Musa Na Aroni Bagenda Owa Faraho

MUSA obu yagarukire Misiri, yagambira mugenzi we Aroni hali eby’amahano byona. Kandi Musa na Aroni obu bagambire Abaisareri ha by’amahano binu, abantu bakaikiriza ngu Yahwe akaba ali nabo.

Hanyuma Musa na Aroni bakagenda kurora Faraho. Bakamugambira bati: ‘Yahwe Ruhanga ow’Abaisareri agambire ati: Leka abantu bange bagende bandamye okumara ebiro bisatu omu Irungu.’ Baitu Faraho akagamba ati: ‘Tindukwikiririza omu Yahwe. Kandi tindukwija kuleka Abaisareri kugenda.’

Faraho akabihirwa habwokuba, abantu baali nibagonza kutungaho obwire kuruga ha mirimo nukwo baramye Yahwe. Nukwo yatandikire kubahambiririza kimu kukora muno. Abaisareri bakejuma Musa habw’omulingo bayongiirwe kubonabonesebwa, na Musa akahurra kubi. Baitu Yahwe akamugamba ngu aleke kweralikirra. ‘Ninyija kuhambiriza Faraho okuleka abantu bange bagende,’ nukwo Yahwe yagambire.

Musa na Aroni bakagenda kurora Faraho omurundi gundi. Omurundi gunu bakakora ekyamahano. Aroni akanaga omwigo gwe hansi, gwafooka enjoka enkooto. Baitu abagezigezi ba Faraho nabo bakanaga emigo yabo hansi nayo yaafoka njoka. Baitu dora kinu! Enjoka ya Aroni n’emira enjoka z’abagezigezi. Baitu Faraho atasobole kulekera Abaisareri.

Akasumi kakahika Yahwe kufubira Faraho. Nomanya eki yakozire? Kyali kuleta emihito 10 rundi ebibonerezo hali Misiri.

Hanyuma y’emihito emu, Faraho akeeta Musa yamugambira: ‘Yemereza emihito, nanyowe ndaikiriza Isareri kugenda.’ Baitu obu omuhito gwahwahoga, Faraho akaba nayehindura. Akaba atarukubalekera kugenda. Hanyuma y’omuhito ogwa ikumi, nubwo Faraho yalekiire Abaisareri.

Buli gumu ha mihito nogumanya? Sukura ha rupapura orurukukurataho, nukwo tugyegeho.