Ebikaguzo Kuruga omu Basomi Baitu

Omukwenda Paulo akaba namanyisa ki obuyayeyesere omwana ayazairwe atakahikire? (1 Abakolinso 15:8)

Kusigikirra ha 1 Abakolinso 15:8, Paulo akagamba ati: “Enyuma ya bona akarorwa nyowe, nkomwana [ayazairwe] atakahikire.” Kara twasoborraga ngu, Paulo nasobora kuba akaba nasoborra ebiyarabiremu obuyatungire okwolekwa kwa Yesu ali omu kitiinisa kye omu iguru. Kikasisana oti rundi akaba ahairwe ekitiinisa eky’okuzaarwa rundi kuhumbuurwa kara nk’ekihangirwe eky’omwoyo, okuhumbuuka okwakubaireho emyaka nyingi muno omu maiso. Baitu hanyuma y’okwongera kwekebiija ebirukukwata ha rukarra runu, kyeyolekiire kimu ngu nitwetaaga kuhindura omulingo turusoborra.

Ky’amananu ngu hanu Paulo akaba nabazaaho kiki ekyamuhikireho ha kuhindurwa kwe kufooka Mukristaayo. Baitu akaba namanyisa ki obuyagambire ngu akazarwa “nkomwana atahikire”? Nikisobora kumanyisa ebintu bingi.

Okuhindurwa kwe kukaba okwa bwangu bwangu kandi kukamuhinguranaho. Omwana kuzaarwa atakahikire kikira kubaho omu kasumi akatarukunihirwa. Saulo (ayahikire yamanywa nka Paulo) obwakaba nagenda Damasiko kuhiganiza Abakristaayo, akaba atarukunihira kurora okwoleka kwa Yesu ow’akaba ahumbuukire. Okuhinduka kwa Paulo kukamuhuniiriza kandi kwahuniiriza n’Abakristaayo abaakaba nagenda kuhiganiza omu rubuga oru. Ekindi, ekyamuhikireho kikamuhinguranaho muno ekyamurugiiremu kufa n’amaiso habw’akacu kake.​—Eng. 9:1-9, 17-19.

Akahindurwa omu kasumi nambere omuntu wena akaba atarukukinihira. Ekigambo eky’Oruyonaani ekihindurwa “owazairwe atakahikire” nikisobora n’okumanyisa “owazairwe omu kaire akabi.” Empindura eya Jerusalem Bible hiyo n’egamba eti: “Kikasisana oti rundi nkazaarwa hataroho omuntu wena arukukinihira.” Akaire nambere Paulo yahinduliirwe, Yesu akaba amazire ira kugaruka omu iguru. Kwahukanaho n’abantu Paulo abayabalizeeho omu nkarra ez’enyuma, uwe atarole Yesu ahumbuukire kandi atakagenzere omu iguru. (1 Kol. 15:4-8) Yesu kubonekera Paulo atarukukinihira, kikaha Paulo omugisa ogw’okumurora, n’obukiraaba ngu kikazooka nk’ekyabaireho omu “kasumi akatahikire.”

Akaba nayebazaaho omu mulingo ogw’obwebundaazi. Kusigikirra h’abakugu abamu, ebigambo Paulo ebiyakozeseze hanu nibisobora kuba biine amakuru ag’okudibya. Eki obukiraaba nikyo Paulo akaba natekerezaaho, akaba nayoleka ngu tasemeriire kutunga omugisa oguyahairwe. Amananu gali, akagumizaamu yagamba ati: “Ninyowe muto owabakwenda, atasemeriire okwetwa omukwenda, baitu nkahiiga ekanisa ya Ruhanga. Baitu obwembabazi za Ruhanga nkokundi nukwo ndi.”​—1 Kol. 15:9, 10.

Nahabweki, nikizooka ngu Paulo n’asobora kuba akaba nabazaaho akasumi akaakaba atarukunihira Yesu kumweyolekeramu, rundi habw’ensonga ngu akaba atasemeriire kutunga okwoleka okurungi nk’oku. Kyona Paulo ekyakaba namanyisa, ekyamuhikireho eki akakitwara nk’ekintu ekikuru muno omu bwomeezi bwe. Kikamugumiza kimu ngu Yesu akaba ahumbwirwe kuruga omu bafu. Niyo ensonga habwaki yakiraga kubazaaho ekintu kinu ekyamuhikireho atarukukinihira, obuyabaga natebeza abandi ha kuhumbuuka kwa Yesu.​—Eng. 22:6-11; 26:13-18.