Obutumwa oburukukirayo obukuru omu Baibuli nibukwata ha Bukama bwa Ruhanga. Yahwe naija kukozesa Obukama obu kuhikiriza ekigendererwa kye hali ensi. Obukama nikyo kiki? Nitumanya tuta ngu buliyo nibulema kasumi kanu? Bintu ki ebibumazire kuhikiriza? Kandi nibwija kukora ki omu kasumi ak’omu maiso? Isomo linu hamu n’amasomo abiri agarukuhonderaho nigaija kugarukamu ebikaguzo ebi.

1. Obukama bwa Ruhanga nikyo kiki, kandi Omukama wabwo nooha?

Obukama eri gavumenti enyakutairweho Yahwe Ruhanga. Omukama wabwo ni Yesu Kristo kandi n’alemera omu iguru. (Matayo 4:17; Yohana 18:36) Baibuli ebazaaho Yesu eti: “Alirema [nk’Omukama] . . . ebiro nebiro.” (Luka 1:32, 33) Nk’Omukama w’Obukama bwa Ruhanga, Yesu naija kulema buli muntu weena omu nsi.

2. Nibaha abaraalema hamu na Yesu?

Yesu tarukulema wenka. Abantu kuruga “omu ruganda rwona, norulimi, nabantu, nihanga” balirema hamu nauwe nk’abakama. (Okusuku’rwa 5:9, 10) Baingaha abalirema na Yesu Kristo? Kuruga Yesu aija omu nsi, obukaikuru n’obukaikuru bw’Abakristaayo bafookere bahondezi be. Baitu 144,000 bonka, nubo baligenda omu iguru kulema nauwe. (Soma Okusuku’rwa 14:1-4.) Abantu abandi boona omu nsi nibaija kufooka bataka b’Obukama bwa Ruhanga.​—Zabuli 37:29.

3. Habwaki Obukama bwa Ruhanga nibukirra hara gavumenti z’abantu?

Abalemi b’abantu n’obubalengaho kukora ebintu ebirungi, tibaine busobobozi obw’okukora buli kintu kyona ekibarukugonza. Abebembezi abandi abagaruka omu bigere byabo nibasobora kuba nibegondeza bonka kandi batarukugonza kukonyera abandi. Baitu busaho muntu weena ow’aligaruka omu bigere bya Yesu, Omulemi w’Obukama bwa Ruhanga. Ruhanga aimukize “Obukama, obutalihwerekerezebwa ebiro byona.” (Danieri 2:44) Yesu alirema ensi yoona kandi talitwaza kurungi abantu abamu kukira abandi. W’okugonza, w’embabazi, w’obwinganiza, kandi naija kwegesa abantu kutwazangana omu mulingo ogw’okugonza, ogw’embabazi kandi ogw’obwinganiza.​—Soma Isaya 11:9.

4. Obukama bwa Ruhaga nibwija kulema ensi yoona

Yesu Kristo aine amaani maingi ag’okulema kukira omulemi ondi weena omu byafaayo. Musome Matayo 28:18, hanyuma mubazeeho ekikaguzo kinu:

• Habwaki amaani ga Yesu ag’okulema nigakirra hara ag’omulemi ondi weena?

Gavumenti z’abantu ziikara nizihinduka kandi buli mulemi alema ekicweka kitaito eky’ensi. Baitu kandi Obukama bwa Ruhanga? Musome Danieri 7:14, hanyuma mubazeeho ebikaguzo binu:

• Habwaki kirungi kumanya ngu Obukama bwa Ruhanga “tibulihwerekerezebwa”?

• Habwaki kirungi ngu bulirema ensi yoona?

5. Obulemi bw’abantu bulemerwe kumaraho ebizibu byaitu

Habwaki gavumenti z’abantu zitarukusobora kumaraho ebizibu byaitu byona? Mutekeho VIDIYO, hanyuma mubazeeho ekikaguzo ekirukuhonderaho.

VIDIYO: Obukama bwa Ruhanga Nikyo Kiki?​—Akacweka ka Vidiyo (1:41)

• Biki ebirugire omu bulemi bw’abantu?

Musome Omugambizi 8:9, hanyuma mubazeeho ebikaguzo binu:

• N’otekereza ngu Obukama bwa Ruhanga busemeriire kugaruka omu kiikaro kya gavumenti z’abantu? Habwaki?

6. Obukama bwa Ruhanga bwine abebembezi abarukutwetegereza kurungi

Habwokuba Omukama waitu Yesu nauwe akabaho muntu, n’asobora ‘kusalirwa naitwe.’ (Abaheburaniya 4:15) Abantu 144,000 abasaija n’abakazi abesigwa abalirema hamu na Yesu, Yahwe akabakoma kuruga “omu ruganda rwona, norulimi, nabantu, nihanga.”​—Okusuku’rwa 5:9.

• Nikikuhuumuza kumanya ngu Yesu hamu naabo boona abalirema nauwe bamanyire enyikara z’abantu barukurabamu? Habwaki?

7. Obukama bwa Ruhanga bwine ebiragiro ebirukukirayo oburungi

Gavumenti zikora ebiragiro ebizirukutekereza ngu nibiija kugasira kandi biriinde abantu baazo. Obukama bwa Ruhanga nabwo bwine ebiragiro abantu babwo ebibasemeriire kuhondera. Musome 1 Abakolinso 6:9-11, hanyuma mubazeeho ebikaguzo binu:

• N’otekereza ensi niija kusisana eta abantu boona obubarahondera ebiragiro bya Ruhanga?a

• N’otekereza kihikire Yahwe kunihirramu abantu abaliikara hansi y’Obukama kutamu ekitiinisa ebiragiro bye? Habwaki?

• Kiki ekirukwoleka ngu abantu abatarukworobera ebiragiro binu nibasobora kuhinduka?​—Rora orukarra 11.

OYEGERE KI?

Obukama bwa Ruhanga eri gavumenti ey’omu iguru kandi ey’erirema ensi yoona.

Kweijukyamu

• Abalemi b’Obukama bwa Ruhanga nibaha?

• Obukama bwa Ruhanga nibukirra hara buta gavumenti z’abantu?

• Bintu ki ebimu Yahwe eby’arukunihirramu abantu abali hansi y’Obukama?

SERULIIRIZA

Manya Yesu ekiyayegeseze obukirukuhika ha kiikaro nambere Obukama burukusangwa.

“Obukama bwa Ruhanga Buli omu Mutima Gwawe?” (Ekicweka kinu kiri ha mukura)

Habwaki Abakaiso ba Yahwe boorobera muno Obukama bwa Ruhanga kukira obulemi bw’abantu?

Bakemarra ha Bukama bwa Ruhanga 1:43

Wetegereze Baibuli eky’egamba hali abantu 144,000 Yahwe abaakoma kulema na Yesu.

“Nibaha Abarukugenda omu Iguru?” (Ekicweka kinu kiri ha mukura)

Kiki ekyaletiire omukazi owali omu nkomo kwikiriza ngu Ruhanga wenka nuwe asobora kuleetaho obwinganiza omu nsi?

“Omulingo Namanyire Ekisobora Kuleeta Obwinganiza” (Awake!, eya Novemba 2011)

Yesu akeegesa ngu abahondezi be tibasemeriire kuba ‘b’ensi.’ (Yohana 15:19) Kinu nikitwarramu kutagwera rubaju omu by’obulemi by’ensi n’omu bulemu. Amananu gali tikyanguhire kutagwera rubaju. Abantu nibasobora kutusekereza habw’okutagwera rubaju. Nitusobora tuta kwikara tutagweriire rubaju kandi tukaikara tuli besigwa hali Yahwe Ruhanga?

1. Abakristaayo barora bata gavumenti z’abantu?

Abakristaayo batamu gavumenti ekitiinisa. Tukora nk’oku Yesu yagambire “Muheyoga hali Kaisali, ebya Kaisali.” Eki nikimanyisa ngu tworobera ebiragiro ebitairweho nk’ekyokurorraho ebirukutwetaagisa kusasura emisoro. (Marako 12:17) Baibuli n’eyegesa ngu gavumenti z’abantu nizirema habwokuba Yahwe aziikiriza kulema. (Abarumi 13:1) Nahabweki nitukyetegereza ngu obusobozi bwa gavumenti z’abantu bwine nambere burukugarukira. Twesiga Ruhanga hamu n’Obukama bwe obw’omu iguru kumaraho ebizibu by’abantu.

2. Nitusobora tuta kwoleka ngu titurukugwera rubaju?

Nka Yesu, titwejumbira omu by’obulemi. Abantu obubaarozere kimu ha byamahano bya Yesu kandi baalengaho kumufoora omukama wabo omu nsi, atabaikirize. (Yohana 6:15) Habwaki yayangire? Habwokuba akamara yagamba ati; “Obukama bwange tibuli bwomunsi enu.” (Yohana 18:36) Nk’abegeswa ba Yesu, twoleka ngu titurukugwera rubaju omu miringo nyingi. Ekyokurorraho, titwejumbira omu bulemu. (Soma Mika 4:3.) Tutamu ekitiinisa obwokurorraho bw’ihanga nk’ebendera, baitu tituburamya. (1 Yohana 5:21) Ekindi, titusagika kandi titujumirra ekitebe ky’eby’obulemi kyona rundi omwebembezi wakyo. Omu miringo enu hamu n’endi, twoleka ngu nitwesigira kimu gavumenti ya Ruhanga kandi obu nubwo Obukama bwe.

YEGA EBIRUKUKIRAHO

3. Abakristaayo ab’amananu tibagwera rubaju

Yesu n’abahondezi be bakatuteraho ekyokurorraho. Musome Abarumi 13:1, 5-7 na 1 Petero 2:13, 14. Kandi, mutekeho VIDIYO, hanyuma mubazeeho ebikaguzo binu.

VIDIYO: Abakristaayo ab’Amananu Tibagwera Rubaju—Ekicweka 1 (4:28)

• Habwaki tusemeriire kworobera ab’obusobozi omu gavumenti?

• Miringo ki eitusobora kwoleka ngu nituboorobera?

Omu kasumi k’obulemu, amahanga agamu nigasobora kwefoora nkagatarukugwera rubaju, baitu nigasagika embaju zoona ezirukurwanisangana. Mali nikimanyisa ki kutagwera rubaju? Musome Yohana 17:16. Kandi, mutekeho VIDIYO hanyuma mubazeeho ekikaguzo kinu.

VIDIYO: Abakristaayo ab’Amananu Tibagwera Rubaju—Ekicweka 2 (3:11)

• Nikimanyisa ki kutagwera rubaju?

Baitu ab’obusobozi omu gavumenti kakuba baba nibagonza okole ekintu ekirukuhakaniza ebiragiro bya Ruhanga? Musome Engeso Ezabakwenda 5:28, 29. Kandi, mutekeho VIDIYO hanyuma mubazeeho ebikaguzo binu.

VIDIYO: Abakristaayo ab’Amananu Tibagwera Rubaju—Ekicweka 3 (1:18)

• Kakuba osabwa kukomamu hagati y’ebiragiro eby’abantu n’ebya Ruhanga, nibiha eby’osemeriire kworobera?

• N’osobora kutekerezaaho enyikara yoona nambere Abakristaayo batasemeriire kworobera ab’obusobozi omu gavumenti?

4. Ba muntu atarukugwera rubaju omu biteekerezo n’omu bikorwa

Musome 1 Yohana 5:21. Kandi, mutekeho VIDIYO hanyuma mubazeeho ebikaguzo binu.

VIDIYO: Ensonga Habwaki Abakristaayo Nibetaaga Obumanzi—Kutagwera Orubaju omu by’Obulemi (2:49)

• Omu vidiyo, habwaki Ayenge acwiremu kwanga kutaaha ekitebe eky’obulemi rundi kwetaba omu mikoro y’ihanga nk’okuterra ebendera etamaama?

• Notekereza ngu akozere encwamu enungi?

Nyikara ki ezindi ezisobora kulenga encwamu yaawe ey’okutagwera orubaju? Mutekeho VIDIYO, hanyuma mubazeeho ebikaguzo ebirukuhonderaho.

VIDIYO: Amasomo Kuruga omu Omunaara gw’Omulinzi—Ikara Otarukugwera Orubaju omu Nsi Enyakwebaganizeemu (5:16)

• Nitusobora tuta kwikara tutarukugwera orubaju obukirukuhika ha mizaano hagati y’amahanga agarukwahukana?

• Nitusobora tuta kwikara tutarukugwera rubaju kakuba tutwazibwa kubi rundi tukagasirwa habw’encwamu z’abeby’obulemi?

• Ebintu ebituhurra omu makuru rundi hali banywani baitu nibisobora kukwataho bita encwamu yaitu ey’okutagwera orubaju?

OYEGERE KI?

Abakristaayo bekamba muno kutagwera orubaju omu by’obulemi omu biteekerezo, omu bigambo n’omu bikorwa byabo.

Kweijukyamu

• Kiki ekitusemeriire kuha gavumenti z’abantu?

• Habwaki twikara tutarukugwera orubaju?

• Nyikara ki ezisobora kulenga encwamu yaitu ey’okutagwera orubaju?

SERULIIRIZA

Bintu ki ebitusobora kwefeereza kusobora kwikara tutarukugwera orubaju?

Yahwe Takatuhemukiraga (3:14)

Amaka nigasobora kukora ki kwetekaniriza kara enyikara ezisobora kulenga encwamu yabo ey’okutagwera orubaju?

Weriinde Kugwera Orubaju Obworaaba Oli Ha Mikoro (4:25)

Habwaki kurwanirra ihanga kitali nikyo kisobora kuleetera omuntu ekitiinisa ekirukukirayo?

‘Byona Nibisoboka Hali Ruhanga’ (5:19)

Manya nk’oku osobora kwikara otali kicweka ky’ensi obworukuba n’ocwamu omulimo ogw’orakora.

“Buli Omu Alyetweka Omutwaro Gwe” (Watchtower, eya Maaci 15, 2006)