Omulingo Ogu Turukusobora Kwomera Ebiro Byoona

NOMANYA kiki akaisiki hamu n’abanywani bako eki barukusoma? Ego, nikyo kitabu kinu eky’orukusoma. Ekitabu Kyange eky’Enganikyo eza Baibuli. Nibasoma oruganikyo runu orworukusoma —“Omulingo Ogu Turukusoboramu Kwomera Ebiro Byona.”

Nomanya eki barukwegaho? Okubanza, ngu twine kumanya hali Yahwe n’omwana we Yesu Kristo obuturaba nitugonza kwomera ebiro byona. Baibuli negamba eti: ‘Gunu nugwo omulingo ogworukusoboramu kwomera ebiro byoona. Yegera kimu ebirukukwata hali Ruhanga ow’amananu, n’Omwana we Yesu Kristo, ou yatumire omu nsi.’

Nitusobora tuta kumanya ebirukukwata ahali Yahwe Ruhanga na Yesu omwana we? Omulingo gumu nukwo okusoma Ekitabu Kyange eky’Enganikyo eza Baibuli kuruga aha kubanza kuhika hampero. Nikigamba bingi hali Yahwe na Yesu, tinukwo? Kandi nikigamba ha bintu bingi ebi bakozire n’ebyo ebi barukwija kukora. Baitu tusemerire kukora kikooto nokukora ekirikukiraho ha kusoma busoma ekitabo kinu.

Norora ekitabu ekindi ekiri hansi? Egyo niyo Baibuli. Tunga omuntu akusomeremu ebicweka eby’omu Baibuli nambere enganikyo ez’omu kitabu kinu zihirwe. Baibuli netuha okumanya kwonyini okuratukonyera kuhereza Yahwe omu mulingo oguhikire n’okutunga obwomezi obutahwaho. Nahabwekyo gifoole ngeso yaawe okusoma Baibuli butoosa.

Baitu okumanya hali Yahwe Ruhanga na Yesu Kristo byonka tibirukumara. Nitusobora kumanya bingi muno ha nyegesa zabu baitu nitutatunga bwomezi obutahwaho. Nomanya kiki ekindi ekirukwetagisa?

Nitwetaga kukorra ha bintu ebitwegere. Noijuka Yuda Isekalyota? Akaba ali omu h’abakwenda 12 Yesu abayakomere. Yuda akaba namanya bingi muno hali Yahwe na Yesu. Baitu kiki ekyamuhikireho? Hanyuma akafooka w’omururu yagobeza Yesu hali abanyanzigwa be habw’ebicweka 30 eby’efeeza. Nahabwekyo Yuda tarukwija kutunga obwomezi obutahwaho.

Noijuka Gehazi, omusaija ou twayegereho omu Ruganikyo 69? Akagonza engoye hamu n’esente ebikaba bitali bye. Akabiha ebisuba nukwo abitunge. Yahwe akamufubira. Nukwo naija kutufubira kakuba tutorobera ebiragiro bye.

Baitu haroho abantu baingi abarungi ababaire nibahereza Yahwe n’obwesigwa. Twakugondeze kuba nkabo. tinukwo? Samwiri omuto akaba kyokurorraho ekirungi ky’okuhondera. Ijuka nk’oku twarozere omu Ruganikyo 55. Akaba ali w’emyaka ena rundi etaano obu yatandikire kuheereza Yahwe muhema. Oteralikirra ha bw’obuto bwawe. Toli muto muno kuheereza Yahwe.

Mali, omuntu ou turukwenda kukuratira nuwe Yesu Kristo. N’obwakaba ali muto, akaba nagonza kugenda mu Yekaru n’okubaza n’abantu hali Ise ow’omu iguru nk’oku turozire omu Ruganikyo 87. Naitwe katuhondere eky’okurorraho kye. Ka tulengeho tutebeze abantu abaturasobora ha birungi ebirukukwata ha Ruhanga n’Omwana we Yesu Kristo. Kakuba turakora binu, nitwija kwomera ebiro n’ebiro omu rugonjo rwa Ruhanga oruhyaka omu nsi.