Kugonza Kutukonyera Kugumira Enobi

1. Kusigikirra ha Matayo 24:9, habwaki tutasemeriire kuhunirra ensi obw’etunoba?

YAHWE akatuhanga n’ekyetaago eky’okugonza abantu abandi, hamu n’okugonza nabo batugonze. Nahabweki omuntu obw’atunoba, twehurra kubi muno kandi nitusobora n’okutiina. Ekyokurorraho, munyaanya itwe arukwetwa Georgina, kuruga omu Bulaaya nagamba ati: “Obunkaba nyine emyaka 14, nyina nyowe akaanoba habw’okuheereza Yahwe. Nkasalirwa muno, natunga amasu, kandi nkatandika n’okutekereza ngu obundi tindi muntu murungi.”b Ow’oruganda arukwetwa Danylo akahandiika ati: “Abaserikale obubantiire, banjuma, kandi bantinisiriza habw’okuba omu h’Abakaiso ba Yahwe, nkahurra ntinire muno kandi nswaire.” Twehurra kubi abantu obubatunoba, baitu eki tikituhuniiriza. Yesu akaranga ngu nibaija kutunoba.​—Soma Matayo 24:9.

2-3. Habwaki abahondezi ba Yesu banobwa?

² Ensi n’enoba abahondezi ba Yesu. Habwaki? Habwokuba nka Yesu, tituli b’ensi. (Yoh. 15:17-19) Nahabweki, n’obukiraaba ngu tutekamu gavumenti z’abantu ekitiinisa, titwejumbira omu by’obulemi, tituterra bendera etamamu, kandi tituzina ekizina ky’ihanga. Turamya Yahwe wenka. Tusagika ngu Yahwe nuwe asemeriire kulema abantu​—baitu Sitaani hamu ‘n’oruzaro’ rwe bagamba ngu Ruhanga tali nuwe asemeriire kulema. (Kub. 3:1-5, 15) Tutebeza ngu Obukama bwa Ruhanga nubwo bwonka buramaraho ebizibu by’abantu, kandi ngu omu kasumi akatali ka hara, nibwija kuhwerekereza abo boona ababuhakaniza. (Dan. 2:44; Kus. 19:19-21) Obutumwa obu makuru marungi hali abaculeezi, baitu makuru mabi hali ababi.​—Zab. 37:10, 11.

³ Ensonga endi habwaki batunoba eri ngu habwokuba tworobera endengo za Ruhanga ez’okuhiikirra. Endengo zinu nizahukanira kimu n’engeso embi ez’abantu b’ensi. Ekyokurorraho abantu baingi basagikira kimu engeso embi ez’obusiihani ezirukusisana n’ezi ezaletiire Ruhanga kuhwerekereza Sodomu na Gomora! (Yud. 7) Habwokuba tworobera endengo za Baibuli ezirukukwata ha bikorwa ebi, abantu baingi batusekereza kandi bagamba ngu ebiragiro byaitu bihinguraine!​—1 Pet. 4:3, 4.

4. Miringo ki ey’etukonyera kugumiisiriza abantu obubatunoba?

⁴ Kiki ekisobora kutukonyera kugumiisiriza abantu obubatunoba n’obubatujuma? Nitwetaaga kuba n’okwikiriza okugumire ngu Yahwe naija kutukonyera. Nk’engabu, okwikiriza kwaitu nikusobora “okuraza emisogi yona eyomurro eyomubi.” (Bef. 6:16) Baitu okwikiriza kwonka tikurukumara. Nitwetaaga n’okugonza. Habwaki? Habwokuba okugonza “tikubihirwa.” Kugumiisiriza ebintu byona ebirukusaaliza. (1Kol. 13:4-7, 13) Hati leka turole omulingo kugonza Yahwe, okugonza Abakristaayo bagenzi baitu, hamu n’okugonza abanyanzigwa baitu, kusobora kutukonyera kugumiisiriza enobi.

KUGONZA YAHWE KUTUKONYERA KUGUMIRA ENOBI

5. Okugonza Yesu okw’akaba ainiire ise kukamukonyera kukora ki?

⁵ Omu itumbi abanyanzigwa ba Yesu obubakaba batakamwisire, akagambira abahondezi be abesigwa ati: “Ningonza Isenyowe, [nahabweki] nka Isenyowe okuyandagiire, nukwo nkora nti.” (Yoh. 14:31) Okugonza Yesu okw’akaba ainiire Yahwe kukamukonyera kuraba omu birengo ebikaba bimulindiriire. Okugonza okutwiniire Yahwe naitwe nikusobora kutukonyera omu mulingo nugwo gumu.

6. Abaheereza ba Yahwe behurra bata ha kugumira enobo y’ensi?

⁶ Kugonza Yahwe kwikaire nikukonyera abaheereza be kugumira okuhiganizibwa. Eky’okurorraho, kooti enkuru ey’Abayudaaya obuyaragiire abakwenda kuleka kutebeza, okugonza Ruhanga kukabaletera “okuhurra Ruhanga okukira abantu.” (Eng. 5:29; 1 Yoh. 5:3) Okugonza nk’oku kukonyire n’ab’oruganda baingi kasumi kanu abarukuhiganizibwa gavumenti ez’amaani kandi ezitaine mbabazi. Ensi obw’etunoba, tituhwamu amaani baitu tutunga okusemererwa.​—Eng. 5:41; Bar. 5:3-5.

7. Tusemeriire kwetwaza tuta abayabuzaale baitu obubatuhakaniza?

⁷ Kuhiganizibwa abanyabuzaale baitu kiri kimu ha bintu ebigumire muno kugumiisiriza. Abanyabuzaale baitu abamu obubakyetegereza ngu nitugonza kwega hali Yahwe, nibasobora kutekereza ngu tuhabisiibwe. Abandi nibasobora kutekereza ngu tugwire iraru. (Lengesaniza Marako 3:21) Nibasobora n’okutukora kubi rundi kutugambira ebigambo ebirukusaaliza. Kuhakanizibwa kunu tikusemeriire kutuhuniiriza, Yesu akagamba ati: “Nabanyanzigwa bomuntu [baliba] bomukaye.” (Mat. 10:36) Baitu abanyabuzaale baitu n’obubatutwaza kubi, titubatwaza nk’abanyanzigwa baitu. Obutweyongera kugonza Yahwe, tweyongera n’okugonza abantu abandi. (Mat. 22:37-39) Baitu titulireka kworobera ebiragiro hamu n’emisingi ey’omu Baibuli kusobora kusemeza abantu.

8-9. Kiki ekyakonyire munyaanya itwe omu kwikara ali mwesigwa n’obukiraaba ngu akahiganizibwa muno?

⁸ Georgina outusangirwe tubalizeeho, akasobora kwikara ali mwesigwa n’obukiraaba ngu nyina akamuhakaniza muno. Georgina n’asoborra ati: “Nyowe hamu na nyina nyowe tukatandika kwega Baibuli n’Abakaiso ba Yahwe. Baitu hanyuma y’emyezi mukaaga obunagondeze kugenda omu nsorrokano, nyina nyowe akatandika kumpakaniza. Nk’akizoora ngu akaba n’akoragana n’abantu abaali becwireho ekitebe kandi yaikaraga nangambira ebigambo byabo ebitahikire obuyabaga n’abaza nanyowe. Yanjumaga, ansika isoke, aniga, kandi anaga n’ebitabu byange. Obu nahikize emyaka 15, nk’abatizibwa. Nyina nyowe akalengaho kuntanga kuheereza Yahwe kurabira omu kuntwara omu ka nambere balindiraga abaana abajeemu, abamu bakozesaaga ebitokooza bwongo kandi abandi baali bacwi b’ebiragiro. Nikisobora kukugumira muno kugumiisiriza okuhakanizibwa, kakuba omuntu ow’asemeriire kukugonza n’okukufaaho nuwe aba n’akuhakaniza.”

⁹ Kiki eky’akonyire Georgina kugumiisiriza? Nagamba ati: “Ekiro nyina nyowe yanyehindukiriiremu, nubwo nkaba nakamara kusoma Baibuli yoona. Hati nkaba ninkigumiza kimu ngu nzoire amananu kandi nkaba nimpurra ndi haihi muno na Yahwe. Namusabaga emirundi nyingi kandi yampurraga. Obunkaba ninyikara omu ka egi, omu ha banyaanya itwe akandaliza omu ka ye kandi twasoma hamu Ekigambo kya Ruhanga. Omu kasumi ako ab’oruganda na banyaanya itwe bakangarramu muno amaani. Bakanfoora omu h’abanyabuzaale baabo. Mali nk’akirora ngu Yahwe w’amaani muno kukira abarukutuhakaniza n’obubarukuba bali bantu ba mulingo ki.”

10. Kintu ekiturukugumya ngu Yahwe naija kwikara natukorra?

¹⁰ Omukwenda Paulo akahandiika ati busaho kintu kyona ekisobora “okubaganiza itwe omu kugonza kwa Ruhanga okuli omu Kristo Yesu Mukama waitu.” (Bar. 8:38, 39) N’obukiraaba ngu nitusobora kubonabona habw’akasumi, Yahwe naija kwikara ha rubaju rwaitu natuhuumuza kandi natugarramu amaani. Kandi nk’oku ekyokurorraho kya Georgina kirukwoleka, Yahwe akozesa ab’oruganda na banyaanya itwe omu kitebe kutukonyera.

KUGONZA ABAKRISTAAYO BAGENZI BAITU KITUKONYERA KUGUMIRA ENOBI

11. Okugonza Yesu yabalizeeho omu Yohana 15:12, 13 kwali nikugenda kukonyera kuta abegeswa be? Baazaaho ekyokurorraho.

¹¹ Omu itumbi Yesu atakafiire, akaijukya abegeswa be kugonzangana. (Soma Yohana 15:12, 13.) Akaba akimanyire ngu okugonza okw’okwefeereza nikwija kubakonyera kwikara omu bumu hamu n’okugumira enobi. Tekerezaaho ekyokurorraho eky’ekitebe eky’omu Sesalonika. Kurugira kimu omu kasumi kyatandikirweho, Abakristaayo omu kitebe eki bakahiganizibwa. Baitu Abakristaayo omu kitebe eki bakatekaho ekyokurorraho ekirungi eky’obwesigwa hamu n’okugonza. (1 Bas. 1:3, 6,7) Paulo akabekambisa kugumizaamu nibooleka okugonza kandi “okweyongera kukikora ha rulengo orukukiraho.” (1 Bas. 4:9, 10, NW) Okugonza kwakubaletiire kuhumuza abenuubire hamu n’okusagika abaceke. (1 Bas. 5:14) Bakahondera oburagirizi bwa Paulo habwokuba omu bbaruha ye eyakabiri eiyahandiikire nka hanyuma y’omwaka gumu Paulo akabagambira ati: ‘Okugonzangana kwanyu inywenka nainyweka nukusaga.’ (2 Bas. 1:3-5) Okugonza kwabo kukabakonyera kugumira ebizibu hamu n’okuhiganizibwa.

12. Omu kasumi k’obulemu, ab’oruganda na banyaanya itwe omu ihanga erimu bakoolekangana bata okugonza?

¹² Tekerezaaho ekyokurorraho kya Danylo, outusangirwe tubalizeeho hamu na mukazi we. Obulemu omu ihanga lyabo obubwahikire omu tawuni yabo, bakagumizaamu nibagenda omu nsorrokano, nibatebeza nk’oku bakaba nibasobora, hamu n’okubagana eby’okulya ebibaali baine n’Abakristaayo bagenzi baabo. Hanyuma, kiro kimu abamahe abaali baine emundu bakaija omu ka ya Danylo. Danylo nagamba ati: “Bakandagira ngu nyehakane okwikiriza kwange, obunayangire bakanteera kandi basisana nk’abarukunteera amasasi baitu bateera eruguru y’omutwe gwange. Obubakaba batakagenzere, bakantinisiriza ngu nibaija kugaruka kandi bahambe mukazi wange. Baitu ab’oruganda bakanguha batuteeka ha gaali y’omwika ey’ekaba n’egenda omu tawuni endi. Tindyebwa okugonza ab’oruganda abo abagonzebwa okubatwolekere. Obutwahikire omu tawuni endi, ab’oruganda omu kiikaro eki bakatuha eby’okulya kandi bankonyera kutunga omulimo hamu n’enju! Ekyarugiremu tukasobora kutangirra Abakaiso ba Yahwe abandi abaali barugire omu kiikaro ekirumu obulemu.” Ebyokurorraho nk’ebi nibyoleka ngu okugonza okutwiniirengana nk’Abakristaayo nikusobora kutukonyera kugumira enobi.

KUGONZA ABANYANZIGWA BAITU KITUKONYERA KUGUMIRA ENOBI

13. Omwoyo ogurukwera gutukonyera guta kugumizaamu nituheereza Yahwe abantu n’obubatunoba?

¹³ Yesu akagambira abahondezi be kugonza abanyanzigwa baabo. (Mat. 5:44, 45) N’otekereza eki kyanguhire kukora? Nangwa tikyangihira n’akake! Baitu nikisoboka habw’obukonyezi obw’omwoyo ogurukwera. Ekyana eky’omwoyo ogurukwera nikitwarramu okugonza, okugumiisiriza, embabazi, obuculeezi, hamu n’okwetanga. (Bag. 5:22, 23) Emiringo enu etukonyera kugumira enobi. Abantu baingi balekere kutuhakaniza habwokuba baiba bo, bakazi baabo, abaana baabo, rundi abataahi boolekere emiringo egi. Kandi batuhakanizaaga baingi bafookere Abakristaayo bagenzi baitu abagonzebwa. Nahabweki obw’okyetegereza ngu nikikugumira kugonza abo abarukukunoba habwokuba n’oheereza Yahwe, musabe akuhe omwoyo ogurukwera. (Luk. 11:13) Kandi okigumize kimu ngu kworobera Ruhanga nikyo ekintu ekirukukirayo oburungi ekitusobora kukora.​—Nfu. 3:5-7.

14-15. Ekyahandiikirwe ekiri omu Abarumi 12:17-21 kikakonyera kita Yasmeen kwoleka iba okugonza n’obukiraaba ngu akamuhakaniza muno?

¹⁴ Tekerezaaho ekyokurorraho kya munyaanya itwe Yasmeen. Obuyafookere omu h’Abakaiso ba Yahwe, iba akatekereza ngu bakaba bamuhabisize kandi akalengaho kumutanga kuheereza Ruhanga. Akamujuma kandi yayekambisa abanyabuzaale, omwebembezi w’ediini, hamu n’omufumu kumutiinisiriza kandi n’okumuhangirra ngu n’alengaho kwahukaniza eka yabo. Iba akajuma n’ab’oruganda abakaba bali omu rusorrokano! Emirundi erukukira obwingi Yasmeen yarraga habw’okutwazibwa kubi.

¹⁵ Obuyagendaga ha Kyombeko ky’Obukama, ab’oruganda na banyaanya itwe bamuhumuzaaga kandi bamugarramu amaani. Abagurusi b’ekitebe bakamwekambisa kuteeka omu nkora obuhabuzi obuli omu Abarumi 12:17-21. (Soma.) Yasmeen n’agamba ati: “Kyali kigumire kukikora, baitu nkasaba Yahwe kunkonyera kandi nakora kyona ekindukusobora kuhondera obuhabuzi bwa Baibuli. Nahabweki iba nyowe obuyasesaga itaka omu kicumbiro akigenderiire nakiyonjaaga. Obuyanjumaga, namugarukamuga kurungi. Kandi obuyarwaraga, namufaahoga.”

16-17. Kiki ekyorukwega kuruga omu kyokurorraho kya Yasmeen?

¹⁶ Yasmeen akatunga empeera habw’okwoleka iba okugonza. Nagamba ati: “Iba nyowe akeyongera kunyesiga habwokuba akaba akimanyire ngu naikaraga nimubaliza amananu. Akatandika kumpuliiriza omu mulingo gw’ekitiinisa obutwabazahoga ediini kandi akaikiriza n’okuletaho obusinge omu ka. Hati anyekambisa kugenda omu nsorrokano z’ekitebe. Enkoragana yange na iba nyowe ekeyongera kusemera kandi eka yaitu erumu obusinge. Nyine okunihira ngu iba nyowe naija kwikiriza kwega amananu kandi anyeteranizeeho omu kuheereza Yahwe.”

¹⁷ Ekyokurorraho kya Yasmeen nikyoleka ngu okugonza “[nikugumira] byona, . . . nukunihira byona, nukugumisiriza byona.” (1 Kol. 13:4, 7) Enobi n’esobora kuba y’amaani kandi n’esaliza, baitu okugonza nikugikira amaani. Okugonza kusingura emitima. Kandi kusemeza omutima gwa Yahwe. Baitu abarukutuhakaniza n’obubagumizaamu kutunoba, nitusobora kwikara twine okusemererwa. Omu mulingo ki?

TWIKARA TUSEMERIIRWE N’OBUBATUNOBA

18. Habwaki nitusobora kutunga okusemererwa abantu n’obubatunoba?

¹⁸ Yesu akagamba ati: “[Mwine okusemererwa] abantu obubabanoba.” (Luk. 6:22) Titugonza abantu batunobe. Kandi tikitusemeza abantu obubatuhiganiza habw’okwikiriza kwaitu. Hati habwaki nitusobora kusemererwa obubatunoba? Tekerezaaho ensonga zinu isatu. Ey’okubanza, obutugumiisiriza, tusemeza Yahwe. (1 Pet. 4:13, 14) Eyakabiri, okwiririza kwaitu kugarurwa buhyaka kandi kweyongera kuguma. (1 Pet. 1:7) Kandi eyakasatu, nitwija kutunga empeera ey’etasobora kugurwa, obu nubwo obwomeezi obutahwaho.​—Bar. 2:6, 7.

19. Habwaki abakwenda baali basemeriirwe hanyuma y’okuteerwa emiigo?

¹⁹ Hanyuma y’akasumi kake Yesu amazire okuhumbuuka, abakwenda bakatunga okusemererwa Yesu okw’akaba abalizeeho. Hanyuma y’okubateera emiigo hamu n’okubaragira kuleka kutebeza, abakwenda bakasemererwa. Habwaki? “Obwokutekerezebwa basemeriire okugizibwa ensoni habwibara [lya Yesu].” (Eng. 5:40-42) Okugonza okubaali bainiire Mukama wabo kwali kw’amaani muno kukira kutiina enobi y’abanyanzigwa baabo. Bakooleka okugonza kwabo kurabira omu kugumizaamu nibatebeza amakuru amarungi. Ab’oruganda baingi kasumi kanu bagumizaamu kuheereza Yahwe n’obukiraaba ngu baine ebizibu. Bakimanyire ngu Yahwe talyebwa omulimo gwabo hamu n’okugonza okubayolekere habw’ibara lye.​—Baheb. 6:10.

20. Kiki ekiturukwija kubazaaho omu kicweka ekirukwongeraho?

²⁰ Obusinge bunu obuburaaba bukyaroho, ensi niija kugumizaamu n’etunoba. (Yoh. 15:19) Baitu titusemeriire kutiina. Nk’oku turarora omu kicweka ekirukuhonderaho, Yahwe ‘aligumya kandi alinde’ abaheereza be abesigwa. (2 Bas. 3:3) Nahabweki leka tugumizeemu kugonza Yahwe, ab’oruganda na banyaanya itwe, hamu n’okugonza abanyanzigwa baitu. Obuturahondera oburagirizi bunu, nitwija kugumizaamu tuli omu bumu, tugumire omu by’omwoyo, nituhaisa Yahwe ekitiinisa, kandi nitwija kukyoleka ngu okugonza kw’amaani kukira enobi.