Ebijuliziibwe omu Katabu Obwomeezi n’Obuheereza Bwaitu nk’Abakristaayo
MAAYI 2-8
EBITURUKWEGA KURUGA OMU BAIBULI | 1 SAMUIRI 27-29
“Omulingo Daudi Yarwainemu Obulemu”
it-1-E 41
Akisi
Emirundi ebiri Daudi obw’akaba nairuka Saulo, yairukiraga omu kicweka ekyali nikiremwa Omukama Akisi. Ha murundi ogw’okubanza, Daudi obuyatekereziibwe kuba munyanzigwa, akefoora nk’ow’agwire iraro kandi Akisi akamuleka yagenda nk’omuntu ow’ataine kabi. (1Sam 21:10-15; Obugambo oburukwanjura Zab 34 na 56) Ha murundi ogwakabiri, Daudi akasendekerezebwa abasaija emanzi 600 n’abomu maka gaabo, nahabweki Akisi akabaragira kwikara Zikiragi. Omwaka gumu n’emyezi ena eibamazireyo, Akisi akateekereza ngu Daudi n’abasaija be batahirraga etahuni za Yuda. Baitu kandi Daudi n’abasaija be batahirraga Abagesura, Abagirizi n’Abamaleki. (1Sam 27:1-12) Akisi eky’akaba n’ateekereza kikamuletera n’okufoora Daudi mulinzi we Abafirisiti obubaali nibetekaniza kutahirra Omukama Saulo, kandi ha kumalirra, abakuru b’Abafirisiti obubaalemireho, Daudi n’abasija be nubwo baagarukire Zikiragi. (1Sam 28:2; 29:1-11) Daudi obuyafookere mukama kandi yatahirra Gasi, Akisi ataitwe. Akaba akyaroho n’omu bulemi bwa Sulemani.—1Bakam 2:39-41; rora GATH.
Abasigazi—Nimusobora Muta Kuletera Abantu Abandi Kubesiga?
8 Tekerezaaho ekizibu ekindi Daudi ekiyarabiremu. Hanyuma ya Daudi kuseswaho amagita kufooka omukama, akaba aine kulinda emyaka nyingi atakatandikire kulema nk’omukama wa Yuda. (1 Sam. 16:13; 2 Sam. 2:3, 4) Omu kasumi ako, kiki eky’amukonyire kulinda aine okugumiisiriza? Omu kiikaro ky’okuhwamu amaani, Daudi akateeka omutima hali ebi eby’akaba nasobora kukora. Ekyokurorraho, obuyairukiire omu kicweka ky’Abafirisiti, akakozesa obwire obu kurwanisa abanyanzigwa Baisaleri. Obuyakozere eki, Daudi akasobora kulinda emitaano ey’ekicweka kya Yuda.—1 Sam. 27:1-12.
it-2-E 245 ¶6
Ekisuba
N’obukiraaba ngu Baibuli ebijumirra ebisuba ebirukugenderra kusiisa ibara ly’omuntu ondi, kinu tikirukumanyisa ngu omuntu asemeriire kugambira abandi ebintu ebibatasemeriire kumanya. Yesu Kristo akatutererra ati: “Mutaliha kintu ekirukwera hali embwa, nobukwakuba okunaga eruru zanyu omu maiso gempunu, zireke kuziribata nebirenge byazo, nizihinduka okubatagura.” (Mat 7:6) Egi niyo ensonga habwaki obwire obumu Yesu tiyagambiraga abantu ebintu byona rundi kubaha eby’okugarukamu hali ebikaguzo ebimu obuyaroraga ngu kyakurugiremu akabi. (Mat 15:1-6; 21:23-27; Yoh 7:3-10) Nikyo kimu, n’ekintu Iburahimu, Isaka, Rahabu na Erisa ekibaakozere. Batagambire abantu abatarukuramya Yahwe buli kimu rundi kubaha oburagirizi obuhikire. Tusemeriire kukirora omu mulingo nugwo gumu.—Kub 12:10-19; sur 20; 26:1-10; Yos 2:1-6; Yak 2:25; 2Bakam 6:11-23.
Eby’Omuhendo Kuruga omu Baibuli
w10-E 1/1 20 ¶5-6
Abafu Nibasobora Kukonyera Abomeezi?
Kitekerezeeho. Baibuli egamba ngu omuntu obw’afa ‘agaruka omu itaka kandi ebitekerezo bye bihwaho.’ (Zabuli 146:4) Saulo na Samuiri boona baali bakimanyire ngu Ruhanga n’atanga kubandwa. Kandi enyumaho, Saulo akaba atairemu amaani kumaraho ebikorwa eby’oburaguzi n’okubandwa omu Isaleri!—Ebyabalevi 19:31.
Tekerezaaho ensonga enu. Kakuba omwoyo gw’omusaija omwesigwa Samuiri gwali gukyali mwomeezi, yakucwire ekiragiro kya Ruhanga kandi akwatanize n’omufumu nukwo atangatangane Saulo? Yahwe akaba ayangire kubaza na Saulo. Hati omufumu akaba n’asobora kuhambiriza Ruhanga ow’Obusobozi Bwona kubaza na Saulo n’akozesa Samuiri ow’akaba amazire kufa? Nangwa. Nikyeyolekera kimu ngu, “Samuiri” ayabalize na Saulo akaba atali nuwe nabbi ow’akaba ali mwesigwa hali Yahwe. Gukaba guli mwoyo omubi—daimoni ey’ekaba n’erengaho kwefoora Samuiri ow’akaba afiire.
MAAYI 9-15
EBITURUKWEGA KURUGA OMU BAIBULI | 1 SAMUIRi 30-31
“Ikiriza Yahwe Akugarremu Amaani”
w06-E 8/1 28 ¶12
Tiina Yahwe—Osemererwe!
12 Okutiina Daudi okw’akaba ainiire Yahwe kutagarukire ha kumutanga kukora ekibi. Kukamukonyera kwanguha kukora encwamu ez’amagezi obuyabaga ali munyikara ezigumire. Daudi n’abasaija be bakamara omwaka gumu n’emyezi ena beserekere Saulo omu Zikiragi ey’erukusangwa omu Firisiti. (1 Samuiri 27:5-7) Abasaija obubaarugireho, ekitebe ky’Abamaleki bakookya orubuga kandi batwara abakazi b’abasaija, abaana baabo hamu n’ebisoro byabo. Obubaagarukire kandi baarora ekyali kibaireho, Daudi n’abasaija be bakarra. Okuganya kukabaletera kutabuka kandi baagonza kuteera Daudi amabaale. N’obukiraaba ngu Daudi akaba ayetuntwire, atahwemu amaani. (Enfumo 24:10) Okutiina okw’akaba ainiire Ruhanga kukamuleetera kugenda hali Yahwe, amugumye. Ruhanga akakonyera Daudi n’abasija be kusingura Abamaleki n’okugarra ebintu byabo byona.—1 Samuiri 30:1-20.
w12-E 4/15 30 ¶14
Yahwe Atulinda Nukwo Tusobole Kujunwa
14 Daudi akahikwaho enyikara nyingi ezamutuntwize omu bwomeezi bwe. (1 Sam. 30:3-6) Ebigambo bye ebyaterekereziibwe omwoyo ogurukwera nibyoleka ngu Yahwe akaba amanyire enyehurra ze. (Soma Zabuli 34:18; 56:8.) Naitwe, Ruhanga amanyire enyehurra zaitu. Obutuba twine “omutima ogucwekere” rundi tuhoirwemu amaani, atwirra haihi. Kinu nikisobora kutuhuumuza nk’oku kyahuumwize Daudi ayazinire n’agamba ati: “Ndihiirwa, ndasemererwa obwokuganyira kwawe: baitu okarora omuhito gwange; okamanya obwomezi bwange omu bujune.” (Zab. 31:7) Baitu Yahwe tagarukira ha kumanya okutuntura kwaitu kwonka. Atukonyera kuraba omu kutuhuumuza n’okutugarramu amaani. Gumu ha miringo akikoramu nukwo kuraba omu nsorrokano.
Eby’Omuhendo Kuruga Omu Baibuli
w05-E 3/15 24 ¶8
Ebiturukwega Kuruga omu Kitabu kya Samuiri ey’Okubanza
30:23, 24. Encwamu enu ey’erukusigikirra ha Okubara 31:27, n’eyoleka ngu abo abaheereza kurabira omu kukora emirimo ey’erukuzooka nk’etali y’amaani baitu ey’esagika ekitebe, Yahwe abatwara kuba b’omuhendo. Nahabweki kyona ekiturakoraga, ‘tukikolege n’omutima gwaitu gwona, habwa Yahwe kunu tihali habwa abantu.’—Abakolosai 3:23.
MAAYI 16-22
EBITURUKWEGA KURUGA OMU BAIBULI | 2 SAMUIRI 1-3
“Masomo ki Agaturukwegera ha ‘Buta’?”
w00-E 6/15 13 ¶9
Teekamu Ekitiinisa Abo Abahairwe Obusobozi
9 Daudi akaba ayetuntwire obw’akaba natwazibwa kubi? Daudi akalirirra Yahwe n’agamba ati “Abantu . . . Abarruma baseruire obwomezi bwange.” (Zabuli 54:3) Akaseesa omutima gwe hali Yahwe n’agamba ati: “Njuna omu banyanzingwa bange, ai Ruhanga wange . . . Emanzi zesoroza hamu okuntahirra, tibuli obwokusiisa kwange, kunu tibuli obwekibi kyange, ai Yahwe. Bairuka nibetekaniza, nyowe ntakozire kibi: Osisimuke okukonyera, orole.” (Zabuli 59:1-4) Naiwe wakehurraga ngu omuntu ow’anyakwine obusobozi, naikara n’agumanganiza obwomeezi bwawe n’obukiraaba ngu busaho kibi kyona eky’okozere? Daudi akaikara n’atekamu Saulo ekitiinisa. Saulo obuyafiire, omu kiikaro kya Daudi kusemererwa, akazina ekizina eky’empamo n’agamba ati: “Saulo na Yonasani bakaba bali barungi, kandi bokusemeza omu bwomeezi bwabu, . . . Bakiraga isamba okwanguha, bakiraga entale amani. Inywe abaisiki ba Isareri, mulirre Saulo.” (2 Samuiri 1:23, 24) Mali ekyokurorraho kya Daudi eky’okutamu ekitiinisa ogu Yahwe ow’akaba aseesereho amagita n’obukiraaba ngu Saulo akaba amutwaize kubi, ka kirungi!
w12-E 4/15 10 ¶8
Obugobya Kiri Kintu eky’Akabi Obwire Bwona!
8 Ekindi, Baibuli ebazaaho abantu abandi baingi abesigwa. Katubazeeho babiri hali bo kandi turole ekitusobora kubegeraho. Leka tutandike n’omusaija ayayolekere obwesigwa bwe hali Daudi. Yonasani mutabani w’Omukama Saulo omukuru, nuwe yakubaire agarukire omu bigere bya ise kulema Isaleri—oihireho haroho ekyabaireho. Yahwe akakoma Daudi kuba omukama wa Isaleri ow’arukuhonderaho. Yonasani akatamu ekitiinisa encwamu ya Ruhanga. Atakwatirwe Daudi ihali kandi atamurole nk’omunyanzigwa. Oihireho, ‘omutima gwa Yonasani gukaterana n’omutima gwa Daudi’ obuyali n’amuraganiza kuba mwesigwa hali uwe. Ekindi, akaha Daudi eby’okujwara bye, empirima, obuta hamu n’omweko gwe. Omu mulingo gunu, akasisana nk’ow’amuhaire ekitiinisa ky’Obukama. (1 Sam. 18:1-4) Yonasani akakora kyona eky’arukusobora ‘kugumya omukono gwa Daudi,’ yahika n’okuteeka obwomeezi bwe omu kabi kurwanirra Daudi omu maiso ga Saulo. N’obwesigwa, Yonasani akagambira Daudi ati: “Naiwe oliba omukama wa Isareri, nanyowe ndikukuratira ha bukuru.” (1 Sam. 20:30-34; 23:16, 17) Nahabweki tikirukuhuniiriza ngu hanyuma y’okufa kwa Yonasani, Daudi akooleka okusaasa kwe n’okugonza okw’akaba amwiniire kuraba omu kizina kye eky’empamo.—2 Sam. 1:17, 26.
Eby’Omuhendo Kuruga Omu Baibuli
it-1-E 369 ¶2
Ow’Oruganda
Ekigambo “ow’oruganda” kikozesebwa hali abo abali omu bumu kandi abaine ebigendererwa ebirukusisana. Ekyokurorraho, Omukama Hiramu owa Turo akeeta Sulemani mugenzi we hatali ngu habwokuba baali nibainganaingana obusobozi n’ekitiinisa, baitu nikisobora kuba ngu boona baali baine ekigendererwa eky’okuhayo embaaho hamu n’ebintu ebindi eby’okwombekesa yekaru. (1Bakam 9:13; 5:1-12) “Dora okukiri ekirungi, okukisemera bene baitu, okuikara hamu nibaterana!” Daudi obuyahandiikire ebigambo ebi akaba atarukumanyisa ngu enkoragana ey’obuzaale yonka niyo ereetaho obusinge n’obumu hagati yaabo bonka abarukuzaarwa hamu. (Zab 133:1) Niturora ngu okugonzangana n’okugonza ebintu ebirukusisana, hatali kuzaarwa hamu, kikaleetera Daudi kweta Yonasani mugenzi we. (2Sam 1:26) Abanywani abarukwetwaza omu mulingo ogurukusisana n’obugurukuba guli mubi, bakira kwetwa b’oruganda.—Nfu 18:9.
MAAYI 23-29
EBITURUKWEGA KURUGA OMU BAIBULI | 2 SAMUIRI 4-6
“Ikara n’Otiina Kubiihiza Yahwe”
w05-E 5/15 17 ¶8
Ebiturukwega Kuruga omu Kitabu kya Samuiri Eyakabiri
6:1-7. N’obukiraaba ngu Daudi akaba aine ebigendererwa ebirungi, kufurra Esanduuko n’akozesa ekigaali kyali nikicwa ekiragiro kya Ruhanga kandi kikarugamu akabi. (Okuruga 25:13, 14; Okubara 4:15, 19; 7:7-9)[10] Uza kukwata Esanduuko etagwa nikyoleka ngu kuba n’ebigendererwa ebirungi tikihindura Ruhanga eky’arukugonza tukole.
w05-E 2/1 27 ¶20
Yahwe Akora Ebihikire Obwire Bwona
20 Ijuka ngu Uza n’asobora kuba yaali amanyire kurungi eky’akaba n’akora. Esanduuko ekaba n’ekikiirra kubaho kwa Yahwe. Ekiragiro kyali nikyoleka kurungi ngu ekaba etasemeriire kukwatwaho omuntu ow’ataikiriziibwe, kandi ngu omuntu ayakucwire ekiragiro kinu, yakwisirwe. (Okubara 4:18-20; 7:89) Nahabweki, omulimo ogw’okufurra Esanduuko enu ey’erukwera gukaba gusemeriire kukorwa n’obwegendereza. Uza akaba ali Mulevi (n’obukiraaba ngu akaba atali nyakatagara), nahabweki n’asobora kuba yali amanyire kurungi ebiragiro. Ekindi, omu myaka ey’enyuma Esanduuko ekaba ereserwe omu nju ya ise nuho erindirwe. (1 Samuiri 6:20–7:1) Ekaba ikaireyo kumara emyaka nka 70, kuhikya Daudi obuyacwiremu kugiihayo. Nahabweki kurugira kimu omu buto bwe, Uza n’asobora kuba yali amanyire kurungi ebiragiro ebirukukwata ha Sanduuko.
w05-E 2/1 27 ¶21
Yahwe Akora Ebihikire Obwire Bwona
21 Nk’oku tusangirwe turozere, Yahwe n’amanya ebiri omu mutima. Nk’oku Ekigambo kye kirukwoleka ngu Uza ‘akasobya,’ Yahwe n’asobora kuba yarozere ebigendererwa bya Uza ebitahikire kandi eby’okwegondeza ebitoolekerwe omu byahandiikirwe binu. Tugambe ngu Uza n’asobora kuba akaba ali musaija arukwetumiisiriza kandi atarukuhondera oburagirizi? (Enfumo 11:2) Nikisobora kuba ngu kutwara omu rwijwire Esanduuko ey’ekaba emazire akasumi n’erindirwa owaabu kikamuleetera kwehurra nk’ow’omugaso muno kukira abandi? (Enfumo 8:13) Nikisobora kuba ngu Uza akaba ataine kwikiriza kandi kyamuletera kuteekereza ngu omukono gwa Yahwe mugufu muno tigusobora kutanga Esanduuko enu ey’erukwera kandi eyakiikirraga okubaho kwe kugwa? Kyona ekyabaireho, nitukigumya ngu Yahwe akakora ekihikire. N’asobora kuba aine ekiyarozere omu mutima gwa Uza ekyamuletiire kumucwera omusango ahonaaho.—Enfumo 21:2.
Eby’Omuhendo Kuruga Omu Baibuli
w96-E 4/1 29 ¶1
Onagirege Yahwe Omugugu Gwawe Obwire Bwona
Kinu nikyo kyahikireho Daudi obuyali n’alema nk’omukama. Omulingo yayetwaizeemu nigwoleka ngu naabo abaine enkoragana enungi na Yahwe, obwire obumu nibasobora kwetwaza kubi obubarukuba bali omu nyikara ezigumire. Eky’okubanza Daudi akakwatwa ekiniga. Hanyuma akatiina. (2 Samuiri 6:8, 9) Enkoragana ye ey’okwesiga Yahwe ekalengwa muno. Gunu nugwo omurundi nambere Daudi haihi yalemerwe kunagira Yahwe omugugu gwe obwatarahondiire ebiragiro bye. Obwire obumu, naitwe twesanga omu nyikara niyo emu? Twikara nitucwera Yahwe omusango obutuhikwaho ebizibu habw’okutahondera oburagirizi bwe?—Enfumo 19:3.
MAAYI 30–JUUNI 5
EBITURUKWEGA KURUGA OMU BAIBULI | 2 SAMUIRI 7-8
“Yahwe Akora Endagaano na Daudi”
w10-E 4/1 20 ¶3
‘Obukama Bwawe Buligumaho Ebiro Byona’
Yahwe akwatwaho habw’okugonza kwa Daudi okurukuruga ha mutima. N’asigikirra ha bunabbi hamu n’obwekambi bwa Daudi, Ruhanga akora ekiragaano na Daudi ngu aliimukya omuntu kuruga omu rulyo rwa Daudi orw’obukama ow’alirema ebiro n’ebiro. Nasani akagambira Daudi omurago gwa Ruhanga ati: “Enju yawe nobukama bwawe biragumahoga ebiro byona omu maiso gawe: ekitebe kyawe kiraikarahoga ebiro byona.” (Orukarra 16) Omu kiragaano kinu, nooha Omugwetwa ow’alirema ebiro n’ebiro?—Zabuli 89:20, 29, 34-36.
w10-E 4/1 20 ¶4
‘Obukama Bwawe Buligumaho Ebiro Byona’
Yesu owa Nazalesi akaba ali mwijukuru wa Daudi. Malaika obw’akaba n’aranga okuzaarwa kwa Yesu akagamba ati: “[Yahwe] Ruhanga alimuha ekitebe kya Daudi isenkuruwe. Kandi alirema enju ya Yakobo ebiro n’ebiro; kandi obukamabwe tibulihwaho.” (Luka 1:32, 33) Ekiragaano Yahwe ekiyakozere na Daudi kikahikirizibwa kurabira omuli Yesu. Nahabweki, abantu tibali nubo baakomere Yesu kulema, baitu kurabira omu kiragaano kya Ruhanga akaheebwa obusobozi bw’okulema ebiro n’ebiro. Leka twijuke ngu emirago ya Ruhanga tesobora kulema kuhikirra.—Isaya 55:10, 11.
w14-E 10/15 10 ¶14
Ba n’Okwikiriza Okugumire omu Bukama
14 Tekerezaaho Yahwe ekiyaraganiize Omukama Daudi owa Isaleri eya kara kurabira omu Kiragaano kya Daudi. (Soma 2 Samuiri 7:12, 16.) Yahwe akakora endagaano enu na Daudi omu kasumi Daudi akaba n’alema nk’omukama omu Yerusalemu, y’amuraganiza ngu Masiya akaba naija kuba mwijukuru we. (Luk. 1:30-33) Ekindi, Yahwe akongera yayoleka nambere Masiya yakurugire kandi yayoleka ngu omu ha baijukuru ba Daudi yakuhairwe ekitebe ky’Obukama obwa Masiya. (Ez. 21:25-27) Kurabira omuli Yesu, obukama bwa Daudi “buragumahoga ebiro n’ebiro.” Amananu gali, omwijukuru wa Daudi “[araikarahoga] ebiro byona, nekitebe kye nkizoba.” (Zab. 89:34-37) Obulemi bwa Masiya tibulisiisikara kandi ebintu ebibulikora biriikaraho ebiro n’ebiro!
Eby’Omuhendo Kuruga omu Baibuli
it-2-E 206 ¶2
Ebiro Ebya ha Mpero
Obunabbi bwa Baramu. Abaisaleri obubaali bali haihi kutaaha omu Nsi ey’Ekaba Eraganiziibwe, nabbi Baramu akagambira Baraka omukama wa Moabu ati: “Ija, nkumanyise abantu banu [Abaisaleri] ekibalikora abantu bawe omu biro ebya hanyuma. . . . Haliruga enyunyuzi omu Yakobo, kandi omuigo gwobukama guliimuka omu Isareri, gulitera ensonga za Moabu, nugutera hansi abana bona abokujagarra.” (Kubar 24:14-17) Omu kuhikirizibwa okw’okubanza okw’obunabbi bunu, “enyunyuzi” enu akaba ni Daudi, ayasingwire Abamoabu. (2Sam 8:2) Nahabweki, niturora ngu omu kuhikirizibwa kw’ekicweka kinu eky’obunabbi, ‘ebiro ebya hanyuma” bikatandika Daudi obuyafookere omukama. Nk’oku Daudi akaba ali kiituuru kya Yesu Omukama w’Obukama bwa Masiya, obunabbi bunu bwakukwasireho Yesu omu kasumi obwalisingura abanyanzigwa be.—Is 9:7; Zab 2:8, 9.
JUUNI 6-12
EBITURUKWEGA KURUGA OMU BAIBULI | 2 SAMUIRI 9-10
“Daudi Akooleka Okugonza Okutalekera”
w06-E 6/15 14 ¶6
Ego, Nosobora Kutunga Okusemererwa
Daudi akahandiika ati: “Ahebwa omugisa anyakutekereza owamasege.” Kandi akagumizaamu nagamba ati: “Mukama alimujuna omu biro byobujune. Mukama alimulinda, alimwomeeza, kandi uwe aliherwa omugisa.” (Zabuli 41:1, 2) Omulingo Daudi yayolekere okugonza hali Mefibosesi omulema kandi ow’akaba ali mutabani wa munywani we Yonasani, kiri kyokurorraho ekirungi ekirukwoleka entekereza eitusemeriire kuba nayo obukirukuhika h’ab’amaseege.—2 Samuiri 9:1-13.
w05-E 5/15 17 ¶12
Ebirukwega Kuruga omu Kitabu kya Samuiri ey’Okubanza
9:1, 6, 7. Daudi akahikiriza eky’akaba araganiize. Naitwe tusemeriire kukora kyona ekirukusoboka kuhikiriza ekiturukuba turaganiize.
w02-E 2/15 14 ¶10
Bakagumiisiriza Amahwa ag’Omu Mubiri Gwabo
10 Hanyuma y’emyaka kurabaho, habw’okugonza okw’akaba ainiire Yonasani, Omukama Daudi, akooleka Mefibosesi embabazi n’okugonza. Itaka lya Saulo lyona Daudi akalimuha kandi yakoma Ziba kulirolerra. Daudi akongera yagambira Mefibosesi ati: “Oralyaga ebyokulya ha meza yange obutosa.” (2 Samuiri 9:6-10) Hataroho kugurukyagurukya, embabazi za Daudi ziine kuba zahuumwize Mefibosesi kandi kyakeehya ha busaasi obw’akaba aine habw’olema bwe. Mali kinu nikitwegesa isomo erirungi. Naitwe twine kwoleka embabazi n’okugonza abo abaine ebizibu ebiri nk’ihwa omu mubiri.
Eby’Omuhendo Kuruga omu Baibuli
it-1-E 266
Omuleju
Omu bantu aba kara ab’omu Burugaizooba, otwaliremu n’Abaisaleri, omuleju kyali kintu ekyatwarwaga kuba ky’omuhendo, habwokuba kaabaga kokurorraho akarukwoleka ngu omuntu musaija w’ekitiinisa. Ruhanga akaha Abaisaleri ekiragiro ekirukutanga kumwa “embaju ezebireju,” kandi eri niryo isoke eriri hagati y’amatu n’amaiso, hamu na nambere omuleju gurukuhwerayo. (Lev 19:27; 21:5) Hataroho kugurukyagurukya kinu kyali kikorwa ekyakorwaga abakafiire omu kuramya kw’ebisuba.
JUUNI 13-19
EBITURUKWEGA KURUGA OMU BAIBULI | 2 SAMUIRI 11-12
“Otaikiriza Okwegomba Okubi Kukulema”
Nosobora Kuruga omu Mitego ya Sitaani!
10 Omururu gukaleetera Omukama Daudi kwebwa Yahwe eby’akaba amuhaire, otwaliiremu itungo, kuranganwa, hamu n’okusingura abanyanzigwa be baingi. Daudi habw’okusiima akakyetegereza ngu ebisembo bya Ruhanga “tibyakusoboire okubarwa!” (Zab. 40:5) Baitu haroho akasumi Daudi obuyayeberwe Yahwe eby’akaba amuhaire. Akaba atakyamarwa eby’akaba aine; akaba n’agonza ebirukukiraho. N’obukiraaba ngu Daudi akaba aine abakazi baingi, akaikiriza okwegomba okubi okwokuba na mukabandi kukura omu mutima gwe. Omukazi ogu akaba nuwe Basiseba, kandi iba akaba nuwe Uliya Omuhiti. Daudi habw’okwegonza wenka, akaterana na Basiseba kandi yatwara enda. Daudi ekiyakozere kikaba kibi muno, baitu hanyuma akakora n’ekibi ekindi ekirukukiraho. Akakora n’entekaniza ey’okwita Uliya! (2 Sam. 11:2-15) Manya Daudi akaba n’atekereza ki? Akatekereza ngu Yahwe akaba atarukurora eby’arukukora? Nobukiraaba ngu Daudi akaba aheeriize Yahwe kumara akasumi kaingi, akafooka w’omururu kandi kinu kyamurugiramu okubonabona kwingi. Baitu ekirungi, obwire bukahika, Daudi yaikiriza ensobi ye kandi yayegarukamu. Akasiima muno Yahwe habw’okumuganyira!—2 Sam. 12:7-13.
Habwaki Tusemeriire Kworobera Yahwe—Kandi omu Mulingo Ki?
15 Yahwe akakoma Daudi kwebembera eka ye hamu n’ihanga lyona erya Isaleri. Daudi akaba aine obusobozi bwingi habwokuba akaba ali mukama. Haroho obuyakozesaaga kubi obusobozi bunu n’akora ensobi ez’amaani. (2 Sam. 11:14, 15) Baitu Daudi akooleka ngu n’ayorobera Yahwe obuyaikirize kuhanwa. Akasaba Yahwe kuruga ha mutima kandi y’amugambira nk’oku akaba n’ayehurra. Kandi akalengaho muno kworobera obuhabuzi bwa Yahwe. (Zab. 51:1-4) Ekindi, akaba ali mwebundaazi muno n’aikiriza kuhaburwa abantu abandi otwaliremu n’abakazi. (1 Sam. 19:11, 12; 25:32, 33) Daudi atongere kugarukamu ensobi ez’akaba akozere kandi y’ayebembezaaga kuheereza Yahwe omu bwomeezi bwe.
Leka Ebiragiro n’Emisingi ya Ruhanga Bitendeke Omuntu Wawe ow’Omunda
7 Titusemeriire kubanza kuhikwaho ebizibu ebiruga omu kucwa ebiragiro bya Ruhanga nukwo twege ekirungi n’ekibi. Nitusobora kwegera ha nsobi ez’abandi baakozere omu busumi bwa kara. Ebyokurorraho binu bihandiikirwe omu Baibuli. Enfumo 1:5 nihagamba ngu: “Owamagezi ahurre, ayeyongere okwega.” Okwegesebwa kunu kuruga hali Ruhanga kandi nukwo okurukukirayo. Ekyokurorraho, tekerezaaho omulingo Daudi yabonaboine obuyajemiire Yahwe kandi yasiihana na Basiseba. (2 Samuiri 12:7-14) Obworasomaga ha bintu binu, oyekaguzege: ‘Daudi yakwetantaire ata ebizibu binu? Nyowe nakukozere ki omu nyikara nk’egi? Kakuba ntunga ekyohyo ky’okusiihana, ninsobora kwetwaza nka Daudi rundi nka Yusufu?’ (Okubanza 39:11-15) Kakuba tutekereza ha bizibu ebiruga omu kukora ekibi, nitwija kweyongera ‘kunoba ebibi.’
Eby’Obuhendo Kuruga omu Baibuli
it-1-E 590 ¶1
Daudi
Baitu Yahwe akaba n’arora byona ebyabaireho, kandi yayoleka amananu. Kakuba Yahwe yaikiriize abacwi b’emisango nubo bacwemu ensonga nibasigikirra ha Biragiro bya Musa, abasiisi boona bakaba basemeriire kwitwa, kandi omwana ow’obusiihani akaba naija kufeera munda ya nyina. (Bir 5:18; 22:22) Baitu Yahwe nuwe yayekwatiiremu ensonga kandi yagirra Daudi embabazi n’asigikirra ha Kiragaano ky’Obukama, (2Sam 7:11-16) kandi hataroho kugurukyagurukya habwokuba Daudi nauwe akaba ayolekere abandi embabazi (1Sam 24:4-7; lengesaniza na Yak 2:13) kandi habwokuba Ruhanga akakirora ngu abasiisi baali begarukiremu. (Zab 51:1-4) Baitu bakaba batasobora kuguruka ebifubiro byona. Kurabira omu nabbi Nasani, Yahwe akagamba ati: “Ndikuimukiza akabi omunju yawe wenka.”—2Sam 12:1-12.
JUUNI 20-26
EBITURUKWEGA KURUGA OMU BAIBULI | 2 SAMUIRI 13-14
“Okwegondeza kwa Amunoni Kukarugamu Akabi”
it-1-E 32
Abusalomu
Kwitwa kwa Amunoni. Oburungi bwa munyaanya Abusalomu arukwetwa Tamali bukaletera mukuru we omwojo kumwegomba. Amunoni akerwaza nukwo yasaba ngu bamusindikire Tamali omu nju ye kumucumbira, kandi hanyuma yamuhamba. Engonzi nyingi Amunoni ez’akaba ainiire Tamali zikahinduka zafooka enobi, kandi yaragira ngu baturukye aheeru Tamali bamunage ha muhanda. Tamali akatemura ekijwaro kye eky’oburambi ekyali nikyoleka ngu akaba ali muhara w’omukama kandi atakabyamaga n’omusaija, kandi hanyuma akatangatangana Abusalomu. Abusalomu abuyarozere ekyali kibaireho, aho naaho akagamba ngu kinu kiine kuba kikozerwe Amunoni, ekirukwoleka ngu akaba akirozere ngu mugenzi we n’ayegomba munyaanya. Abusalomu akagambira Tamali kuculeera n’okutajunaana Amunoni, kandi yamutwara omu ka ye yaikara nauwe.—2Sam 13:1-20.
Weyongere Kuba Muntu Arukwetanga
11 Baibuli eyongera ebazaaho ebyokurorraho by’abantu abaagwire omu mutego gw’okusiihana. Kandi n’etwoleka n’ebintu ebibi ebirugamu obutuba tutetangire. Obw’orayesanga omu nyikara nk’eya Kim, cumiitiriza ha kyokurorraho ky’omusigazi omudomadoma arukubazibwaho omu Enfumo esuura 7. Tekerezaaho n’eky’okurorraho kya Amunoni, n’ebizibu ebiyalesereho habw’engeso ze embi. (2 Samuiri 13:1, 2, 10-15, 28-32) Abazaire nibasobora kubazaaho ebyokurorraho binu omu kuramya kwabo okw’eka nukwo kikonyere abaana baabo kwega kwetanga n’okuba b’amagezi.
it-1-E 33 ¶1
Abusalomu
Hakarabaho emyaka ebiri. Obwire bw’okusara ebyoya by’entaama bukahika, omukoro ogw’okujaguza kandi Abusalomu akatekaniza obugenyi omu Baalihazora kilomita nka 22 (mailo 14) omu matemba ga Yerusalemu kandi akaraaliza batabani b’omukama hamu na Daudi. Ise obuyagambire ngu tarukusobora kubaho, Absalomu akamulemeraho ngu hakire asindike mutabani we ow’okubanza Amunoni nuwe abeho omu kiikaro kye. (Nfu 10:18) Ha bugenyi, Amunoni obw’akaba ‘asemeriirwe habw’amaarwa,’ Abusalomu akaragira abaheereza be bamwite. Abatabani b’omukama abandi bakagaruka Yerusalemu, kandi Abusalomu akairukira mwa isenkuru owa Busuli omu bukama bwa Gesura burugaizooba bw’Enyanja ya Galiraya. (2Sam 13:23-38) “Busitama” rundi “empirima” nabbi Nasaneri ey’akaba arangire ekaba etaahire omu “nju” ya Daudi kandi ekaba n’egenda kwikaramu obwomeezi bwe bwona.—2Sam 12:10.
Eby’Omuhendo Kuruga omu Baibuli
g04-E 12/22 8-9
Oburungi Oburukukirayo Obukuru
Baitu hati, tekerezaaho Abusalomu omu ha batabani ba Daudi. Akafooka musaija ow’atarukugonzebwa n’obukiraaba ngu akaba n’azooka kurungi. Baibuli emubazaaho eti: “Lero, omu Isareri yona hakaba hatarumu nomu asimbwa oburungi bwe okuingana na Abusalomu: okuruga ha [maara] gekigere okuhikya ha ruhorohozi rwomutwegwe tiharoho kamogo.” (2 Samuiri 14:25) Baitu, ebigendererwa bye ebitahikire bikamuletera kujeemera ise wenyini nukwo ayegarurre obukama. Ekindi, akabyama n’abazaana ba ise. Ekyarugiremu, Abusalomu akahikwaho ekiniga kya Ruhanga kandi yafa omu mulingo ogurukusaaliza muno.—2 Samuiri 15:10-14; 16:13-22; 17:14; 18:9, 15.
N’ohurra n’ogonza kunywana omuntu nka Abusalomu? Amananu gali nangwa. Niturora ngu akaba ali muntu ow’otasobora kweiriza haihi. Oburungi bwe obwa ha maiso butamutange kwehemba n’okuba mugobya, kandi butamutange kuhwerekerra. Omu Baibuli harumu ebyokurorraho bingi eby’abantu abaali baine emiringo emirungi kandi ab’amagezi baitu oburungi bwabo obwa ha maiso tiburukubazibwaho. Hataroho kugurukyagurukya, ekintu ekyali nikikirayo obukuru bwali burungi bwabo obw’omu mutima.
JUUNI 27–JULAAYI 3
EBITURUKWEGA KURUGA OMU BAIBULI | 2 SAMUIRI 15-17
“Abusalomu Akajeema Habw’Emyehembo”
it-1-E 860
Omwiruki Anyakwebembiire
Kuruga kara, gukaba guli mugenzo abairuki kwebembera ekigaali ky’omukama, kutekaniza n’okuranga ngu omukama naija hamu n’okumukonyera omu miringo endi. (1Sam 8:11) Abusalomu na Adoniya obubaajemere, bakakora ekintu nikyo kimu bateekaho abasaija 50 kwirukira omu maiso g’ebigaali byabo nukwo bongere ha kitiinisa kyabo.—2Sam 15:1; 1Bakam 1:5; rora RUNNERS.
w12-E 7/15 13 ¶5
Heereza Ruhanga ow’Obugabe
5 Omu Baibuli harumu ebyokurorraho bingi eby’abo abaaletiire abandi kukora ebitahikire. Omu hali bo nuwe Abusalomu mutabani w’Omukama Daudi. Akaba ali musaija ow’arukuzooka kurungi muno. Baitu hanyuma y’akasumi, kusisanaho na Sitaani, akaikiriza ebigendererwa bye eby’omururu byaijura omu mutima gwe yatandika kwegomba obukama bwa ise obw’akaba atahairwe. Obw’akaba n’alengaho kutwara obukama, akefoora ngu n’afaaho muno Abaisaleri bagenzi be kandi omu mulingo ogw’amagezi akabagambira ngu abacwi b’emisango ab’omukama baali batarukubafaaho. Ego, nka Diabolo omu rugonjo rwa Adeni, Abusalomu akefoora nk’owarukugonza kukonyera abandi baitu ha murundi nugwo gumu n’abazaaho kubi ise.—2 Sam. 15:1-5.
it-1-E 1083-1084
Heburoni
Hanyuma y’emyaka nke kurabaho, Abusalomu mutabani wa Daudi akagaruka Heburoni kandi yakora entekaniza ez’okwihaho ise obukama baitu zitahike ha businguzi. (2Sam 15:7-10) N’asobora kuba yasigikiriire ha byafaayo bya Heburoni nk’oku rukaba ruli rubuga rwa Yuda orukuru, rundi ngu habwokuba nurwo rubuga yazaalirwemu, kandi nuho asigikirre kwiha ise ha bukama. Hanyuma, omwijukuru wa Daudi, Omukama Rehoboamu akombeka buhyaka Heburoni. (2Byom 11:5-10) Hanyuma y’Abababuroni kuhwerekereza Yuda, n’Abayudaaya kuruga omu bunyagwa, bamu ha Bayudaaya abaagarukire bakaikara omu Heburoni (Kiryasi-araba).—Neh 11:25.
Eby’Omuhendo Kuruga omu Baibuli
Omanyire Amananu Gonyini?
11 Haroho akasumi nambere naitwe tusobora kwehurra kubi habwokuba abantu bajanjaize ebintu ebirukutukwataho baitu bataburamu n’ebisuba. Kinu nikyo kyahikire hali Mefibosesi. Omukama Daudi akaheereza Mefibosesi itaka lyona elya isenkuru Saulo. (2 Samuiri 9:6, 7) Baitu hanyuma Daudi yahurra ebigambo ebitali birungi ebirukukwata hali Mefibosesi. Atabanze kwetegereza ebigambo binu obu garaaba gali mananu, baitu yaiho Mefibosesi ebintu byona ebyakaba amuhaire. (2 Samuiri 16:1-4) Daudi akakyetegereza ngu akaba akozere ensobi, hanyuma y’okubaza na Mefibosesi. Akongera yagarurra Mefib osesi ebimu ha bintu ebyakaba amwakire. (2 Samuiri 19:24-29) Kakuba Daudi yatwaire obwire kubanza kwetegereza ebiyahuliire obugaraaba gali mananu omu kiikaro kyokwikiririza omu makuru agatahikire, Mefibosesi yakubaire atahikirweho obutali bwinganiza bunu.