Ba Munywani Wa Ruhanga Ow’ebiro Byoona!

Kyetagisa okwekamba okutunga omunywani; kandi kyetagisa obwekambi omuntu kusigara munywani wawe. Okwekamba kwawe kuba hamu n’okusigara oli munywani wa Ruhanga nikwija kuhebwa omugisa gw’amani. Yesu akagamba abo abamwikirize ngu: “[A]mananu galibafora b’obugabe.” (Yohana 8:32) Kinu nikimanyisa ki?

N’osobora kuba n’obugabe hati. N’osobora kuba n’obugabe kuruga hali enyegesa ezisobere hamu n’ebisuba ebirukuraranganizibwa na Setani. N’osobora kuba n’obugabe kuruga okutanihira okubutikire abantu baingi abatamanyire Yahwe. (Abarumi 8:22) Banywani ba Ruhanga baine obugabe kuruga ‘kutina kufa.’​—Abaheburaniya 2:14, 15.

N’osobora kuba n’obugabe mu nsi empyaka eya Ruhanga. Ka buliba bugabe bwamani mali obw’olitunga mu biro by’omu maiso! Omu Rugonjo rwa Ruhanga ha nsi, halibayo obugabe kuruga hali obulemu, oburwaire n’obucwi bw’ebiragiro. Obugabe kuruga ha masege n’enjara. Obugabe kuruga ha kukaikura n’okufa. Obugabe kuruga ha kweralikirra, kwenderezebwa, na butaba na bwinganiza. Baibuli ekagamba hali Ruhanga ngu: ‘Osasanura engaro zawe, oigusa buli kintu kyona ekyomire eki kigonza.’​—Zabuli 145:16.

Banywani ba Ruhanga balyomera ebiro byona. Obwomezi obutahwaho kisembo ky’omuhendo omwingi ekya Ruhanga aliha abo boona abarukuserra obunywani nawe. (Abarumi 6:23) Kicumitirizeho obwomezi obutaine mperu ekibuli kumanyisa!

Oliba n’obwire kukora ebintu bingi. Obundi oliba n’oyenda kwega kutera ebidongo. Rundi kwega kusiga ebisisani rundi kubaija. Obundi n’oyenda kwega hali ebimera rundi kwega hali ebisoro. Obundi noyenda kugenda kurambura ensi ezindi na bantu. Kuba n’obwomezi obutahwaho buli kusobozesa binu byoona okubaho!

Oliba n’obwire bwingi kuba na banywani baingi. Okwomera ebiro byoona kuli kusobozesa kumanya abantu baingi abafokere banywani ba Ruhanga. Kiri kuyamba okumanya ebisembo ebi baine hamu n’engeso zabu kandi nabo balifoka banywani bawe. Olibagonza nabo bali kugonza. (1 Abakolinso 13:8) Okuba n’obwomezi obutaine bugarukiro buli kusobozesa kuba n’obwire kunywana na buli muntu ow’omu nsi! Nokukiraho, ebyasa by’emyaka obu biregenda nibirabaho, nukwo n’obunywani bwawe hali Yahwe bulyeyongera kugumira kimu. Kale k’osigale munywani wa Ruhanga ow’ebiro byoona!