Rahabu Yasereka Entasi

ABASAIJA banu bali omukabi k’amaani. Baine kwiruka, kitali ekyo nibaija kwitwa. Banu bakaba ntasi z’Abaisareri kandi omukazi ogu arukubakonyera nuwe Rahabu. Rahabu akaba naikara omunju eyekaba eri hakisiika ky’orubuga orwa Yeriko. Katurole abasaija banu nkoku bayesangire omukabi.

Abaisareri bakaba betekanize kwambuka Ekisaru ekya Yorudani kutaaha omu nsi eya Kanani. Baitu obu bakaba batakakikozire, Yosuha akatuma entasi ibiri. Akabagambira ati: ‘Mugende murole ensi hamu n’orubuga Yeriko.’

Obu entasi zataahire omu Yeriko, bakagenda omu nju ya Rahabu. Baitu omuntu akagambira omukama wa Yeriko ati: ‘Abaisareri babiri baizire ekiro kutata ensi yaitu.’ Obu yabihuliire, omukama akatuma abasaija hali Rahabu n’okumuragira: ‘Abasaija aboine omu nju yawe, obaturukye!’ Baitu entasi zinu Rahabu akaba aziserekere ha rusu rw’enju ye. Nukwo yagarukamu ati: ‘Haroho abasaija abaizire omu nju yange, kyonka timanyire nkaha nambere barugire. Bagenzerege obwire obu bubaire butakaizire hamu n’enyigi z’orubuga zitakakingirwe. Obu murarahuka musobora kubasanga!’ Abasaija nukwo kutandika kubahambya.

Abasaija obu bamazire kugenda, Rahabu akarahuka kugenda harusu rw’enju ye. Akagambira entasi ati: ‘Manyire ngu Yahwe naija kubaha ensi enu. Tukahurra nkoku yayomeze enyanja erukutukura obu mwali nimuruga omu Misiri n’oku mwaisire abakama, Sihoni na Ogi. Mbaire w’ekisa nambere muli hati bunu munihize ngu nainywe nimwija kunyoleka ekisa. Nimwija kukiza isenyowe, mau hamu n’abagenzi bange.’

Entasi zikanihiza ngu nizija kukikora, baitu Rahabu akaba aine kyaine kukora. Entasi zikamugambira ziti: ‘Twara omuguha ogw’ehuzi erukutukura ogubohe omu idirisa, kandi osoroze ab’enganda zawe boona munju yawe. Kandi obutuliija kutwara Yeriko, tukarora omuguha omu idirisa, tituliita wena aliba omu nju yawe.’ Entasi obu bagarukireyo hali Yosuha, bakamugambira byoona ebyabaireho.