Enyana Ey’ezabbu

MAWEE! Abantu nibakora ki hati? Nibaramya enyana! Habwaki nibakora ekintu kinu?

Musa obu yamazire akasumi karaira ha rusozi, abantu bakagamba bati: ‘Titurukumanya ekibaireho hali Musa. Katwekorre ruhanga aratwebembera kuruga omu nsi egi.’

Mugenzi wa Musa, Aroni akagambira abantu ati: ‘Mucwemu empeeta zanyu eza zabbu eziri omu matu ganyu muzindeteere.’ Abantu obu bakikozire, Aroni akazagya yazikoramu enyana eya zabbu n’abantu bakagamba bati: ‘Onu nuwe ruhanga waitu eyatwihire omu Misiri!’ Hanyuma y’ebi, Abaisareri bakaba n’obugenyi bw’amaani kandi baramya enyana eya zabbu.

Yahwe obu yaboine eki bakozire, akasalirwa muno. Nukwo kugambira Musa ati: ‘Rahuka osirimuke abantu basisire muno. Beberwe ebiragiro byange nibainamira enyana eya zabbu.’

Musa akarahuka okusirimuka kuruga ha rusozi. Obu yairiire haihi, kinu nikyo yarozire. Abantu baali nibazina kwehinguliriza enyana eya zabbu! Kinu kikabihiiza muno Musa n’okunaga yanaga hansi ebibbali bibiri eby’amabale nambere ebiragiro byaali bihandikirwe n’okubyata. Hanyuma akakwata enyana y’ezabbu yagyagya yagisasangurra kimu.

Abantu bakaba bakozire ekintu kibi muno. Hanyuma Musa akagambira abasaija abamu kukwata rurara zabu. Musa yagamba ati: ‘Abantu boona ababi abaramize enyana ya zabbu bakaba baine kwitwa.’ Nukwo abasaija bakaita abantu 3,000! Kinu tikirukwoleka ngu twine kuramya Yahwe wenka omukiikaro ky’okuramya ba ruhanga ab’ebisuba?