3. Rolerra kurungi obwomeezi bwawe

Abakristaayo abehaireyo hali Yahwe bakozesa obwomeezi bwabo bwona kumuheereza. Nikisisana oti rundi bakahayo emibiri yabo nk’ekihongwa hali Yahwe. Musome Abarumi 12:1, 2, hanyuma mubazeeho ebikaguzo binu:

• Kiki ekisemeriire kukwekambisa kurolerra kurungi obwomeezi bwawe?

• Miringo ki ey’osobora kurolerramu obwomeezi bwawe?

Omu kwega kwawe okwa Baibuli, oyegere ebintu bingi ebirukukwata hali Yahwe. N’osobora kuba oine empindahinduka ez’okozere kusobora kuteeka omu nkora eby’oyegere. Baitu, hasobora kuba haroho ekintu ekikyakulemeseze kwehayo hali Yahwe okabatizibwa. Isomo linu niriija kubazaaho bimu ha bintu ebisobora kukulemesa kubatizibwa, n’omulingo osobora kubisingura.

1. Nikikwetagisa kubanza kumanya ebintu ebirukwingana nkaha nukwo okabatizibwa?

Kusobora kubatizibwa, osemeriire “kumanyira kimu amazima.” (1 Timoseo 2:4) Kinu tikirukumanyisa ngu oine kubanza kumanya ebigarukwamu bya buli kikaguzo ekirukukwata ha Baibuli otakabatiziibwe. Abakristaayo abamazire akasumi babatiziibwe, nabo bagumizaamu nibeega hali Yahwe. (Abakolosai 1:9, 10) Baitu osemeriire kuba oyetegeriize enyegesa za Baibuli ez’okubandizaaho. Abagurusi b’ekitebe nibaija kukukonyera kurora eby’omanyire obubiraaba nibikusobozesa kubatizibwa.

2. Madaara ki ag’osemeriire kurabamu nukwo ohike ha kubatizibwa?

Otakabatiziibwe, osemeriire kubanza ‘kwegarukamu . . . kandi ohinduke.’ (Soma Engeso Ezabakwenda 3:19.) Kinu nikimanyisa ngu n’oyehurra kubi habw’ebibi ebiwakozere kara kandi osaba Yahwe kukuganyira. Ocweramu kimu kwanga engeso ezitasemiire n’okutwaza obwomeezi bwawe omu mulingo ogurukusemeza Ruhanga. Ekindi, otandika n’okwejumbira omu mirimo y’ekitebe nk’okwija omu nsorrokano n’okufooka omutebezi atakabatiziibwe.

3. Habwaki otasemeriire kwikiriza okutiina kukakulemesa?

Abamu batiina ngu nibasobora kulemwa kuhikiiriza ekibarukuba baraganiize Yahwe. Ky’amananu ngu obwire obumu noija kukoraga ensobi, baitu n’abaheereza ba Ruhanga abesigwa abarukubazibwaho omu Baibuli nabo kikabahikaho. Baitu tosemeriire kweralikirra ekihinguraine. Yahwe tanihirramu abaheereza be kuba bahikiriire. (Soma Zabuli 103:13, 14.) Asemererwa obw’okora ekyorukusobora! Kandi naija kukukonyera. Yahwe n’aturaganiza ngu busaho ekintu kyona ekirisobora “okubaganiza itwe omu kugonza [kwe].”​—Soma Abarumi 8:38, 39.

YEGA EBIRUKUKIRAHO

4. Manya kurungi Yahwe

Osemeriire kumanya Yahwe kuhika ha rulengo ki otakabatiziibwe? Osemeriire kumumanya ekirukumara ekirakuletera kumugonza n’okugonza kukora ebirukumusemeza. Mutekeho VIDIYO kurora omulingo abeegi ba Baibuli omu nsi yoona bakikozeremu. Hanyuma mubazeeho ekikaguzo ekirukuhonderaho.

VIDIYO: Omuhanda Ogurakuhikya ha Kubatizibwa (3:56)

• Kusigikirra ha vidiyo, kiki ekyakonyire abantu abamu kwetekaniriza okubatizibwa?

Musome Abarumi 12:2, hanyuma mubazeeho ebikaguzo binu:

• Oine okugurukyagurukya kwona ha bintu Baibuli eyegesa rundi Abakaiso ba Yahwe obubaraaba nibegesa amananu?

• Obukiraaba nukwo kiri, kiki eky’osobora kukora?

5. Singura ebintu ebisobora kukulemesa kuhika ha kubatizibwa

Obutukora encwamu ey’okwehayo hali Yahwe n’okubatizibwa, haroho ebitulemesa. Kurora ekyokurorraho, mutekeho VIDIYO, hanyuma mubazeeho ebikaguzo ebirukuhonderaho.

VIDIYO: Okugonza Okutwiniire Yahwe Kutukonyera Kusingura Ebizibu (5:22)

• Kusigikirra ha vidiyo, bintu ki Narangerel eby’akaba aine kusingura kusobora kuheereza Yahwe?

• Okugonza okwainiire Yahwe kukamukonyera kuta kubisingura?

Musome Enfumo 29:25 na 2 Timoseo 1:7, hanyuma mubazeeho ekikaguzo kinu:

• Kiki ekituha obumanzi obw’okusingura ebintu ebitulemesa?

6. Wesige obukonyezi bwa Yahwe

Yahwe aroho kukukonyera. Mutekeho VIDIYO, hanyuma mugarukemu ebikaguzo ebirukuhonderaho.

VIDIYO: Yahwe Naija Kukukonyera (2:50)

• Kusigikirra ha vidiyo, habwaki omwegi wa Baibuli yabandize kutiina kubatizibwa?

• Kiki ekiyayegere kandi kyamukonyera kweyongera kwesiga Yahwe?

Musome Isaya 41:10, 13, hanyuma mubazeeho ekikaguzo kinu:

• Habwaki osemeriire kukigumya ngu n’osobora kuhikiriza okweraga okw’orakora ha kwehayo kwawe?

7. Weyongere kusiima okugonza Yahwe okw’akwiniire

Obw’oyeyongera kutekerezaaho okugonza Yahwe okw’akwiniire, oyeyongera kumusiima n’okugonza kumuheereza ebiro n’ebiro. Musome Zabuli 40:5, hanyuma mubazeeho ekikaguzo kinu:

• Migisa ki kuruga hali Yahwe eyorukukira muno kumusiimira?

Nabbi Yeremiya yagonzaaga Yahwe hamu n’ekigambo kye kandi yasiimaga muno habw’omugisa ogw’okuba omuheereza wa Yahwe. Akagamba ati: “Ebigambo byawe namberendi bikaba byokusemererwa, kandi okukyanganuka kwomutima: baitu nyeserwe ibara lyawe, ai [Yahwe] owamahe.” (Yeremiya 15:16) Garukamu ebikaguzo binu:

• Habwaki guli mugisa gw’embaganiza kuba omu h’Abakaiso ba Yahwe?

• N’ogonza kubatizibwa nk’omu h’Abakaiso ba Yahwe?

• Haroho ekintu kyona ekisobora kukulemesa kukikora?

• N’otekereza osemeriire kukora ki kusobora kuhika ha kigendererwa kyawe eky’okubatizibwa?

OYEGERE KI?

Yahwe, n’asobora kukukonyera kusingura ekizibu kyona okahika ha kubatizibwa.

Kweijukyamu

• Nikikwetaagisa kumanya ebintu ebirukwingana nkaha kuruga omu Baibuli kusobora kubatizibwa?

• Mpindahinduka ki ez’osemeriire kukora otakabatiziibwe?

• Habwaki otasemeriire kuleka okutiina kukakulemesa?

SERULIIRIZA

Tekerezaaho eky’osemeriire kusigikirraho kukora encwamu ey’okubatizibwa.

“Wakahikire Ha Rulengo orw’Okubatizibwa?” (Omunaara gw’Omulinzi, Maaci 2020)

Manya omulingo osobora kusingura ebizibu ebimu ebisobora kukulemesa.

“Kiki Ekirukuntanga Okubatizibwa?” (Omunaara gw’Omulinzi, Maaci 2019)

Rora omulingo omusaija yasingwire ebintu ebimu eby’amaani ebyali nibimulemesa kubatizibwa.

‘Habwaki Noikaraho Kubatizibwa?’ (1:10)

Ha kubanza, omusaija arukwetwa Ataa akatiina kubatizibwa. Rora ekyamwekambisize kuteera orutambu runu orw’amaani.

Mali Kinu Kinsemeriire? (7:21)