Ebijuliziibwe omu Katabu Obwomeezi n’Obuheereza Bwaitu nk’Abakristaayo
JANWALI 3-9
EBITURUKWEGA KURUGA OMU BAIBULI | EKYABACWI 15-16
“Obugobya—Kabubi Muno!”
w12-E 4/15 8 ¶4
Obutalibwesigwa—Akokurorraho ak’Obusumi Obwa ha Mpero!
4 Banza otekerezeeho Derira, ayayejumbiire omu rukwe orw’okukwata omucwi w’emisango Samusoni, omusaija ayamugonzaaga muno. Samusoni akaba aine ekigendererewa eky’okurwanisa Abafirisiti nukwo arwanirre abantu ba Ruhanga. Obundi habw’okukimanya ngu Derira akaba ataine okugonza okutalekera hali Samusoni, abakuru batano Ababafirisiti bakamuraganiza enguzi y’amaani kusobora kumanya ensita nambere Samusoni y’aihaga amaani ge, nukwo basobole kumuhwerekereza. Derira omugobya akaikiriza, baitu akalema kumanya ensita ya Samusoni emirundi esatu. Nahabweki akaikara ‘n’amugadya butoosa n’ebigambo bye.’ Ha kumalirra, “omutima gwe gwatuntuzibwa nokuhikya okufa.” Nahabweki Samusoni akamugambira ngu isoke lye likaba litakasarwaga, kandi kakuba lisarwa amaani ge nigamuhwaho. Derira obuyakimanyire akeeta omuntu y’asaraho Samsoni isoke lye obw’akaba abyamire ha bibero bye, kandi hanyuma y’amuhayo hali abanyazingwa be bamukole kyona ekibarukugonza. (Bac. 16:4, 5, 15-21) Mali ekiyakozere kakikaba kibi muno! Habw’omururu gwe, Derira akagobeza omuntu ow’akaba n’amugonza.
w05-E 1/15 27 ¶5
Ebiturukwega Kuruga omu Kitabu Ekyabacwi
14:16, 17; 16:16. Kusindikiriza omuntu kurabira omu kurra rundi omu kumugadya nikisobora kusiisa enkoragana.—Nfu. 19:13; 21:19.
w12-E 4/15 11-12 ¶15-16
Obutalibwesigwa—Akokurorraho ak’Obusumi Obwa ha Mpero!
15 Abo abali omu buswere nibasobora bata kwikara bali besigwa hali abagonzebwa baabo? Ekigambo kya Ruhanga nikigamba kiti: ‘Osemererwege omukazi [rundi omusaija] ow’obuto bwawe’ kandi, “semererwa okuikaraga na mukazi [rundi omusaija] owogonza.” (Nfu. 5:18; Mug. 9:9) Abali omu buswere obubeyongera kukura, basemeriire kuba hamu omu mubiri, n’omu bitekerezo kusobora kugumya enkoragana yabo. Eki nikimanyisa basemeriire kufaahongana, kumara hamu obwire, hamu n’okweyongera kwirrangana haihi. Omutima baine kuguteeka ha kulinda obuswere bwabo hamu n’enkoragana yabo na Yahwe. Nahabweki abaswerangaine nibetaaga kwesomesa hamu Baibuli, kutebeza hamu butoosa, kandi n’okusaba hamu Yahwe abahe emigisa.
IKARA OLI MWESIGWA HALI YAHWE
16 Haroho abamu omu kitebe abaakozere ebibi eby’amaani kandi “[abahanirwe] muno muno, [nukwo] bomeere omu kuikiriza.” (Tit. 1:13) Abamu bakaba baine kubingwa omu kitebe habw’engeso zaabo. “Hali abo abanyakwegesebwa omukwo,” okuhana kunu kubakonyera kugarraho enkoragana yabo na Yahwe. (Baheb. 12:11) Kiki eky’osobora kukora kakuba omunyabuzaale rundi munywani wawe nfe na nfe aba abingirwe omu kitebe? Kinu kirenga obwesigwa bwaitu, habwokuba tusemeriire kuba besigwa hali Ruhanga hatali omuntu. Yahwe aba n’aturora nukwo amanye obuturaaba nitworobera ekiragiro kye eky’okutakoragana n’omuntu weena anyakubingirwe.—Soma 1 Abakolinso 5:11-13.
Eby’Omuhendo Kuruga Omu Baibuli
w05-E 3/15 27 ¶6
Samusoni aba Musinguzi Habw’Amaani ga Yahwe!
Samusoni akaba aine ekigendererwa kimu eky’okurwanisa Abafirisiti. Kwikara kwe omu nju ya malaaya omu Gaza akaba aine ekigendererwa eky’okurwanisa abanyanzigwa ba Yahwe. Samusoni akaba nayetaaga ekiikaro ky’okuraramu omu rubuga rw’abanyanzigwa, kandi ekiikaro kyonka ekiyatungire nikyo eky’omu nju ya malaaya. Samusoni akaba ataine kigendererwa ky’okusihana. Akaruga omu nju y’omukazi ogu saaha mukaaga gw’ekiro, y’ahimba enyigi z’orubuga, hamu n’ebikondo byazo, y’azitwara ha rusozi eruguru oruli haihi na Holebu, nka mairo 37 [60 km]. Kinu akakikora habw’obusagiki bwa Ruhanga, hamu n’amaani agayamuhaire.—Bac. 16:1-3.
JANWALI 10-16
EBITURUKWEGA KURUGA OMU BAIBULI | EBYABACWI 17-19
Kujeemera Ebiragiro bya Ruhanga Kirugamu Ebizibu
it-2-E 390-391
Mika
1. Omusaija kuruga Eferaimu. Akacwa ekiragiro kya munaana omu Biragiro Ikumi (Kurug. 20:15), Mika akaiba hali nyina ebicweka byefeeza 1,100. Obuyayatwire ekibi kye kandi sente y’azigarra, nyina akagamba ati: “Mazimakwo mpaireyo efeza zinu hali [Yahwe] omu mukono gwamwana wange, okukora ekisisani ekisaruirwe nekisisani ekyagiibwe: nukwo hati bunu ndabigarra namberoli.” Nyina akatwara ebicweka 200 eby’efeeza hali omuheesi, ayakozere “ekisisani ekisaruirwe nekisisani ekyagiibwe” kandi hanyuma eby’atairwe omu nju ya Mika. Mika, ow’akaba aine “enju yabacwezi,” akakora efodi hamu na terafimu kandi yaha mutabani we obusobozi obw’okuheereza nka nyakatagara we. N’obukiraaba ngu entekaniza enu ekaba n’ezooka nk’ey’okuhaisa Yahwe ekitiinisa, ekaba etahikire nakati, kandi ekaba n’ecwa Ebiragiro bya Ruhanga ebirukutanga kuramya ebisisani (Kurug. 20:4-6) kandi ekaba etarukwikiraniza n’entekaniza ya Yahwe ey’eheema ey’okutangatanganiramu, hamu n’obwanyakatagara. (Bac. 17:1-6; Bir. 12:1-14) Hanyuma, Mika akatwara Yonasani, omwijukuru w’amutabani wa Musa arukwetwa Geresomu, omu ka ye, kandi yapangisa Omulevi onu omuto kuba nyakatagara we. (Bac. 18:4, 30) Habw’okutekereza ngu eky’akaba akozere kihikire, Mika akagamba ati: “Hati bunu manyire nti [Yahwe] alinkora ebirungi.” (Bac. 17:7-13) Baitu Yonasani akaba atali mwijukuru wa Aroni nahabweki akaba atasemeriire kuba nyakatagara, kandi kinu kikongera ha kibi kya Mika.—Kubar. 3:10.
it-2-E 391 ¶2
Mika
Obu haali harabireho akasumi kake, Mika hamu n’ekitebe ky’abantu bakahambya oruganda rwa Dani. Obubabahikireho kandi babakaguza ekyali kibalesere, Mika akabagambira ati: “Mutwaire abacwezi bange abanakozire, na nyakatagara, kandi mugenzire, nanyowe nyina ki ekisigaireho?” Aho, batabani ba Dani bakagambira Mika ngu nibaija kumukora kubi kakuba agumizaamu n’abahondera kandi n’ayesalinga. Obuyarozere ngu abaana ba Dani b’amaani kukira abasaija abaakaba aizire nabo, Mika akagaruka omu ka. (Bac. 18:22-26) Hanyuma abaana ba Dani bakasingura kandi bayokya orubuga rwa Raisi, nambere bayombekere orubuga rwa Dani omu kiikaro nikyo kimu. Yonasani hamu n’abatabani be bakafooka banyakatagara b’abaana ba Dani, abaikaire ‘n’ekisisani ekisaruirwe ekya Mika ekiyakozire, ebiro byona enju ya Ruhanga [eheema ey’okutangatanganiramu] obwekaba eri omu Siro.’—Bac. 18:27-31.
Eby’Omuhendo Kuruga Omu Baibuli
w15-E 12/15 10 ¶6
Empindura ya Baibuli Enungi Muno
6 Obwakaiso oburukugumya ngu ibara lya Ruhanga lisemeriire kukozesebwa omu Baibuli bweyongiire bweyongera omu kiikaro ky’okukeha. Baibuli eya New World Translation eya 2013 erumu ibara linu emirundi 7,216, ekirukumanyisa nirisangibwa omu biikaro ebindi 6 kukira eya 1984. Bitaano ha biikaro ebi nibisangibwa omu 1 Samuiri 2:25; 6:3; 10:26; 23:14, 16. Ibara linu likagarurwa omu biikaro ebi kukira muno habw’emizingo eya Dead Sea Scrolls, ey’erumu ibara linu omu nkarra ezi kandi emizingo enu ekaba eroho emyaka erukuhingura omu 1,000 ebihandiiko ebya Hebrew Masoretic text bitakabaireho. Ekiikaro ekindi nambere ibara linu liri nikyo ekya Ekyabacwi 19:18, likongerwamu hanyuma y’okwekebiija ebihandiiko ebindi ebya kara.
JANWALI 17-23
EBITURUKWEGA KURUGA OMU BAIBULI | EKYABACWI 20-21
“Ikara n’Oyekaguzaaho Yahwe”
w11-E 9/15 32 ¶2
Naiwe Oraaba nka Finehasi obw’Oratunga Ebizibu?
Hanyuma y’abasaija ba Gibeha ab’omu ruganda rwa Benyamini kuhamba kandi n’okwita omukazi w’Omulevi, enganda ezindi ziketekaniza kurwanisa Ababenyamini. (Bac. 20:1-11) Obubakaba batakatandikire kubarwanisa bakasaba hali Yahwe abakonyere, baitu bakasingurwa emirundi ebiri, kandi bafeerwa abantu baingi. (Bac. 20:14-25) Eki kyakubaletiire kutekereza ngu esaara zaabo tizibaire z’omugaso? Mali Yahwe akasemererwa kurora amaani agabatairemu kufubira abaakozere ekibi eki?
w05-E 1/15 27 ¶9
Ebiturukwega Kuruga omu Kitabu Ekyabacwi
20:17-48—Habwaki Yahwe y’aikiriize Ababenyamini kusingura enganda ezindi emirundi ebiri, n’obukiraaba ngu baali nibetaaga kufubirwa? Kwikiriza enganda ezikaba ziri zesigwa kusingurwa muno ha kubanza, Yahwe akaba n’agonza kurora obubaraaba bacweriiremu kimu kwihamu ekibi omu Isareri.
w11-E 9/15 32 ¶4
Naiwe Oraaba nka Finehasi obw’Oratunga Ebizibu?
Isomo ki eriturukwega omuli eki? Ebizibu ebimu nibisobora kwikara omu kitebe, n’obukiraaba ngu abagurusi bekambire muno kubigonjoora kandi basaba hali Ruhanga kubakonyera. Kinu obukibaho, kirungi abagurusi kwijuka ebigambo bya Yesu ebirukugamba biti: “[Mwikale nimusaba] mulihebwa; muserre mulizora; mwerange mulikingu’rwaho.” (Luk. 11:9) Esaara n’obuzirazooka ngu zikereriirwe kugarukwamu, abagurusi basemeriire kukigumya ngu Yahwe naija kuzigarukamu omu kasumi ke akasemeriire.
Eby’Omuhendo Kuruga Omu Baibuli
w14-E 5/1 11 ¶4-6
Obaire Okimanyire?
Emyesuuso yakozesebwaga eta omu bulemu obwa kara?
Omwesuuso kyali ky’okurwanisa Daudi yakozeseze kwita Goliasi omusaija ow’amaani muno. Nikizooka ngu Daudi akeega kukozesa omwesuuso obw’akaba ali muliisa w’entaama akyali mwojo muto.—1 Sam. 17:40-50.
Omwesuuso nigusangwa omu bisisani eby’omu busumi obwa kara by’Abamisiri hamu n’Abasura. Kusobora kukora eky’okurwanisa kinu, bakozesaaga akagoye rundi oruhu, hanyuma nibasibaho obuguha bubiri. Omurwani y’ateekaga omu mwesuuso ibaale eryekulingiriire erya inchi nka ibiri rundi isatu (5 kuhika ha 7.5 cm) kandi erirukulemera nka 250 g. Hanyuma yahungyaga omwesuuso gunu eruguru y’omutwe gwe, kandi alekera akamu ha buguha, ekyaleteraga ibaale kurugamu ha supiidi nyingi muno, kandi n’okugenda honyini nambere arukugonza.
Abarukuhaiga ebintu eby’omu itaka bazoire amabaale maingi muno agakozesebwaga omu myesuuso omu bulemu obwa kara omu Isaleri hamu n’omu mahanga agagyetoroire. Abarwani abakugu nibasobora kuba bahunguraga amabaale kuruga omu mwesuuso ha supiidi eya mairo 100 rundi 150 buli saaha (160 kuhika ha 240 km/h). Abakugu tibarukwikiranganiza omwesuuso obuguraaba gwali nigusobora kuhungura ibaale hara kwingana akasaale, baitu obwakaiso nibukigumya ngu nagwo gwali nigusobora kwita nk’akasaale.—Bac. 20:16.
JANWALI 24-30
EBITURUKWEGA KURUGA OMU BAIBULI | RUSI 1-2
“Kurakuraniza Okugonza Okutalekera”
w16.02-E 14 ¶5
Yegera h’Abanywani ba Yahwe Nfe na Nfe
5 Rusi yakurahukire kutekereza ngu aine nyina hamu n’abanyabuzaale be omu Moabu, abakumufiireho kandi bamuhikyaho ebyetaago bye nk’oku akaba ali mufaakati omuto. Moabu niryo ihanga nambere akaba azaalirwe. Akaba amanyire emigenzo, orulimi, hamu n’abantu b’owabu. Naomi akaba atasobora kumuraganiza ngu naija kumuha ebintu nka binu omu Beterehemu. Kandi amananu gali, Naomi akaha Rusi amagezi kwikara omu Moabu. Naomi akaba n’atiina ngu tasobora kumurolerra, kumuha omusaija, rundi eka. Kiki Rusi ekiyakukozere? Wetegereze embaganiza ekaba eri hagati ya Rusi na Orupa, ‘ayagarukireyo hali bataahi be na hali abacwezi be.’ (Rus. 1:9-15) Rusi akaba n’agonza kugarukayo hali abacwezi be ab’ebisuba aba abantu b’owabu? Nangwa, akaba atarukugonza kukikora.
w16.02-E 14 ¶6
Yegera h’Abanywani ba Yahwe Nfe na Nfe
6 Nikizooka ngu Rusi akaba amazire kwega ebirukukwata hali Yahwe, obundi kuruga hali iba rundi Naomi. Yahwe akaba atali nka baruhanga ba Moabu. Rusi akaba akimanyire ngu asemeriire kugonza Yahwe kandi n’okumuramya. Baitu kukimanya kyonka kyali kitarukumara. Rusi akaba aine kukora encwamu. Yakukomere Yahwe kuba Ruhanga we? Rusi akakora encwamu ey’amagezi. Akagambira Naomi ati: “Abantu bawe nibo baliba abantu bange, na Ruhanga wawe nuwe aliba Ruhanga wange.” (Rus. 1:16) Okugonza Rusi yayolekere Naomi nikuhuniriza muno, baitu ekirukukira obukuru akaba n’agonza muno Yahwe. Hanyuma omusaija omuguuda Boazi akahaisaniza Rusi habw’okuserra obulinzi omu mapapa ga Yahwe. (Soma Rusi 2:12.) Eki nikisobora kutwijukya akanyonyi akato akaserra obulinzi omu mapapa g’omuzaire wako ow’amaani. (Zab. 36:7; 91:1-4) Yahwe akafooka muzaire wa mulingo ogu hali Rusi. Akamuha empeera habw’okwikiriza kwe, kandi Rusi ateyijukye habwaki y’akozere encwamu egi.
Eby’Omuhendo Kuruga Omu Baibuli
w05-E 3/1 27 ¶1
Ebiturukwega Kuruga omu Kitabu kya Rusi
1:13, 21—Habwaki Naomi yagambire ngu Yahwe akaba aletiire obwomeezi bwe kusarra? Naomi atajunaane Ruhanga habw’ebintu ebibi ebyali bimuhikireho. Baitu habw’ebizibu byona ebikaba bimuhikireho akatekereza ngu Yahwe akaba tarukumukonyera. Akehurra asaalirwe muno kandi ahoirwemu amaani. Ekindi, omu kasumi ako kuzaara abaana kyarorwaga nk’omugisa kuruga hali Ruhanga, kandi kuba ngumba nk’omukyeno. Nk’oku akaba ataine baijukuru kandi batabani be babiri bafiire, Naomi akatekereza ngu ahikire kutekereza ngu Yahwe akaba amuswaize.
JANWALI 31–FEBWALI 6
EBITURUKWEGA KURUGA OMU BAIBULI | RUSI 3-4
“Kora Ibara Erirungi Kandi Olirinde”
w12-E 10/1 22 ¶5
Omukazi ow’Engeso Enungi Muno
Boazi akabaza na Rusi kandi hataroho kugurukyagurukya iraka lye erihehiire kurungi liine kuba lyahuumwize Rusi. Akagamba ati: “Ohabwe omugisa hali [Yahwe], mwana wange: baitu oyolekere embabazi nyingi ha mpero okukira ha kubanza, baitu tokuratiire abasaija abasigazi, nobubakuba abanaku nobubakuba abaguda.” (Rus. 3:10) “Omurundi ogw’okubanza” ogurukubazibwaho Rusi oguyayolekeremu okugonza okutalekera, nugwo obuyasendekeriize Naomi kugaruka omu Isaleri kandi n’okumurolerra. “Omurundi ogwa ha mpero” nugwo ogu ogukaba nigugenda omu maiso. Boazi akakyetegereza ngu omukazi onu omuto akaba nasobora kwanguha kuserra omusaija omu basaija abato abaguuda rundi omu banaku. Baitu akaba nagonza kukorra Naomi ebirungi hamu na iba ow’akaba afiire nukwo iba asobole kusigaza ibara omu Isaleri. Tikirukuhuniriza kwetegereza habwaki Boazi yakwasirweho muno omutima ogw’omukazi onu omuto ogw’okwefeereza.
w12-E 10/1 23 ¶1
Omukazi ow’Engeso Enungi Muno
Rusi nasobora kuba yasemeriirwe muno obuyatekeriizeho ebigambo bya Boazi obuyagambire ngu abantu boona bakaba bamumanyire nk’omukazi omurungi muno! Busaho kugurukyagurukya, ekihika kye eky’okugonza kumanya Yahwe hamu n’okumuheereza nikyo kiine kuba kyamuletiire kwekorra ibara erirungi. Ekindi akaba afiireho kandi ayolekere embabazi nyingi muno hali Naomi hamu n’abantu be kandi akaba ayehaireyo kwega emiringo hamu n’emigenzo ey’akaba atamanyiriire. Obuturayegera ha kwikiriza kwa Rusi, nitwija kulengaho muno kuteekamu ekitiinisa abantu abandi, emiringo yabo, hamu n’emigenzo yabo. Obuturakikora naitwe nitwija kwekorra ibara erirungi, ery’okuba bantu ab’engeso enungi muno.
w12-E 10/1 24 ¶3
Omukazi ow’Engeso Enungi Muno
Boazi akaswera Rusi. Hanyuma nitusoma ngu: “[Yahwe] yamuha okuba nenda, yazara omwana omwojo.” Abakazi ba Beterehemu bakaha Naomi omugisa kandi bakugiza Rusi kuba murungi hali Naomi kukira abatabani musanju. Hanyuma nitwega ngu, mutabani wa Rusi akafooka isenkuru w’Omukama ow’amaani Daudi. (Rus. 4:11-22) Kandi na Daudi akafooka isenkuru, Yesu Kristo.—Mat. 1:1.
Eby’Omuhendo Kuruga Omu Baibuli
w05-E 3/1 29 ¶3
Ebiturukwega Kuruga omu Kitabu kya Rusi
4:6—Mulingo ki omununuzi akaba n’asobora ‘kusiisa’ obugwetwa bwe habw’okucungura abandi? Ogw’okubanza, omuntu ow’afookere munaku obuyatundaga itaka ery’obugwetwa bwe, omununuzi akaba aine kwongera kuligura nasasura sente ezasigikirra ha myaka eyabaga esigaireyo kuhika ha Yubile erukwongeraho. (Lev. 25:25-27) Kukora eki kyakukeheze ha by’obuguuda bye. Ekindi, Rusi kakuba y’azaire omwana omwojo nuwe yakugwesere itaka eri bongiire bagura omu kiikaro ky’omunyabuzaale ow’omununuzi.
FEBWALI 7-13
EBITURUKWEGA KURUGA OMU BAIBULI | 1 SAMUIRI 1-2
“Gambira Yahwe Ebiri omu Mutima Gwawe Kuraba omu Kusaba”
ia-E 55 ¶12
Akagambira Ruhanga Kiki Kyonyini Ekikaba Kiri ha Mutima Gwe
12 Omu mulingo ogu, Hana akateeraho abaheereza ba Ruhanga boona ekyokurorraho ekirungi obukirukuhika ha kusaba. Yahwe n’araaliza abantu be kubaza na uwe batarukutiina kandi bamugambire buli kimu kyona nk’oku omwana arukwesiga omuzaire we akora. (Soma Zabuli 62:8; 1 Abasesalonika 5:17.) Omwoyo gwa Ruhanga gukaterekereza omukwenda Petero kuhandiika ebigambo ebirukuhuumuza ebirukukwata hali Yahwe, akahandiika ati: “Nimunagira okutuntura kwanyu kwona haluwe, baitu nabitaho omutima ebigambo byanyu.”—1 Pet. 5:7.
w07-E 3/15 16 ¶4
Omulingo Hana Yatungiremu Obusinge
Kiki ekiturukwega? Obutusaba hali Yahwe ha bintu ebirukutweralikiriza, nitusobora kumugambira omulingo gwonyini turukwehurramu kandi n’okumusaba ebiturukugonza. Kakuba tuba tutaine kintu kyona ekitusobora kukora kugonjoora ekizibu kyaitu, ekizibu eki tukireke omu mikono ye. Busaho kintu kindi ekirukukira eki.—Nfu. 3:5, 6.
Eby’Omuhendo Kuruga Omu Baibuli
w05-E 3/15 21 ¶5
Ebiturukwega Kuruga omu Kitabu kya Samuiri ey’Okubanza
2:10—Habwaki Hana yasabire ngu Yahwe “aliha amani omukama” kandi kunu omu Isaleri hakaba hataliyo omukama wena?
Kyali kirangirwe omu Biragiro bya Musa ngu, hali haraho omuntu ow’akaba nagenda kulema Abaisaleri nk’omukama. (Bir. 17:14-18) Omu bunabbi bwa Yakobo obwakaba ali haihi kufa, akagamba ati: “Omuigo gwobukama tiguliruga ha Yuda.” (Kub. 49:10) Ekindi, Yahwe akabazaaho Sara nyinenkuru w’Abaisaleri ati: “Abakama bamahanga baliruga omuluwe.” (Kub. 17:16) Nahabweki, Hana akaba nasabaho omukama ow’omu kasumi ak’omu maiso.
FEBWALI 14-20
EBITURUKWEGA KURUGA OMU BAIBULI | 1 SAMUIRI 3-5
“Yahwe Afaaho Abandi”
W’Obusobozi Bwona Baitu n’Afaaho Abandi
3 Samuiri akatandika ‘kuheereza [Yahwe]’ ha hema y’okutangatanganirwamu obwakaba akyali muto muno. (1 Sam. 3:1) Omu itumbi rimu Samuiri obwakaba abyamire, ekintu ekirukuhuniiriza muno kikabaho. (Soma 1 Samuiri 3:2-10.) Akahurra iraka nirimweta nirikozesa ibara lye. Habw’okuteekereza ngu iraka lya Nyakatagara Omukuru Eri, ow’akaba agurusire, Samuiri akairuka bwangu yagenda nambere ali kandi yamugambira ati: “Dora nyowe; baitu onyesere.” Eri akamugambira ngu tamwesere. Ekintu kinu obukyabaireho emirundi endi ebiri, Eri akakyetegereza ngu Yahwe nuwe akaba nayeta Samuiri. Nahabweki akagambira Samuiri omulingo aragarukamu kandi na uwe akamworobera. Habwaki Yahwe kurabira omu malaika we, atarayeyanjuliire Samuiri ha murundi ogw’okubanza? Baibuli terukutugambira baitu ebyabaireho nibitukonyera kwetegereza ngu ensonga enkuru habwaki kyabaireho ekaba eri kukonyera Samuiri. Omu mulingo ki?
W’Obusobozi Bwona Baitu n’Afaaho Abandi
4 Soma 1 Samuiri 3:11-18. Ebiragiro bya Yahwe byatererraga abaana kuteekamu abantu abakuru ekitiinisa, kukira muno omulemi. (Kurug. 22:28; Lev. 19:32) Noteekereza Samuiri akasobora kugenda nyenkyakara hali Eri, kumugambira obutumwa bwa Ruhanga obw’omunsango? Nangwa! Amananu gali ngu, ebyahandiikirwe nibitugambira ngu Samuiri ‘akatiina okumanyisa Eri okwolekwa.’ Baitu Ruhanga akaba akyolekiire kimu Eri ngu akaba nayeta Samuiri. Ekyarugiremu, Eri akataaha omu nsonga egi kandi yagambira Samuiri kubaza. Eri akamugambira ati: ‘Otansereka ekigambo kyona omu byona ebyakugambiire.’ Kandi Samuiri akamworobera “yamugambira byona.”
Eby’Omuhendo Kuruga Omu Baibuli
w05-E 3/15 21 ¶6
Ebiturukwega Kuruga omu Kitabu kya Samuiri ey’Okubanza
3:3—Nitukimanya tuta ngu Samuiri tiyaraaraga omu Kiikaro Ekirukukira Okwera?
Samuiri akaba ali Mulevi ow’oruganda orw’Abakohasi abatakoraga obwa nyakatagara. (1 Byom. 6:33-38) Nahabweki akaba atarukwikirizibwa ‘kwirra ha bintu ebirukwera muno.’ (Kubar. 4:17-20) Ekicweka kyonka ekirukwera nambere Samuiri yakirizibwaga kugenda niyo ezigati ey’eheema. Kandi oku nuho asobora kuba yaraaraga. Nikozooka ngu na Eri yaraaraga omu kicweka ekimu eky’ezigati y’ehema. Ebigambo “nambere esanduko ya Ruhanga yaikaire” biine kuba nibimanyisa ekiikaro nambere eheema y’okutangatanganirwamu ekaba eri.
FEBWALI 21-27
EBITURUKWEGA KURUGA OMU BAIBULI | 1 SAMUIRI 6-8
“Omukama Wawe Nooha?”
it-2-E 163 ¶1
Obukama bwa Ruhanga
Bakasaba Omukama. Obuhakaba harabireho emyaka 400 Abaisaleri bamazire kuruga omu Misiri, hamu n’emyaka erukuhingura omu 800 Ruhanga amazire kukora ekiragaano na Iburahimu, Abaisaleri bakasaba kutunga omuntu arafooka omukama wabo, nk’oku amahanga agandi gaali gaine abakama. Kusaba kwabo kunu kwali nikwoleka ngu baali bangire Yahwe nk’omulemi wabo. (1Sam. 8:4-8) Ky’amananu ngu abantu bakaba nibanihira Ruhanga kuteekaho Obukama kusigikirra ha murago gwe ogw’akaba araganiize Iburahimu hamu na Yakobo. Ekindi bakasigikirra ha bunabbi Yakobo yarangire hali Yuda obwakaba ali ha kitabu ali haihi kufa (Kub. 49:8-10), ha bigambo Yahwe yagambiire Abaisaleri hanyuma y’okuruga Misiri (Kurug. 19:3-6), ha Biragiro by’ekiragaano (Bir. 17:14, 15), kandi hanyuma na ha kicweka ky’obutumwa Ruhanga yagambiire nabbi Baramu kubaza (Kubar. 24:2-7, 17). Nyina Samuiri, Hana, omukazi ow’akaba ali mwesigwa akabazaaho okunihira kunu omusaara. (1Sam. 2:7-10) Yahwe akaba atakamanyisize omu bwijwire “ekyensita” ekirukukwata ha Bukama kandi akaba atakoolekere nidi Obukama obu buliteekebwaho rundi omulingo Obukama obu buliba bukozerwemu, obuburaaba buli bw’omu iguru rundi omu nsi. Nahabweki, Abaisaleri baketumiisiriza obubasabire omukama.
w11-E 1/1 27 ¶1
Akagumiisiriza n’Obukiraaba ngu Akatalibanizibwa
Wetegereze omulingo Yahwe yagarukiremu Samuiri obuyamugambiire ensonga egi omu kusaba, akamugarukamu ati: “Hurra iraka lyabantu omu byona ebibakugambira: baitu tibangire iwe, bangire nyowe, ndeke okuba omukama wabu okubalema.” Kinu kiine kuba kyahuumwize muno Samuiri, baitu abantu baali nibasisana nk’abajumire Yahwe, Ruhanga Ow’obusobozi bwona! Baitu Yahwe akagambira nabbi we kugambira Abaisaleri ebizibu ebyakurugiremu omuntu obuyakutandikire kubalema. Samuiri obuyakikozere bakahambiriza nibamugambira bati: “Nangwa; baitu ntugonza omukama atuleme.” Nk’oku Samuiri yayoroberaga Ruhanga, akagenda yaseesaho amagita omukama Yahwe ow’akaba akomere.—1 Sam. 8:7-19.
w10-E 1/15 30 ¶9
Omulingo Yahwe Alema Gunyumizibwa!
9 Ebyafaayo bya Isaleri nibikigumya ngu Yahwe ebiyagambire bikahikirra. Kulemwa omuntu kikaletera Isaleri ebizibu eby’amaani kukira muno omukama ogu obuyalekaga kuba mwesigwa hali Yahwe. Ekyokurorraho kya Isaleri eki nikitukonyera kwetegereza habwaki kumara emyaka nyingi gavumenti ezirukulemwa abantu abatamanyire Yahwe ziremerwe kumarraho kimu ebizibu by’abantu. Ky’amananu ngu, ab’eby’obulemi abamu basaba Ruhanga kuha omugisa amaani agabateekamu kuleetaho obusinge, neteeka, baitu Ruhanga nasobora ata kuha omugisa abo abatarukworobera obulemi bwe?—Zab. 2:10-12.
Eby’Omuhendo Kuruga Omu Baibuli
w02-E 4/1 12 ¶13
Orukarra runu nirutwegesa ki ha kuhinduka n’okwegarukamu?
13 Kuhinduka kusemeriire kubaho omuntu atakabatiziibwe nk’omu h’Abakaiso ba Yahwe. Omuntu ahinduka ayegondiize habwokuba aba acwiremu n’omutima gwe gwona kuhondera Yesu Kristo. Omuntu nk’ogu, aleka engeso ze eza kara kandi acweramu kimu kukora ebihikire omu maiso ga Ruhanga. Omu Byahandiikirwe ekigambo eky’Oruheburaniya n’Oruyonaani ebirukukozesebwa kumanyisa okuhinduka biine amakuru ag’okuhinduka okatoma omuhanda gundi. Kinu nikimanyisa kuhinduka okagaruka hali Ruhanga okaruga omu muhanda omubi. (1 Bakam. 8:33, 34) Kuhinduka nikyetaagisa “engeso ezisemeriire okwegarukamu.” (Eng. 26:20) Nikitwarramu kwecwaho ediini ez’ebisuba, kworobera ebiragiro bya Ruhanga, kandi n’okuramya Yahwe wenka. (Bir. 30:2, 8-10; 1 Sam. 7:3) Entekereza yaitu, ebigendererwa, hamu n’enyetwaza byona bihinduka. (Ez. 18:31) ‘Tuhinduka’ obutuleka engeso embi kandi tukajwara omuntu omuhyaka.—Eng. 3:19; Bef. 4:20-24; Bak. 3:5-14.
FEBWALI 28–MAACI 6
EBITURUKWEGA KURUGA OMU BAIBULI | 1 SAMUIRI 9-11
“Ha Kubanza Saulo Akaba Ali Mwebundaazi Kandi Muculeezi”
Rubata na Ruhanga Wawe Oli Mwebundaazi Kandi Muculeezi
11 Tekerezaaho ekyahikire ha Mukama Saulo. Ha kubanza akaba ali musigazi omuculeezi. Akaba amanyire obugarukiro bwe, kandi akabanza kwanga obujunanizibwa oburukukiraho. (1 Sam. 9:21; 10:20-22) Baitu hanyuma y’akasumi, Saulo akatandika kwetumiisiriza. Akooleka omulingo gunu omubi hanyuma y’akasumi kake amazire kufooka omukama. Kiro kimu akalemwa kugumiisiriza obwakaba alindiire nabbi Samuiri. Omu kiikaro kyokwoleka obuculeezi, akesiga ngu Yahwe naija kukonyera abantu be, Saulo akahonga ekihongwa n’obukiraaba ngu akaba ataikiriziibwe kukikora. Ekyarugiremu, Saulo akafeerwa enkoragana ye na Yahwe kandi hanyuma n’obukama. (1 Sam. 13:8-14) Tuba bamagezi obutwegera ha kyokurorraho kinu kandi tuketantara kwetumiisiriza.
w14-E 3/15 9 ¶8
Nk’oku Tusobora Kwikara Twine Omutima gw’Okwehayo
8 Ekyokurorraho eky’Omukama Saulo owa Isaleri nikituwoleka omulingo kwegonza itwenka kusobora kutuletera kuleka kwehayo. Saulo obuyafookere mukama akatandika ali muculeezi kandi mwebundaazi. (1 Sam. 9:21) Saulo akanga kufubira Abaisaleri ababalizeeho kubi obukama bwe n’obukiraaba ngu akaba nasobora kwehurra ngu kihikire kurwanirra ekitiinisa eki nk’oku Yahwe nuwe akaba akimuhaire. (1 Sam. 10:27) Omukama Saulo akaikiriza obuhabuzi obw’omwoyo gwa Ruhanga ogurukwera obuyayebembiire Abaisaleri kurwanisa hamu n’okusingura Abamoni. Hanyuma omu mulingo ogw’obwebundaazi, ekitiinisa akakigarurra Yahwe habw’obusinguzi obu.—1 Sam. 11:6, 11-13.
w95-E 12/15 10 ¶1
Abamoni—Abantu Abayetwaize Kubi Hanyuma y’Okwolekwa Embabazi
Abamoni bakongera bayetwaza kubi n’obukiraaba ngu Yahwe akaba aboolekere embabazi. Yahwe akagira ekiyakoraho habw’okutiinisiriza kunu okw’amaani. “Omwoyo gwa Ruhanga gwaija namani ha Saulo obuyahuliire ebigambo [bya Nahasi], ekinigakye kyayaka muno.” Hansi y’oburagirizi bw’omwoyo gwa Ruhanga, Saulo akebembera ihe ly’abasaija 330,000 kandi yasingurra kimu Abamoni kyahika ngu “nokuikara bataikaleho babiri hamu.”—1 Sam. 11:6, 11.
Eby’Omuhendo Kuruga Omu Baibuli
w05-E 3/15 22 ¶8
Ebiturukwega Kuruga omu Kitabu kya Samuiri ey’Okubanza
9:9—Ebigambo binu nibisobora kuba nibimanyisa ki? Ebigambo binu nibisobora kuba nibyoleka ngu banabbi obubeyongiire kumanywa omu kasumi ka Samuiri, kandi n’omu kasumi aka bakama omu Isaleri, ekigambo “omurozi” kikaleka kukozesebwa kandi omu kiikaro kyakyo batandika kukozesa ‘nabbi.’ Samuiri nateberezebwa kuba nuwe yabaire nabbi ow’okubanza.—Eng. 3:24.