusobora kukora obuturukuba twine ebizibu binu, hanyuma mubazeeho ebikaguzo ebirukuhonderaho.
Omu vidiyo, ow’oruganda akatunga bizibu ki?
Akakora ki kusobora kusingura ebizibu ebi?
Musome Matayo 6:25-34, hanyuma mubazeeho ekikaguzo kinu:
Yahwe n’araganiza ki abo abamuteeka omu kiikaro ky’okubanza?
ABANTU ABAMU BAGAMBA: “Nyine kukora n’amaani kusobora kusagika eka yange. Tindukusobora kugenda omu nsorrokano z’ekitebe buli wiiki.”
Kyahandiikirwe ki ekirukukugumya ngu kwebembeza Yahwe obwire bwona niyo encwamu erukukirayo oburungi?
OYEGERE KI?
Omulimo hamu na sente nitubyetaaga, baitu tibisemeriire kutulemesa kuheereza Yahwe.
Kweijukyamu
Kiki ekisobora kukukonyera kurora sente omu mulingo oguhikire?
Tugasirwa tuta obutuba n’okumarwa?
N’osobora ota kwoleka ngu noyesiga omurago gwa Yahwe ogwokurolerra abantu be?
SERULIIRIZA
Wekebiije orole Baibuli obweraaba n’egamba ngu sente mbi.
“Sente Nikyo Ekikoro ky’Obubi?” (Ekicweka kinu kiri ha mukura)
Manya kugaba kwa mulingo ki okusemeza Yahwe.
“Baibuli Eyegesa Ki ha Kugaba?” (Ekicweka kinu kiri ha mukura)
Kuteera ejaara tikulimu kabi?
“Baibuli Ekyebaza ha Kuteera Ejaara” (Awake!, eya Maaci 2015)
Manya ekyakonyiire omusaija kuleka kuteera ejaara n’obusuma.
“Nagonzaga Kuvuga Embaraasi” (Watchtower, eya Novemba 1, 2011)