Yosuha Yaforwa Mwebembezi

MUSA nagonza muno kugenda omu Kanani n’Abaisareri. Nukwo kusaba Yahwe ati: ‘Ndeka nyambuke-ho ekisaru kya Yorudani ndole ensi enungi.’ Baitu Yahwe akamugambira ati, ‘Ekyo nikimara! Otagaruka kukibazaho!’ Nomanya habwaki Yahwe yagambire ati?

Nahabwekyabaireho Musa obu yatiire omwandara. Ijuka, Musa na Aroni batahe Yahwe ekitiinisa. Batagambire abantu amananu ngu Yahwe nuwe yabahaire amaizi okuruga omu mwandara. Habw’ensonga enu Yahwe akagamba ngu talibaikiriza kutaaha omu Kanani.

Hakaba harabireho emyezi mike hanyuma y’okufa kwa Aroni. Yahwe akagambira Musa ati: ‘Twara Yosuha omwemereze mumaiso g’Eryeza nyakatagara n’abantu, kandi obagambire boona ngu Yosuha hati nuwe omwebembezi omuhyaka.’ Musa akakora nkoku Yahwe yamuragire nkoku orukurora omu kisisani.

Hanyuma Yahwe akagambira Yosuha ati: ‘Fooka w’amaani ogume omutima kandi olyebembera Abaisareri kubatahya omu nsi ya Kanani ei nabaraganize, nanye ndiba naiwe.’

Hanyuma Yahwe agambira Musa kutemba haiguru y’Orusozi orwa Nebo omu nsi ya Moabu. Ali ha rusozi, Musa asobora kurora ensi enungi eya Kanani, nseri y’ekisaru Yorudani. Yahwe agamba ati: ‘Enu niyo ensi naraganize kuha abaana ba Iburahimu, Isaka na Yakobo. Nakwikiriza kugireba baitu tindikukwikiriza kugitaahamu.’

Haiguru Harusozi rwa Nebo, nuho Musa yaferiire. Akaba aine emyaka 120 ey’obukuru. Akaba akyaine amaani n’amaiso ge gaali gakyarora kurungi. Abantu bakatunga obujune bwingi habw’okufa kwa Musa. Baitu bakasemerererwa Yosuha okuba omwebembezi wabu omuhyaka.