ISOMO 10

Kuhindahindura Iraka

Enfumo 8:4, 7

EKY’OSEMERIIRE KUKORA: Soborra kurungi ensonga kandi ohike ha mitima y’abantu. Kinu n’osobora kukikora kurabira omu kubaza omu iraka erya haiguru rundi erya hansi, kubaza bwangu rundi kubaza mpora.

OMULINGO OGW’OKUKIKORAMU:

Yongeza iraka rundi likehye. Yongeza iraka kwoleka ensonga enkuru hamu n’okwekambisa abarukukuhuliiriza. Kandi kora omu mulingo nugwo gumu obworaaba nosoma ebyahandiikirwe ebirumu okucwera abantu omusango. Kehya iraka lyawe kuletera abantu ekihika, kwoleka obutiini rundi kweralikirra.

Otongeza iraka buli kaire kikaletera abarukukuhuliiriza kutekereza ngu n’obacoomera. Weriinde kuletera abantu kukutaho omutima habw’okuhindahindura iraka ekihinguraine.
Baliza haiguru rundi hansi. Obukiraaba kisemeriire omu rulimi rwanyu, baliza haiguru kwoleka obutagasi rundi obukooto obw’ekintu rundi orugendo orwa hara. Baliza hansi kwoleka enaku rundi kwetuntura.
Baza bwangu rundi mpora. Baza bwangu bwangu kwoleka omuhimbo. Baza mpora obworaaba nobozaaho ensonga enkuru.

Kusobora kweriinda kukaanga abarukukuhuliiriza otahindura iraka lyawe omu bwangu. Otabaza bwangu muno abarukukuhuliiriza bakalemwa kukwetegereza.