ISOMO 2

Kubaza nk’Oku Obaza n’Omunywani

2 Abakolinso 2:17

EKY’OSEMERIIRE KUKORA: Baza nk’oku obaza buli kiro, kandi omu mulingo ogurukwoleka nk’oku orukwehurra h’abantu abarukukuhuliiriza na ha nsonga ey’orukubazaaho.

OMULINGO OGW’OKUKIKORAMU:

Saba kandi otekanize kurungi. Saba Yahwe akukonyere oleke kwetekerezaaho baitu otekerezeeho obutumwa obw’orukugenda kwegesa. Manya kurungi ensonga enkuru ez’orukugonza kwegesa. Soborra omu bigambo byawe omu kiikaro ky’okusoma busoma ebiri ha rupapura orw’okuheeraho orubazo.

Obworaaba nogenda kusoma Ekyahandiikirwe rundi ekitabu ekindi kyona, kirabemu kara nukwo osobole kusoma kurungi. Obworaaba nosoma ebigambo eby’abantu abandi ebijuliziibwe, bisome n’enyehurra baitu otakihinguraniza.
Baza kuruga ha mutima. Tekerezaaho ensonga habwaki abarukukuhuliiriza nibetaaga obutumwa orukubazaaho. Kandi nubo otekeho omutima. Obu nubwo omulingo orayemerramu, omulingo orakozesaamu ebicweka byawe eby’omubiri, n’omulingo orazooka ha maiso nibiija kwoleka ngu nobaza amananu kandi oli munywani.

Kubaza nk’oku obaza buli kiro tikirukumanyisa kubaza omu mulingo ogutali gw’ekitiinisa. Obworakozesa ebigambo ebirukwetegerezebwa kurungi n’orulimi oruhikire nikiija kwoleka nk’oku obutumwa bwawe bukuru.
Rora abarukukuhuliiriza. Rora abantu ha maiso obukiraaba kitali kibi omu kiikaro kyanyu. Obworaaba noha orubazo, rora omuntu omu h’omu, omu kiikaro eky’okurorra hamu abantu boona.