• Ebijaguzo Byona Bisemeza Yahwe?
    Wegondeze omu Bwomeezi Ebiro n’Ebiro!—Okwega Baibuli Okw’Okuleeta Hamu Ebiteekerezo

    • Musome Abefeso 5:10, hanyuma mubazeeho ebikaguzo binu:

      • Bintu ki ebikuru ebitusemeriire kutekerezaaho obuturukuba nitucwamu kujaguza rundi kutajaguza ekiro kikuru?

      • Biro ki ebikuru ebijaguzibwa omu kiikaro eky’orukwikaramu?

      • N’otekereza ebiro bikuru ebi nibisemeza Yahwe?

      Ekyokurorraho, wakekaguzaaga Ruhanga eky’arukutekereza ha kujaguza amazaarwa? Baibuli tebazaaho omuheereza wa Yahwe wena ayajagwize amazaarwa, baitu ebazaaho abantu babiri abaagajagwize kandi abaali batarukumuheereza. Musome Okubanza 40:20-22 na Matayo 14:6-10. Hanyuma mubazeeho ebikaguzo binu:

      • Bintu ki ebirukusisana ebyabaire omu bijaguzo by’amazaarwa ganu?

      • Kusigikirra ha byahandiikirwe binu, n’otekereza Yahwe ayehurra ata ha kujaguza amazaarwa?

      Ekindi, n’osobora kuba n’oyekaguza, ‘Yahwe nakwatwaho kakuba nyejumbira omu kujaguza amazaarwa rundi ekijaguzo ekindi kyona ekitarukusigikirra ha byahandiikirwe?’ Musome Okuruga 32:1-8. Hanyuma mutekeho VIDIYO, kandi mubazeeho ebikaguzo ebirukuhonderaho.

      VIDIYO: Ebiro Bikuru Hamu n’Ebijaguzo Ebitarukusemeza Ruhanga (5:07)

      • Habwaki tusemeriire kumanya kurungi ebintu ebirukusiimwa Yahwe?

      • Eki nitusobora kukikora tuta?

      Omulingo tusobora kumanya ekijaguzo obukiraaba nikisemeza Ruhanga

      • Nikisigikirra ha nyegesa ezitali omu byahandiikirwe? Kusobora kutunga eky’okugarukamu, lengaho kumanya endugirro yakyo.

      • Nikiha ekitiinisa abantu, ebitebe rundi obwokurorraho bw’ihanga? Ekirukukirayo obukuru tutamu Yahwe ekitiinisa kandi nuwe twesiga ngu naija kumaraho ebizibu byona omu nsi.

      • Emigenzo n’emikoro y’ekijaguzo eki n’ehakaniza endengo za Baibuli? Tusemeriire kwikara tuli becumi omu ngeso.

  • Komamu eby’Okwesemeza Ebirukusemeza Yahwe
    Wegondeze omu Bwomeezi Ebiro n’Ebiro!—Okwega Baibuli Okw’Okuleeta Hamu Ebiteekerezo
    • Isomo 53. Omusaija, mukazi we, na muhara wabo nibalya emberenge obu nibarora tiivi.

      ISOMO 53

      Komamu eby’Okwesemeza Ebirukusemeza Yahwe

      Yahwe ali “Ruhanga anyakusemeriirwe.” (1 Timoseo 1:11, “NWT”) N’agonza tusemererwe kandi twegondeze omu bwomeezi. Kimusemeza obutweteraho obwire tukahuumuramu. Omu isomo linu, nitwija kurora nk’oku tusobora kukozesa obwire bunu omu miringo ey’erukutusemeza, ey’eratuletera okumarwa, kandi erukusemeza Yahwe.

      1. Bintu ki ebitusemeriire kwijuka obuturukuba nitukomamu eby’okwesemeza?

      Okira kugonza kukora ki obw’oba ohuumwireho? Abamu bagonza kukozesa obwire bwabo obw’okuhuumuraho kuba muka​—nibasoma ekitabu, nibahuliiriza ebizina, nibarora filimu rundi bali ha intaneeti. Abandi bagonza kumara obwire n’abanywani baabo​—nibatemba ensozi, nibaziha, rundi nibazaana emizaano. Katube nitugonza kukora kintu ki, tusemeriire kukora kyona ekirukusoboka kurora ngu kiri kintu “ekirukwikirizibwa Mukama waitu.” (Abefeso 5:10, “NWT”) Kikuru kwetegereza ekintu kinu habwokuba eby’okwesemeza ebirukukira obwingi abantu ebibacwamu kurora, kuhuliiriza, rundi kukora, birumu ebintu Yahwe eby’anoba. Ekyokurorraho okurwana, obusiihani, rundi oburaguzi. (Soma Zabuli 11:5.) Kiki ekiratukonyera kukora encwamu ez’amagezi obukirukuhika ha by’okwesemeza?

      Kakuba tukomamu abanywani abarukugonza Yahwe, nibasobora kutwekambisa kukora ebintu ebirungi n’okukomamu eby’okwesemeza ebirungi. Nk’oku twayegere omu Isomo 48, ‘ow’agenda n’abantu ab’amagezi, afooka w’amagezi.’ Baitu kakuba twikara nitumara obwire n’abantu abatarukugonza endengo za Ruhanga nitwija ‘kusaasa.’​—Enfumo 13:20.

      2. Habwaki kikuru kubalirra obwire obutumarra omu by’okwesemeza?

      N’obukiraaba ngu eby’okwesemeza ebiturakomamu tibirukusiisa enkoragana yaitu na Yahwe, tusemeriire kwegendereza kurora titwabimarraho obwire bwingi. Kitali eki nitwija kwesanga tutakyaine bwire obw’okukora ebintu ebirukukira obukuru. Baibuli n’etwekambisa kukozesa kurungi obwire bwaitu.​—Soma Abefeso 5:15, 16.

      YEGA EBIRUKUKIRAHO

      Manya omulingo osobora kukora encwamu enungi obukirukuhika ha by’okwesemeza.

      3. Wetantale eby’okwesemeza ebibi

      Habwaki tusemeriire kwegendereza obuturukuba nitukomamu eby’okwesemeza? Mutekeho VIDIYO, hanyuma mubazeeho ebikaguzo binu.

      VIDIYO: By’Okwesemeza bya Mulingo Ki Ebinsemeriire Kukomamu? (4:39)

      • Emizaano ya Roma eya kara n’esisana eta n’eby’okwesemeza ebimu eby’omu kasumi kanu?

      • Omu vidiyo, Danny akeega ki ha by’okwesemeza?

      Musome Abarumi 12:9, hanyuma mubazeeho ekikaguzo kinu:

      • Orukarra runu nirusobora kukukonyera ruta kukomamu eby’okwesemeza ebirungi?

      Bintu ki ebimu Yahwe eby’anoba? Musome Enfumo 6:16, 17 na Abagaratiya 5:19-21. Hanyuma y’okusoma buli kyahandiikirwe, mubazeeho ekikaguzo kinu:

      • Omu bintu ebibaziibweho omu nkarra zinu, nibiha ebirukukanya omu by’okwesemeza ebya kasumi kanu?

      Ebikaguzo ebisobora kukukonyera kukomanu eby’okwesemeza omu mulingo ogw’amagezi

      Wekaguze:

      • Eby’okwesemeza binu birumu ebintu Yahwe anoba?

      • Bintwaraho obwire obunakubaire ninkozesa kukora ebintu ebirukukira obukuru?

      • Nibiinyiriza haihi n’abantu abatarukugonza Yahwe?

      Kirungi kukora kyona ekirukusoboka kwirra hara n’akabi. Egi niyo ensonga habwaki tusemeriire kwetantara eby’okwesemeza byona ebiturukutekereza ngu tibiri birungi hali itwe

      Motoka n’egendera ha kalebolebo k’oruguudo oruli ha rusozi. Omupiira gw’enyuma gutandikire kuruga ha ruguudo.

      4. Kozesa kurungi obwire bwawe

      Mutekeho VIDIYO, hanyuma mubazeeho ebikaguzo ebirukuhonderaho.

      VIDIYO: Kiki Ekitwara Muno Obwire Bwawe (2:45)

      • N’obukiraaba ngu ow’oruganda ow’ayolekerwe omu vidiyo akaba atarukurora ekintu kyona ekibi, kiki ekyamufookiire kizibu?

      Omu Abafiripi 1:10, “NWT,” Baibuli egamba ngu: “Mumanye ebirukukira obukuru.”

      • Orukarra runu nirusobora ruta kutukonyera kumanya obwire obutusemeriire kumarra omu by’okwesemeza?

      5. Komamu eby’okwesemeza ebirungi

      N’obukiraaba ngu eby’okwesemeza ebimu tibisemeza Yahwe, haroho ebintu bingi eby’okwegondezaamu ebitali bibi. Musome Omugambizi 8:15 na Abafiripi 4:8, hanyuma mubazeeho ekikaguzo kinu:

      • By’okwesemeza ki ebirungi eby’ogonza?

      Ebisisani: Abantu ab’emyaka erukwahukana nibegondeza omu by’okwesemeza n’emizaano ebirungi. 1. Omwisiki n’ahuliiriza ebizina kandi n’ateera ebisisani. 2. Aboojo basatu nibazaana basketball. 3. Aboojo babiri nibavuga obugaali. 4. Omwojo n’akora ekimotoka ky’okuzaanisa. 5. Omusaija n’ateera engoma. 6. Omwojo n’azaana na ise omuzaano ogwa vidiyo. 7. Omukazi n’ateera ekisisani n’akozesa kamera.

      N’osobora kwegondeza omu by’okwesemeza ebirungi

      ABANTU ABAMU BAGAMBA: “Eby’okwesemeza ebirumu okurwana, obusiihani, rundi oburaguzi tibiri bibi ekikuru kakuba mba ntarukwejumbira omu bikorwa ebi.”

      • Iwe n’otekereza ki?

      OYEGERE KI?

      Yahwe n’agonza tukomemu eby’okwesemeza ebirungi kandi tubyegondezeemu.

      Kweijukyamu

      • By’okwesemeza bya mulingo ki Abakristaayo ebibasemeriire kwetantara?

      • Habwaki tusemeriire kwegendereza obukirukuhika ha bwire tumara omu by’okwesemeza?

      • Habwaki n’ogonza kukomamu eby’okwesemeza ebirukusemeza Yahwe?

      Lengaho Kinu

      SERULIIRIZA

      Manya nooha ow’arukujunanizibwa obukirukuhika ha kukomamu eby’okwesemeza byaitu.

      “Abakaiso ba Yahwe Batanga Filimu, Ebitabu, Rundi Ebizina Ebimu?” (Ekicweka kinu kiri ha mukura)

      Rora omulingo osobora kukora encwamu enungi obukirukuhika ha by’okwesemeza.

      “Eby’Okwesemeza Byawe Nibikugasira?” (Watchtower, eya Okitobba 15, 2011)

      Omu kicweka “Nkasingura Engeso ey’Okusoroora,” rora ensonga habwaki omusaija yahindwiremu omulingo akomamu eby’okwesemeza bye.

      “Baibuli Ehindura Obwomeezi” (Watchtower, eya Febwali 1, 2010)

      Rora omulingo omuzaire omukazi akora encwamu ey’amagezi obukirukuhika ha by’okwesemeza ebirumu oburaguzi.

      Wetantale Eby’Okwesemeza Ebirumu Oburaguzi (2:02)