Yezeberi, Omugo Omubi Muno

HANYUMA y’okufa kwa Yeroboamu, buli mukama ayalemaga obukama obw’enganda 10 obwa Isareri akaba ali mubi muno. Omukama Ahabu akaba ali mubi muno n’okukira abandi boona. Nomanya habwaki? Kukira muno, habw’ensonga y’obubi bw’omugowe Yezeberi.

Yezeberi akaba atali mukazi mu Isareri. Akaba muhara w’omukama wa Zidoni. Akaba muramya wa ruhanga Baali, kandi akasonereza Ahabu hamu n’Abaisareri boona kuramya Baali. Yezeberi akaba atarukugonza Yahwe kandi akaba naita abarangi baingi aba Yahwe. Abandi bakaba baine kwesereka omubwingira nukwo baleme kwitwa. Kakuba Yezeberi yagonzaga ekintu kyona, yagumyaga ngu nakitunga nobu kyamanyisaga kwita omuntu.

Kiro kimu Ahabu akatuntura muno. Nahabwekyo, Yezeberi akamukaguza ati: ‘Habwaki nozooka otuntwire muno kiro kinu?’

Ahabu yamugarukamu ati: ‘Nahabw’ebi Nabosi angambiire. Mbaire ningonza kugura orugonjo rwe orw’emizabibu. Baitu uwe yangambira ngu tasobora kurunguza.’

Yezeberi yamugamba ati: ‘Otafayo. ninyija kurukutungira.’

Yezeberi nukwo kuhandiikira abakuru b’omurubuga nambere Nabosi akaba naikara ati: ‘Mutunge abasaija ab’obugobya, bagambe ngu Nabosi akyenere Ruhanga hamu n’omukama. Aho mumutwale aheru y’orubuga, mumutere amabale, afe.’

Yezeberi obu yakimanyire ngu Nabosi afiire, ahonaho nukwo kugambira Ahabu ati: ‘Imuka otwale orugonjo rw’emizabibu.’ Torukwikiriza ngu Yezeberi asemerire kufubirwa ha bw’ebintu ebibi ebyakozire?

Obwire bukahika, Yahwe yatuma Yehu kumufubira. Yezeberi obu yahuliire Yehu naija, Yezeberi yalengaho kwesiiga amaiso ge n’okwecuma muno. Yehu obu yaizire, akarora Yezeberi omu idirisa, yaragira abasaija ab’omukikaali ati: ‘Mumunage hansi!’ Abasaija bamuhurra, nkoku orukurora omu kisisani. Bamunaga hansi, yafa. Enu niyo yabaire mpero y’omugo onu omubi muno.