Emihito 10

ROLERRA ebisisani binu. Buli kimu nikyoleka omuhito Yahwe ogu yaletiire ensi ya Misiri. Omukisisani eky’okubanza nosobora kurora Aroni natera omwigo gwe hali amaizi ag’omu Kyambu kya Nailo. Obu yakikozire, amaizi goona gakafooka sagama. Encu zoona zikafa, n’ekyambu kyoona kyatandika kununka.

Ekyahondiireho, Yahwe akaleta ebikere kuruga omu kyambu kya Nailo. Bikagenda hoona, omunju, omukitabu, omubyoto, omukisiika na buli hantu. Ebikere obu byafiire, Abamisiri bakabisoroza entumo n’entumo n’ensi yoona ekanunka muno.

Aroni obu yagoroire omwigo gwe yatera ecucu y’ensi, ekafooka obuhuka oburukusisana enkukuni. Bunu buhuka obutaito muno oburukuguruka kyonka niburuma muno. Bunu buhuka oburukusisana enkukuni nibwo bwali omuhito gwa kasatu hali ensi eya Misiri.

Emihito eyagarukireho ekarumya Abamisiri bonka hatali Abaisareri. Omuhito ogwakana gukaba emizinga y’ensohera eyaijwire omu maju goona ag’Abamisiri. Omuhito ogwa kataano gwali hali ebisoro. Ente, entaama hamu n’embuzi ezirukukira obwingi ez’Abamisiri zikafa.

Hanyuma y’ebintu binu, Musa na Aroni bakatwara iju balimisa omumwanya. Likaleta ebizimba n’ebihoya hali abantu n’ebisoro. Gunu nugwo omuhito ogwa mukaaga.

Hanyuma yeki, Musa akaimukya emikono ye haiguru, nubwo Yahwe akaleeta enkuba hamu n’orubale. Runu rukaba rubale orubi muno orutakabahoga omu Misiri.

Omuhito ogwa munana gukaba enzige enyingi muno. Hakaba hatakabahoga enzige nyingi ziti. Zikalya buli kintu eki orubale rutarasisire.

Omuhito ogwa mwenda gukaba mwirima. Okumara ebiro bisatu ensi yoona eya Misiri ekaba omu mwirima kwihaho ekiikaro nambere Abaisareri bakaba nibaikara.

Hakumalirra, Ruhanga akagambira abantu be okusiiga esagama ye kyana ky’embuzi rundi entaama ha mikumirro y’enyigi zabu. Maraika wa Ruhanga akaraba omu Misiri. Obu yakuboine esagama, tiyakwisire muntu wena anyakuli omunju egyo. Baitu enju yoona etarabaireho sagama ha mukumirro gw’orwigi rwayo, maraika wa Mukama akaita buli muzigaijo gw’abantu hamu n’ebisoro. Gunu nigwo muhito ogwa 10.

Hanyuma y’omuhito gunu ogwa hampero, Faraho akagambira Abaisareri ngu bagende. Abantu ba Ruhanga bakaba betekanize kugenda, mukiro ekyo bakatandikiraho orugendo rwabu okuruga mu Misiri.