Ruhanga Akahanga Iguru n’Ensi

Yahwe nuwe Ruhanga ayatuhangire. Byona ebi turora n’ebi tutarora nuwe yabihangire. Akabanza kuhanga abamaraika baingi muno atakahangire ebintu ebi turora. Omanyire abamaraika nibo baha? Abamaraika bihangwa ebi Ruhanga yahangire ebirukumusisana. Titusobora kubarora nk’oku tutasobora kurora Ruhanga. Haroho maraika ou Ruhanga yabandize kuhanga yamufoora mukonyezi we. Maraika ogu akakonyera Yahwe omu kuhanga enyunyuzi, hamu n’ebintu ebindi. Kandi ensi ekahangwa esemiire muno.

Hanyuma, Yahwe akatekaniza kurungi ensi nukwo esobole kwikarwamu ebisoro n’abantu. Akakora izooba nukwo lihe ensi ekyererezi. Akahanga ensozi, enyanja, hamu n’ebisaaru.

Kiki ekyahondiireho? Yahwe akagamba: ‘Ensi emere ebimera, ebinyansi, n’emiti.’ Emiti ekatandika kwana ebijuma, ebinyansi byamera, ebyakyo nabyo byamera. Hanyuma Yahwe akahanga ebihangwa ebihurruka, ebyekurra, hamu n’ebigendera omu maizi. Akahanga ebisoro ebitaito nk’obume, hamu n’ebisoro ebikooto nk’enjojo. Kisoro ki eky’okira kugonza?

Hanyuma, Yahwe akagambira maraika ow’okubanza ati: ‘Tukole omuntu.’ Abantu bakubaire nibahukana n’ebisoro. Bakusoboire kukora ebintu ebihyaka, kubaza, kuseka, hamu n’okusaba. Bakaba baine kurolerra ensi hamu n’ebisoro. Omanyire omusaija Ruhanga ou yabandize kuhanga? Katurole.