Okwambuka Ekisaru Kya Yorudani

DORA! Abaisareri nibambuka Ekisaru kya Yorudani! Baitu amaizi gali nkaha? Habwokuba obwire obu nubwo enjura egwa muno n’ekisaru kiijura n’okubooga. Baitu hati amaizi goona gagenzire! N’Abaisareri nibambuka haitaka eryomere nkoku kyabaire ha Nyanja Erukutukura! Amaizi goona gakagya nkaha? Katurole.

Obwire obu bwahikire okucwanganiza Ekyambu kya Yorudani, kinu nikyo Yahwe yagambiire Yosuha okugambira abantu: ‘Banyakatagara bahimbe esanduuko y’endagano batwebembere. Obu barateka ebigere byabu omu maizi g’ekisaru kya Yorudani, ahonaho amaizi nigaija kwemerra.’

Banyakatagara abakaba bahimbire esanduuko y’endagano nukwo kwebembera abantu. Obu bahikire ha Yorudani, banyakatagara bakemerra omu maizi. Gaali nigairuka muno kandi garaihire. Baitu obu bataire ebigere byabu omu maizi, amaizi gakalekeraho kugera. Kyali kyamahano! Agaali nigaruga eruguru, Yahwe akaba agatinziire. Gaali gatakyasobora kwija, nahabwekyo hali hataroho maizi goona omu kisaru!

Abanyakatagara abakaba bahimbire esanduko y’endagano bakagendera kimu hagati y’ekisaru ekikaba kyomiire kimu. Nosobora okubarora omu kisisani? Bakasigara bamerire aho, obu Abaisareri baali nibacwanganiza ekisaru kya Yorudani haitaka eryomere!

Abantu boona obu bamazire kwambuka, Yahwe gambira Yosuha okugambira abasaija ab’amaani 12 ati: ‘Mugende omu kisaru nambere banyakatagara bemeriire, mukome amabale 12, muragata nambere muraraara kiro kinu. Abaana banyu hanyuma obu balibakaguza kiki eki amabale ganu gurukumanyisa, mulibagambira muti: Amaizi gakemerra esanduuko y’endagano ya Yahwe obu ekaba n’ecwanganiza Yorudani. Amabale ganu galibaijukya ekyamahano kinu!’ Na Yosuha akata amabale agandi 12 hagati ye kisaru nambere banyakatagara bali bemerire.

Hamperu, Yosuha akagambira abanyakagara abakaba bahimbire ensanduuko y’endagano ati: ‘Muruge omu Yorudani.’ Aho obu bakikozire, amaizi gakatandika kugera nka bulijo.