Morodekai Na Esiteri

TUGENDE enyumaho Ezera atakagenzere Yerusalemu. Morodekai na Esiteri nubo bali Abaisareri eb’ekitiinisa mubukama bwa Peresi. Esiteri nuwe omugo, kandi omwana wa isento Moredekai nuwe arukugaruka hali omukama mubusobozi. Leka twetegereze nkoku binu byabaireho.

Abazaire ba Esiteri bakafa obwakaba akyali muto muno, kandi nikyo Morodekai yamukuliize. Ahasuero omukama w’Abaperesi aine ekikaali mu rubuga rwa Susani, kandi Morodekai ali omu h’abahereza be. Kale kiro kimu, omugo w’omukama Vasiti akanga kumworobera, nahabwekyo, omukama akakoma omukazi omuhyaka abe omugo. Nomanya omukazi ou yakomere? Mali ni Esiteri akaba ali muto kandi murungi munno.

Norora omusaija onu ow’emyehembo abantu ou barukwinamira? Onu nuwe Hamani omusaija mukuru muno omu Peresi. Nayenda Morodekai, oworukurora aikalire hanu, nawe kumwinamira. Baitu Morodekai tasobora kukikora. Takutekereza nti kihikire kwinamira omusaija onu omubi. Kinu kikaletera Hamani kutunga ekiniga ky’amaani. Hati kinu nikyo yakozere.

Hamani akagambira omukama ebisuba h’Abaisareri. Akagamba ati: ‘Bantu babi abatarukworobera ebiragiro byawe. Basemerire kwitwa.’ Ahasuero tamanyire ngu omugo Esiteri ali omu h’Abaisareri. Akahuliriza Hamani kandi yatekaho ekiragiro ngu ekiro kimu, Abaisareri boona bakaba b’okwitwa.

Morodekai obu yahulire ekiragiro ekyo yatuntura. Yatuma hali Esiteri ati: ‘Oine kugambira omukama, omwesengereze atujune.’ Nikicwa ebiragiro mu Peresi kugenda kurora omukama kwihaho uwe bwaba akusembiize. Kyonka Esiteri akagenda hali omukama atamusembize. Omukama yaimukya omwigogwe ogwa zabbu haliwe ekirukumanyisa ngu taina kwitwa. Esiteri ayeta omukama na Hamani okwija ha bugenyi. Hanu omukama akaguza Esiteri ekyarukwenda amukorre. Esiteri agamba nti naija kumugambira uwe na Hamani obubaraija ha kihuro ekiro ekirakurataho.

Ha kihuro kinu, Esiteri akagambira omukama ati: ‘Abantu bange nanye nitugenda kwitwa.’ Omukama akwatwa ekiniga. Akaguza ati: ‘Noha arukulengaho kukora ekintu nkekyo?’

Esiteri agarukamu ati: ‘Omuntu ogu omunyanzigwa nuwe onu Hamani omubi.’

Hati omukama abihirwa muno. Aragira ngu Hamani aitwe. Hanyuma omukama afoora Morodekai owakabiri mubusobozi haliwe. Morodekai atekaho ekiragiro ekirukubaikiriza kurwanirra obwomezi bwabo ha kiro ekibakaba nibagenda kwitirwaho. Habwokuba Morodekai muntu w’ekitiinisa, abantu baingi bakonyera Abaisareri, kandi bakizibwa kuruga mubanyanzigwa babu.