Eryato Lyacwekacwekera Ha Kizinga

DORA! Eryato litungire obuzibu! Licwekeremu ebicwekacweka! Norora abantu abagwire omumaizi? Abamu bahikire ha Musa. Ogu tali Paulo? Leka turole ekimubaireho.

Ijuka, Paulo akamara emyaka ebiri nk’omunyankomo omu Kaisaliya. Hanyuma, uwe n’abanyankomo abandi bakabateeka omuryato kubatwara Rumi. Obu babaire nibaraba haihi n’ekizinga ekya Kerete, ihunga ly’amaani lyabatera. Omuyaga gukaba gw’amaani gwabalemesa kuterekereza eryato. Kandi baali batarukusobora kurora izooba nyamusana rundi enyunyuzi obwire bw’ekiro. Hanyuma y’ebiro bingi, abo abakaba bali omuryato bakahwamu okunihira kw’okukizibwa.

Hanyuma Paulo akemerra yabagambira ati: ‘Busaho nomu arafeerwa obwomezi bwe; eryato niryo lyonka erirasiisikara. Omwitumbi, maraika wa Ruhanga aiziire yangambira ati: “Paulo! Otatiina noija kwemerra omu maiso ga Kaisali omulemi wa Rumi, kandi Ruhanga naija kujuna abo boona aboinabo.”’

Mwitumbi ery’ekiro kya 14 hanyuma y’ihunga, abalimba baketegereza ngu amaizi gakehere. Habw’okutiina kutomera emyandara omu mwirima, bakanaga enanga. Ekiro ekyakurasireho, barora omusa. Nukwo bacwamu kutwara eryato ha mwogo.

Obu babaire bali haihi kuhika ha mwogo, nubwo eryato ryatomiire omukungu gw’omusenyu nukwo kutobera. Ebigonzi nukwo kutandika kulitera, likacwekacwekamu. Omukuru w’ekihanda nukwo kugamba ati: ‘Abo boona abarukusobora kuziha, mugwe munyanja, muzihe muhike ha Musa. Abandi mubakurate, kandi mukwatirre ha bicweka by’eryato.’ Kandi ekyo nikyo bakora. Mumulingo gunu abantu boona 276 abaali muryato nukwo basobora kuhika ha Musa kurungi, nkoku maraika yaraganisize.

Ekizinga kinu nikyetwa Merita. Abantu hanu nab’ekisa muno, kandi bayamba muno boona abakaba bali muryato. Obwire obu bwasemiire, Paulo atekebwa muryato erindi okutwarwa Rumi.